@malinchen
Hehe okay es erklärt de doch, wieso iher das hend müesse läsä... dette passts ja ine

@Lula
Moll han scho es Touchscreen, chan dette scho au ned komplett mitem Nagel umedrucke, aber so Nagel/Fingerkuppe-Kombi und jez klicki eifach immer denebe irgendwie.
Bin scho mega gspannt was bi eu bi de Blueme so usechunnt! Und natürli au, ob du DIS Chleid gfinde wirsch!
Wieviel Gäscht wärded ihr denn sii? Han denkt das wird extrem schwierig wird mit de Tischordnig will am GG sini Family sich chli schwer tued, Oma mag ihre SchwiSohn ned, will aber denk glich gern am 'Familietisch' sitze, SchwiSohn will uf kei Fall mit de Schwägerin sitze... Tochter 1 will ned mit Tochter 3 usw.
Am Schluss hemmer aber genau 7 Tisch gha mit 6er, 7ner oder 8er Kompositione und s'isch mit de 'Grüppli' genau ufgange.

@all
Apropos Tischordnig. Mier wärded rundi Tisch ha i de Location. Jetzt frag ich mich wie iher das möched. Sitzed iher au a de runde Tisch eifach irgendwo zmitzt inne oder möched ihr so en Tafele wo Bruutpaar, Eltere, TZ usw sitzed?

Hoi zäme

angy: Da chani dir leider au nöd so wiiter hälfe, mir hürated au kirchlich. Wobi, falls du eifach gern amene spezielle Ort würdsch, aber doch gern en Pfarrer oder Prieschter hettisch, würdi eifach mal afröge. Eusi Pfärrer werded au inere andere Chile de Gottesdienst ha, als sie normalerwiis sind.

munggi: Ja, das befürchti au, dass sie eim no dieses und jenes werded ufschwätze. Ich lueg mal, dassi bis dänn au scho Schmuck han und BH. D Schueh woni han... Naja, bin au no gspannt, wie sie unter em Chleid usgsehnd. Sind ganz flachi, eher schlichti, defür altrosa Ballerinas. Ich wett ebe würklich lieber flachi Schueh.

Lula: Mer chönt natürlich au s Altrosa vo de Schueh (falls ich bi dene Schueh blib, suscht wärs e knalligi Farb und chli too much für de Gurt) im Gurt wieder ufneh. Farbe für s Fäscht, wo mer d Deko dena usrichtet, hämmer bisher nonig. Ich weiss nur, dass ichs gern chli farbig hett bi de Blueme. Und lieber so chli öpis im Stil vo Wieseblueme und Ranunkle i Vase als klassisch roti oder wiissi Rose in Gsteckli. Das wird wohl au für de Brutstruss gälte.
Di erscht Idee für de Bruutstruss isch eine gsii us nume pinkige Gerberas. Aber über die Phase bini mittlerwiile hinweg. Würd glaub au zum Chleid nöd so passe, wil das doch so chli en romantische Touch hät.

Pfingstrose: Mis Chleid hät übrigens 1700.- koschtet. Isch dänn ehrlich gseit au de Grund gsi, werum ich mich für das entschiede han vo mine zwei Favorite. Han dänn am Schluss us dem Grund au nur no das nomal aprobiert. Und es gfallt mer ja mega guet.

janedoe: Nomal es Ladybird-Gspänli.
S Shooting am Hochsigstag nur mit em Brutpaar werded mir ev au am Morge oder früene Nami vor em Gottesdienst mache. Mir möchtet zwar nach em Gottesdienst scho au es Momäntli Ziit ha für eus - isch aber au kuul, wänn das nöd mit Shooting gfüllt wär. Defür isch halt d Romantik weg vom "Mir xehnd eus erst, wänn ich inelauf"... Münd no überlegge.
Mir werded Rächteckigi 8er Tisch ha. Und händ eus überleit, dass vermuetli d Trauzüge mit Partner (de Prediger isch übrigens de Maa vo de Trauzügin, es bliibt i de Familie *gg*) und dänn no je öper vo sinere Siite und öper vo minere Siite wird am Bruttisch sii. Halt gezwungenermassen öper, wo ohni Partner chunt. Das macht defür d Uswahl chli eifacher. Ich chönt det entweder e gueti Fründin neh oder au min Brüeder, wo kei Fründin hät (und das wär dänn au kän Affront em andere Brüeder gägenüber, wil de e Fründin hät).

me: Eusi zwei Pfärrer (freikirchliche Prediger und kath. Priester) händ eus hüt beidi zuegseit. Ich bin ja mal gspannt. Aber han es super Gfühl. Mir wänd ebe nöd sone typischi herzigi Hochsigspredigt mit ganz vilne Symbol für d Liebi. Ich wett niemertem uf de Schlips trätte, aber das isch eifach nöd so euse Stil. Und das wird eus vor allem bim Freichile-Prediger au nöd passiere. Da isch er nöd de Typ dezue und de Priester glaubs au eher nöd.
De Gottesdienst isch mer halt scho wichtig, für mich eigetli s wichtigst Elemänt vom Tag. Mängisch gaht das chli unter, wil's no so vill anderi git, wo ziitlich sicher au meh werded in Aspruch neh. Isch ja au guet so, wett ja au, das nacher gfäschtet wird. :)) Aber so richtig am Herz isch scho de Momänt i de Chile mit em Ja-Wort und de ganz Godi rundume.
Drum bini jetzt froh, hämmer eus nach einigem Hii und Her (min Unkel isch ebe au no Priester, aber mir fröged ihn dänn eher für en chline Part a) entschiede, wer mir wänd afröge und wer nöd primär. Und es klappet jetzt. Juhuu!
Sprich: Mir händ au bald es Datum. *hüpf*

Schöne Nami no!

Guete Obig

@jane: Ah ok. Ig ou, aber i fröie mi mega!
Mir si am Obe, mit Fotograf u DJ, 36 Lüüt. Mir hei 2 6er u 3 8er Tische, ha dr e Grafik aghänkt, isch auerdings eifach meh so chli für GG u mi, drum ou mit de Farbene, ha ebe scho afgange mit dr Tischordnig. Aber bi üs isch dr Knackpunkt sini Schwo gsi, wo ig eigentli niemerem wetti zuemuete, Lüüt wo fasch niemer kenne, u de no Päärli woni nit mit anderne Päärli zämä wetti, wüu süsch di andere am Tisch abgschriebe si... U ja, es wird äuä immer öber gäh, wo nit zfride isch.
Mir hocke mit de TZ u Partner a 1 Tisch (Blau), denne isch sis Mami, DJ, mi Vater& Stiefmeutter sowie mini Groseltere am Familietisch (Grüen), derte wäri dOption sini Schwo drzue ztue. U de hei mir no 3 Tische mit Gottelüüt, Cousine&Cousin u Fründe.

@Fara: Werum nit, Altrosa gsuch sicher schön us!
Ranunkle si mega , leider im März äuä no nit verfüegbar. Wieso setti das nit für ne Brutstrus gälte? Es gäbti doch ou so blassrosa Gerberas?!
Wieso heit ihr de zwöi Pfärrer? Sorry...
Fröit mi für öich, hets so guet klappet!

Datei-Anhänge

Bären Saal.pdf (23x) Mime-Type: application/x-pdf, 100 kB

Hoi Lula

Stimmt, blassrosi Gerberas würded au passe. Aber ich dänk, mittlerwile wetti lieber nöd en Struss us nur einere Sorte Blueme. Aber wer weiss, vilich änderi mini Meinig no. Bis im April isch no lang (es zeichnet sich ab, dass euses Datum im April wird si).

Wäg de zwei Pfärrer... Ja, das würkt vilich würkli chli komisch. Und wäni jetzt no säg, dass es gnau gno eher drü werded sii (wobi de dritti eher en chline Part wird überneh, dänki), dänn bini no vill schreger.
Nei, es isch so, dass min Verlobte und ich beidi eigetli katholisch sind, so vo de Herkunft her. Ich bin aber sit einige Jahr inere Freichile am mitmache und er isch diesbezüglich no bizli am usefinde, wien er's gnau gseht. Aber ebe, de konfessionell Hintergrund, wo mir teiled, isch de katholisch (sind au beidi Mitglied). Aber mir händ glich au dem wele Rächnig träge, dass ich zumindest jetzt in e Freichile gang.

Und mir werded mit em katholisch Priester no gwüssi Sache bespräche. Eifach wil eus beidne d Trauig sehr wichtig isch und mir nöd wänd liechtfertig Sache verspräche, wo mir nöd werded chöne oder welle halte oder s eifach nöd wüssed. Da bini gspannt, wie er's dänn xeht.

So, sorry... Sone langi Antwort häsch vilich gar nöd welle. :-D

Wie hüratet ihr eigetli? Au inere Chile oder nur zivil oder mit enere freie Zeremonie?

Liebi Grüessli,
Fara

Gwundernasenliste

an alle die noch nicht eingetragen sind oder noch Änderungen/Ergänzungen haben:

http://www.heiraten.ch/forum/board/perso...2_237_9.html#89

Guete Morge Brütlis

@Lula: Wo geisch ga Chleider probiere u wär nimmsch dasmau mit? I ga o am Zischti.

Uf Butinette hani scho glegt gha wäg de Güfeli, aber dert heisi nur wenig Farbe zur Uswau (i wott ja nid x verschiedeni gmischt) und ou nur 50 Stk. ire Packig. Ha itz aber paar Sitene gfunde wome cha Floristebedarf bsteue u dert hei sie so 100-er-Packige i x Farbe.

@munggi: Ja, isch mi erscht Termin (aso es si 2, eine am Morge u eine am Nami) und bi gspannt, ob ig gad uf Ahieb fündig wirde oder ob sech die Suechi de sehr schwierig gstautet... Hm ja, i wetti eigentlech nid no tusig angeri Sache ufgschwätzt becho. Höchstens vielech e passende BH oder e Stola we sie gad öpis hei. Aber Schueh si doch i so Läde oft rächt übertüret und i wett ja eh nid wissi, u Schmuck hani ganz schöne uf etsy gseh oder de luegi bi Swarovski. U Schleier wotti o kene. Aber we sie i däm Lade würklech schöni Chleider sehr abegschriebe hei, luegi evtl. no gad fürnes rots für am zivile.

@Pfingstrose und Sue: Gueti Besserig euch! Sone Seich. Sue, wie isch eigentlech ide Ferie gange mit dire Blaseentzündig?

@Sue: Super Idee mit de Kartonböxli für d Cupcakes, wo sie nid möge. De chame no öpis mitnäh und es bliebt nid feins Dessert fürig, i fänd das o so schad!

@Tischornig: Mir hei ou rundi Tische, wahrschinlech 6-7. Mir as Brutpaar wärde o e runde Tisch ha u de eifach chli ir Mitti si. Are länge Tafele würd ig mi gloub chli zu usgsteut füehle.