Hey zäme

Jetzt bini hüt irgendwie glich nüme dezue cho uf eui Biträg izgah. Aber ha no churz wele Tschüssli säge. Wird di negschte Täg wohl nöd mitschriibe, da ich wieder zur lässige Chemo dörf atrabe morn. Isch halt blöd. Aber es lohnt sich.
Das Mal hani übrigens au alli Drahtchugle und de Draht und d Ballön zum sie herstelle us mim Blickfäld verbannt. Au grad di andere Sache, woni di letschte Täg baschtlet han.

Liebs Grüessli id Rundi,
Fara

uiii i verlüre völlig de a schluss irgend wie wei aui öppis vomer ( aber ned s militär us stürbüro)

gloube ha sicher um die 20 site verpasst :(


@ fara fingi super wägem schwümme das isch öbis wo mir ou ligt u drum wider i betracht zoge wirt nur hei mer äbe ke badi i de nöchi..

@fara oje die chemos kenni ou no ganz guet vo mim papi winer nachane nüme het möge u glich wen e hoffnig hesch das aues super usechunt u wider gsung wirsch :)
mag das aune gönne wensi wider gsung u fit wärdet...

@ konto mir hei kes gmeinsams konto u ou kes spetziels i grichtet dä wo wot dä zaut fangs :)
s schloss heimer scho müese komplett zahle u das het de är gmacht ;)
geschder isch no vom fotograf e azahlig cho..
u so bastle louft im momänt aues übermi :)
aber mir schribe uf was was choschdet damer so e überblick hei.

aber schüsch louf nix nur weti no wägem appero go froge u de het sich äuä für das johr im dez louft bi üs i de bude gnue so dasni ned ou no zit ha für hochzit do wei aui ihre wiehnachtsurte siuvester u grittibänze wos sit geschder ou scho git ;)

Guete Morge iher Liebe!

@nala
neiii, leider hemmer de vintage-Märt nöd entdeckt. Schade!
Findes immer sehr truurig wenn langjährigi oder/und tiefi Beziehige plötzlich es Endi nehmed. Bi eusem Kolleg ischs eifach eso, das er mier wahnsinnig leid tued, willmer ihm agseht wie sehr er liidet. Mier hend ihn jetzt hüt Abig iglade mit eus zum Fuessball zcho und denn bi eus z übernachte. Hoffemer das lenkt ne de chli ab...
Hey so cool wege de Location, gratuliere! Und 30.- Mindestkonsumation isch ja nüüüt. Selbscht 80.- hetti no günstig gfunde. Allei en Mehrgänger ohni Getränk isch ja oft scho so tüür... Hend iher eu scho für es Menü entschiede?
Und mit de Sängerin isch ja au mega cool. So guet, wies bi dier lauft grad :) Schööön

@Pfingstrose
Daanke aber trotzdem fürs drah denke! GG zeigt allne sini Iron Man Chnöpf ume, das isch glaub scho s perfekte Gschenk gsi
Wieso hesch dich denn gege Tansania entschiede?

@squishy
guet gmacht wegem Fingerprint Bild :D mier organisiered das denn glaubs selber. Mine TZ trau ich ebe so Chlinigkeite nöd unbedingt zue...
Mir hend eus eigentli no gar kei Gedanke gmacht zu de Flittis, es isch nur mal die Destination gfalle... Aber wenn, denn uf jedefall mit Safari. Finde das puuri Entspannig :)

@Fara
Hey ich wünsch dier vill Chraft und Durchhaltevermöge bi de Chemo. Drück dich!!

@Sue
öppe so würd ich mier das au vorstelle mit de Flitterwuche, eifach gsamthaft chli länger :) Merci fürs brichte!

@Azahlig
Mier hend no gar nienets en Azahlig müesse mache. Im Resti hed eus d Chefin verzellt, dass sie sit em März uf en Zahlig vome Hochziitspaar warted. Ha sie de gfragt obmer grad en Azahlig sölled mache und sie hed de aber gfunde, das seg nöd nötig wasi chli komisch gfunde ha, wenns ja scho so schlechti Erfahrig gmacht hend :D Ich find das mit dene Azahlige ebe amigs gar nöd so schlächt.... so tüend sich d Chöschte chli verteile :)

@me
Has hüt morge nümm usghalte und mini Chefin mal gfragt ob sie eigentli d Iladig nöd becho hed (eifach au, will ich sie niene im Gschäft ha gseh hange) und denn fragt sie mich, ob d'Iladig nume für sie gelti, debii hemmer uf sKuvert gschribe 'as ganze Team'. seit sie so 'ah doch, ha sie becho, danke, aber das isch ja ame Samschtig, denn chani de Lade ja nöd zuemache, mier chönd höchstens so uf die 6i dett si' Denn hani ihre gseit mier hend de Tagesablauf natürli no nöd, aber ich denki, dasmer am 6i öppe bi de Aperolocation gönd und iher glaubeds nöd was sie denn gseit hed: 'Denn müender eue Tagesablauf halt chli richte nach eus damit mier au chönd cho!' Mier heds gad abgstellt. Am liebschte hetti gseit sie söll doch eifach bitte deheime bliibe.. Ha de aber nur gseit es zwingt sie ja niemer.
Findes so frech!

_janedoe ojee irgend wie isch gloubs bi jendem hochzit so das öpper us de reihe tanzt :(

mir hei no keni chärtli gschikt ha aber müese i de bude fangs säge wie das ablouft wöui das i üse houptsitz mues schike so damer no e batze bechöme u i mini 3 tag frei ;)
u macht de schef vo mir nur so jo gäu mir chöme de gärn zum hochzit i organisiere de öpper wo dene uf üsi beckerei ufbasst!
hmm guet u rächt aber i ha nüt gseit das si iglade si :) schaffe zwar zäme aber sooooo es super team simer de no ni grad dasi aui am hochzit wot ....

@munggi
Haha, heder sich grad eifach selber iglade oder was? Grundsätzlich findis ebe scho sehr schön, wenn s'Team sich mitfreut. Eusi Lehrtochter isch vo Syrie und erst sich ca 7 Jahr i de Schwiiz und mit de Gepflogeheite mängisch no nöd so vertraut. Denn hed sie mich eis Mal gfragt ob sie denn au iglade isch, das fändi sie soooo schön.... Und offebar hed sie denn agno, das sie für de ganz Tag iglage isch und nöd nur fürs Apero, will sie das halt au gar ned kennt. Hami de no nöd gwüsst usezschnurre... :/

Laded iher denn sGschäft au nöd zum Apero i?

@_janedoe uii aber härzig wensi chunt cho froge ;) dänkes ou dasi das ned kennt, aber wirt jo äuä scho drufe gstange si das fürs appero wort si :)

jo si hei sich säuber i glade aber wensi wider mau chli lieber zu mir si de dörfets scho cho aber irgend wie isch augemein de wurm dinne... aber es got no no es zitli ;) aber grundsätzlich häti jo nix de gäge wensi chöme aber ned säubschd iladent

@lil.lian hamer dene notitze gmacht wasi aues wot froge u das de ou öppe e gueti offerte usechunt jenachdäm si die sooo tür ...