So schön, hüt isch wiider viiel los do inne! Schön hend hüt irgendwiä alli gliichziitig Ziit zum siich ustuusche
Sue: Stimmt, meh selber müässt ja au Ziit ha zum alüte Viellicht namal es Mail? Will bim schriibe muä meh nöd uf passendi Uhrziite achte? Es tönt würkli meega schwierig mit diiner einte Bruutfüährerin. Gell, zum einte chan ii's uuh guät verstoh und anderersiits isch es eiifach nöd fair vo ihre. Wer weiss, viellicht hilft wirkli es Briäfli? I hoff für eu, dass es siich leiit und du dini Hochziitsvorbereiitige gnüssä chasch und eues Treffe hüt Obiig mit Vorfreud und Lachä usgfüllt isch!
Pfingstroose: Es tönt extrem deno, dass sini Eltere Verlust Ängst hend? Isch denn er dä jüngscht Sohn/dä einziig? Mii GG isch au es Nozügerli. Und als Frau bechunt meh denn da scho chlii gspüürä. Vor allem am Afang hends ned welle akzeptiere, dass jetzt dä jüngschti au erwachse wird.
Malinchen: Gell, so was cha nu PH bzw. Schuälleiter fröögä. I ha d'Ufgab gar nöd verstandä, will ii säg ja am Samichlaus es Gedicht über ihn und nöd über mii…
Littlefoot: Phuuu, Autofahre lerne isch ebe scho tüür. I ha das nonig hinder miir. Hesch dir schomol überleiit es Occasionkleiid z'hole? I unserer Region würd ii gad dä Lade empfehle monarosa.ch aber dä isch halt nöd gad um dä Egge vo diir? I wünsch diir, dass morn dä Tag und Shoppe gliich gnüsse chasch. Diir öpis gönne chasch und diich verliäbsch in es Traumkleiid! I denk es macht en groosse unterschiid, ob meh nöd hürotet us finanzieller "Not" anderne "Schwerpünkt", aber du weisch, dii Partner hebet zu dir und ihr hend zämä eh Familie. Als wenn eiifach dä Partner siich nöd biinde wott. I stell mir das sehr verletzend vor.
Nala: Morn isch shopiing agsaiit! Viiel Vergniägä, Froiid und Durchhaltewille
Me: I ha gad mii GG gfragt, ob ii eu d'Musterkarte zeiige darf. Wenn er ja saiit, gsehnt ihrs hüt Abiig no ii eune PN
Wünsch eu allnä es schön sunnigs und erholsams Wuchenend!
So, nach fliessigem Mitläse, mitfiebere u Ideesammle mäudeni mi o mau z Wort. Mir wärdet im Juni hürate, si abr no vou nid wiit mit de Vorbereitige. Auso Location & Standesamt heimer abgmacht, abr de Rescht isch no unklar. Naja. Mir hei ja no lang Ziit (seit ämu mi GG)
Ig findes uh schön da mitzbecho, wie die eint um die ander ihres Troumchleid findet u ig bi scho gspannt uf de Tag, wenn ig de ändli darf gah aprobiere. Ig wett das äbe gärn mit mim Mami u mire Schwöschtr zäme mache, abr die erfahret erscht inere Wuche, dass mir überhoupt hüratet. Vrgieble fascht bis denn, wetts doch am liebschte aune grad säge
@Littlefoot: ig ha o zwöi mau ad Prüefig müesse u bim zwöite bini o vieu sicherer gsi. Mittlerwiile hani e Outomat, dasch haut scho gäbiger, da muessmer nid eso ume stresse mit schaute u vor auem z Afahre am Hoger isch supi-eifach! Wenn dir daheime eh e Outomat heit, denn würdi d Prüefig uf so eim mache. Chasch ja nachane immer no upgrade, faus denne mau e handgschautete wetsch ha.
So jetz no zumene "Fruscht-Problem" vo mir: ig ha e Chefin, die isch so gägä z Hürate u Chinder becho findeti si ganz schlimm, wieu denn fäuht mer ja de bim schaffe geng u mer leischtet nüt meh u das sigi aues eso müehsam. U mir söue ihre de ja säge, faus mer irgendwenn e mau e Chindrwunsch hei etc. Ig finde abr, dass se dä Chindrwunsch gar nüt ageit. Wenni schwanger würd wärde, würdis ihre ja de eh emau säge. U jetz isch äbe das mitem Hürate. Ig weiss gar nid rächt wienis ihre söu säge. Ha zwar de Vrlobigsring anne, u ghofft, dass sie mi vo allei druf aspricht, het sie abr bis jetz nid. U ig weiss, dass sie denn grad de Chopf vrlührt, wenni ihre säge ig tüeng hürate im Summer. Isch eigentli vou trurig, dass mer muess "Angscht" ha, das de Chefin z säge. Wie geits öich eso i derä Situation? Ha nume ig sone komischi Chefin?
So, bi gspannt öb die zwöi Brüütlis morn im Domino ihres Chleid findet. Wünsche ämu vieu Vrgnüege!
Ah no öpis, ig ha jetz oft gläse, dass verschiedeni e "Andrea" us Fotografin wei resp. hei. Ha leidr nid mitbecho wär das gnau isch. Chamer öper de gnaui Name säge? Wie gseit, mir hei bis jetz no fascht nüt organisiert, scho gar e kei Fotograf Viellecht wär das ja e Option. Odr Pfingstrose: isch sie scho bi dir am Fötele?
littlefoot Oooh das dönt aber härzig mit de Füessli und Händli.. Findi ja e meega kuuhli Idee!! Phuuuaaa nomol 10 Stunde neh? Ja das isch würkli vill!! So blöd. Und häsch öbis gfunde bim shoppe? Dis Chleid? Häsch d'Nala05 känneglernt?
Nala05 Und wie isch bi dier gseh? Öbis gfunde?
Squishy-fishy Danke für dini PN!! Ich find d'Charte super!! Isch eu würkli guet glunge.. Gahts jeze definitiv in Druck?
Claudilein Gratuliere dier und dim GG zu euere Verlobig!! Oooh das glaubi, ich chönt glaub au nöd eifach schwiege!! Den wünschi eu vill Spass bim verzelle. Ou da häsch ja e tolli Chefin. Wet sie eu gad künde, wenn sie wöt, das mers ihre seit, wennd gern Chind hetisch? Gahts no? Zu dem Ziitpunkt chönt sie eu ja no spicke, abr wenn den schwanger bisch isch es scho zspat für sie.. Voll dänäbet!! Ich wüsst glaub nöd, öb ichs ihre scho wür säge wegem hürate.. :-/ Wege de Andrea, muesch mal google: andrearufener
Me Ich bin hüt ja au no s'zweite Mal go luege wegeme Chleid. Ich bin im Liluca in Züri gsi. Ich han d'Uswahl einiges grösser gfunde als im Merry's in Züri. Ich han de Beraterin gseit was ich mier so vorstelle und sie hät mer den idere Art es paar Chleider zeigt und ich han den die chöne probiere. Han den au no es Korsett und Schueh becho. Han den würkli es super schöns Chleid a gha. Seinzig wo mich den gstört hät, isch es graus Band gsi, wos hät. S'Chleid hät mer scho würkli guet gfalle, abr ich wür gern es Chleid ha, wo komplett wiis isch. Sie hät den au no es wiises Band, statt dem graue, aneghebt, abr den häts irgendwie komisch usgseh. Han mich jeze entschiede no zu Chez Janine zgah. Ha am nächste Samstig no en Termin becho. Han so e Standart-Beratig, det chasch 2-3 Chleider aprobiere (isch au nöd würkli vill) und du häsch kei persönlichi Beraterin und das wär kostelos. Den gids no e anderi Beratig, die chan bis 3 Stund gah, aber für das zahlsch den CHF 50.-. Findi no struub und für das bini echt nöd bereit zum zahle. Schliesslich wännd sie ja Chleider verchaufe. Mal luege wie das wierd. Meh chämti den de Betrag wieder über wenn innerhalb vome halbe Jahr es Chleid würdisch poste.. Aber das Chleid vom Mery's isch definitiv dusse.. Und das Chleid vom Katalog woni mal postet han, gids leider nüme. Isch vo de letztjährige Kollektion
Sooodeli ich wünsche eu no es restlichs schöööns Weekend. Möcheds guet..
@nala und littlefoot: uuuuund? Chleider gfunde?? Bi u gspannt uf euche Bricht!
@squishy: Ou i möcht euchi Chärtli ou u gärn gseh! Super dasses ufgeit mitem Timing bis Wiehnachte.
@claudilein: wiukomme bi üs im Forum, vrzeusch no chli vo dir? Vo wo siter, wie heiternech kenneglehrt und wo/wie weiter hürate? Ig (und sicher ou ganz viu angeri Brütlis hie inne) bi e schrecklechi Gwundernase Wäge dire Chefin: Ig würd nur soviu säge, wie du muesch, aso vielech dass dir demnächst hüratet. Familieplanig isch euchi Privatsach und o wenn sie gärn würd, dass du ihre das vorhär scho seisch, muesch du das nid. Da bini würklech dr Meinig, dassme as Frou nid immer scho vorhär aus mues säge und eher chli egoistisch söu si. I meine, wär weiss 100% im Vorus, ob sie de würklech cha/wird Chind ha? Je nachdäm schadets eim de nume, weme zfrüeh scho öpis seit. Das längt no lang, we de schwanger bisch. Das isch uf jede Fau mini Meinig Ig ha ersch gad im Novämber e neui Steu agfange und drum o chli Bammel gha vor däm Thema, irgendwie platzt me ja mit so News o nid gad ide 1. Täg use... aber inzwüsche hani irgendwie ganz es guets Gfüu und bi ziemli sicher, dass das nid es Problem sött si. I ha eigentlech dänkt, dassi de im Januar, weni eh es Zielveribarigsgspräch mitem Chef ha, ihn wirde informiere, aber itz isch grad e chli e spezielle Fau iträte u zwar hätti söue Visitechärtli für mi bsteue i 3 Sprache à 100er-Blöck... u de ischmer irgendwenn igfaue, dass das nid auzu viu Sinn macht, jetz soviu zbsteue, weni scho ab Mitti Mai 2014 e neue Nachname ha u me aui wieder neu müessti drucke dr Chef isch jetz die ganzi Wuche wäg gsi, aber i ha mir vorgnoh, ihms am Mänti zsäge. Wirde de scho chli närvös si, aber hoffe er fassts guet uf...
D Andrea isch e Kollegin vo mir und ig ha sie hie inne empfohle. www.andrearufener.com Sie machts hobbymässig, aber mit sehr viu Härzbluet, viu Talent und super Idee. Gang doch mau uf ihrer Site ga luege.
@littlefoot: Was, nomau 10 Stund, wed se itz "nume" ufem Outomat machsch? I meine we du houptsächlech mit schaute Müeh hesch, sötts ja ufem Outomat kes Problem meh si. I würd mau d Heufti näh und luege, vielech längt das ja scho? Oder muesch im Vornherein fix säge, wieviu Stund?
@Sue: ou nei das isch de schad wäg dire Brutfüehrerin... Isches sie wo ig kenne? Ig verstah sie einersits scho, aber das isch ja ke Grund, dass sie sech när so benimmt euch (u vor auem dir) gägenüber. Oder isch sie nidisch uf die angere TZ? I würd o mau versueche, nur mit ihre z'zwöit es Gspräch zsueche. Ig ha denn am Abe vom Nachtmarkt mit dr Andrea abgmacht zum e Glüehwy ga näh und d Ferie izlütte, aber chönnt ihre ja eigentlech vorschlah, dr Glüehwy bi dir cho znäh (und es Cupcake o no grad hihi )! Mau luege ob öpis drus wird, cha no nüt verspräche. Uf au Fäu würde mers nid vor de 8i schaffe, wüu ig no Training gibe zBärn.
@Babychärtli: Ih dasch ja furchtbar mit dene Sprüch, wetti auso o nie! Aber wüsster wasi o furchbar finde? Lüt wo uf Facebook jede.einzeln.Monet müesse bekannt gä, wie aut ihres Baby jetz grad isch (ja genau, e Monet euter as bim letschte Post) und was fürnes einzigs Wunder das isch. Oder die wo die blöde Disney Chläber sammle und poste, weli as ihne no fähle und me söu doch ase dänke I ha würklech sehr gärn Ching und mir wette ou e Familie, aber i so Situatione sägi geng zu GG: Luegsch bitte, dassi nie soZüg wirde poste? Oder dr Hammer: E Kolleg vo mir het vor paar Jahr, no bevor das Ching isch uf dr Wäut gsi, scho postet wie's wird heisse und wie gross u schwär ases denn grad bim Ultraschall isch gsi.... Hallo?!
@me: I ha hüt üsi Checklischte wieder mau aktualisiert und gseh, dassmer eigentlech scho rächt viu erlediget hei, woni ersch nächsts Jahr hätt terminiert gha i ha de die wichtigschte Sache, wo ir nächste Zit astöh, agstriche und i gloube, es isch würklech aus im Grüene. D Azahlig wo üses Restaurant bis Ändi Jahr het verlangt, heimer o gmacht u morn weimer üs itz de vielech nomau chli mitem Apéro befasse. Nächst Fritig hani frei und ga mit dr einte TZ uf Konstanz, de wotti de no luege wäge Hochzitsschueh (Tipps für Schueläde wiukomme ) und i dä Nanu Nana wo paar vo euch so hei gschwärmt. Bis itz hani mi äbe mit Dekosache no sehr zrüggghaute wüui nid eifach iz Blaue use wott druflos bsteue, sondern würklech Sache, womer o konkret bruche. Uf etsy hani aber vo Letscht ganz härzigi Karton-Ahängerli mitme glochte Härzli bsteut (die da: https://www.etsy.com/de/listing/16077368...hop_home_active ) woni as Ahängerli für säubergmachti Güezi / Cupcakes / Pralinés wott bruche. Dert hani när dä Stämpu vom Depot (made with Love) drufta und es gseht würklech u härzig us! Ha dänkt die chönnt me eigentlech ou guet am Hochzit as Ahängerli für d Gaschtgschänkli bruche.
@lil.lian: Gäu das bisch du gsi wo'd ds Engagement shooting bir Andrea wosch mache? Mega cool. I finde das ghört doch irgendwie drzue und biete doch no viu Fotografe a? Aber bi ihre wirds eh super, da chasch di freue! Wäg dim Chleid, chame de dä grau Gürtu nid wäg näh, isch dä fix dra? Was isches de süsch fürne Stil? Bechunnt me die 50.- vom Chez Janine agrächnet, weme ds Chleid när dert chouft?
@Pfingstrose: Tönt würklech nid eifach mit de Eutere vo dim GG. Chönnts si, dass das o no chli e kulturelli Sach isch? Bi de Südländer isch ja d Familie sehr wichtig und die wohne ja meistens würklech sehr lang im Hotel Mama ämu bi Italiener und Spanier isches gloub fasch normau, weme mit 30i no dähei wohnt? Aber i findes ou sehr wichtig und guet, dass dir mit ihne weit Klartext rede, das geit würklech nid, dass du geng so Vorwürf bechunnsch. I hoffe fescht, dass dir d Woge chöit glette unds es guets Gspräch wird.
So, i due itz no - e Tag zspät i weiss - Grittibänze bache Aber die si ja immer fein. U när muesi mau wieder e Rundi "4 Hochzeiten und eine Traumreise"-Fouge nacheluege.
bis jetzt hani eifach still mitgläse, jetze verzelli aber glich mol chli öppis vo mer.
e ha dr Hürotsatrag im Sept becho und mer hei denne erscht im oktober chöne afo plane und hei denne schnell müesse merke dasses doch scho zemli knapp werd ufs nöchste johr... üsi location esch leider a üsem wunschdatum (20. sept) scho usbuechet gse und so hürote mer jetze am 4. Oktober idr Mangerie in Egolzwil. Mer si üs bidr ganze Planig fascht niene wörkli einig, esch aber no luschtig. är wett es Resti, ech Catering, ech wett en schöni mittelalterlichi Chile, är sone pompösi schwarz-goldigi, ech wett en Tüll Rock, ehm gfallt sone vorhang öberhaupt ned! :-) wie ihr gsähn, bliibts aso spannend be üs! :-)
mer hei eigentlech noni so vell. d Location hemer fang und letscht Woche simer nochli ga chilene aluege. si am SO öppe 10 Chilene abgfahre. ohni grosse erfolg...
s Apero wemer eigentlech vom Agricatering, en passende Ort hemer aber leider noni gfonde für üs. :-(
Vo Fotografe beni fang chli am offertene ihole.. esch aber no schwerig... e weitt eifach ned so föteli wo so bedi vomene Baumstamm hendevöreluege.... e ha do enne aber vodr andrea gläse und e froge se jetze de mol! :-)
Chleider beni aber notürlech scho go probiere! ebe in Beromünster, in Lörrach und in Aarau im Priska gse. Mi Favorit gsänder onde! :-) das bstelli jetze denne äuä bedr Priska. e wett äbe umbedengt gärn es diadem derzue! :-) s zwöite föteli eschmi 2. Favorit vo demetrios... das esch aber hende gschnüeret und e wett gärn eis met chnöpfli. bim Sincerity esch äbe das obe sones jäggli wome de no cha abzie.
sust machimer notürlech scho vell gedanke über d Deko und so. Ha mi Frönd mol gfrogt welli Farb er aus "Theme-Farb" wett. sini Antwort: "WAS??? Mer hei e Themefarb???" hihi, e gloube dörte hettersech s erste mol gfrogt, uf wasersech do ächt iglo hett! :-) üsi farb werd jetze äuä mint und Rosé....
jetze hani no e Frog:
wie macheter das metde chärtli. mer hei dänkt mer verschecke ganz normal Iladige zum Apero und Iladige för Apero+Abend. Was macheter aber met lüüt wome z.b. vo früecher kennt oder kollege vode eltere oder so, wo me jetze nömme soo vell kontakt hätt und drum ou ned zum apero wörd ilade. aber glich dänki se wördesech abeme chärtli fröie, bzw fändes schön z wösse dassmer ghürote hei.... Heiter das problem ou, und wie löseter das? e wätt äbe ou ned eifach alli woni ergendwie kenne zum apero ilade und de getts es apero för 350 lüüt....
Hett öber no en guete Tip förd musig am obe? üs esch die eigentlech ned soo wechtig und es wird be üs ned en riiise party gä aber glich wemer üse hochziitstanz tanze. aber halt ou ned vell usgä förd musig. esch ou öpper do wo ned en riise party hett/wett und wie löset ehr das?
so, wönsche üch en schöne sonnige Sonntig... Liebi Grüess
Puh öber 3 Woche isches her, sitdemi s’letschte mol online gsi bin und chume chum meh no mit noläse.. öber 30 site uiuiu :p muess wider chli öberflüge… go drum nur uf die a mich grichtete nochrichte oder @me’s i ;)
Danke allne för die liebe Wort wägem Stress ihr sind golig! <3
@malinchen: jöö danke vilmol för de Tipp! Wär ev. ächt öbis mol mit Berrocca z’versueche wänns das würkli bringt? Was isch d’Bilanz so nach bald 4 Woche? Ich traue so Sache ebe amigs nedso… wägem apéro: also mir händ au kei sitzplätz am apéro! Aber apéros sind doch au meistens im stoh ned? oder meinsch will öiche apéro länger goht? Hey gratuliere öich zum 4. Jubiläum! :) ooh cool wäg de crèpes findi hammer! :) und das mitem zält dönt au geil! :) öbrigens apropos crèpes falls mir de brutträff wie mol plant in aarau würdet welle mache wils regional gseh i de mitti isch hettis do also en härzigi crèperie :))) aber chönt chli äng wärde hehe müesstemer luege wie vil mir sind ;))
@snicki: danke viiilmol!!! :) jo chan de Lade ächt empfehle! :)
@pfingstrose: ich mache de eidg. personalfachuswis – han mi johrelang immer degäge gweigeret wili de sinn nedso gseh han wili scho en coole, interessante, verantwortigsvolle, abwächsligsriche job han und gar ned meh wet z.bsp. ned ambitione han zum lüt führe etc. aber has nüme chönne ghöre, dass si mir immer mit dere usred chömed wägem lohn, dass si mir halt ned meh chönd zahle wili de doof fachuswis ned han! Debi machi doch mi job nacher ned besser! Jetzt am DI, 10. Hani scho quartalsprüefige muess also ächt no chli dra mit lere… d’usbildig goht bis im oktober 2014.. han also erst agfange.. aber han ebe vorher scho en usbildig gmacht privat wo erst fertig worde isch han mi do wohl grad chli öbernoh.. oje hey dönt ned guet dini magegschicht – nach 3 woche goni devo us, dasses dir wider guet goht ;) hoffes emel sehr ;) hehe chunt mir sooo bekannt vor ächt das ewige warte hey :p min schatz häd au ewigs gha biser mir mol gholfe häd mit übersetze.. ich rede jo scho au sehr guet italienisch das isches ned aber glich halt ned muettersproch und för so öbis muesses eifach perfekt si… han dänn glich ellei mol agfange… aber isch ächt öbis hey…hey dönt mega hammer dis chleid! :) schön häsch di entschide! :) ich würd au gärn es foti gseh weni döf :) oje immer das drigeschwätze hey… aber guet sind du und di GG öich einig! Die eltere und schwigereltere müend ächt no öbis lere mängisch.. hmm oje duetmer leid aber hey so höch und tüüfs gits halt i jedere bezihig.. aber wäg de wiehnachte findet ihr sicher en lösig! Chönds jo au so mache dasser 1 johr mit sinere family und 1 johr mit dinere fiiret das wär doch fair oder ned?
@lil.lian: siehe oben dänn muessis ned nomol schribe ;) hey dönt cool wägem hochzyt wo gsi bisch :) isch immer guet wämer chli chan abluege was eim gfalle häd und das wo nedso toll gsi isch besser mache ;) hey cool wäg paris! =))
@taeboyana: danke vilmol! :) bin inzwüsche au sicher, dassi die richtig wahl troffe han mitem chleid :) danke jo du häsch rächt.. das muessi würkli sust gohni irgendwenn no kabutt… nöie vorsatz förs nöie johr würdi mol säge :p ui jo krass wäge dere wo liebeschummer gha häd :( puh do würdi also au ned welle brüt berote wämer ev. grad verloh worde isch oder so!! mängisch isch scho strub wämer plötzli d’hintergrundgschicht dehinter kennt gäl? Hey cool wäg de mietreduktion! :) mir händ au 60.- mietreduktion becho immerhin ;)
@lula: danke chani bruche! Leider isches eher no stressiger worde i de zwöschezit.. d witerbildig goht es johr.. also bis im oktober negst johr no 10 mönet.. am DI hani quartalsprüefig und gsehs nonig so sprich isch lere agseit das weekend obwohli eigentli volls programm han..
@snicki: was för musig wettet ihr dänn? Ich han ebe es top agebot becho vo de arianna (stoht detailliert witer unde) und die vo öich wo vo bärn sind hettet no de beser pris will si us bärn isch und kilometer no dezue chömed.. woow die teeliechtli sind jo mega schön!! Alles sälber gmacht?? *staun* aber sicher uh mega ufwändig ned? :p hey cooli idee mit de übernachtig för d’eltere super wiehnachtsgschänk! :) hey das chöntet mir doch eigentli au öisne eltere schänke hihi häsch mi grad uf en idee brocht ;))
Anmelden
) is domino und m nomi de no do z basel in Pour Elle. Ka dir de sage wie d prise im vrglich gsi sin 
Viellicht namal es Mail? Will bim schriibe muä meh nöd uf passendi Uhrziite achte? 
)! Mau luege ob öpis drus wird, cha no nüt verspräche. Uf au Fäu würde mers nid vor de 8i schaffe, wüu ig no Training gibe zBärn.
I ha würklech sehr gärn Ching und mir wette ou e Familie, aber i so Situatione sägi geng zu GG: Luegsch bitte, dassi nie soZüg wirde poste? Oder dr Hammer: E Kolleg vo mir het vor paar Jahr, no bevor das Ching isch uf dr Wäut gsi, scho postet wie's wird heisse und wie gross u schwär ases denn grad bim Ultraschall isch gsi.... Hallo?!