Ig ha mau das hie gfunge: Gebühren und eifach gluegt, was mir de so würde bruche und chume uf 355.- (weiss aber ehrlichgset nüm, was ig alles igrächnet ha, emu nüt ussergwöhnlichs wie Samschtigstrauige oder so)

So, wünsche euch no ne schöne Obe, ig verabschiede mi für hüt!

nicht registriert

Wooow danke eu allne für diä Antworte uf mini Frog!! Isch aber eigentli scho unverschämt, dass diä mit Hüroote so viil Geld machet. I cha mir ned vorstelle, dass da de Stadt tatsache so viil kostet, wiä meh zahle muän...

So ii pack ez au mini Sachä und tuä da Forum über d'Nacht schloofä looh. Wünsch en allgemeiin schönä Obiig!

@squishy-fishy: also ich denke 155.- isch en super pris! ;) mir zahled nur scho fürs esse 115.-....

soo guete morge zäme be au wedermol do:-) aso mer hend gester no d liste gmacht vöre apero ond chöme död uf guet 120 lüüt wou halt vereine ond grossi familie ome esch ..am esse hemer öppe 60 persone eifach die ängste...aber esch schono schwer z plane
aso mer hend etz au gseit vör esse ond getränk muesch guet 140.- pro person rechne....
ehr send wörkli kuul do enne:-)

Zivil: I bi mir würklech nümme sicher wo här dasi die zahlä ha gnoh. Aber has ömu mau uf dr homepage nachä gluegt. Das isch gloub scho öpä so viu. U was haut när ono chunnt isch nöii ID / Pass, das choschtet ono gad mau paar fränkli. Kreditchartä mues ou ä nöii härä u Bankchärtli äuä ou... Ke ahnig! Aber das choschtet ja när aus ono irgendwelchi Gebührä wo sich när glich summierä.

Ässä / Trinkä: Mir wärdäs gloub ou so machä das mir je ä Wisswy und ä Rotwy usläsä wo d Gäscht chöi trinkä und drzue ds Mineral zahlä u ev. no ä Dessertwy (), aber aues was Süess, Bier oder Hochprozentig isch, müessä d Gäscht säuber zahlä. I fänds ou hennä doof wenns zumnä Gelage usartet, obwou ig süsch ou eher trinkfröidig bi. Aber amnä Hochzyt passt das eifach nid, fingi. Am piindlechschtä fingis we ds Brutpaar säuber bsoffä isch, das geit ja gar nid! Dr Ma vo mirä Cousinä het sich a ihrem Hochzyt huerä zueknallt, da hätti mi äuä gad wieder la scheidä - wäsentlichä Irrtum oder so!

We mir scho bi denä unromantischä Themä si... Wüsset dir scho was fürnä Güeterstand dir wählet?

Güeterstand: Jaa, i weis äbä ou nid so rächt obs bi üs Sinn macht. Ds Problem isch chli, dass mi GG scho sit 8 Jahr schaffet und verdient und vo däm här ziemlech viu id AHV und PK izaut het. Ig hingägä ha meh oder weniger immer Schuel / Uni gmacht, zwar ou immer Näbäjobs gha aber no praktisch nüt ir AHV und PK... Aber ja, das het ja no zyt und mä cha ja ou no Rückwirkend ä Ehevertrag machä.

Squishy-fishy: Ou das isch ä cooli Frag! Nimmt bi also ou Wunder! =)

Mi GG und ig kennä üs scho sit über 10 Jahr wöu mir ir Nöchi vonand ufgwachsä si. Mir si am glichä Ort ids Schwümmbad, hei dr gliich Zahnarzt gha und enand det im Wartezimmer troffä, mir hei ds Konf-Ässä im glichä Resti gha, mir si immer a die glichä Ortä i Usgang etc. Mir hei ou nach dr Schuelzyt immer Kontakt gha zämä, mängisch chli meh u mängisch chli weniger. Vor ca. 4 Jahr si mir per Zuefal beidi sit churzer Zyt Single gsi und hei aues angerä wöuä aus ä nöii Beziehig. Mir hei gfungä das sig die besti Vorussetzig fürnä platonischi Fründschaft u hei agfangä üs öfter ou z zwöit träffä, hei DVD Äbä gmacht, si i Usgang etc. Üsä Plan isch du (glücklecherwiis) nid ganz ufgangä wöus nid lang isch gangä bis mir meh zämä gha hei auses unger platonischä Fründä so üblech isch... U so hets sich ergäh das mir es Paar si wordä. =)

Wie ischs bi öich gsi? =)