Sooo und ez zu mim Ego-Post!! Haha ich bin nur scho wieder nervös wenni devo schriebe iiich han mis Kleid gfunde !!!! jipiiiih! Aber vo Afang a.... :)!
Am morge am 9ni hemer euse Termin gha im Liluca in Züri. Zerscht hemer chli müesse warte und denn simer dra cho und sind abe go luege. Ich han ihre mini Vorstelligs-Bilder zeiged und sie het denn d Kleider füre gholt. Ich bin denn aber gar nöd so z friede gsi will vieles nöd gstumme het, han aber en Teil au erscht nachher im direkte Verglich mitem Mery's feststellt :). 1. sind d Verkäuferin und ich nöd so warm worde mitenand und 2. hani d Location chli blöd gfunde, mini Begleiter hend immer müesse um alles umelaufe zum mich "aluege". Denn hemer s erschte Chleid idä Garderobe agleid und sie hettmer u höchi Schueh gä zum alegge. Für die wiitere Chleider zum probiere hani immer müesse uf dem runde Schemmeli stah bliebe und sie het dert direkt d Kleider gwechsled. Ich bin paarmal fascht abegheit will ich ja erscht vor 2 Mönet min Fuess operiert han und eifach nanig so sicher bin i höche Schueh (wassi ihre au gseid han..) und denn ebe immer a Ort und Stell han müesse stah bliebe.. Nachere Stund simer gange miteme Favorit im Chopf aber nöd 100% z friede. Denn simer am Nammitag in Mery's in Züri und det hemer eus alli grad wohl gfühlt! Hend u e liebi Verkäuferin gha wo eus z trinke abote het und au interessiert gsi isch und paar Sache gfröget het über mich und s Hochziit. Sie het au ehrlichi Kommentar abgä und isch würklich ganz e liebi gsi! Wassi na schön gfunde han isch au gsi, dass sie immer grad de Priis vom Chleid gseid het! Es het ganz en grosse Ruum miteme grosse Spiegel undeme schöne Sofa fürd Begleiter. Und s zweite Chleid isches gsi :)!!! Phu bin sooooo glücklich!! Ich hänk eu es Bild ane aber ufem Bild gfalli mir nöd eso, will s Chleid ischmer viel z gross gsi und mer muens zerscht na apasse :D isch grössi 42 und normalerwis hani 36/38.. aber henk auna es Bild vom Internet a. Es isch us de 2013ner Kollektion und drum 50% abegsetzt gsi , perfekt :D! min Favorit usem Liluca wär doppelt so tüür gsi! Han mich aber au grad sofort müesse entscheide und drum hanis gno mitem Scheier zäme und die passende Svarovski Ohrering hettmer mis Mami kauft dezue :). sie isch übrigens die ganz Ziit am Brüehle gsi.. :D Isch also echt super gsi und bin soo glücklich! Chan de Merys in Züri also voll empfehle :)!
Ah und min GG isch au herzig gsi hüt, normalerwiis hasst ers zum sms z schriebe (jaja mir sind beid na bidä sms und nöd bi what's app :P ) und hüt heter immer wieder gschriebe und gfröget wies gaht und egal was ich nimme es wird ihm sicher gfalle und perfekt sii und ich sell nöd uf de priis luege etc.. :) würklich herzig gsi
.. und min Termin in Konstanz hani vorher abgseid, willmer alli frei gno hend gömmer morn glich aber eifach go lädele und TZ-Kleid sueche und so :)
haha sorry für min lange Ego-Post:D
Aja und allne wos Bruutkleider Shopping na vor sich hend, gäbed eu nöd so müeh mit de Frisur! Ich han extra mit Lockewickler gschlafe willi denkt han wenn mini Haare schön ugsehnd fühli mi au besser, aber spätestens nachem 2. Kleid woner probiered isch allllles kaputt :D
Pfingstrose: Ja ich han au mega Freud am Bluemeschmuck…sie wird das sicher guet mache! Isch vilicht eh mal besser am Fritig z’goh…Konstanz isch jo immer soooo vollgstopft am WE…bläääh (ich wohn grad do)
Janedoe: Ja nimmt mich denn Wunder z’ghöre wenn ihr euri Offerte bechömed. Im Mai hesch auscho chli meh Uswahl. I bi mega froh hets im April per Zuefall grad all das woni ha welle
Nala: jo gell hüt gohts voll ab do! Genau, das stelli mir ebe au so vor…schlicht und romantisch…passt aber würkli super zu üsem Ruum
Lula: Würkli sauglatt! Danke!
Taeboyana: Danke…ja gell, die findi ebe wunderschön (vlt hesches scho gseh uf Pinterest bi mir) die Succulent oder ebe Echeverie.
Pricana: Dankeee! Hey, etz hani extra gwartet bis din 2te Post grad auno chunnt Gseht jo bombig us dis Brutkleid! Uuuuh schön! I het etz nix gmerkt dases z’gros wär! Gseht würkli sehr sehr guet us! Din GG wird Auge mache! Viel Spass morn!
pricana: e wunderschöns kleid hesch du do gfunde! stoht dir so guet! dä glitzergurt gfallt mir au sehr guet! isch de hammer das kleid! jööö isch de härzig das dis mami de ganz zyt briellet het! schön hesch im merys so e guete vrkäuferin ka wo dir zu dim kleid vrholfe het! isch jo super könnet ihr de dag morn grad witr nutze für s shopping!
daenu: eure ruum isch de schön! gfallt mir meeega mit däne holzbalke, find das eh mega schön so rustikal imene modärne ruum! ka mir au grad vorstelle das euri deko dört guet inne passt!
me: mir hän jetzt s gspröch ka mit dr "neue" zeremonieleiterin und si isch mir au rächt sympathisch! mannooo das machts jetzt wirklig schwer. mi gg findet se au nätt, het abr nid dr vrglich zur andere.. hmpf! weiss jetzt grad nid was mache.. i schlof am beste nomol drüber!
Wooow, hüt hend iihr aber gas gäh. 50 Mails han ii vo eu im Postigang gah Nimmt mii also wunder was ihr so gschriibä hend, los gehts:
Pfingstrose: Oooh, schön het sii scho agfange bearbeite! Du hesch recht. Miir teilet unser Leiid oder besse unseri Ungeduld Schickt sii eu so als Goodie es unbearbeitets? Aaah kuul, ihr machet so minibooks. vo minted.com oder soo? Find ii uuh herzig und dert giits no viil platz oder? Bii denn gspannt wiä s'Orginal usgseht mit eune Föteli! Krass, dass alles scho usbuächät isch in Konstanz. Demfall muäsch dini Ladies schnell iiweiihe, dass no en gmeinsame freie Tag verwütschet! Wiä hesch dirs gnau überleiit zum ilade? So richtig per Post? Find ii au eh herzigi Idee zum mitteile das hüratisch!! Find ii kuul! Und dini Oma nimmsch mit zum Kleiidershopping, han ii da richtig verstande? Sooo lässig!!
Janedoe: Naii bim iifärbe giits keiin grössere Ufwand. Nu fangts denn so aah langsam usewachse, denn muäsch es noii färbe und uf das han ii nöd immer lust So en Schrank kenn iich, er macht mir jetzt scho Buuchweh uf nächst Summer. Er isch zwar ganz noii us dä Ikea. Aber er isch es Usstelligsstuck gsii. Das heiisst scho zämä gmacht und mit so Nägel befestigt damits jo hebet. Meh chan en gar nöd usenand schruube. I frag mii, wiä mir dä in d'Wohnig bringet, je nach dem ii wellem Stock mir wohnet.... Also chan ii diir ii de Schrank-Aglegeheit guät nafühle...
Sue: Gnauer überleiit han ii's mir nonig. Und wenn's mir recht isch, han ii d'Idee sogar vo öperem usem Forum klaut? Eventuell Kinderalbe, Feriealbe und ebe Fotoshooting-Albe. So für Zwische dä Gäng. Mir hend ja dusse so es Gärtli mit Stüähl, dört chönt ii's mir no guät vorstelle. Bietet denn sicher au Gsprächsstoff für Lüüt wo sich gegesiitig nonig so kennet.
Alegna: Gratuliärä zu diim Traumkleiid? Wo hesch es gfuunde und wiä war dä shoppingtag? Giits es Foti?
Nala: Wooow, diä chunt eu jo recht entgege! Mal luägä, was diä ander meiint. Chöntsch ja ihre sägä: "Mir hend no eh anderi gfunde für 1600.-, jo und jetzt müänd mir nomol denke." Diä chunt jo so wiit abä mit em Priis. Viellicht ja nomol?
Lula: Mama mia, de Text. I find en glichziitig irrsinnig lustig und er macht mir au Angst. I wott em miim GG zeiige, luägä wiä er reagiert! I hoff, ii bii nöd gär so schlimm
Daenu: Woow, ja dini Dekosachä sind wunderschön. I find au dii Bruutstrüüs bezaubernd! Er isch so speziell mit dem grün/bläuliche Ding (exgüsi weiss dä name nöd) Aber das gfallt mir so guät!! Au diä Rosabändel gfallet mir ah dä Stüäh. So doof hend mir Bänk ii de Kiirche, denn got das gar ned... Wooow, de Priis isch ja hammer und denn no eh gratis Hilf! Da hesch eh guäti Fründin, schön tuät sii sich für eu so engagiere!
Pricana: I cha chum d'Auge offe ha, aber diis Kleiid han ii no müässä aluägä (dä Text les ii morn, bitte verzeiih mir!) I finds wunderschön! Woow!! Es stot diir usgezeichnet und diä glitzerperle! Es Tröimli!! Gratuliärä zu diim Fund. Und jö diin GG (hahaha, da han ii irgendiwä glese)!! Mii GG schriibt au nöd gern, schön het er sich hüt so Ziit gno zum mit diir Kontakt z'ha! Isch romantisch!
Me: Ha mii hüt mit einer TZ troffe. So Ladies-Abig. Sii het denn gmeiint, sii heg sich läschtin überleiit, was sii scho fürs Hochziit chönt vorbereiite. Ihre säg aber no nixx in Sinn cho. Ob sii würkli no nöd vil chönt tuä usser Spiielidee überlege. I has uuh herzig gfunde. Gell es got no chlii meh als 9 Mönet, und sii macht sich scho voll Gedanke
Boah, mich hät fascht de Schlag troffe, woni xeh han, dass hüt öpe 60 Mails vom Forum cho sind mit Biträg. Wi geil, ihr gebed mega Gas! Ich cha vermuetli wieder nöd uf alles igah. *gg* Sorry, fallsi öpis vergisse. Und hett eigetli no PN's z schriibe. Sorry!
Min Verlobte hät im Momänt Schuelferie, drum simmer hüt en Usflug is Technorama go mache. Mega kuul xi, händ gar nöd Ziit gha zum alles aluege!
janedoe: Han no keis Passwort übercho, würds aber also immer no neh. ;) Hehe, bin grad uf dis Profil. Aber leider suechemer zwar im gliiche Kanton, aber amene andere Egge. Suscht hetti eu jetzt glatt gfrögt nach gnauere Agabe zu de frei werdende Wohnig. *gg* Ev. chönder d Föteli für d Deko am Abig irgendwie bruche? Dänn chämteds nomal zum Isatz. Ui, das gseht ja krass us mit euem Bode! Hoffentlich chan mer de bald wieder richte und s isch nüt mega schlimms und ufwändigs.
malinchen: Also, Crepes zum Apero fändi glaub au lässig. Bsunders, wil ihr ja e richtigi Mahlziit wänd büüte. Isch halt weniger dekorativ als en suscht schön agrichtete Apero vom Beck/Metzger/Caterer. Wohnzitschrifte sind zum Teil u mega tüür, glaub ich. Aber han sie ja gratis grad zur Hand gha. Suscht lohnt sich d Investition ev. doch nöd. Isch ja nöd spezifisch deko-usgrichtet. Ich han so zwüsched 0-2 Ideä pro Heftli gfunde. Wobi, s einte heisst Wohnen und Garten. Die händ au e Homepage mit Ideä und Aleitige, woni scho bin go aluege. Git sicher au anderi mit HP.
TaeboyanaD Chleid-über-de-Chopf-Problematik wird sich bi mir au stelle. Ich wird en mehr oder minder unzerstörbari Frisur bruche. Oder versueche, vo une is Chleid ine z stiige. Ich wirdes ebe mehrmals müesse abzieh.
squishy: So schön, dass sich din Brüeder und din Verlobte so guet verstönd. Bi eus isch es au so und ich han mega Freud. Findes u herzig au, wie min einte Brüeder amel über min Verlobte redt. Sie sind ebe rächt vill am über Philosophie diskutiere und min Verlobte isch det rächt beläse. Min Brüeder und mich intressierts au mega, aber mir sind chli läsefuul. (Nei, bitte nöd fröge, öb ich nöd eigetli es Literaturstudium gmacht han... )
Pfingstrose: Mir sueched e Chile im Züri Oberland. Han jetzt bi dere, wo mer die Wuche sind go aluege, mal nagfrögt, wie tüür sie wär. Die hät eus jedefalls gfalle. Di ander wär zwar no bizli schöner, aber de Priis isch scho rächt überrisse. Mir werded sie wohl nöd neh. (Ev. wär sie eh z chlii.) Mached ihr demfall alli Iladige grad zweisprachig? Mir werded vermuetli eher eifach zwei Versione mache.
Alegna: Ui, danke für de Tipp wäg em Coiffeur und de Sache, wo mer vorher aleit. Stimmt, das sett keis ängsch T-Shirt sii. Hoffentlich dänki dänn dra! Und danke für de Hiwiis (au dir, kleinefeder), dass mer das am Hochsigstag dänn anderscht ume aleit. Wobi... Ich han für zum vo une istige bi Chleider mängisch chli Müeh. Ich han halt zimli breiti Hüfte und über die bringi nöd jedes (au passende) Chleid. Gratuliere zum Chleiderfund! Möchtsches zeige?
nala: D Chugle beschriibi une, aber falls möchtsch, chani au no di andere Föteli ine stelle. Sind allerdings gar nöd soo mega vil, ehrlich xeit. Ebe, es isch nöd umbedingt mega ergiebig xi. Zum chaufe lohnt sich die Art vo Heftli mines Erachtens eher nöd. Usser ihr wänd eh neu irichte oder so. Tönt super mit de Zeremonieleiterinne... Das heisst, ihr händ jetzt zwei gueti Optione, oder?
Chile: Weiss gar nöd, öb's e typischi Hochsigschile isch. Ich weiss aber scho vo zweine us em Forum, wo det händ oder tüend hürate. Für Reformierti isch sie gratis, aber mir sind beidi nöd reformiert. Ich han ebe scho au Müeh mit dem Priis. Ich mein, mir würded d Chile ja würklich au als Chile nutze und en Gottesdienscht drin halte. Es wär öpis anders, wänn mer es Konzert würded plane dete, find ich.
Drahtchugle: Es isch rächt eifach zum mache. Wobi mir di letscht jetzt zimli usenand gheit isch, defür sind die 4-5 vorher rächt guet gloffe. Han au als letschts rächt e grossi gmacht, für die muessi wohl no chli a de Technik fiile. Mer chan so Dinger (in schöner) aber au chaufe. Min Fründ hät no d Idee gha, dass mer au öpis chönt drii stelle. Es Cherzli zum Bispil oder au es Blüemli. Also, zumindest i grösseri. Ich dänk, ich wird dänn sotig ha mit öpis drin und sotig elei (di chlinere). Han eu Bilder aghänkt, woner paar vo mine xehnd (eini no mit em Ballon drin) und au d Inspiration und Aleitig us em Dekoheft. Ich weiss leider nüme, weles es xi isch, drum ohni Quälleagab. Han xeh, dass sie's rächt andersch gmacht händ. Wär ev. en Überlegig, öbi nöd au meh i die Richtig söll. D Hauptschwierigkeit isch eigetli fascht, dass mer de Ballon fascht nöd würklich chugelrund ufblase chan. Falls mer d Aleitig nöd chan läse, tippi sie suscht gern ab oder erklär, wien ich's konkret mach.
So... Ich schick das mal ab und fang en neue Biitrag a. Isch z lang worde.
daenu: Das tuet mir so leid, dass du dis Mami so früeh verlore häsch. Das glaub ich, dass es schmerzt, dass sie din zuekünftige Maa nüme käneglernt hät. Ich weiss grad gar nöd, was säge. Ussert, dass ich mir es bizli vo dem chan vorstelle, won ihr dure gmacht händ, und mit dir fühle. Ich wünsch dir vil Chraft und Troscht. Aso, wänn de Konzertflügel grad inbegriffe isch, xeht's natürli scho bizli andersch us. Oh, super, dass de Juwelier au Ring in eismatt hät. Wie xeit, mir chämtet gern uf dich zue. Hey, xeht mega schön us mit de Deko und em Bruutstruuss! Und isch en u schöne Saal det! Danke für d Fotis! Eui Deko passt u mega guet det ine!
Pfingstrose: Oha, bald Bruutchleidersuechi! Mit Konstanz und Mery's hani kei Erfahrige. Eifach mit em Chez Janine. Han det grad uf Ahiib mis Chleid gfunde. Und ich dänk au, dass sie no freii Samstigstermin hettet. Ah, du häsch no d janedoe gfrögt wäg Spitze. Also, ich han mis Chleid ja vo dete und es hät Spitze. Han au fascht nur Chleider mit Spitze aprobiert - und e grossi Uswahl gha. Allerdings muessi säge, dass es unter 1000 Franke eher schwirig würdi. Sie händ aber im Oktober e sone Aktion, wo glaub alli Chleider im Outlet nur 500 Franke choschtet. Det isch d Uswahl halt dänn chliner. Aber falls es für dich nöd soone wiiti Areis wär, chöntisch ja eifach mal verbi go luege? Det (aso eifach i de Outletabteilig) chönt mer aber glaub nöd so die superdupermegakrass Beratig in Aspruch neh, wo i de normale Abteilig ebe chasch. Findi au kuul mit de Bruutchleidershopping-Iladig. Gisch ne das dänn einigermasse kommentarlos? Also, ohni vorher z säge, dass hüratisch? Fändi no luschtig. Müsstisch eus aber dänn d Reaktione schön plastisch schildere!
Taeboyana, Pfingstrose, nala, malinchen: Also, jetzt muess ich glich fröge... Chan mir öper vo eu ächt säge, weli Fotografin ihr händ? Die schiint ja superduper guet z sii. Wobi, sie müsst au no einigermasse günstig sii, dass sie für eus in Frag chämt. (Hani mim Fründ versproche, dassi ganz fescht nach enere günstige Lösig sueche.)
Pricana: S isch Fehraltorf, wo so vil würd choschte. Mir sind halt beidi nöd reformiert. Mir händ eus druf igstellt, dass mir werded müesse zahle für d Chile (eus gfalled halt di reformierte da i de Gägend besser). Aber händ eher so 500 budgetiert (wil das au öpe i dem Rahme isch, was mer so uf de HP's vo verschidene Chile findet, sofern sie öpis ageh händ).
Im Chez Janine han ich persönlich gueti Erfahrige gmacht. Mini TZ hät aber im Mail (sie hät de Termin abgmacht, mega lieb) extra nach enere ifühlsame Beraterin gfrögt und mini Chrankheit erwähnt (da ich ufgrund vo dem Gaggiarschchräbs halt au gwüssi bizli spezielli Aforderige a mis Chleid gha han). Und händ dänn würklich e mega gueti, erfahreni Beraterin gha, wo das ganze aber au diskret ghändlet hät. Au de Schniiderin gägenüber - die hät sich gfrögt, werum ich's e Grössi grösser wel - d Beraterin isch nöd mega druf igange, hät eifach insistiert und nöd gross begründet, dass es sicher so segi. Das hani mega guet gfunde vo ihre.
So, und ez hani grad dini Beschriibig vom Chleiderchauf gläse und d Föteli agluegt. Xeht mega schön us und staht der sehr guet! Und werum du dir nöd gfallsch, weissi aso nöd. Hehe, mittlerwile hämmer beidi Föteli vonenand xeh. Wänn mer eus mal im Migros über de Wäg laufed, wirds luschtig. So mit argwöhnisch beobachte, öb sie's ächt au würklich isch, und werweise, öb mer sie söll aquatsche.
me: Aaaah, ich muess dringend is Bett. Morn hani wieder Chemo. Da freui mi gar nöd. Ich hoffe aber, es gaht wieder ähnlich guet wie letscht Mal. Isch nämli vill, vill besser gsi als die zwei Mal devor. Aber ha no welle verzelle, dass eus d Wohnig vo hüt u mega guet gfalle hät. Am obere Ändi vom Budget, aber e hammer Wohnig für de Priis. Jetzt simmer am überlegge (brüchtet ja nonig grad sofort e Wohnig). Aber zimli sicher bewerbemer eus. Isch eh fraglich, öb mer sie überhaupt würded übercho.
@Fara: Hammer die Chugele, gseht super us! Ig ha letscht Wiehnachte so ähnlechi Drahthärz gmacht, auerdings mitme Kartonhärz drinne, wome de mues imne Füür verbrönne (u dr Draht wird haut de schwarz). Het o nid schlächt usgseh. Fotografin: I schicke dir e PN mit de Agabe, isch ja e gueti Kollegin vo mir.
@daenu: Tuet mer o mega leid wäg dim Mami. Isch sicher itz im Zämehang mitem Hochzit bsungers schwär, dass sie nümm da isch. Mir geits scho chli so mit de Grosseutere, wo bi mir scho aui gstorbe si. Aber isch natürlech nid ds Gliche. I steue mir de aube vor, wie sie "vo obe" (oder wo ou immer) zueluege... irgendwie tröschtet mi das de chli. Wünsche dir trotz auem e schöni Vorbereitigszit und dass du sie eifach i dim Härz bi dir hesch.
@Pricana: Gratuliere zu däm tolle Chleiderfund! Passt perfekt zu dir und gseht sehr schön us! Und darfsch dr auso absolut gfaue uf dene Fotis! hehe, das mit dr Frisur chani absolut ungerschriebe. I ha no dänkt, i machi es schöns Zöpfli u spetistens nach 2 Chleider isches nur no ei Chuz gsi Super chöit dir hüt no uf Konstanz ga shoppe. Viu Spass!
aiaiai, dir heit ja geschter meeeeega viel gschribä. Bi sit 1.5h im Büro u ha no nid viel anders gmacht als öii Biiträg läsä...
I due jetz nid alles wieder ufgriife wo da gange isch...
@Lula: Wäge de Stumpe kenni mi ou nid mega guet us. GG u i göh jetz eifach immer a üsem Zwöisamkeitsabä wo mir einisch im Monet mache nachem Ässe no inä Lounge ga Stumpe roucke u hei sone Bewärtigsskala agfange wo mir alli drinne ufliste. Aber mir si bis jetz immer i däm Gschäft ga choufe wo gad bim BHF Bern isch, det näbem Schwizerhof und em Ochsner Sport. Sie berate eim würklech guet, ou wemä kei Ahnig het drvo...
Hihi, u dä Text isch ja würklech lustig... Scho nur dr Afang vo wägä am Tag nach dr Verlobig ga Zytschrifte choufe het gad passt bi mir.
@Pricana: Wow, das Chleid steit dir mega guet!!! Passt würklech guet zu dir... I dänkä es chunnt würklech sehr ufd Bedienig a wo me verwütscht. I ha ja ds Bern gad die gägäteiligi Erfahrig gmacht... I ha mi ou immer gnärvt ab denä doofä Brutschueh womä mues alegä zum Probiere. Würum wei äch deu das??
@Dänu: Oh das duet mir so Leid wägä dim Mami!!! I bi sicher sie wird a öiem Tag bi öich si und fröit sich, dass di GG und du öich heit gfunge!
@üsi Fotografin: hach, i ha gad säuber no mau müessä ihri Site ga aluege... Sie macht würklech sooo gueti Fotos.
@Fara: I wünsche dir ä guetä Tag hüt!!! D Chuglä gseh ja würklech cool us... das muesi also ou mal probiere! Hihi, wägä dr Quelläagab hani gad müessä schmunzlä, da het doch gad chli d Germanistin/Historikerin i dir gsproche...
@nala Ahhh wenn Lörrach nöd wiit weg isch bi dier, denn gits dett no Stesa Brautmode oder so öppis. Da ich mega gern es Ladybird Chleid möcht hani dette emal agfragt gah und de eMail Kontakt isch also sehr sehr herzlich gsi.
@Pfingstrose Heds klappet mitem Termin?
@Lula Bis jetzt sind d'Möbel no unataschtet. Wie gseit, ich wirde de Schrank dett sicher ned umenandzügle. Komischerwiis isch de Bode hüt nümme sooo stark gwellt wie gester. Aber de Bodelegger hed sich no ned gmeldet. Langsam beschlicht mich sGfühl, das ich chli pech ha mit Lüüt wo sich bi mier sötted melde
@Taeboyana Na, heds klappet mit pünktlich heigah?
@Pricana Mier wohned ime zwei Familie Huus, eifach zur Mieti. Wieso sich de Laminat wölbt wissen die Götter - oder de Bodelegger, wenner sich de mal meldet... De 'alt' DJ hed sich gmolde und mier bestätigt, daser ame andere Paar zuegseit hed will mier eus ned gmolde hend. Je meh ich da drüber nahdenke desto meh regts mi uf. Schliessli simmer echt zmitz i 'Verhandlige' gsi. Janu. De 'neu' DJ hed sich au gmeldet, verlangt 1500.- und wird unter keine Umständ drunter gah. Für euses Budget isches es bitzli viel... Müend eus das jetzt überlegge. So und zu dim Chleid. A dier gsehts viiiiel viiiiel schöner us, als a dere Vorfüehrdame!!! Wirkli es wunderschöns Chleid und staht dier usgezeichnet!!
@daenu sie hed ebe gseit gha, dases chli länger chönnt gah will sie ebe schwanger isch und chli viel um d'Ohre hed... Irgendwie wärs mer unagnehm jetzt go stresse willi dett ebe gseit ha, es seg keis Problem. Hey euche Saal isch ja en Traum Ha mi grad chli verliebt! Gratuliere!!!
@squishy Dini TZ isch ja herzig! So schöön, dass sie sich scho so Gedanke macht!
@Fara Ha das mitem PW grad nagholt! Das mit de Föteli am Abig bruche hemmer au scho denkt. Aber da hani no kei konkreti Ideeä. Und suscht findis au gar ned sooo nötig. Dasmer sie für eus hend isch wichtig D Drahtchugle sind der echt glunge! Supii!!
@malinchen Geeeell, es isch sones super Gfühl wennmer weiss, dasmer die perfekt Fotografin buecht hed, ich denkes au immerwider :)
@Pricana woooo mega mega schöns Kleid!!!! gfalltmer u mega!!! gratuliere
@Fara ganz schöni Drahtkugle....merci fürs zeige!!
Liebi Brütlis i chönnti gad brüele.......sitze da im Büro und ha gad wiene Schock und muess das gad bi öich loswerde.... Ha Gestern ja dere vode Verwaltig vode Kirche Burgdorf gschribe megde Blüemli streue. Ner het si gmeint das döfme ja nid das gäbi Fleche a Bode. Ner hani ihre das gschribe:
Guten Tag Frau Baumgartner
Da wir langsam mit der Planung unserer kirchlichen Trauung beginnen, wollte ich mal nachfragen ob es bestimmte Richtlinien in Bezug auf Dekoration oder Blumenstreuen von Blumenmädchen oder anderem gibt in der Kirche Burgdorf?
Freundliche Grüsse
ner hani vori es Mail vo ihre druffe:
Sehr geehrte Frau Berger
Eigentlich sind wir eine reformierte Kirche, ein Gotteshaus und keine „Kulissenkirche“ oder „Theaterplatz“. Beachten Sie doch die Kirchenordnung des Kantons Bern. Er ist auf der Homepage ersichtlich. (www.reberuso.ch)
Wir wünschen in der Kirche auch keine Stoffblüten, denn ich nehme nicht an, dass ihre Gäste diese alle wieder auflesen werden. Auch ein roter Teppich gehört nicht in eine Kirche.
Anmelden
iiich han mis Kleid gfunde !!!! jipiiiih! Aber vo Afang a.... :)!
isch jo super könnet ihr de dag morn grad witr nutze für s shopping!
weiss jetzt grad nid was mache.. i schlof am beste nomol drüber! 
Schickt sii eu so als Goodie es unbearbeitets?
So en Schrank kenn iich, er macht mir jetzt scho Buuchweh uf nächst Summer. Er isch zwar ganz noii us dä Ikea. Aber er isch es Usstelligsstuck gsii. Das heiisst scho zämä gmacht und mit so Nägel befestigt damits jo hebet. Meh chan en gar nöd usenand schruube. I frag mii, wiä mir dä in d'Wohnig bringet, je nach dem ii wellem Stock mir wohnet.... 
