Hallo liebi Brütlis!

Hui wie wird das nächst Wuche, wenni de dr neu Job agfange ha und nümm cha privati Sache mache am PC (finde das macht sech gad am Afang nid würklech guet und wott mi ja de ufe Job konzentriere)? De chumi de äuä gar nümm mit hie...

@Fara: I dänke adi und wünsche dr viu Chraft und Energie, dass schnäu wieder fit bisch!

@Janedoe: Dire Chefin schlifts ja wou... was die Lüt mängisch für Vorstellige hei?! Mache mi ja scho uf aus gfasst we mir d Iladige verschicke. Bi üsne STD Magnetli si gröschteteils positivi Reaktione cho, aber vo viune o gar keni, was mi de o chli het möge.
Du hesch mi no nach üsem Budget gfragt. I schickes dir süsch o am liebste per Mail, wetts lieber nid gad hie im Plenum offebare Schicksch mer dini Adrässe per PN?
De geits dim GG würklech im Job grad chli glich wie mim. Er wär mega motiviert und wett gärn gförderet wärde, aber sie wei ihm eifach nüt biete u gseh gloub o sis Potenzial nid. U vo däm wo sie verspräche, chunnt meistens nüt. Er isch aber scho jetz chli am luege.

@Pfingstrose: Komplimänt mit euem Training, das isch ja super! Vo zäme trainiere chani leider nur tröime... i bi ja säuber eigentlech sehr sportlech u trainiere normalerwis 4-5 Mau pro Wuche, vo däm här isches für mi nid sones Problem, aber mi GG isch chli e Couch Potato... er het ds Glück, dass är meeeeega schlank isch und cha ässe, was är wott, aber i fänds haut aube glich no gsung, wener chli meh Bewegig hät. Und wieme ja aube seit, isches o bi ihm nach 30 nümm gad wie mit 20i u irgendwenn gseht me de langsam scho chli, dasses a Training fäut Wasmer aube gärn zäme hei gmacht isch squashe, bike (wobi är lieber abe und ig lieber ufefahre ) und wandere. Ig säuber wett im Momänt wieder chli Muskle ufboue, sit dr OP bini chli liechter und merke zum Teil, dassmer Hose witer si as vorhär.

Die wo no wette trainiere/straffe für ds Hochzit und ir Region Bärn wohne, ladi ganz härzlech zu üs iz Tae Bo i Isch sehr effizient, verbrucht viu Kalorie und definiert dr Körper ziemli

Wäge Chinderplanig nachem Hochzit: Bi üs wird das de scho gli es Thema, mir si ja beidi o scho 30i gsi und dr Chinderwunsch isch bi beidne da. I bi nach dr Matur viu greist und ha vo dämhär nid zGfüu, dassi no öpis mues nachehole Aber zersch muesi ja o no chli im neue Job schaffe. Dr finanziell Aspäkt isch bi üs scho o immer es Thema gsi. I ha bis 24i gstudiert und nume so Studijobs gha und när paar Jahr sehr schlächt verdient. Momentan verdiene mer fasch glich viu, aber i ha die höcheri Usbiudig as GG und im neue Job wird ig meh verdiene as är. I weiss aber scho jetz, dass ig nid die geboreni Husfrou wirde si, wo glücklech 100% as Mami dähei isch... u GG isches o mega wichtig, dass o är öpis vo de Ching hätt. Drum wette mir, wes irgendwie möglech isch, so chli ufteilt schaffe, vielech 80% u 60% oder so. Chönnti mir guet vorsteue. I bi absolut nid karrierebesässe, aber e chli e Usglich müessti eifach ha. Aber es mues ja de zersch o no klappe und i möcht mi nid chum isch ds Hochzit vrbi, scho afa stresse dassi de möglechst gad sött schwanger wärde... chunnt ou no ganz drufa, wenn as mir de id Flitterwuche gö.

@Konto: Mir hei sowohl es gmeinsams Konto für Mieti u Hushaut (da mir scho sit 6 Jahr zämewohne) und itz o no es separats Hochzitskonto, wo beidi jede Monet e Betrag druf izahle. Abem Novämber wird ig 200.- meh pro Monet izahle, wüu ig de meh verdiene und mir so Dekodetails und Schnickschnack o wichtiger isch Chlini Sache zwüschedüre nähme mer o mau vom Hushautskonto, aber die grosse Sache aui vom Hochzitskonto. Azahlige heimer bis itz für d Ringe u für d Fotografin gmacht u bis Ändi Jahr müesse mer no 1000.- ad Location azahle. Findi völlig ok.

@Flittis: Mir hei mau Hawaii im Visier gha, aber dert wetti scho 3-4 Wuche chönne ga u i mues itz zersch luege wies mit de ferie usgseht im neue Job. Wemer nid so lang chöi ga, mache mer haut vielech öpis "eifachers", so 2 Wuche nöime a Strand (immer mit dr Option, dassme no öpis cha ungernäh/aluege, da i nach eim Tag am Strand liege kribbelig wirde und e Zuemuetig zum ushaute ). La Réunion hani scho ghört sig so schön. U de het GGs Gotti (woner zwar sit ewig ke Kontakt meh het, aber sis Mami scho) in Sambia sone Lodge wo sie o Safaris u so abiete, aber eher eifach, nid sone Luxusschuppe. Das wär sicher o Hammer. Gäb auso viu Möglechkeite!

@Sue: D Büecher hani bi amazon.com bsteut und ds einte heisst Cupcake decorating lab, ds Angere 200 Tips for Cake Decorating - Tips, Techniques and Trade secrets. Bi gad chli ine Bsteuruusch cho, git so viu! Aber i mues mi bis im Dezämber geduude, wärde ersch denn glieferet... aber de chani mi hoffentlech für Wiehnachte chli ustobe

Ga hüt Nami mau im Tchibo ga luege wäg dene Bastusache, mis Mami hets o scho gseit gha die heige no guets Züg.

Itz wotti no uf Ifolor Kalender mache mit üsne Engagement shooting Föteli und vielech o no vo Oustralie... sie hei gad e Aktion im Momänt!

Zuletzt bearbeitet am 30.10.13 11:41

Taeboyana
Danke villmal für dini Planig. Findi super so e Ufstellig!! Ich han zersch dänkt ich mach no e Todoliste mit Terminerinnerige (wenni wem muen alüte) abr ich chan eigendli alles i ei Liste integriere..
Ja min Traum isch au mal das ich 60% und er 80% wür schaffe. Bi eus isch halt au chli "s'Problem" dass ich halt eifach scho meh verdiene wie er, und ich chamer au nöd vorstelle ganz diheime z'sii.

Pfingstrose
Min GG isch Schriiner und ich han en KV-Job. Und bi eu?
Ja das mit em Huus wär au mal en Traum bi eus. Abr idere Region wo mier wohned chasch es vergesse, da zahlsch au für e Eigentumswohnig gad ei Million. Den müsstemer scho wiiter ufs Land zieh, abr das möchtemer beid eigendlich nöd.

Lilian: Mir hend beidi en KV Job. Aber isch ja scho mega gschäftsabhängig... Chunsch du us de Region ZH wenn so schriebsch? Mir ebe eigentlich au aber sind jetzt gad as agrenzende AG zügled. Chaufe wird wohl no länger en Traum blibe im Kanton Züri.

uhh hüt gohts widr ab do

squishy: so lustig bisch go luege mir maches nid ime saal sondern bi guet wättr idrsunset lounge (garte) und bi schlächtwättr die rigi hütte! hoff aber ganz fest uf d garte-variante
hoff dini TZ wird das mitem fingerprint umsetzte! wär scho toll!
ab und zue mues meh halt brautzilla si

fara: wünsch dir viil kraft die kommende däg!

janedoe: mir mache dört ebe nur de apero.. unseri obe location isch scho bestumme. dorum findi de 80 fr nur für de apero schon o happig.. jooo freu mi au grad voll dases so lauft! bi grad voller tatedrang!
dini chefin hets jo! für si de zytplan apasse! phh! voll fräch!

munggi: isch au no fräch sich grad sälber iilade.

lilian: i hoff de fotograf passt zu euch und s wird e guets gspröch

taeboyana: merci viilmol für s mail

familieplanig: mir wärde wohl no 2-3 joor warte mit de kinder. obwohl ich am liebste sofort würd welle afoh aber mir si jo beides no studis und er wird nägst summer ich im friehlig 2015 fertig si.. den simer beidi no dr meinig sötte mir zerst no chli „karriere“ mache. mir würde de ebe gärn beidi reduziere und so d kinderzyt ufteile. de ischs sicher nid blöd wen mir zerst e guete job usw hän. mir si jo de immerno untr 30 und das wünschi mir halt scho vor 30 mami z wärde

sorry ha nur schnäll alles übrfloge, hoff ha niemer vrgässe

Pfingstrose
ah soo luschtig :) wo bisch den ufgwachse?
Ja genau das mit de Immobiliekrise findi guet :))
Was isch den das für e Gwundernaseliste?