Üsi Besichtigungstour hüt isch leider nur haub erfougrich gsi... Mir hei ds Hotel Beatus gar nid chönne ga aluege, wüu sie d Strass ab Gunte hei gsperrt gha... hei auso nur bis Sigriswil chönne ga d Chile aluege. Aber die isch würklech u schön... Und d Lag isch super, grad näbedra hets no e Pfrundschüür wome cha miete für ds Apéro. Das Ganze het natürlech si Priis, aber weme nid iheimisch isch, zaut me ja fasch überau oder? Die vo euch, wo o chirchlech hürate (u nid ir Chile vo ihrem Wohnort), was zahlet dir so? Ds Sigriswil chäms üs uf ca. 700.-
Mir zahled für dChile sogar Fr. 900.- (mit Konzertflügel) und wills dete grad ide Chile no en Ruum het für de Apéro (mit Chuchi) zahled mir sogar 1100 Fr.
Also ich han fliisig mitgläse, aber wie ich mich känn, wahrschinlich nöd allnä grächt jetzt bim schriibä. Ich fang ma ah.
Mami-Thread-2014:
Ich bin voll debii mir händ chürzlich en pregnancy-scare gha, am GG sis Mami meint es heggi chöne e "missed miscarriage" sii. Mir gahts uf all fäll guet, und min GG wet jetzt unbedingt chind nach de Hochziit. Er hät sich glaub scho drah gwöhnt gha, das mir villicht Elterä werdet. Er wet z'erst eifach ine 4.5 wohnig zügglä
Flitterwuche:
Mir wend (au) en Road Trip mache ide USA ade Westküste. Mir händ au scho en Plan, ez wemmer de no mit Kollegä aluege wo au scho detä gsi sind.
Mir gönd nöd grad nachem Hochziit, da mir e Wuche druf uf England gönd, damit mir detä es BBQ Fest chönd mache, mit allne wo nöd händ chöne zum Hochziit cho, nach dem Fest werdet mir am Mäntig druf gha. Mir wend so ca. 21 Täg reise, machet sicher 1 Monet Ferie, aber gönd zwüschet CH und UK go schaffä für e Wuche. Also, ich zu mindest. Mir münd viellicht no uf NY wämmer scho ide USA sind, da min GG nomeh verwandti het detä, und mir in Californiä scho e Cousine gönd go bsueche.
Mir chönd leider nö i die Chilä wommer händ wellä gah mir gönd ez in Uerikon am See und Stäfa go luege, det müsstemer au zahle, aber mir wüsset nanig wieviel.
Zivil:
Am Zivilä chömed nu die Ängste go ässe. Dh. oisi Elterä, Grosselterä, Gschwüsterti, mis Gotti&Götti und d'Trauzüüge. Mir mached den wahrschinli es BBQ. Für ois het s'chirchlichä meh bedüütig, aber für oisi Elterä ischs umgekehrt drum machet mir nacher au öppis.
Trouring:
D'trouring sind u schön. Mir gönd is Acredo in Wädenswil go luege, det sind's relativ günstig und meh cha alles abänderä. Isch eifach mega. Für s'Material hämmer ois scho entschiddä, es wird Platin sii, min GG weds nu i einerä Farb. Min Lieblings Ring wäri ebä en zweifarbige gsi mit Diamäntli, und es gseht so chli wie planetä us, ich gfinds genial. Min GG hät zuegstummä, de Ring in detä gnauer azluege ha no es Bild aghänkt.
Festessä:
Ich denkä das mir au mit ca. 120/130.- pro Person chönd rächne. Mir werdet aber no es chinder menü ha, da mir viellicht 3 Babies, und 5 Chind debii sie werdet. Mir händ scho öppert wo ufd Chind wür ufpasse am Abig, was u kuul isch. Mir münd halt überall 2 sprachlichi Lüüt ha, ez suechet mir no en 2i Person.
Weekend:
Hüt dümmer chli Sache besprechä, vorallem weg de Honeymoon. Froi mi mega.
Gschänkli:
Mir möchtend vorallem dasd Lüüt ad Flitterwuche zahlet, da mir scho vieles händ. Mir machet aber trotzdem e chlini Gschänkli Liste. Det druf chunt e GoPro Hero 3, mit derä wämmer oisi Flitterwuche dokumentierä, und mir werdet en Flitterwuche Blog mache, damit d'Lüüt chönd nöch debii sie, und wüsset was sie ois Gschenkt händ.
Hochziitskleid:
Wer nämet ihr mit zum Hochziitskleid sueche? Ich wird afangs September ma ins Chez Janine gha, und ha mich für mis Mami, mini best Fründin und mis Gotti, 3 Lüüt sind zwar viel, aber mis Gotti het sust die Möglichkeit nöd (bi s'einzige Meitli gsi i ihrer Verwandschaft) und ha s'Gfühl das sie das no schön fändi. Muen sie no fröge :)
Also liebi Ladies, ich wünsche oi en schöne Suntig, und hoffä das meh Lüüt vo Züri zu ois stossät ha s'Gfühl das ganz Bern/Thun hüratet
Dank lilmonkey hani grad dHomepage vo Acredo chli gnaue aglueget! Sie händ jo MEGA schöni Ring! Wow...mues grad min fiancé uf die Page ufmerksam mache.
Dä Westküste-Roadtrip chanich nur empfehle! Traumhaft und abentürlich! Mir mached denn au sone Flitterwuche-Homepage wo mer denn zum Bispiel ad Flugkilometer oder ad Übernachtige, Abigesse, Drinks, etc. chan anezahle. Wenn ich amigs uf sondere Homepage han chönne für dFlitterwuche was uslese hani gmerkt, das mer so richtig inen Kaufrausch inecho isch
Wie isch öiches Wucheändi gsi? Sit dr guet umi i dWuche gstartet? Heit Dir bi öich ou so nes Hammer Naturphänomen? Blaue Himmu, Sunne...
@Taeboyane: Och schad, aber schön isch wenigstens ei Teil erfolgrich gsi! Finde dr Priis no gnue, aber i weiss nit mau, wie viu me bi üs müessti zahle.
@dänu: Wow, u i ha scho bir Taeboyane zGfüehl gha es segi viu...
@lil: Was isch en "pregnancy-scare" und e "missed miscarriage"?? I wetti eifach Whynachte 2014 schwanger dörfe si...
Was geisch de Du i de Flittis ga schaffe? Aber tönt super bi öichne Flittis!
Wieso chöit dr de nit i dKirche wo dr heit wöue? Isch si scho usbuechet?
I nimme öbe TZ mit. Mini Stiefmuetter het zwar eismau gad verzellt vo eire wo dSchwieMu het dörfe ga mitgah, wüu si das süsch ja nit chönnti, da si kenner Kind het. U mini Stiefmuetter het ebe ou kenner liebleche Kind. Aber ebe, wes nach mir gieng würdi mit GG gah...
Meinsch es hüroti ganz Bern/Thun? Obwou, GG het geschter gad gmeint, er heigi so im Gfühel dass si TZ de öbe ou no nächst Jahr u ne guete Kolleg im 15ni hürotet...
@me: zWeekend hei mir nit soviu gmacht, wie mir hei wöue. GG het no sim Götti aglütte, u zwöi Kollegine. Dr Götti zum informiere, dKollegine zum Frage nach de Adressesene, aber dReaktione si mega härzig gsi!! U im Verein wüsses ou e Teil meh... Drfür muess er hinech no Kärtli zueschnide, damit i morn cha witermache, hoffe ha dr Puzzlestämpel bis denn. Ah, u dr DJ hei mir ou ändlich... U närne drucki die Wuche mau no gsammleti Iladigstexte us, damit GG chli cha Ideene sammle, di setti mir nämli ou ändli no drucke, im ne guete Monet müesse di Kärtli usse...
WOW da isch ja einiges gloffe am Wuchenendi...!!;O) @Lula, jaaaaaaaaaaaaaa super endlich mau wider d sunne das tuet sooo guet...wett am liebschte use gah und se richtig i mi isuge;O) Wele DJ heiter de??
@Taeboyana, isches de gspert gsi mege überschwemmig...? hmmm dänke bi sore spezielle schöne Kirche und weme nid vom Ort isch muessme scho mit dem Priis rechne....isch eigentlich scho no extrem...? wäri das de mit Blueme oder ohni?
@lilmonkeyme, wow dir heit ou gas geh?! dasch doch super und fägt....d Ringe gfalle mer auso ou:blush
@morelia, wow ou schöni Ringe!¨
@samu, potz das si langi arbeitstäg....was schaffisch du de...?
Sue: I gloub würklech überschwemmt isches noni gsi, aber gfährdet u vorauem gits i dere Region no schnäu Ärdrütsch. Jetz versueche mer, am Samsti no zga.
Chile: I ha scho vo beliebte Hochzitschilene ghört, wo über 1000.- choschte, das wär de definitiv zviu. Es summiert sech haut aus mit Chilemieti (400.-), Sigristedienst (180.-, sie mues putze, uftue, luege dass aus funktioniert etc.) und Sekretariatsdienst (60.-). Näbedra hets no gad e "Pfrundschüür" wo perfekt isch für ds Apéro, aber die muesme natürlech o miete (240.- für 6 Std.). De wär me totau o bi 880.- Es isch haut o e sehr grossi Chile, drum het sie äuä o ihre Priis. I fänds scho mega schön... ha itz mau bim Sekretariat aglütte und üses Wunschdatum provisorisch reserviert u de chöi mir üs das ja no chli überlege. Klar, i chönnt o id Chile woni konfirmiert worde bi, aber das isch sooooooooooooo... ke typischi Chile, würklech nüt Schöns. u ringsum hets o nüt Schöns fürnes Apéro oder so...
Lilmonkeyme: Vore "missed miscarriage" hani itz ou no nie öpis ghört. E Miscarriage isch doch e Fäugeburt? Uf jede Fau sicher nüt Schöns, tuet mer leid.
Zum Hochzitschleid-shoppe nimi sicher mini beide Trouzüginne mit und vielech no mis Mami. Obwou sie vielech nid so mi Gschmack het, aber sie hätt sicher o Fröid. Wott de im Herbscht ga u freue mi scho jetz
En pregnancy scare, aso ich ha mini mens nö becho, und ha den en Test gmacht nachdem ich trotzdem ein tag chli bluetige gha han. De isch positiv gsi. Ha eine den 1 1/2 Wuche druf noma gmacht und de isch negativ gsi.
Ja genau s'isch Fehlgeburt, ha s'wort nö gad gwüsst gha. Und "missed" wills e sogenanti "verpassti Fehlgeburt" isch gsi. Aso, das denkt am GG sis Mami.
Anmelden
Mir hei ds Hotel Beatus gar nid chönne ga aluege, wüu sie d Strass ab Gunte hei gsperrt gha... hei auso nur bis Sigriswil chönne ga d Chile aluege. Aber die isch würklech u schön... Und d Lag isch super, grad näbedra hets no e Pfrundschüür wome cha miete für ds Apéro. Das Ganze het natürlech si Priis, aber weme nid iheimisch isch, zaut me ja fasch überau oder? Die vo euch, wo o chirchlech hürate (u nid ir Chile vo ihrem Wohnort), was zahlet dir so? Ds Sigriswil chäms üs uf ca. 700.-
mir händ chürzlich en pregnancy-scare gha, am GG sis Mami meint es heggi chöne e "missed miscarriage" sii. Mir gahts uf all fäll guet, und min GG wet jetzt unbedingt chind nach de Hochziit. Er hät sich glaub scho drah gwöhnt gha, das mir villicht Elterä werdet. Er wet z'erst eifach ine 4.5 wohnig zügglä 
mir gönd ez in Uerikon am See und Stäfa go luege, det müsstemer au zahle, aber mir wüsset nanig wieviel. 
U im Verein wüsses ou e Teil meh... 
