Das tönt super mit eune Confi-Gastgschänk! I fänd so öpis o toll, oder so chlini Sirupfläschli. I mache o süsch gärn so Sache.

Wägem Motto lömers gloub o uf üs la zuecho, entweder es ergit sech vo säuber öpis oder mir lös la si, aber künstlech öpis us de Finger suge weimer nid. Aber das mit de Näme für d Tische findi äbe o no cool!

Und ja, mir hei hüt tatsächlech üsi Ringe bsteut ! I bi soooo gspannt, wie de ds Ändprodukt usgseht... schints göngs nur öpe 2 Wuche u de heimer se vielech scho! Sobaud mer se hei, gits natürlech es Föteli für euch!

Und gester hani im Bastuzäntrum no es Schieferhärz gfunge. Wägem Houz-& muesi no witersueche, aber ha no Zit bis Ändi Juni.

Euch ganz es schöns Weekend!

Hallo zäme! Mäude mi au mau widr, dir sit ja meeega schrieb-fliessig gsi und es duet mr wäuz leid, aber ig chume nid würklich derzue, aues z läse Ha ebe grad nid so vil Zit fürs Forum, will ig rächt vil am schaffe bi, aber überflüges immermau widr.

Finges super, as es scho widr soviel neui Brütlis gä het!

@Lula: Ui, dini chärtli wärde würklich toll! Isch sicher e mega Büez aber es lohnt sich uf jede Fall! Ig finge die zwoi Puzzleteili am schönschte, will das isch doch oh symbolischer, so zwoi Teili wo perfekt zu nang passe und so. Aber mit zwoi mau stämpfle chasch natürlich de dert, wo nur eis ane passt, das oh grad so mache.

@Sue: du hesch doch mau wäg meine Jäggli gfrogt? Hesch scho öpis gfunge? Ig fänd eigentlich e Stola am schönschte zu däm Chleid

@novia mayo: Cooli Location, gseht super us! us Chärtli isch oh mega härzig!

@me: ig brüchti mau euche Rat: Mir hei jo üsi Chile und üses Resti greserviert u die si leider chli wit usnang, darum setts Apero am beschte "ufm Wäg" lige oder grad ir Nöchi vor Chile si. Jetzt heimr jo oh e mega schöni Location für das gfunge. Aber s Problem isch, es isch nur e Traum wenn me cha dusse si. Bi schlächtem Wätter hei si nume e wäuz gruusige Ruum (seeehr altmodisch, mensa-mässig, ungmüetlich und düschter). Öpis anders, wo vor Lag här gieng, dinne und dusse gnueg Platz het für söfu Lüt wie mir hei und üs wenigschtens halbwägs so guet würd gfalle, wie dises usse, heimr oh nach langem Sueche nid gfunge Aaaaber: ir Nöchi hätts es Waldhuus, wo bi Räge allne würd Schärme biete (müssti no definitiv abkläre) u besser wär als die Mensa, aber bi Sunne eifach nix isch im Verglich zur angere Location. Mini Idee wär jetzt gsi, bedes z miete und de ir Chile (oder am Tag vorhär scho ufdr HP zB) de Lüt zsäge, wo as es jetzt isch (es chunnt eh niemer nur as Apero) bzw scho uf dr Iladig azchünde, as es de zwoi verschidni guet u schlächtwätter Variante wird gä und mir no kommuniziere, wo as es isch. Ig fänd das für üs die beschti Lösig, will de müesste mr bi Sunne nid uf dä Traumhaft Garte verzichte und bi Räge wärsoh nid grad dr Horror, aber wo ig das mire Mueter verzellt ha, het sis grad mega dumm gfunge Und jetzt bini unsicher, ob mer das de würklich nid cha mache, aso wäg de Gäscht, ob d Locations iverstande wäre wüssti aber oh nonid... Aber mi dünkts wenn me jo zahlt, setts dene jo glich chönne si, will fürs Apero an sich luege mer jo eh sälber und wenn mes rächtzitig seit, setts doch ok si? Ah und de isch no öpis anders: ds Waldhuus hätt eifach e riiise Ungerstang und e chlinere (35 Sitzplätz) Inneruum. Das heisst, es hätte alli Schärme, aber nid unbedingt drinne, aber sooo chalt setts jo im Auguscht oh widr nid si, oder? Alternativ chönnt me es Zält organisiere, aber das wetti eigentlich nid. Ebe, was dänket dir eso? Wär mega froh für paar Meinige!

Zuletzt bearbeitet am 26.05.13 12:03

@taeboyana: Sirup findi ou super, nume si mir miner letschte Versüech so missglückt, dass i ne eifach umi koufe...

Heit dr es Thema wo nech dür aus begleitet, wo dr enand heit lehre kenne, es gmeinsams Hobby? Viellech chönntit dr ha Tisch so bennene, oder wichtigi Orte/Ereginiss vo öicher gmeinsamer Gschicht?

Bi ja so gspannt uf Diner Ringe! Wo sit dr gsi?

Dr Obi bim Shoppy chönnti ou no so was so...

@morelia: Wie isch dr Gottesdienst gsi? Heit dr öiche "Pfarrer" gfunde?
Ga ne Gottesdienst lose sette mir ou no mau, eifach das mir wüsse, wie si so im ne Gottesdienst isch
Gmacht hei mir fürs Hochzyt nit würk was, heis mau ganz kurz wäge Gästeliste u DJ gha, heis aber uf morn vertagt...

@Fringilla: Merci viu mau!

Wäge Dim Locationproblem; meinsch nit, Du bisch wöhler mit nume eim Ruum? Chasch de di "Mensa" nicht chli ufpeppe? Mit Lichterketti, Kerzli, Stoffbänder, Blueme, ...
Wäris de im Waldhuus nit chli sehr äng? Wüu fürs Apero settisch ja de ou no Platz ha!? U de trennsch ja dLüüt, u das isch ja ou iwie schad. U gugg mau sWätter jtzt, ändi Mai wie im Oktober...
U de isch ja sicher ou e Priisfrag...
Inwiefern meinsch ob dLocations iverstande si?
I würdi eifach dr schön Garte mit dr Mensa näh, u di schön schmücke. Zumau, wie lang sit dr i dere Location??

Hallo zäme! I hoffe dir heit es guets Weekend gha.

Mir si für d Ringe ire Bijouterie z Biel gsi und hei Diad'oro Ringe usgsuecht. We sie genau so usechöme wie mir se üs vorsteue und hei bsteut, wärde sie würklech wunderschön... I weiss es isch normalerwis nid ds 1. wome macht ir Hochzitsplanig, aber drfür heimer iz dä Poschte scho abghagget u de nächst Jahr no chli Zit für angers. D Beratig heimer übrigens super gfunge, wüu mir hätte gärn sone Fingerprint-Lasergravur inne ide Ringe gha, aber sie hei üs drvo abgrate, wüu sie es Bispiu heige gseh und d Umsetzig gar nid schön heige gfunge (es sig so grob und stark vrgrösseret). Hani u nätt gfunge, vor auem wüu die Gravur nomau 100.- pro Ring würd choste! Itz lömer üs mit dr Gravur no Zit, das pressiert ja nid.

I ha o nid uuu viu Erfahrig mit Sirup mache, ha mau uf Wiehnachte so Glüehwy-/Wiehnachtssirup gmacht u dä heisi globt, aber süsch no nie. Mir hätte drum u viu Zitronemelisse im Garte u das wär ja im Spätsummer no passend. Mau luege. Süsch fingi o so dekorierti Güezi / Cupcakes (i bine absolute Cupcakes-Fan ) u schön, aber die müesst me fasch bsteue, wüu für das hätti de nid no d Närve churz vorem Fescht, o wenis sehr gärn mache.

Fringilla, hm e schwierigi Sach mit dere Location. I fänds o chli stressig. 2 Optione zha (wo nid am gliche Ort si) u de churzfristig müesse z'entscheide. Es cha drum de o si, dass ds Wätter so unbeständig isch und me nid sicher weiss, obs itz guet wird odr nid. De bisch im Stress zum müesse entscheide (u sicher o süsch scho chli närvös) u hesch de vielech Angscht, die fauschi Wau z'träffe. U mit dr Kommunikation isch vielech o chli schwierig, de hets irgendöper nid mitbecho odr verstande u du hesch e Umetelefoniererei oder verwütschisch d Lüt nid... isch itz vielech chli worst case scenario, aber mit däm muesch rächne u das wär aus zuesätzleche Stress. I würd o viu versueche mit Deko zmache, oder hets vielech irgendwo ufem Wäg no e schöni Schüür oder öpis wome chönnt miete?

Novia, isch es Zäut nid rächt ufwändig / tür für ds Apéro? I fänd o dusse am Schönste, aber äbe me weiss ja nie...

Hach i wett es wär scho wieder Weekend, am Samsti gö mir ändlech ga Chile und Resti aluege, wo i Frag chämte. Ämu d Chile wär vor Lag u vor Ussicht mi absolut Troum.