Danue16: Danke für dini Wort. Ja da hesch au wieder recht. Das hani mir ebe au scho dänkt und d helfti vo eusere Fiir chund ebe vom Welschland das heisst die händ au no ca. 2 Stund Heiweg. Hm… Ich glaub au dass mir das eifach so mached. Alli Frage ufschriebe ines Mail packe und mal luege was retour chund. Will d Lokation isches eifach! Sie isch so schön… Kei anderi het eus so guet gfalle und das isch hald eifach s wichtigste für mich. Hihi cool! Nomal öpert wo chli uf Vintage gaht… Wie händer eu den so Deko vorgstellt? Also ich han gester Abig so e cooli Homepage gfunde… www lieschenundruth de (chan immer no kei Links da ine schicke). Leider gits so öpis i de Schwiiz nonig. :( Schad!!! Isch au e sehr es schöns Chleid wo du anetah hesch! Häsch das scho kauft oder wetsch eifach i die Richtig?
Janedoe: Isch scho mängisch chli frustrierend wemmer merkt dass mer d Freud amene Hochziit nöd zgspüre überchund vo Lüt wo eigentlich en wichtige Ateil drah hetted. Da frögi mi scho was so Mensche i dem „Business“ verlore händ. Grrr! Aber ich glaub es chund guet bi dir! Jetzt bisch au scho viel lockerer will du weisch das dete het was du suechsch und au wege de Grössi keis Problem isch.
@sasileu Dankeschön! D'Boxe macht eusi 'Charteretterin'. Eifach de i eusne Farbe, freue mi voll druf!
@Pfingstrose Sie hed voll lang zögeret wegem Chleid. Und denn hani gfunde, mier finded sicher nomal sones schöns Chleid wo nid ganz so tüür isch und de hed sie gfunde, es gieng ihre gar ned ume Priis, de sig ihre egal, es gaht ihre drum, dass sie die einzig isch, wo sich so hübsch macht und sie denn im Mittelpunkt staht. Hani voll herzig gfunde. Als Bruutmami darfmer das doch!!
@Lula Ha de extra vor de Beraterin zu mine Begleiterinne gseit, dases mier mega leid tued, dass sie jez extra wege 'Nüt' sowiit hend müesse umefahre. Die hends de hoffentli scho verstande!
@daenu Danke fürs zeige! Ah bisch du das gsi, wo zChleid ez ganz a Bode chunnt obwohls ufem Bild ned so lang isch? es isch es meega schöns Chleid, gfallt mier super guet! Ich gah eigentli nume usem Grund nomal, willi denke, dass sie mier e grossi Uswahl bieted wenns alles dette hend. Und da die Beraterin denn weg isch, würdi anere andere ebe scho namal d'Chance geh, mich devo z'überzüge, dasi am richtige Ort bi... Wow, die Gastgschenk.Idee isch de hammer! findi suuuper guet! Mier werded selber Macarons mache, aber mini 3 Probeläuf sind meh oder weniger id Hose :D Vielleicht söttemer au lieber was apflanze
Ihr sind ja wieder seeeeeeehr fliessig.. chume im moment leider nöd so dezue.. güggsle öppe die ine aber bi im gschäft gad chli im seich.. hend jahresabschluss und dä muen stah bis endi nöchst wuche.. dän na dä ganz bettel parat mache für drevision und dän ab mitti oktober hani au wieder luft
@janedoe isch nöd gad die feine art gsii und nöd so faire vom gschäft.. hoffe findsch dän bim nöchste termin diiiis chleid! hesch müesse öppis zahle zum go chleider probiere? das hetti dänä dä glaub gad zum trotz nöd zahlt.. bisch ja au für nüüt dethi gfahre... aber druck dir düüme fürs nöchste mal.
@pfingstrose naja das hett mich au dämpft.. mit däm problem hend mir au bi jedere location kämpft.. ich glaub ich wür dete würkli namal gnau nachefrage.. well isch dän am schluss au schaad.. aber wies scho gseit worde isch mer weiss nie wie gäst druf sind..für die isch es au en lange tag.. ich bi erst a eim hochziit gsii und dete sind all nach em dessert gflüchtet wells müed gsii sind was ich ehrlichgseit au chli fiis gfunde gha han gegenüber em bruutpaar.. ich ha bi eus sgfühl dass es wahrschindlich nöd bis am moorgä am 4i gaht.. us dem grund dass mir im januar hüratet und wenns dän chalt isch dä tag us dän deckts eim doch am abig amig zue wenn mer id wärmi chunt.. i hoffes zwar nöd well mir chönd relativ laang fiire.. hend en saal gmietet.
@danue finde dini ideee meeeega cool... gseht sicher super uus.. und suscht gits doch amig i dä ikea oder i dä landi ganz günstigi chliiini kaktussli
@all mal e frag id rundi.. vowo nehmed ihr immer all die idee für gastgschänkli, tischdeko und so wiiteR? eifach chli im internet umesurfe? und da ich leider erst a eim hochziit gsii bin (10jahr sither) hani au kein plaan was wie woo.. sind sozägä die erste und das stresst mi nachli meee... möched ihr all irgend es gastgschänkli? oder isch das dän eifach gad s'namenstäfeli am tisch? und tüend ihr immer alles online bstelle? vielfach gfindt mer mega lässigs züg aber halt irgendwo .de oder .com hend ihr da gueti erfahrige gmacht? zoll?
Chlinii22: Also wege de Deko hani viel Idee vo Pinterest. Und ich känns eigentlich nöd, dass mer Gastgschänkt macht (bin aber au erst a 2 Hochziite gsi). Finds schön aber ehrlichgseit hani das no nie erwartet. Selber werdemers au nöd mache. Bzw. jein... Mir werdet Zündhölzli bstelle mit eusem Name und em Datum vo de Hochziit druffe i eusne Farbe und die uf em Tisch i so Candygläser inetue. Den chan jede 2-3 mitneh am Endi vom Fest... Wege eusere Lokation häsch scho rächt. Mer weisses nie... Aber mer gaht hald vo de Optione us dass wenn d Lüst lust händ das mer länger chönti blibe was ja den nöd gaht. Mir luegeds uf jedefall nomal ah. Finds hald eifach scho chli komisch vo dene Restis dass mer dete immer so igschränkt isch. Söll ja schliesslich es Fäst und kein Alterheimusflug werde...
@Pfingstrose: So isches bi üs au gsi...mir sind sprochlos im Ruum gstande, sHerz het pöpperlet und mir hend beid gwüsst das isches! Drum liebi Pfingstrose, alles ander wird sich sicher kläre...halted nöd zrug mit Froge, die söled dich chli meh Müeh geh Tischdeko wetti eso (siehe unten) und bin drum scho sehr fliessig am Väsli und Fläschli sammle. Aaah so kuul die Homepage. So praktisch wemme etz öppis wett i dene alte Service serviere und denn so schöni alti Tässli cha uslehne. Mer sött eh meh so Partyartikel chönne uslehne. Grad au für es Candybuffet oder so! Das Bild isch praktisch mis Kleid (sehr 50ger Jahre ) bi mir isches aber bodelang will ich hald viel chliner bin und 3/4tel lang würd mich ja no chliner mache. und de Satingürtel isch bi mir wiss. Ich liebe mis Kleid und es isch genau was ich mir vorstellt han!
@Tischdeko: wer sichs wott vorstelle dGastgschenk woni vorher sBild inegstellt ha und dTischdeko! Die Deko isch glaub s'erscht gsi woni gwüsst ha und passt au SUPER zum Ruum. das Tischset unter de Väsli wird bi üs petrolfarbig die bini grad am häkle
@Janedoe: Ja genauuuu, das bin ich Danke vielmol Stimmt, und e anderi Berotig und e neui Kollektion macht denn sicher was us. Magsch no so lang warte? susch gohsch mal zu LILUCA ich mach do voll Werbig, aber i bi würkli super zfriede gsi. Danke!!! i bi etz grad mega happy, dasi wieder was bstelle ha chönne. Ah jo, und am Sa gömmer grad no ufs Reisebüro weg de Flittis...immer chli was vorzue abhöggle.
@Chliini: Danke! Ah jo stimmt. Super Idee! Ufem Bildli isch e Echeveria...die wirdi au im Brutstruuss ha. Weni die chli günstig würd finde würdi die au lieber ha als Kresse I bi imfall au nonig a sovielne Hochzite gsi..glaub 3. I find d'Ideä oft uf Pinterest und schaffe au imene sehr kreative Bruef und NATÜRLI do im Forum! Jedi treit öppis dezue bi! Bi Fotografe us de USA findis auno recht lässig zum chli go güxle
@dänu: Gseht närne sicher ou mit am ne Tontopf mega härzig us! Tuesch de närne eifach so nes Fähnli dri mit am Name?
@Jane: Hoffentli! Isch ja mega seich, hoffe Du hesch nächst mau meh Erfolg!
@chliini: Us am Forum, de Hochzytsheftli, üse Wünsch u am Ustusch mit mim GG. Oder haut eifach ou chli im Internet umegurke... Ha aus Kind zwöi Hochzyte miterlebt, wo bi i mi a beidi nume knapp mah errinnere,u sit denn 3 Aperos u 1 Fest. Wobi sFest nit so mis isch gsi, aso eifach vom ganze, daher geit ou das wäg. Aber mir hei letscht Jahr 4 verschiedeni Erdbeerkonfis gmacht, u di si sehr guet acho, u de hei mir dänkt, mir mache zwöi verschiedeni Konfis, tüe es Dekortüechli drum mit am ne Satinband befestige u nes gstanzt Puzzleteili druf mit am Name (genau so wärde ou dNamensastecker für dObegäst) Daher hei mir Gastgschenk u Namenstäfeli i eim. Üs isch haut eifach wichtig gsi, dass sis chöi bruche us nit eifach nume umesteit! Mir bstelle online, was süsch nit geit, aber bis jtzt nume us dr CH. U süsch Deko hani jtzt gad viu vor Nemo bstellt u dr Räst gugge mir de äuä Oktober/November
@chliini D'Beraterin seit so 'ich verrechne ihne das jetzt usnahmswiis nöd als Exklusivberatig' und das hed mi de recht uf Palme bracht, da sie üs ja gar nöd wirkli BERATE hed! Da hetti also sicher kein Rappe zahlt. Mier sind ja ned mal e Stund bi de Bruutchleider gsi.
@daenu Nei! Ich mag voll nid warte! ZWEI Mönet grrrrr... Ja mal luege, wirde mich jetzt mal nochli umeluege und vorher vielleicht spontan mal was abmache Dini Tischdeko gseht mega schön us. sowas stellemer eus au vor. Aber ich möcht unbedingt grossi Cherzäständer!
@Lula Dankeschön!!
@Deko Ich bin uf FB vo ganz vielne Sache 'fan' und verfolge dette chli d'Ideeä vo dene Hochziitspages. Aber au suscht im Internet, uf Pinterest und uf Etsy sammli chli Ideeä. Han so es paar Lieblingssiite, www.hochzeitswahn.de uf jedefall, www.friedatheres.com findi au ganz schön. Deko hani bis jetzt no nüt online bstellt, mier hend bis jetzt alles in Dütschland kauft. Ich han aber Backzuetate für d'Candybar bi Amazon.de bstellt und Bastelsache ebefalls. Und ich denke bi etsy wirdi de sicher au no mal bstelle.
@Gastgeschenke Mier möched uf jedefall welchi. Vorallem wills ufem Tisch nochli Farb inegit. Mier lönd vo eusere 'Charteretterin' Boxe passend zu de Iladige mache und wärded dette dMacarons driitue und dett de Name direkt anemache als Platzawiiser.
@daenu: Also ich chans mir vorstelle, finde sogar das wenn au so wiisi Spitze hesch, seb im Tontöpfli no schöner usgseht. Und das mit de Chräsi findi au e gueti Idee
@chlini: Also mini Idee chömet praktisch all vo Heftli, Internet, TV und und und aber bi paarna bringi gwüssi sache zämä oder eigeni Wünsch ih und so entstaht den öbis Was Gastgeschnek agaht, wend mir seb scho mache aber irgendwie wüssema nonig so ganu was, mir wend ebe unbedingt so bonboniere, also eifach d'mandle. Momentan gseht bi eus so us, dass mir für alli enge Familiegäst, mit dene womer nachem Standesamt no was wend go esse, deht chunt jede sones chlises Pizzarad über womer was druf schriebe cha, wahrschinli lömers grad so wiemers gseh hend mit L.O.V.E. Und us budgettechnische Gründ werdema für die bim Hochziitsfest eifach so festi Plastikförmli ha, wahrschinli grad us Herzfrom oder so chlini Glasbehälterli und die mit bedruckte M&M's fülle und den die "magische" 5Mandle obedruf und dezue wirds eifach echi herzig verziert und anterdem mit somene Drahtherzli und emen Thank's. I glaub i wird au bi dme bliebe obwohls uuuuu cooli herzi Kartonschächteli git. Wegem bstelle unsem Internet, i wird sicher vieles so mache, da seb eifach günstiger isch. Wegem Versand isches jo oft so das sobald was id Schwiiz muesch liefere lah extrem viel Gebühre zahlsch und ab 50Euro chunt na Zoll, DESHALB hani scho sitere Willi sone Dütschi Lieferadresse, isch au legal. Und für mich isches kei Sach schnell uf Konstanz z'gah. Wens di interessiert lueg eifach mal im Internet unter Deutsche Lieferadresse
Ich lade emal es paar Bildli ufe, das Pizzarad und eifach die plastikbehälter plus was u kitschiges und lustiges als Verpackigvariante (Findi leider grad die herzli woni gseh han nüm)
Mir hend emal denkt mir chöntet au Schlüsselahänger graviere lah und die schenke, aber irgendwie weissi nid recht. Wür ich wele en Schlüsselahänger miteme fremde Name und Datum ha?!?Was meinet ihr?
@Taeboyana: Oh die Narbe wärde sicher no besser. Die gseh haut am Afang immer schrecklech us, aber wedä guet duesch säubele chasch dr Heiligsprozess ja ou positiv beiflusse... U bis mir wieder im Bikini chöi umeloufe chönnts ja fasch nid länger gah, vo däm här perfekts timing.
@4Hochzeiten: I lueges ou no gärn, aber d Bewärtig isch mängisch scho chli drnäbä... Finges eifach no cool so chli zum Tips sammle und natürlech seichti Abäunterhaltig.
@jane: oh schad hesch keis chleid gfunge... aber jetz weisch immerhin was dir würd gfalle und de chasch bim nächschte mau gad gezielt die uswähle! und z nächschte mau triffsch es sicher zure bessere Bedienig... Aber ds Chleid vo dim Mami isch dr Hammer!!! mega schön... und ja, i cha mir ar Dänu nur aschliesse - Liluca isch würkli super!
@pfingstrose: oh nei, das isch ja mega doof wege denä Bedingige! GG u ig hei das bim einte Resti ou gha wo üs mega hät gfalle und hei üs när drgägä entschiede wöu für üs d Party öpis vom wichtigste isch... Dir müesst öich eifach guet überlegä, wo dir d Prioritäte weit setzä. U villecht no mau nachefrage wie "streng" sie das umsetzä... i mache i so Fäu immer pro und contra liste woni när für jedes Argument no Pünkt vergibe wie wichtig dases mir isch. När zämä zellä und de het me ä rächt gueti entscheidigsgrundlag...
@chliini: Ja i finde die meischtä Ideeä uf Hochzytsblogs... Ide Shops hani jetz no nid so gstöberet, wöui zersch möcht wüsse was mir bruche. Süsch bstelli mal wild druf los und am schluss hani viel z viel Sache dehei. I ha allgemein no nid uf usländische Site öpis bstellt, da hani leider ou no kei Erfahrig gmacht. Und a Hochzyte bini ou nur fang a 2 gsi und die si beidi über 10 Jahr här. Aber i gseh das jetz ou chli als Vorteil, de si üsi Fründä sicher nid all zu kritisch...
Schööne guete Abig mitenand! Ich hoff ihr hend e besseri Wuche als ich, ich chume eifach zu nüd und bin nur am schaffe, wet so gern wieder chli meh ziit ha zum HZ Sache aluege
@Pringstrose: Ja das findi ebe au, drum müemer mal na luege wassmer ez mached wegem Fotograf .. Ou nei isch ja blöd wäg euem Ruum! Mir dörfed so lang Musig mache wiemer wänd, müend eifach d Fenster uf ei Siite zue tue. Meinsch langeds nöd wenn eui Band/DJ bis am 1 spieled und nachher nur d Zimmerluutstärki? Chunt halt au immer chli drufa wassmer unter Zimmerluutstärki verstaht, viellicht isches doch na gnueg luut zum Tanze? Hoff uf jede Fall ihr findet na e gueti Lösig wo passt für eu !!
@janedoe, tuetmer u leid hesches so blöd troffe mit de verkäuferin, e gueti verkäuferin isch so viel wert!! Gasch na neumeds anderscht go luege? Wow s Kleid vo dim Mami gseht aber mega us !! Hets au chli günstigeri Kleider gha in Übergrössi bide Abigmode? Mis Mami suecht drum auna eis aber so viel chan sie nöd usgä..
@Lula, merci vielmal, die hend würklich au uu schöni Tortene :)
@daenu16: Persönlich kennemer euse Pfarrer nanig, aber er isch regelmässig bi mim Mami und da vertraui voll uf ihri Empfehlig, er het au u froid gha womer ihn gfröget hend und bin würklich gspanne wies erschti Gspräch denn wird. Aber han es guets Gfühl :). E Ehevorbereitig machemer glaub nöd, min Schatz isch nöd so de Fan vo so Sache.. Aber mal luege was denn euse Pfarrer meint ;) Hey das Töpfli gseht mega us, uu herzig !!
@chliini22: eus gahts ebe gnau glich, mir sind beidi sit Chind nüme amene Hochziit gsi, a gnueg Apéros aber nie amene Fest willmer au die erschte sind, somit hemer au kein Verglich oder e Ahnig vom Ablauf oder so. Mir mached aber sicher au Gastgschenkli, würd aber gern öppis chlises persönlichs mache, so öppis wie das vode Daenu1 findi ebe mega .
Anmelden
Ah bisch du das gsi, wo zChleid ez ganz a Bode chunnt obwohls ufem Bild ned so lang isch? 
es isch es meega schöns Chleid, gfallt mier super guet! 
) bi mir isches aber bodelang will ich hald viel chliner bin und 3/4tel lang würd mich ja no chliner mache. und de Satingürtel isch bi mir wiss. Ich liebe mis Kleid und es isch genau was ich mir vorstellt han!
grrrrr... Ja mal luege, wirde mich jetzt mal nochli umeluege und vorher vielleicht spontan mal was abmache 
Was meinet ihr?
Aber ds Chleid vo dim Mami isch dr Hammer!!! mega schön... 
Und a Hochzyte bini ou nur fang a 2 gsi und die si beidi über 10 Jahr här. Aber i gseh das jetz ou chli als Vorteil, de si üsi Fründä sicher nid all zu kritisch...