@Fringilla: So schöni Schueh! Mir gfaut dä Stil u guet und i wett o lieber Schueh, woni när nomau cha alege as so typischi Brutschueh.

@Cathie: i gloub i würd o no i paar angeri Läde ga und chli vergliche. Wenns das Chleid söu si, de wirds dr o nümm usem Chopf ga u de weisch, dasses das isch. Aber vielech gsehsch no nöime angers schöni. U Zit hesch ja no.

I finde d Chleider vo Rembo Styling o troumhaft die hei so fiini und i wett äbe nid es zu pompöses u vor auem nid e zu usgsteute Rock, ha zGfüu das passt nid zu mir. Mir gfaue Neckholders mega guet. Aber mau luege, was de mir steit...

@chriesi: Zur Coiffeuse gahni. Isch im Dorf u mit am Outo hani nume ca 5 Minute. Bir Kosmetikere bini no nit sicher, hase mau gfragt ob si ou hei chämi, Coiffeuse het jtzt aber gmeint, si chönni ja eigentli ou zu ihre cho...


@Taeboyana: I ha gmeint, di fahre uf Afrag ou süsch. Ha mau so ne Bitrag gseh. I würdi eifach mau afrage, http://www.nezrouge.ch/Default.aspx
Isch doch super, jtzt hesch öber wo chasch mitfiebere, u de bestimmt nit närvsch


@malinchen: Oder schnäu alüte?!


@Fringilla: Das mit dr Florischtin hani mir ou überleit, aber ebe, di si ja äuä de am Nami am ds Resti dekoriere. Oder mache das nit aui? Daher hätte si eh kei Zyt.
Ou so cool! Wettisch de Du keis längs Kleid? So wäge de Schueh, di gseht me ja meischt eh nit?


@cathie: Wow , das tönt wunderschön!!!
Meinsch de nit, wenn Dir vom Festort as Apero u retour es Poschi organisieret, würde dLüüt drufigah? Oder wäri das de für dLüüt no ne äxtra Fahrt?
Och so genial!!


@dänu: De würdi das aber klar komuniziere, süsch chasch ja immer no ir Schuel es Apero mache.
Gits Fotis zum gwundere?? Aber es tönt scho jtzt troumhaft, am Obe mit dr Sunne am See...


@lela: U wenn si mau drufasprisch? Oder geit das nit?


@Coiffeuse/Kosmetik: dKosmetiker ladi ih, aber mir rede ou gäng öbe privat, daher. U si hett am Samschti regulär gar nit offe. U dCoiffeuse het bis am 13.00 offe u dTrouig isch am 13.30, dh es gieng ou da. Muess das gloubs mau mit mim GG agugge.

@Nez Rouge: wenn si ungerm Johr söue fahre heisst das anstatt "Aktion Nez Rouge" "Service Nez Rouge", aber wies mit de chöschte isch, weiss ig nid. Je nach däm, chöme die de nid extra sondern si scho umewäg und warte drus as si öper müesse heifahre, de sett me die ja fasch oh no verpflege, oder nid?

@Schueh: Merci muess mi jetzt ebe scho chli zrugghalte, wil die würdi oh im Alltag gärn alege. Ig dänke es git am Hochzig de no gnueg Zügs woni nie meh cha alege und usserdäm gfalle mir farbigi Brutschueh halt oh eifach süsch. Wett aber de glich es langs Chleid, eifach es schmals, de würd me d Schueh bim laufe ebe äue glich gseh. Wobi vilich geits mer de am Schluss so wie ar cathie und ig chume mit emne pompöse Chleid usm Lade. Uf all Fäll hani jetzt emu scho mau mis "Something blue"

Mi nimmt würklech mega wunder, was mir de aui für Chleider hei... I säge immer, i wott ke usgsteute Rock, möglechst ke Spitze und uf gar ke Fau sone usgsteute Ballerina-Tüllrock. U vielech hani de när genau sones Sissi-Chleid Obwou i mers würklech nid cha vorsteue a mir!

@sue: i ha geschter gad es Gschänkli bstellt für GG's Schwo wo üses Shooting am Zivile het gmacht. Es git so mega schöni Fototäsche, falls dir ä Tip bruchet chasches sägä...

@lela: hmm, i würd's gloub derä Kollegin ou irgendwie versuechä mitzteilä... Entweder direkt oder äbä durch die Blume.

@Fringilla: wow, das si cooli Schueh. Mit denä chasch sicher ou lang umeloufe ohni dass dir d Füess weh düe...

@cathie: wow, das Chleid gseht würklech cool us! Me cha sich haut vorhär würklech nid vorstellä, wie me de usgseht i somnä Teil. Aber i würd mi ou nid lah stressä, i gloub die sägä das zum Teil ou nur wöu sies wei verchoufe...

@Taeboyana: Ja, i möcht äbä ou es eher schlichts Chleid. Und uf kei Fall e Reifrock, stellä mir das mega unbequem u kompliziert vor... Mir hei grad ä Termin abgmacht mit dr Andrea, bi mega gspannt sie kennä z lehrä. MERCI viel mal füre Tip!!!

@me: Mir luegä jetz definitiv witer für Fotografinne, mir wei ja nid unbedingt e Profi und es git so viel. Möchte üs nid lah unter Druck setzä...

I mues ono gad chli Dampf ablah: Ä gueti Kollegin vo mir isch scho sit dass mir hei bekanntgäh, dass mir hürate mega komisch. Jetz isch das ganze irgendwie eskaliert... Sie isch hennä beleidigt 1. dass sie nid TZ isch u 2. dass mir nächschte Summer hürate wöu mir vor eim Jahr amnä füecht-fröhlechä Abe mal hei "abgmacht", dass üse ganz Kollegekreis denn Gruppeferiä macht. Jetz het sie mega Panik dass das ids Wasser gheit wägä üsem HZ etc. GG u ig si drum immer so chli Zugpferdli wes drum geit so öpis ds organisierä. We mir nüt mache, mache aui angerä eifach ou nüt. Aber mir wüssä ja no nid mau wenn das mir id Flittis göh, ev. ja ersch im Winter... Und süsch jaaa, isch mir ehrlechgseit mis HZ gad wichtiger als die Gruppeferiä. Jetz si mir ja letscht Weekend ds Genua gsi ohni si, mit mirä bestä Kollegin wo ou TZ isch und GG's bestem Kolleg (wo ou nid TZ isch und genau so chönnt beleidgt si) und jetz macht sie wägä däm es riesä Drama. Sie wärdi usgschlosse vor üs u so. Drbi hei die Wuchenendtrips scho bau Tradition, mir mache das so 2 mau im Jahr. Ha mega weni gschlafe wöu sie die ganzi Nacht het wöuä liire u i ha so ke Bock im Moment uf so blöds Froue-Gstürm. Sie isch ä gueti Kollegin vo mir u i ha sie gärn, aber mir hei ca. 3 Jahr lang mau scho ke Kontakt meh gha wägä somnä blödä Gstürm, isch ja logisch wird sie nid TZ... Jetz fingt sie ihri Fründschaft bedüti üs nüt und das sig eifach unfair das mir nid Rücksicht nähme uf die blödä Feriä etc!

So, fertig gjammeret und sorry für dä Roman!

@malinchen
ou das tönt super - hesch e link vo dene Fototäsche??

uiuiuiuiui das chunnt mir imfau sooo bekannt vor.....i ha ou e gueti Kollegin wo sehr e iversüchtige Mönsch isch....wenn mi GG und ig öpis mit mire TZ und sim TZ mache de dafme das ihre fasch nid säge wülme gad merkt dass es si u mag und ihre gad der Lade abelaht aber das chas doch nid si? I dänke da isch würkli ds Problem, dass si iversüchtig isch und wenn das öper nid selber igseht und lernt de blibt das so und isch für alli beteiligte sehr müehsam...isch si de Single oder ire Beziehig?
Vilicht het si ou chli verlustängscht wüu si dänkt ize isch de das Kollegeläbe chli verbi mit zäme mau no id Ferie oder so und meg dem so tuet..?

I wünsche dir emu trotz wenig Schlaf ganz e guete Tag und dass du nomau mit ihre chasch rede und
si ou isichtig wird dass das nid geit wie si sich benimmt....