| Bräute 2014 |
|
|
1 .. 211 .. 420 421 422 423 424 .. 711 .. 997
|
14.10.13 23:54
Fara 
|
Re: Bräute 2014
Gueten Abig allersiits
Hui ui ui... Ich han über s Wuchenänd rächt flissig mitgläse, aber bin ja unterwägs xi und han drum nöd gschribe. Ich hoffe, isch ok, wänni nöd uf alles igang. 
malinchen: S Problem bi dere Fründin isch halt, dass sies durchus guet meint. Ich glaub, sie hät mich würklich gern und möcht uf kän Fall, dass ich stirb a dem Chräbs. Sie hät nur sehr anderi Asichte als ich, wie mer das here kriegt.
So Fettnäpfli-Sache tünd mängisch au weh, das stimmt. Aber sehr oft chani das iordne. E Fründin hät sich am Samstig bi mir entschuldiget, wil sie anschiinend ines paar Fettnäpfli trampet segi vorher. Ich hans - ussert eim - gar nöd bemerkt gha.  
janedoe: ich nämti s Passwort also au, wänn ich dörft. 
daenu, min Zwilling: Ha, zum Glück häsch du eus ufmerksam gmacht druf, dass es nur no 6 Mönet isch. Mir hettets beid voll verpasst. Wobi, da ich das erscht a dem Tag nach Mitternacht gläse han, hämmers eigetli au so no verpasst.
Super, dass ihr eui Ring händ! Ich hans mim Verlobte verzellt und wänn mir da i de Nöchi kei passendi Ring (schöni und bezahlbari) findet, würdemer ev. uf dich zuecho und fröge, wo ihr eui gnau mache lah händ. Magsch di erinnere, öbs so det so ganz schlichti, "schraffierti" (nännt sich eismatt) gha hät?
Euses Datum isch nöd irgenwie symbolisch für eus. Mir händ ufgrund vo minere Behandlig plant. Ich bin im Dezämber fertig, im Januar wird es Bild gmacht und dänn gahts 3 Mönet bis zum negschte Vorsorgetermin. Han wele, dassi mi einigermasse chan vo de Behandlig erhole bis zum Hochsig, aber nöd scho de negschti Vorsorgetermin churz vorher ha. (Ich hoff ja, dass es dänn jewils immer Entwarnig git. Aber d Wahrschinlichkeit für en Rückfall isch halt scho sehr höch.)
Im Momänt bini am Chemo mache, ja. Tuet mer u leid, dass dis Mami au Chräbs gha hät (wänn ich dich richtig verstande han)! Und ich hoffe ganz fescht, dass sie wieder gsund isch. Möcht dir aber nöd irgendwie z nöch trätte mit nafröge.
Schöni Deko, übrigens! Aber das häsch der chöne dänke, dass ich das au schön find, so öpis! Mir Fläschlifraue...
squishy und Pfingstrose: Freut mi, dass ihr so gueti Shootings gha händ! Ich hoffe, s Warte uf d Bilder wird nöd zu asträngend!
laprincipessa: Sehr geil, 4200 Euro und es Viersternhotel??? Da chan mer eigetli nur schallend lache. Ich mein, ich han zwar de Idruck, dass Musiker zum Teil eher unterbezahlt werded. De Ufwand isch ja nöd nur die Ziit, wo sie tatsächlich spiled, sondern au d Probe vorher, etc. Aber 4200 Euro??? Wi geil. Haha!
sasileu: Ich stahn vilich eher chli elei da mit minere Meinig, aber ich finds jetzt nöd so mega denäbed, dass eui TZ und ihren Verlobte s Datum so gwählt händ. Ich dänk mir äfach, sie werded ihri Gründ ha. Aber ich dänk au, grad wil sie ja vo eune Plän gwüsst hät, wird sie's au ok finde, falls ihr a ihrem Hochsig nöd debi sind. Ich würd mir da kei Druck mache, wänn ich eu wär, sondern würklich eifach abwäge, wien ihr's lieber wänd mache.
Pricana: Vill Erfolg uf de Brutkleidersuechi! Gasch au uf Buebike in Chez Janine? Det han ich mis gfunde.
Homepage: Mached mir au. Bzw. min Verlobte macht das. Er wird's über wordpress mache. Ich bin gspannt. Aber dörf natürlich ganz fescht mitrede und driirede, wie's söll usgseh und so.
Ufgabe vo de TZ: Da werded mir eus no gnauer Gedanke drüber mache müesse. Einersiits werdemer sie wohl bitte, de Abig chli z organisiere, Biträg vo eusne Gäscht und so. Chönted eus aber au vorstelle, das hani minere TZ scho gseit, ev. eine vo mine Brüedere azfröge zum Tätschmeistere (zäme mit em TZ vo mim Verlobte zum Bispil). Und bim Apero, bzw. wänn mir es Ziitli lang weg sind (was mir ebe scho no es Aliege wär, mal au no es Wiili Ziit für eus zwei am Hochsigstag), wär vilich au guet, wänn sie öpis würded mache. Aber gnauer müemer das no bespräche. Au öb sie mir chli bim Baschtle möcht/chan hälfe. Aber da hani zum Glück au Cousine, wo mir ihri Hilf scho abote händ. Vilich machemer mal es Cousine-Wuchenänd im Chalet vo de Grosseltere mit Bastelei und kitschige Schnulzefilm.
me: Het nöd dänkt, dass ich am Wuchenänd Hochsigsmässig produktiv bin. Aber dänn häts i dem (übrigens u mega schöne) Huus, wo mir mit Kollege (z 9te) xi sind, ganz vili so Wohn-/Deko-/Garte-Zitschrifte gha. Die hani alli dureblätteret und nach Deko-Ideä abgsuecht. Und bin au fündig worde.
Di erst hani hüt scho agfange umsetze. Bin so Chugle us Chupferdraht am baschtle. Han fäng drü gmacht... In unterschiedlicher Qualität. Da gits no Verbesserigspotenzial.
Ah, und hüt und morn gömmer je e Wohnig go aluege.
Und bi de einte Chile hani hüt aglüte. Die würd für eus 1200 Franke choschte. Ich glaub, das machemer nöd. Find das scho grad chli krass.
So, ez schlüssi mal. Guet Nacht, pfuused alli guet (und kä Hochsigsalbtröim!!)!
Fara
|
|
|
|
|
|
15.10.13 00:00
Fara
|
Re: Bräute 2014
daenu, ez hani ganz vergässe z fröge, wien ihr eigetli uf euses (hehe) Datum cho sind?
|
|
|
|
|
|
15.10.13 08:28
malinchen
|
Re: Bräute 2014
@pricana: Viel Spass hüt uf dire Brutchleid-Suechi!!! Gniess es!
@squishy: hihi, du bisch z viel!  Nägeli schön lackiere isch würklech praktisch zum chli Zyt vertrödle. I mache i so Zyte aube ou no Gsichtsmaske, Fuessbäder, Peelings, Haarkuure etc. Am bestä machsch das ganze Zügs no säuber, de bisch ou no chli beschäftigt dürd Zuebereitig und die ganzi Sauerei när wieder putze... 
@Fara: oh cool, wie machsch de die Drahtchugle?  Uf die Idee bini jetz no gar nid cho, mal no chli Wohnzytschrifte düre z luegä.  Das findi aber ou ä stolze Priis fürne Chille!!! So viel zum Thema: "Ds Huus vo Gott steit allne offe..."  Da fragi mi mängisch scho chli. Klar gits für d Sigriste ou z düe sones Hochzyt, aber die söue doch froh si wenn überhoupt no Lüt id Chille chömä cho hürate...
@üses Apéro: I dänkä mir würde scho no chli so Knabberzügs drzue abiete. Eifach chli Chips, Nüssli, Stängeli etc. Mueses jetz de würklech mal GG unterbreite dä Vorschlag... Ha bis jetz no dr passend Moment abgwartet. Villecht machi mal Crèpes zum Znacht u när sägi so: "Hmmm isch eifach scho öpis mega Leckers so Crèpes... - Gedankepouse - Das wär eigetlech ou no cool für bim Apéro, was meinsch?!"
@Ufgabe TZ: Mir hei ihne nid ä fixi Ufgabeliste oder so gäh. Eifach wenn öpis afallt wo sie chönntä erledige, düe mir sie frage ob sie Zyt u Lust hätte u de chöi sie ou gad sägä wenns ihne zviel isch oder so... Bis jetz sis alles nur so chliini Organisations-Ufgabe gsi. Die wichtige Eckpünkt düe mir lieber sälber organisiere... Bi halt scho chline Bridezilla mit Kontrollwahn. Aber am Tag sälber wärde sie sicher viel z düe ha, mit Gäst informiere, dr Zytplan im Oug ha, Transport vo de Gäst koordiniere etc. U villecht de ou bim Deko-Bastle hälfe... Mal luege!
|
|
|
|
15.10.13 08:34
Taeboyana
|
Re: Bräute 2014
Guete Morge Brütlis
@janedoe und daenu: I würdi ou gärn euchi HPs gwundere und nähmti ds Passwort ou
@daenu: Bi üs organisiere d TZ rächt viu. Sie hei z.T. ou sehr vou Erfahrig (dr eint het scho 3 Hochzite organisiert + säuber ghürate ) und so wies tönt u viu Idee. Letscht Samstig hei sie gad Sitzig gha zviert, ohni üs natürlech... Hui macht mi das gwundrig Sie wärde so chli dr ganz Ablouf und Zitplan vom Tag ir Hand ha und ds Abeprogramm plane. Mir gäbe eifach d Zite vo de einzelne Menugäng vor, süsch hei sie da freii Hand und nähme ou mit üsne Gescht Kontakt uf für Biträg etc. Süsch plane sie sicher düre ganz Tag no die einti oder anderi Überraschig und d Pouteräbe organisiere sie o.
@malinchen: Ganz härzigi Idee mit dr Zitig vo dire Beschte. Mir wei e Hochzitszitig, wo de am Afang vom Abe (vielech we d Gescht bim Hotel iträffe) verteilt wird. Das Amt het scho mi Brüetsch übernoh.
@Lula: Tönt super mit däm Ruum! Da chöiter sicher no so richtig fiire. Wägem rouche wär ig itz ou nid drfür z'begeistere... guet i rede hie as Nichtroucher, aber grad für die Gescht steui mirs nid so agnähm vor... chunnt natürlech drufa, ob dir mehrheitlech Roucher sit oder Nichtroucher.
@Fara: Wow du gisch ja Gas! Tönt spannend mit dene Drahtchugle. Chame es Föteli gseh? Viu Erfoug und Spass bim Wohnige aluege! Aso 1200.- fürne Chile wär mir jetz ou definitiv zviu. Mir (bzw. mini Eutere schänke üs das  ) zahle für d Chile ca. 650.- und i finde no das gnue. Isches de sone typischi Hochzitschile wo sehr beliebt isch?
@Pricana: Oh so toll, grad 2 Tag Brutchleidershopping! Bi ja de gspannt uf di Bricht und natürlech Fotos!
@squishy: oh i bi scho so gspannt uf eui Fotos! hets guet klappet mit de Farbe?
@Sue: oh das tönt sehr schön mit dene Papierseckli! Hesch es Foto? I gloub Rosebletter sötte weniger es Problem si as Riis oder Täfeli, das hei sie oft nid gärn wüu mes fasch nümm wägbringt. Aber würd uf au Fäu afrage.
I la Haar und Make-up im gliche Salon la mache, ha e Kollegin wo aus macht, o Negu. Sie het zum Glück no Ungerstützig und drum nimi mini beide TZ de grad mit u mir lö üs zdritt la zwägmache. Sie freue sech scho mega druf Dä Salon isch ca. 10 min mitem Outo vo üs dähei und drum findis kes Problem, dert härezfahre. De chasech GG däheime mitem TZ zwägmache u mir gö de zur TZ hei woni o mis Chleid wirde ufbewahre. Nachem Chleidershopping letscht Wuche steui mir auerdings 1 Frag: Wie söus die schöni Frisur überläbe, weni när das Chleid mues übere Chopf zieh?? I ha nachem aprobiere usgseh wiene verstrubleti Häx...
Es tönt, as wäret dir aui enorm produktiv und kreativ im Momänt. Bi mir hautet sechs i Gränze... I muesmi itz no chli ufe Abschluss und Abschied hie im Gschäft konzentriere (het mi o rächt hert...) und de gli ufe neu Job, drum hani gad chli angers im Chopf. Aber i wett am Wuchenänd mit GG zämehocke und mau üsi To-do-Lischte düregah u luege, was mir itz gnau fürnes Datum für ds Zivile wei reserviere u was süsch no so asteit. I ha ir Letschti eigentlech ds meischte erlediget und wett ihm vielech es paar Jöbli i Uftrag gäh Vielech hani de när ou mini erschte Hochzitsalptröim - bis itz hani no kene gha, aber das chunnt bestimmt
|
|
|
|
|
|
15.10.13 08:46
_janedoe
|
Re: Bräute 2014
Guete Morge iher Liäbä!
@Sue
Danke villmal Mir wärded d’Text eher ned vorläse… Ich würd wahrschinli Bäch brüele und chönnt das ned vorläse
Hui demfall muessi bi eus au no afrage wege Blueme streue. Weisch du scho meh?
@malinchen
Danke villmal! Mer gseht de Rege uf es paarne Bilder extrem guet. Und vor allem gseht mer, das am Afang d Haar no voll schön sind und mit jedem Bild meh verchruslet… Aber eigentli störts mi nöd mal so gross
Aso wenn die mit de Crepes gnueg Platte hend, stimmt, denn sötts glaub keis Problem geh Din Plan, das dim GG z offebare findi grooooss! Mach das unbedingt so :D hahaha
@nala
Das isch mega schön und sehr viel wärt, dass dis Mami dich so unterstützt. Da bini bi minere au mega froh…
@Pfingstrose
Ich chans nachvollzieh, dass dini Bilder denn lieber per PN teilsch… Ich bin halt eifach e huere Gwundernase sorry.. Du de DJ Stipe, wie lang brucht de so im Schnitt fürne Antwort?
@daenu
GG hed gester Abig gfunde, ich heb doch e Vogel, kei Mensch welli im Februar mitem Schiff fahre Wahrschinli heder recht, haha.
Danke villmal für dini liebe Wort!
@Pricana
Yeeeeeaaaah, bi mega gspannt uf eui Homepage!! Sooo cool
Viel viel Spass bi dim Marathon!! Hoffentli gfindsch DIS Chleid und verliebsch di so richtig! Inere halbe Stund gahts scho los
@squishy
Du bisch eifach e Goldschatz, ha immer so freud wie du chasch begeischteret schriibe! Danke villmal! Mier wärded imfall gar kei Bilder uf d’Chärtli drucke, da d’Charte ja scho fertig druckt sind Inzwüsche wurmt mi das es bitzli. Hend ja das mit dem Shooting au ganz spontan entschiede. Janu, defür chönds d’Gäst ja uf de Homepage aluege… D’Haarfarb heisst imfall Haselnuss und isch vo Movida. Isch aber nume e Tönig. Wetts nümme färbe aber mini Coiffeusin hed gmeint ich söll für Pfleg glich e Tönig neh…
Ohjee, ja, ich glaub ich würd am Fotograf au nöd getraue zschribe… Warte isch halt eifach müüüüehsam 
@Fara
Bi gar ned sicher obi dier ez sPW gschickt ha oder nöd. Bi voll durenand. Suscht meld di doch nomal, fallsis vergesse ha…
Hesch es Bild vo dene Chugle? Tönt mega spannend.
Oh viel Erfolg bim Wohnig aluege. Bi eus im Huus wird grad eini frei, mier wohned ime zweiFamilie Huus und hetted gern chli liebi Nachbare
1200.- für d’Chile, wow, findi huere happig!! Eusi choschtet 50.- Aber nid mal das müemmer zahle…
@me
Zerscht mal a alli ganz es grosses DANKE für eui liebe Wort. Das freut mi sooo fescht!
Has gester glich nöd chönne lah und am DJ versuecht azlüte. Leider heder nöd abgno. Denn hani sim ‚Chef’ aglüte, de hed au ned abgno. Okay, hmmm, hani dem Chef halt es Mail gschickt dasi ja eigentli nöd welli stresse, aber glich gern e Antwort hett. Er hed denn gschribe, dise DJ meldi sich UMGEHEND. Das heisst doch ‚sofort’? Naja, iher chönds eu denke. Han kei Antwort becho gester.
Suscht isch hochziitstechnisch ned grad viel los… Mier hend nämli suscht gad chli viel um d’Ohre mit schaffe… Und bi eus i de Wohnig hed sich plötzli im untere Stock überall s’Laminat afange wölbe…. Es isch im Moment wie es Mienefeld, dett unne umenand zlaufe, willmer ned uf die Wölbige versuechet zstah, us Angst, das die Verbindige de breched. Ez wartemer uf en Termin mitem Bodelegger.
|
|
|
|
|
|
|
|
|
|
|
|
1 .. 211 .. 420 421 422 423 424 .. 711 .. 997
|
Anmelden
