@lela85 ich wür s'chleid rechzitig sueche. zum teil muesch 3 mönet warte bises chund und denn muesch ja no apasse und chürze und so... es git uuu viel wo ihres chleid occasion verchaufed. findsch sicher was :)

@lela auso i ha mis kleid letst novämber afa sueche. bi am schluss froh gsi bini eso früeh drann gsi. Lieferfriste sind normalerwies eso 4 monet plus zyt fürd Schniederin zum ändere. Im Früehlig und Summer hend die viel zdue und meh muess gnue zyt irächne. Auso so ca. 6 monet vorhär würdi scho luege fürnes Kleid. Wenn es bruchts wosch hets ja hie ou no en Teil wo Froue ihri Kleider verkoufe. Dert würdi mau ga luege. Es het mega viel! Und süsch, wenns dr ned eso wichtig isch chasch ou süsch es schöns Kleid koufe. I ha z.B. mau in Bern imne chlide Lade es shöns wiesses Kleid gseh gha woni fasch kouft hät. Das het ca. Fr. 500 kostet, isch hochwärtig gsi aber halt ned dänkt als Hochzytskleid. Hät sech aber uf jede Fall geeignet.
I ha dr Erfahrig gmacht, dass we me e chli dOuge offe het, me a viel Sache eifach häre louft. I würd eifach mau e chli afa ume luege und villech chli ufem Internet uege i weili richtig dases sell ga.

Hui, guete Morge dir Flissige Schriber! Wie gseht äch das hie i paar Monet us, wes jetz scho so abgeit ?

@Chleid: i wirde wahrschinlech im Septämber/Oktober afa luege, das si de 10-11 Monet vorem Hochzit, aber i ha dänkt evtl. isch de no chli Usverchouf und i ma eifach nümm warte D Chleider für üsi TZ wärde mir nid zahle (es sei denn, mir heige no unerwartet meh Budget, wasi nid gloube ). Die 2 Mau wo ig bi TZ gsi, hani mini Chleider o säuber kouft und i bi denn ir Usbiudig gsi und ha nid würklech Gäud gha... I erwarte aber vo üsne TZ o nid, dass sie weiss nid was fürnes türs Chleid müesse choufe. Sie söue sech o drin wou füehle und das de o wieder mau für süsch en Alass chönne alege. I ha nur ei Bedingig bide Froue: Es darf nid pink si. Ig hasse pink, cha mit dere Farb würklech nüt afa. Und da mir rot wärde as Houptfarb bi Deko etc. ha, geit pink scho gar nid drzue. Aber bi mine Fründinne isch das eh wit use bekannt, dass ig pink verabscheue

@malinchen: i würd itz o nid eues ganz OK neu organisiere wäg ihre. Dir heit nech so entschiede und das isch doch guet. We sie wäg däm beleidiget isch, wär sie je nachdäm o wäg süsch öpisem schnäu beleidiget und de muesch immer ufpasse bi ihre, dass sie zfriede isch. Wär mir z'asträngend... Aber genau so Jöbli verteile isch doch e gueti Idee, das wärde mir o mache. Ig wett zum Bispiu mini Brüetsche (wo nid TZ si bi üs) o chli ibezieh. Dr eint isch gstauterisch mega begabt und het o scho viu Deko u Flyer für Parties gmacht, dä chönnt üs sicher no häufe bi Iladige und bir Hochzitszitig (heter scho für mi anger Brüetsch gmacht am Hochzit).

@Chleid: Ja es isch sicher Usverchouf, so wit ig weis isch dä so vo Afang September a. I wirde sicher ou denn mal ga luegä... Fröiä mi scho riiiiiiesig druf.

@all: Merci viel mal für öii Biträg zu mim Frouegstürm... Duet gad mega guet ds gseh, dass dir alli ds Ganze ähnlech gseht wie ig. Mängisch chumi mir vor als wäri ufem falsche Stärn.

@Lula: ig ha bi zalando bstellt. Jo, glaube wed extra Brutschuhe chaufsch, chunnts halt würklich schnäu mau chli tüürer, aber ig ha gmeint ig heig emu über d Marke Rainbow ghört, die sige uuhh bequem und drum würd sichs vilich glich lohne. Aber ebe, es gibt ja oh Schueh, wo nid Brut druffesteit, wo bequem si, oh in wiss, und wenn eh mim Gedanke spilsch farbigi znäh, de isch dä mim Färbe zwar mega cool, abr woni mau ar HZ-Mäss mit dr Frau vom Brutschuehlade gred ha, het si gmeint, we si nass wärde, gobs schnäu mau Wasserfläcke ir Farb. Wägm Abfärbe weiss igs nid mau... Ig ha mir das aber oh überleit, dä Schueh hätt mr no gfalle. Es wär i däm Fall uf öpe 270 Stutz cho, was ig aber für ne bequeme Schuhe eigenetlich scho zahlt hätt, immerhin wird mis ganze Outfit relativ tüürsi und bequemi Schueh si mega wichtig. Wäge Läder: das isch eifach mi Idruck, aber ig ha oh uh bequemi angeri Schueh. Aber ebe, Läder heisst nid grad mega tüür, wie gseit, mini hei nume 70.- koschtet.

@malinchen: Ig würd emu oh nid die ganz Planig ändere, nume wil sich eini vernachlässigt füehlt! Zieht euches Ding dure, wies für euch stimmt. Süsch wirfsch dr das när vilich sogar mau vor, as di apasst hesch. Fingsches e schöni Idee, d Chleider/Hemli de TZ zzahle. Vorallem, duet me ne jo süsch meischtens im Nachhinein einewäg es Dankesgschänk mache.

Vo wäge ere ganze BM-Crew ds Chleid zzahle:
Ig wett gärn "mismatched Bridesmaids", mit "erlaubte und verbotene" Farbe, wil de cha jedi dä Schnitt und bis zumne gwüsse Grad die Farb/das Muschter näh, wo ihre steit und gfallt. Drum wetti ihne eigentlich nid ds ganze Cheid zahle, höchstens öpis dra gäh, oder was ig ebe fasch no besser fänd, ihne zB dr Coiffeur zzahle und vilich es Accesoire, wie allne die glichi Stola oder Schmuck oder öpis für id Hoor.

Zuletzt bearbeitet am 12.07.13 09:43

Lela 85: du hesch gloub mau gfragt wieföu es shoooting chostet. mier hei för ei stond ca 300 fötteli met versch. Outfits und CD 240.- zaut.

Chliini 22: ja das esch d gfahr wennmer es büssli organisiert. stemmt. ja mier wärde üs ou öber das (wie öber no so vieles) Gedanke mache. aber das met däm hochziit wo du gseit hesch esch werkli grad echli hert und haut ou mega schad förs Brutpaar...Wäg de Wunschliste: mier wohne scho baud 5 jahr zäme und hei scho fast alles. wärde aäug mehrheitlech gud för üse troum australie womer scho eisch gse si wönsche oder Migros guetschiine, evt. paar usflüg z.b. ufe Pilatus oder so druufnäh, esch aber no nüüd fest.

Lula: hm das metem Coiffeur weissi äbe noned ha e kollegin wo glehrti couiffese esch, etz esch si mami. be Emmer mega z frede gse met ehre, etz beni binere andere. woni verbii gah mösst. s gliiche met de Visagistin. ha e kollegin aber ou amene ort woni ou scho be ga gsechtsbehandlig ga mache. cool wärs natürli scho, wenn si zu mier chönnte cho, wär natürli ziit iigspart, wenni ned beidne ort döre mössti fahre...
die vode gschäfter wördi gloub ehrlech gseit ned iilade. die schaffe ja de eh...

FrangilliVigo: wie hesch du d uswahl för dini florestin troffe? fendes no schwerig, ha scho 2 Bluemeläde i der uswahl aber för wär werkli??? hesch der Offerte iighout? d schueh si mega schön, wett ou soöppis förs hochziit elegant und ha gärn, wenn si voredöre no chli haut gäi. ech meine met de schnalle

Cathie: jööö esch ou härzig wie du schwärmsch vom chleid....freut mi för dech. huii du machsch mer grad freud ufs aaprobiere vo mim eigetä... ha ou schnettä woni a mier wörd gseh oder haut vorstellige, aber e
dänke äbe ou, dases öppis anders esch wennmers de werkli aahet. velecht gfautmers de gar ned a mier?!wäg de trouzüüge eschmer imfall gliich gange. ha aber e kollegin gnoh, woni no lenger kenne auus mini andere kolleginne.si hei sech meeeega gfreut för mech und s esch nüüd vo niid z gspöre gse
Lela: wörd dini kollegin nomau druf aaspräche, ech dänke, si wörds schetze wenneres ehrlech wördsch säge. esch aber no so schwerig gäu. ech gloube mier wärde ou no s paar useforderige erläbe...WOW das esch es meeega schöns chleid. mier hei gloub de gliiich gschmack
Hei das esch ou schad, met dinere kollegin. si söug sech doch eifach freue för euch. aber esch bi töune lüüt gloub ned so eifach.ech verstah dini secht wiis ganz klar. ech hoffe, du chasch met ehre mau es guet gspräch ha, ond ehre velech ou säge dass ehres verhaute dech entdüscht. aber mängisch esches för lüüt schwerig sech ine andere mönsch iiz füele wenn si säuber i ehrem dänke feststecke....

Taeboyana: was hesch bastlet för ds Shooting?