| Bräute 2014 |
|
|
1 .. 207 .. 412 413 414 415 416 .. 707 .. 997
|
|
|
|
|
|
|
|
|
|
|
|
|
10.10.13 22:22
Pricana 
|
Re: Bräute 2014
Ihr sind ja super, merci für eui ratschläg nach einigem hin und her hemer eus ez uf nöd knapp d helfti geiniged zum voruszahle. Hoffe das klapped denn alles !
@malinchen: wieso hesch müesse lache wod adresse gseh hesch vode kartefrau ? Ach tuetmer echt leid für dini beschti, ich hoff sie wird iigseh das sich so type nie änderet.. wennd ihre sone therapie chöntsch nöchlegge wär das längerfristig sicher die beschti hilf für sie!
@squishy: danke, aber d farb wird na gänderet  wird pink statt viollet. Ja ich dänk au es wär sicher türer zum selber mache..
Mir hend euses shooting wenns wetter stimmt am samstig inere wuche und hanmer au sch überleid was alegge wenns so chalt isch, han na keii ahnig !
Aja und bi eus hets leider nöd gschneid, wäge 100 meter 
@lula: neii han dis chleid scho wieder verpasst, schicksches mir na :D?
@daenu1: ich benieeeede dich, wot unbedingt au bald mal wieder uf wien, gnüsseds i volle züg!!
@janedoe: ou nei so fiis mit dim DJ!! So isches eus gnau miteme Fotograf gange, finds eifach total unhöflich das sie nöd mal churz chönd rückfrage alla „hey mir hend nama e Afrag für das Datum, wie gsehts ez us bi eu?“ unglaublich hey.. hetter sich scho zruggmolde? hoff ihr findet na de passendi !!
wünsch eu allne en schöne abig!
|
|
|
|
11.10.13 00:00
Fara
|
Re: Bräute 2014
Grüezi wohl
Hui ui ui... Händ ihr wieder fliissig gschribe. Ich wird wohl nöd uf alles igah chöne.
malinchen: Bin sehr schockiert xi, woni das vo dinere Beschte gläse han. Ich hoffe ganz fescht, dass sie d Chraft ufbringe mag, sich vo ihm z tränne.
Han, wie anderi und du au, de Idruck gha, dass da wohl professionelli Hilf agseit isch. Suscht zieht sich das Muschter immer wiiter.
Pfingstrose: Au dinere Tante wünschi ganz fescht, dass sie das alles chan wiiter ufarbeite - und vilicht irgendwänn en liäbe Partner finde.
Isch scho krass. Mir alli händ da scho grosses Glück, liebi Brütlis! Isch nöd sälbstverständlich, dass mer so tolli Partner findet. 
Bibi: Herzlich willkomme! Ich glaub, ihr bechömed das hii bis im Septämber. Mir hürated im April und händ au erscht vor es paar Wuche afange plane. D Chile isch au nonig sicher und reserviert. Aber isch zum Glück nöd sonen typische Hochsigsmonet, drum klappets glich. Wobi, ich dänk, wänn mer chli flexibel isch, gaht eh no viles.
Han grad churz de Herzberg googlet. Xeht sehr schön us! Häsch no wiiteri Fotis gfunde zums chli gnauer chöne beurteile?
janedoe: Sehr es herzigs Foti! Und mer (also ich zumindest) gseht nüt vom Räge. Und dini Haar xehnd au super us, im Fall! ;)
Hehe, mer bechunt grad Luscht, "Rio" z luege, wänn mer din Bitrag drüber list. Hanen ebe nonig xeh.
Isch ja mega schad wäg em DJ. Würkli blöd, dass er nöd nomal churz zrugg gfrögt hät bi eu. Ich hoff ihr findet eine, wo no vill besser isch. Mögts eu gönne.
Blasenentzündig: Ich hoffe, eu gahts allne scho wieder biz (oder no besser: vill) besser?
Ich bin im Momänt au biz meh am ufpasse. Neige normalerwiis nöd so dezue (han aber au scho mal eini gha) und bin im Momänt eh afällig uf alles mögliche dur d Chemo. Griift halt s Immunsystem scho a. Lah mi das Jahr sicher au gäg Gripp impfe. Han hüt au chli Schiss gha, dassi mi ev. verchelte bi dene Temperature. Ha drum grad e Zitrone uspresst und mit heissem Wasser übergosse, biz Honig dezue ta, und trunke. Mis Mami hät mer mal de Tipp geh.
sasileu: Ich glaub, d squishy hät nacher gfunde, dass du doch nöd die gsi bisch mit de Iladigs-Charte, wo sie gmeint hät. Aber defür bin ich also dankbar für de Tipp. Hans mim Fründ au scho zeigt, mal luege, vilich machemers dänn au dete.
squishy: Hui, de Zahni hät aber churze Prozäss mit dim Wiisheitszah gmacht. Ich han mich damals (vor einehalb Jahr) wenigstens bizli mental chöne druf vorbereite. Ich hoffe, s gaht dinere Bagge scho besser so vo wäge Schwellig? Häsch Schmerze?
Hey, das gseht super us under dere Autobahnbrugg! Chunt sicher guet! Ha mi no bizli gfrögt, öb d Farbe richtig zur Gältig chömed, wänn ihr's vor de Graffitis mached, wil die sälber ja au so farbig sind. Grundsätzlich findi d Graffitis aber en coole Hintergrund.
Wäg dene Offertene: gaht um de Apero, oder? Sorry, bin zersch nöd so drus cho, aber wo dänn vo de Bäckerei gschribe häsch, hani mir das so zämegreimt. Mir sind eus au am überlegge, dass mirs wohl vomene Beck mache lönd. Wobi, holed vilich doch no anderi Offertene i. Mal luege dänn.
Taeboyana: So guet, dass dis Chleid gfunde häsch! Isch mega schön und chunt der uu guet!
So luschtig, churz bevor du vo de Guetzli verzellt häsch, hani mir das au überleit für mini Gäscht. Aber ich würd glaubs eifach Herzli mache oder suscht rundi Guetzli oder so.
Häsch mi grad uf en Idee bracht. Ich chönt eigetli au mal fröge, öb ich vo öperem de Reifrock chönt uslehne, falls sie en no händ. Falled mer auf die Schnelle sogar grad drü Fraue ii, woni chönt druf ahaue. Dassi da nöd früener druf cho bin. *gg* Di eint hät eh scho gfunde, sie chengi mir ihren Schal uslehne.
Pricana: Super, dass di häsch chöne einige mit de Chartefrau! Hetti au rächt komisch gfunde, wänn grad scho alles hetsch müesse zahle.
kleinefeder und lela85: Danke vill Mal für die Tipps, wie mer sich chan so Sache us Dütschland liefere lah! Irgendwie bini no nie druf cho, dass es so Dienscht git. Isch ja voll geil, ich hans ersch grad letschti mit mim Brüeder devo gha, dass gwüssi Sache vo Amazone nöd id Schwiiz gliferet werded. So chönt mers natürlich umgah. :)) Und für s Hochsig gäbts ev. au s eint oder s ander, wo mer mal froh wär.
Lula: Ich han dis Chleid gseh! Superschön! Und voll kuul, dass chasch Sache vom Gschäft uslehne!
Wägem 1. Adväntschränzli und d Chärtli det de Familie gäh... Da häsch mi glaub mit de Pfingstrose verwächslet.
daenu: Gnüss Wien bizli für eus alli mit! Vill Spass!
So... Ich han z vill gschribe, drum folgt halt de "me"-Teil jetzt imene Egopost.
|
|
|
|
11.10.13 00:49
Fara
|
Re: Bräute 2014
me: Bi gester und hüt rächt unterwägs xi. Gester Morge hani no en Arzttermin gha im Unispital z Züri. Ich bin vorher scho mal bi ihre xi zum e Behandlig bespräche, won ich mir sooo sehr wünsche, dass ich sie dörf mache. I min Körper isch halt würkli massiv igriffe worde und die Behandlig würd ebe so zumindest en Teil wieder chöne regle. Aber irgendwie hät min Onkolog mir devo abgrate - aber ihre nüt devo xeit. Obwohl sie am gliiche Spital schaffed und sie mit ihm eigetli au Rücksprach ghalte hät (was ich au absolut richtig finde). Mann, de Unispital... Ich chönt eu da Gschichte verzelle...
Jedefalls hät sie dänn gseit, sie tägi ihn jetzt nomal fröge und mir dänn halt en neue Sprächstundetermin geh.
Findes eifach schwierig, s Risiko abzwäge. Es isch glaub eher chli, chan aber natürlich doch fatal werde. Es git aber vermuetli kei Studie drüber, wo mer sich chönt druf stütze.
Sorry, das hät eigetli mit em Hochsig nöd würkli z tue. Aber s hät no guet ta, das ufzschribe, drum lahnis jetzt.
Aber ab zu erfreulichere Theme: no im Unispital hani nämli (bim waaarte uf min Termin) d Offerte übercho vomene Caterer, wo mer mal agschribe händ für de Abig. Müend sie no gnauer aluege. Aber sie schint en guete Priis z sii und au i eusem Budget (wobi ja grosszügigerwiis mini Eltere s Ässe und au de Apero wänd zahle  ). Isch vo pastamobil.ch
Was meined ihr zu Pastabuffet amene Hochsig mit verschiedene Saucene? Er macht ebe au sehr spezielli und hät e mega Uswahl uf de HP. Aso nur grad so di normale fändi chli komisch. Aber s isch halt doch nöd eis vo de gängige Fäschtässe-Menus.
Nacher simmer go Schueh chaufe für mich und händ spontan d Idee gha mal nach Juwelier Usschau z halte. Zum einte, wo eus agsproche hät (isch aber au zimli de einzig xi), simmer au ine und händ mal nach Ehering gfrögt. Also, mir lueged sicher no wiiter ume. Aber di einte Ring det händ eus scho sehr gfalle. Juhuuu!
Hüt simmer dänn no e Chile go aluege für s Hochsig. Die chöntis also werde! Hät eus guet gfalle! Fründe vo mir händ au scho det ghürate. Aber das muess ja nöd umbedingt degäge spräche.
Ansonsten bini chli a de Deko am umestudiere. Han mir ebe mal überleit, leeri Fläsche z bstelle und die als Vasene z bruche am Hochsig. Stell mir ebe eher so e Tischdeko mit Strüssli und nöd mit Gsteck vom Florischt oder so vor. Und min Verlobte fänd das au kuul.
Die Fläschene chämtet halt extrem günstiger als Vasene chaufe. Eini choschtet es paar Cents. Vilich bstelli mal es paar zum luege und abwäge - und würd de Rescht dänn no nabstelle.
So, das isch jetzt irgendwie rächt en lange Egopost worde. Sorry.
Ah... Und mis Chleid hani ja eigetli au no welle ine stelle. Han dänkt, ich maches eifach so wie d Lula, dassis nacher dänn wieder usenimm. Bin eifach bisher z fescht e Memme xi. 
Aaaalso - tadaaaa!
edit: Mischt jetzt hani grad gmerkt, dass ich Biträg nur churzi Ziit nomal chan bearbeite (bin wohl no zwenig lang Mitglied?). Ich nimms drum glich nomal use. Aber wänn ihr mir chönd erkläre, wien ich Biträg doch no länger chan bearbeite oder so, würdis wieder ine tue. Oder vilich bini irgendwänn dänn au so gnueg muetig.
Aber wär froh mal um en Erklärig, wie das gnau funktioniert mit gwüssne Sache. Links chan ich ja au nöd (nonig?) poste.
Zuletzt bearbeitet am 11.10.13 00:57
|
|
|
|
11.10.13 08:31
malinchen
|
Re: Bräute 2014
Hey zämä und TGIF!!!
@squishy: oh Gott, bi dir hets gschneit??? z Bern zum Glück nid, das hät mir äuä no gad dr Räscht gäh... Obe wiis und unte schwarz isch sicher super fürs Shooting! Bi würklech gspannt uf die Föteli!
Mini Besti gseht zum Glück ii, dass das was sie het nid unbedingt als "glücklechi Beziehig" cha bezeichnet wärde. Sie chunnt eher immer mitem Argument, dass alli anderä ihri Problem nur nid gägä usse trage und schliesslech niemer perfekt isch. 
@Pfingstrose: Chind si zum Glück für mini Besti no nie es Thema gsi... Aber mir wärde ou älter und das isch nur ä Frag vor zyt. Sie seit ganz klar, dass sie sich mal e Familie wünscht. Vo dahär wärs super, wenn sie die "Chance" jetz würd packe, sich vo däm trennä und ä Therapie mache bevor sie sich inä nöii Beziehig stürzt...
@jane: oh nei, das isch ja mega doof wägä öiem DJ!!! Gäu da denkt me äbä immer "mir si ja no früeh gnue dranne - kei stress" u so u när plötzlech isch glich scho öpis usbuecht womä gärn hätti wellä. Üs ischs mit dr Band genau glich gange - fang eis einzigs Datum hei sie verplant nächscht jahr u natürlech ischs genau üses. 
@pricana: D Strass isch irgendwie "Hinter dem Dorfe", ha mir gad sones chliises Häxähüsli irgendwo im Wald vorgstellt... 
@Fara: oh das chani guet nachevollzieh dass di das beschäftigt mit derä Behandlig. Isch als Laie würklech mängisch soooo schwierig zum abschätze, wenn alli Ärzt öpis anders sägä. Und gad wenns um so schwärwiegendi Entscheidige geit wie bi dir...
Ds Pastamobil fändi ja meeeeeega cool!!! I liebe Pasta, also mir chönntme mit somne Ässe e riese Fröid mache... Und mit de verschiedene Sauce isch ja sicher ou für alli öpis drbi, wo sie gärn hei.
U i gseh grad, mir hei äuä sehr ähnlechi Vorstellige vo dr Deko... Ig und GG's TZ si scho sit em Summer am lääri Gläser und Fläsche sammle fürd Deko. Wo würdisch de du die bstellä?
Wägem Bilder wieder usenäh chani dir leider nid hälfe. Aber Links chasch teilwiis eifach wenn z.B. ds WWW wäglahsch und när z.b. heiraten(punkt)ch schribsch.
@me: I ha gester per Zuefall GG's TZ tröffe bim schaffe u sie när gad mitem Outo mitgnoh, de hei mir mal chli Zyt gha zum schwätze. Sie het när verzellt, dass sie ä DJ für üs het agfragt, wo sie no kennt vo früener (sie het lang inerä Bar gschaffet). Jetz duet sie üs de mal sini Kontaktdate düregäh, aber i dänke wenn dr Priis stimmt, näme mir ihn. Bi ou scho meh a Parties gsi wo er ufgleit het und isch immer guet gsi...
Und denn isch mir doch tatsächlech fasch ds gliche passiert wie dr Principessa mit ihrem Gottemeitli (resp. dr Mueter drvo)!!! Has chuum chönnä gloube... Gester het mir GG's schwoscht gschribe, sie sige äbä scho am plane wägä de Chind a üsem HZ (oh mann, es geit no über 9 Mönet!!!), sie müessä langsam luege wär sie de chönnti hüete. U ob sie überhoupt iglade sige am Abe etc. Ha när gschribe, da sie die einzige Chind wärä, heigä mir d Entscheidig ihne wöuä überlah, aber es wärdi für Chind sicher nid so cool si am Abä, da mir eifach ä Party wärde ha u nid wärde Rücksicht näh... När fragt sie so, ja ob mir de ds anderä Gotti vo ihrem Jüngste wo GG Götti isch ou iglade heige. De hani gseit nei - mir kennä sie zwar scho und sie isch ä liebi. Aber ussert dass sie ds gliche Göttichind hei, het GG eigetlech nid viel mit ihre z düe. De fragt sie doch tatsächlech, ob mir sie de nid ou chönntä ilade, dass sie när zu de Chind chönnt hälfe luege...  Immerhin kennä mir sie ou und mir heis immer guet mit ihre - aber jaa, sie ghört jetz nid zu üsem Fründeskreis oder so. Hei när ou abote, dass si as Apéro cha cho, aber am Abe möchte mir sie ou nid drbi ha... Eifach ächt ungloublech was die Lüt fürnes Theater mache wäg denä Chind!!! I hoffe scho, dass ig de mal chli nes unkomplizierters Mami wirde (wenn überhoupt)!
|
|
|
|
|
|
|
|
1 .. 207 .. 412 413 414 415 416 .. 707 .. 997
|
Anmelden
