Ich bin wieder zrug im Forum,entli hanis wieder gschafft. Also zerst Wünschi eui allne ganz e guets Neus! Hoff ihr sind all guet gstartet,aber glaub das isch nid schwierig gsi....schliesslich isch das euses Johr2014 in Love
Alli neue wos geh hend möchti au na begrüesse!
Ich bin ehrlich und muen leider segä dasi sit ca. Mitti März kei Ziit meh cha ha zum schribe und au läse isch praktisch uf de Strecki bliebe,es isch soviel los gsi.Aber nid hochziitstechnisch Ufjedefall möchti jetzt wieder istiege...
Ich ha 2 wichtigi Frage 1. am 1.Februar isch Bruttreffe,oder? wenn und wo?und mit Partner oder ohni?
2.wer gaht morn alles ad Hochziitsmess in Züri?
Und wenn öberd mag weri au nid abgneigt,über e chlises update im allg. oder eifach vo sich selber was so gloffe isch
Also,i freui mi dasi wieder meh Ziit und Nerve ha und entli wieder mit eui cha ustusche
@malinchen: Isch das di Ärnscht wägem Mini?? Wär ja dr Hammer! Es mues gar kes Cabrio si u o süsch nid luxuriös, mir wette eifach e modärne Mini und eui Farbe wäre ja perfekt! Aber weiss nid ob dir üs dä würklech weit vermiete? Und ob me mitme Brutchleid drin Platz het (wobi mis Chleid ja nid sehr pompös isch)...? Nei i meine dr Park vom Schloss Oberhofe, dä isch grad am See und uuuu schön. Hünegg wär äuä o no e Möglechkeit, aber da hani mi no gar nid erkundiget.
@Pfingstrose: hani no ganz vergässe gha: Schön bisch zrügg und heiter aus chönne kläre, freut mi sehr für euch!
@Fara: o dir welcome back und mi hets im Fau riesig gfröit euch ufnes Kafi bi üs zha! Nei so cool, hesch 3Chönigschueche mit Cranberries gmacht?
@sasileu: Wiukomme o dir wieder zrügg hie inne: Aber bim Monet März hesch di gloub vertippet...? Wüu sooooo lang hesch itz o nid nümm gschriebe I cha dr leider o nid würklech es usfüehrlechs Update gäh, chume säuber unger dr Wuche nümm zum schriebe u mängisch nid mau meh zum lückelos mitläse.
@Iladige verschicke: Mir planes uf Ändi Februar.I findes o weme STDs het gmacht, ersch 2 Monet vorhär definitiv zspät! Bi üs hei ou d TZ gwünscht, dass mir no chli Zit irächne dass sie de aui Gescht no chöi aschriebe mit Infos vo ihne (Biträg zum Programm, Überraschige etc.). Das brucht ja de o no Zit bis sie da vo aune Antwort hei u so.
@me: De vom Schlosspark het mer am Namittag zrüggglütte und mega fründlech Uskunft gä. Weme mit weniger as 10 Persone chunnt (was mir bi üsem Paarshooting vor dr Trouig uf jede Fau wärde si), muesme gar nid reserviere und es isch sogar gratis. Mega toll! Wieder öpis Chlis meh womer hei klärt.
Jetz bruchi no eui Meinig. Hüt isch mis Päckli vo Esprit cho mit de Chleider woni ha bsteut fürs zivil. Hänke nech mini 2 Favorite a, finde se würklech beidi sehr schön u chami chum entscheide... es witers Chleid (mi eigentlech Favorit in rot) isch no ungerwägs, we das o no passt wird's ächt schwierig! Bimer ou am überlege evtl. gad 2 z'näh, sie si aui abegschriebe und mir si ja o no anes Hochzit iglade... De hani de aber afa viu feschtlechi Chleidli im Schrank
I findes übrigens ou mega ufregend dass mir itz scho chöi säge, mir hürate DAS Jahr. Muesmi no chli dragwöhne dassis richtig säge Gester hani no e ganz nätti neui Bekanntschaft gmacht im Gschäft: Paar vo üs hei amne grosse Alass mit ca. 500 Lüt müesse ga mithäufe und de hani eini besser kenneglehrt, wo nume e Monet vor mir het agfange und dr glich Jahrgang het wie ig. Ha de usegfunge dass sie sit 1.5 Jahr ghürate isch u de si mir uf üses Hochzit z'rede cho und sie hets u schön gfunge u mir heis mega guet gha bim apéröle u über Hochzitstheme, Chind etc. quatsche . Das het u guet ta und isch mega schön z'wüsse, dasses öper chli glichgsinnts het wome de aube cha zäme ga zmittägle.
So, itz nützi mini Motivation no gad us und schriebe no amne Musiker e Afrag
@nala: isch ja ä super überraschig mit London :) sone cooli Stadt :) u wägem Farbkonzept isch ja ou nid so eifach wasme da genau wot.. ömu ig finges nid so eifach ;) aber petorl-violett isch doch sehr schön :)
@malinchen: dPocketfolds gseh mega schön us.. sehr ä schöni Farb.. bi de gspannt wiä si fertig usgseh :)
@squishy.-fishy: ja sit gescher Abe chöme geng ume chli Rückmäudige.. :) äs paari hei säch sogar gad agmäudet :)
Taeboyana: hmm auso isch no schwirig mit dene Chleider.. ig finge beidi wük sehr schön u es chöme dr ou beidi guet vom Schnitt u ou vor Farb här :-) Hami ou no nid so rächt dr gwöhnt dass mir DAS Jahr hürate :-) u dassmr DAS Jahr 10 Jahr zäme si :) Ah das isch immer schön so Bekanntschafte wome merkt dassme so chli diä gliche Interesse het :-)
Sue: mir hei üsi iladige diä Wuche verschickt u hürate aber ersch ändi August… Isch sicher eher früäch..aber lieber zfrüäh aus zspät dünkts mi… u gad wöu mir im August hürate wo no feriäzyt isch, heimrs müglechst früäch wöue use gäh..
@Sasileu: willkome im 2014, i üsem Jahr :-) Hiä steit schüsch aus zum Brautträff: :) fröiie mi scho druf :-) http://www.heiraten.ch/forum/board/personenkreise/brauttreff/brauttreff-2014-17_90_3.html#28
@me: bi üs trudlä loufend Rückmäudige ine vo üsne Iladige :-) teu heisäch sogar scho gad agmäudet :) Iz wünschi euch ganz es schöns Weekend u dene wo ane Hochzytsmess gö viu erfolg :)
Hallo liebi Brüütlis Ech hoffe ehr sind alli guet is neue Johr gstartet? E wönsche üch allne wünderschöni momänt wo üch wird dr Atem stocke, unvergässlechi begägnige und dassder jedi minute vo däm spezielle Year of love chönt gniesse!!
E mälde mech ou weder mol… hado nömme so metgläse und gschrebe. E ha zwar schöni Wiehnachte und Festtäg gha, ha aber e chlineri Läbeskriise gha und e ha zerscht weder mol sälber müesse luege wasi wett…. Aber jezte beni weder do!
E ha jetze nur die paar letsche siitene nochegläse…
Be üs ned grad meeega vell gfloffe. Verzelle aber glich mol chli.
Stampin up / Einladungskarten E ha doch mol gschrebe, eb öpper stampin up kennt und scho met däm Chärtli bastlet het. E ha jetze im Internet öpper gfonde vo Düütschland wo mer duet met mine Idee und Wünsch 3-4 Musterchartene duet bastle. E cha denne eini Uswähle und se schicktmer das Muster und alles Material und e cha denne das deheime alles nochebastle. Idäm Still, aso met Idee entwickle hettsi das nonie gmacht, esch aber grad begeisteret gse Derzue setts de ou Dankeschärtli, namenschärtli, Menucharte etc gä. E freumi mega ufd Muster!!! Am WE sett jetze mol die erste Bilder cho. Zeige üch denne die….
Aperolocation Hemer ändlech gfonde! Mer sindse am SA ga aluege. Esch en Kommende. Meteme Innehof und so, aber eher chli und härzig. Wörkli perfekt!
Chileproblem…. Mer si scho x Chilene ga aluege… es hett es paar schöni derbigha aber ned DIE Chile. Am letschde SA simer denne nomol durd Gägend gfahre und denne hemmerse gfonde: DIE WOW Chile. Mer si ine und hei üs agluegt und gseit die esches!!! Die chile hett üs sooo überwältigt! Denne hani grad aglüüte am andere Tag. Und si esch nümm verfüegbar a üsem Tag!!!! Es hett mech sooo mega agschesse. E weiss wörkli ned wasi sell mache. Jetze dömer evtl nur zivil hürote….
Polterabend Dä esch ou scho in voller Planig! e ha äbe gseit dassi lieber weig ga Skifahre und vor allem is Apres Ski aus ergendine club ine Stadt. Obwohlmer erscht im Oktober hürote hani scho bald mi Polterobe! do esch aber ou chli s problem: mini TZ esch mini Schwöster und ebe mega äng met ehre befröndet. Si goht jetze aber 3 Mönet is usland und chont denne afangs Mai retour. Denne wär grad in Ischgl Seasonclosing Party womer chönte go poltere. Das esch denne aber alles mega tüür, d Öbernachtig, d Areis, s Skibillet und Getränk und so. die besser Option wär äbe scho ergendwo ider CH ga im März oder April. Aber de chasi ned derbi si….weiss wörkli gad ned….
So, das wärs gloub vomer… Ah doch, am SO ire Woche machemer be üs en Brunch womer die bede Trauzüüge und üsi2 Tätschmeister ilade und si sech kennelehre!
Claudilein: e ha gläse zu bisch ga s Chleid poschte? Hesch öppis tolls gfonde? Gäu es esch scho u schön und speziell so imene Chelid innezsta! Hesch denne im Chez Janine die „grossi“ Berotig gha? Hesch es Föteli gmacht? Wie eschs gse ader Mäss? Hesch no tolli sache gse?
la principessa: mega toll hender so schöni Röckmäldige becho vode Chärtli und abder Homepage! Dörfti ächt ufd Homepage ou mol en blick drufwärfe? Und meeega toll wägdr Theologin! Mängisch gets doch so sache wo eifach „müesse“ so si! Und dassderse kennet, machts secher nomol spezieller! Wie esch gsi ader mäss? Mer göi denne äuä erscht uf luzern ad mäss. Hey mega toll metdine Hotels und übernachtismöglichkeite! Tönt alles perfekt!
lillian: so mini Flittis machemer evtl. ou. Me esch schnell dörte, und cha die emotione vom hochziit no metnä und hett ned grad en 15stund flug hendersech. Und wellnesse esch mega schön. Me hett eifach ziit försech! Mer mache das no vell…. Ui nei, wägem Zoro. Das goht jo gar ned….ächt schad…. Und de no metem Favorit!! Haha…..e verstoh das wörkli ned vo dene. Und gönstig eschs jo ned dörte….. Hesch inzwösche dis Chleid gfonde? Aber derför esch umso beser metem Wiibuur! Tönt voll tol!!! En mega schöni idee metem buech woder weit mache. Weisch was ou no öppis wär? So chlini couverts drichläbe und denne chame als Gast dr betrag ufenes Chärtli schribe und is couvert due. Weiss halt ned eb das möglech esch vode beträg här. Eifach so als idee!
littlefoot: ou wow die schmetterling vo etsy sind jo toll! Und dr danke banner ou. E muess dörte gloub ou mol es ganzes Container Schiff vode USA locho! E fend halt änglisch ou toller, aber kenne ou vell lüüt (z.b. mis schwegermami) wo öberhoupt kei änglisch cha. Und fördie eschs denne scho chli doof, wennsis de ned verstöi. Mer hei das bede chärti. Es wörd es motiv gä wo druffestaht: I love you… to the moon and back. Und no sone mond abbildet. Mega härzig… aber äbe… Hihi d hösli sind cool. Mueschse denne halt eifach sexy präsentiere dim GG, de goht das scho! D chärtlis sind jo mega schön!!! Ächt toll! Sind die ou vode USA? Hihi und das wäg dim GG, eigentlech jo no härzig. Är loht di voll lo mache und nur DU beschem wechtig. Nei, jede detail zeiginem ou ned. Dä wördmi jo sust no vör komplett verrockt halte wasimer alles öberlegge!
sue: mega toll dini Ilaadige, und en mega schöni idee metde Säcklis.
pfingstrose: mi countdown esch 266 täg! das goht aso nochli….
fara: ou mega schön wägde Foteli. De beni jo denne gspannt! Mer näme jo äuä ou d andrea… hihi e ha sogar vo ehre tröimt!
malinchen: d pocketsfolds gsänt hammer üs!!! Voll schön metem glitzer! Wo henderse bstellt? Mer fröie üs scho z gse wiesi denne fertig usgsäi! hihi
taeboyana: nemm bedi chleider! si bedi mega schön und stöider guet!! Förs zivile gfalltmer s violette chli besser. Esch nochli fästlecher….
So das wärs vomer… be äxtra am 7ni ufstande… und jetze esch scho halbi 9ni! e wönsche üch allne es schöns weekend…. bibi
@Dänu: Oh so schön, ou Babyplän? Und heit dr e Azug gfunde? Wo sit dr ga luegge? Bi mir geits no 61 Täg bi si Miss GG bi
@littlefoot: Wäri doch was? So aus sexy Überraschig für Din GG! Mir hei aus zämäagugget, wüu es isch üses Hochzyt, u i wetti doch das er ou drhinter cha stah. Aber er het mir scho viu eifach überlah u de quasi no abgsägnet. Idee gsammlet ha scho mehrheitlech ig. U ou Texte gschribe I finde zdritte vom Liecht här bau am schönschte
@malinchen: Dir am Mäntig ganz viu Glück für Dini Prüefig! Schöni Kärtli!
@chlini: Oh wow, Du hüratisch ja hüet scho!!! I wünsche Dir e wunderschöne Hochzytstag u ganz viu Liebi!!!
@principessa: Oh jöö, merci viu mau! Ja mou, danke. Mir würde gloubs ou öbe i däm Rahme zahle. Hei aber am kirchleche kei Torte, sondern es Dessertbuffet. Drfür am zivile Oh jöö, tönt aber glich sehr härzig bi däm Päärli! I gloub über die Gschicht laches sicher irgend einisch! Wow bi öich louft ja mega viel! Zahlet ihr dUnterbringi vo de Gäst?
@Fara: Wow, tönt genial bi Dir! Hoffe es leit sech gli umi mit am Stress u Du chasch voller Elan umi hinter Planig!
@Sue: Mir hei üsi ja sehr früeh gschickt, wüu mirs hei müesse wüsse, wäg de Übernachtige. Ohni StD würdis aber öbe so 5-6 Mönet im vorus verschicke
@Taeboyana: Finde beidi Kleider schön! Was passt besser is Konzept inne, i welem füehlsch Di wöhler?
@Bibi: U de e ähnlechi Kirche? Wäri ja de doch schad, oder?
@me: So hüet si dIladige für e Ziviler uf Post... U am Mänti gibis mire TZ gad persönlich u GGs Mami brchunnts ou gad so
Littlefoot. Ja genau, da defür isch ja de Probetermin da! D’Frisur wod usgwählt hesch isch jedefalls wuuuuuunderschön!!! Edel und elegant, aber trotzdem romantisch-verspielt. Das mues e Frisur zescht mal alles vereine Weisch was, mine gumped au nöd jedesmal wenn ich ihm was Deko-mässigs zeige. Er het sini Spezialgebiet und ich mini. Er luegt aber geduldig alles a woni ihm wett zeige und weisch was…dine und mine werded sicher meeeega froh si um die chline Details wo mir planed!!! 100%
Lillian, Pfingstrose und Malinchen: Ich tue mich sooo schwer mit dä Entscheidig für dFrisur. Z’letscht het mir etz no de Schleier en Strich dur dRechnig gmacht. Han eigentlich welle e gflochteni Ufesteckfrisur (und kein Schleier), aber das het ufem Foti mit Schleier eifach e chli hart usgseh. Also bini etz binere halboffene Frisur glandet….tadaaa, wieder di gliche Entscheidigsproblem und am 28.01. isch Probetermin Ich han mal d’Uswahl aghenkt und es Bild vode Frisur vom Verlobigsshooting
Pfingstrose: Da beruhigt mi chli, dases dir mengmol au so goht. I fühl mi etz scho chli besser nochdem GG und ich geschter e sehr gnaui To Do-Lischte gmacht hend! Soooo geil din Countdown!!! Dankeeee!
Fara: freu mi scho uf euri Engagementfotis ! Hesch au es Foti vom grüene Kleid für s’zivile?
Namensänderig: me cha scho vor de Namensänderig uf de neu Name bueche. Mir hend üsi Flitterwuche au scho uf min neue Name buecht. Bis zur Reis mues denn de Name halt au ide ID/Pass stoh.
Nala: Jo gell, sGfühl isch ganz andersch etz wo’s DAS JOHR isch Bi mir hend no im Dez alli gseit – jooo, es goht jo no es Ziiitli…und plötzlich säge dalli, woooow, das isch jo scho bald!!! Ach nei nei, das isch nur dLischte für de Januar!!!!! Und GG und ich hend grad gescht no ergänzt !!!! Am Afang sind irgendwie zwar grösseri Entscheidige, aber noher defür vieeeel meh Absprache – mit 1000ge vo Persone hani mengmal sGfühl. Super Farbwahl!!! Mir hend au unter anderem PETROL – love it !
Malinchen: gsehnd super us euri Pocketfolds! Geili Farb !
Squishy: Gell, für mich tönts au voll nach Endspurt! Und da macht mi mega nervös! Etz scho !! Danke, das hoffi au!
Sue: Mir hend üsi Iladige 8 Mönet vorem Hochzit verschickt will mir ide Ferieziiit (Früehligsferie) hüroted. Aber es het sich zeigt, dases für es paar Lüt fascht chli z’früeh gsi isch. Etz hemmer scho paar Telefon/Email gha, ob mir nomol sPasswort für dHomepage chönnted duregeh (die sind ufem Kärtli)…vlt hends sKärtli scho nüme??? Vlt besser so 6-7 Mönet vorher.
Taeboyana: Mir gfalled beidi MEGA guet und ich würd sicher beidi neh weni dich wär. Weni mues entscheide gfallt mir s’rote es Müü besser. Es macht wieblicheri Forme.
Lula: GG wär mit sim Daddy gange go Azug luege und sie hends etz doch uf negste Sa verschobe (schowieder…wäred eigentlich scho am 27.12 gange)! Hett gern wenn’s etzdenn gmacht wär! Sie gönd in Strellson Krüzlinge.. Woooow, isch scho meeeega bald. Wie hend ihr eu etz entschiede wegem zivile? (also weg de zuesätzliche Persone)
@malinchen: hey mega cool sin si jetzt ändlig ahko! sin aso mega schön! dä perlschimmer gfallt mir aso sehr! bi scho gspannt wie si den zum schluss usgseh wärde. s wär worhschinli scho bequemer wen ihr s personal usw. vom crepes wägeli lön loh ko, aber ebe drfür türer. i vrstand voll das du de chli angst hesch dases de doch nid klappt mit eurem kolleg, schwierigi entscheidig!
@squishy: hm isch chli e blödi situation wäg de gschänk. ich würd eifach mache wie ihrs wänd. sin jo de euri gschänk! schön hesch susch so viil könne erledige, au wenn grad so viil ztue hesch im studium.
@claudilein:jo so mini-flittis in paris sin jo au toll! und das mit de reisezyt ischhalt scho e wichtige punkt! den liebr vorem hochzyt go as den zur vrrägnete zyt. wäg de farbe hani ebe au dänkt das violett eifach isch as coral. wäg de blueme hani mir dänkt das ich den wiisi rose mit violette hortensie möcht oder öbis in die richtig. mues de no luege ich weiss scho das meh d mm's au ka personalisiere, das wän mir de sicher au mache aber mir wän trotzdäm au söttigi mit nüd druf und dorum luege mir mol. wil es git se jo no i vrschiedene gschmacksrichtig und das ka me bi my mm's nid wähle.. hihi so lustig wäg de mandle. i find das ebe eigetli au chli doof dorum würde mir am apero worschinli mm's und mandle mische hani dänkt ;) und händr d ring?
@taeboyana: jo i freu mi au wirkli mega uf london, bi jetzt scho 3 joor nüm gsi, und s isch mini lieblingsstadt z europa, ha scho chli entzugserschiinige ka ;) das isch de toll wägem schlosspark, öbis meh an das meh nüm z viil gedanke mues vrschwände d kleider sin wirkli beidi schön. mir persönlig gfallt aber s rote an dir besser. find es macht dir e mega gueti figur und s violette duet dini (aso sowiso gueti) figur fast chli kaschiere. aber wie gseit find beidi mega schön, ich würd glaub au eifach beidi bhalte :tongue:
@lil.lian: doch mir wän scho au personalisierti, aber nid numme. dorum hämir dänkt mir kaufe evtl grad z london. mir gön mitti februar. ha jetzt chli googlet wäg hz-läde, im westfield shopping center könnts no s eint oder ander ha. mir gsehns de. de whole foods kenni gar nid. wo isch dä?
@sue: nei ich bi nid im stesa gsi, nur im domino und dolcevita. dä wäri eifach au no uf minere liste gstande wil är z lörrach isch. hmm i will ganz viil go shoppe aso i will unbedingt (aber de ohni gg) i victorias secret, hoff find dört de grad tolli untrwösch für am hz. den schueh wirdi sicher sueche, deko und papier sache und susch chli kleider shopping. wäg de iladige: aso mir hän vor unseri ändi feb/afangs märz vrschicke, aso 6 monet vorhär.
@sasileu: schön bisch widr drbi! aso ich ha idr zwüschezyt mis kleid kauft :o) und susch lauft grad nid sooo viil. wie seht de bi dir us? was händr hochzyttechnischs no könne mache?
@lamariee: schön hän sich die erste scho agmolde! isch sicher e cools gfühl die erste definitive gäst scho z wüsse.
@bibi: oh je isch de doof wäge de kirche. und ihr findet gar keini wo euch chli entspricht und no frei isch? susch sin au e paar sache gloofe bi euch, toll! bi gspannt uf d karte!
@daenu: kum, au wen das nur d to-do liste für e januar isch, du schaffsch das scho! vor allem jetzt wo ihr alles detailliert ugno händ. das isch jo grad es super planigstool und mit jedem wo meh kasch abhöggle kunnt au eure dag chli nöcher! meh mueses eifach immer vo de positive site här gseh obwohl i sicher bi das ich in 3-4 mönet au am hyperventiliere bi. danke fürs komplimänt beträffend farbwahl. i bi jetzt erhliggseit au glücklicher. wil eigetli isch das min favorit vo afang ah gsi und petrol findi ebe au haaammer! aso mir gfallt s zweite bild am beste. find das mega stimmig mitem schleier und allem!
@me: ich ha letscht wuche ändlig mol mim halbbrueder sinere fründin gschriebe.. si duet ebe hobbymässig au fötele und het scho uf hochzyte gfötelet usw. (si het sogar e homepage mit wunderschöne fotis druf) ebe ha si jetzt gfrogt ob si bi uns würd de fotograf spiele und si het de gantwortet das si das sehr gärn würd mache und uns das grad as hz-gschänk mit bearbeitete föteli und album würd welle schänke! das isch jetzt natürlig super! bi grad so froh.. den simer immer widr chli am luege wäge de iladige wie mir die gstalte wän. hän jetzt scho paar favorite, entscheide dien mir uns aber noni sofort. hm,ahhh joooo… für allli shabbychic fans: mini kollegin het e katalog von "impressionen" übrko! sooo e tolle katalog und so e tolli homepage (www.impressionen.ch) es het ganz viil shabby chic deko züg und au susch tolli kleider druf miend mol go luege! ha grad 2 kleider fürs zivile bstellt.
so das wärs gsi, mi gg isch jetzt glaub fertig mit znacht mache, d.h. i dörf go ässe wünsch euch e guete start in d wuche morn!
Schööne guete Abig zäme, hender es schöns weekend gha? Mir sind hüt adä Hochziitsmess gsi und es isch super gsi, aber une nachli meh devo :)
@squishy: mercii für de link :)! Haha tönd ja grad sehr chaotisch bi dir :p uu aber e kennwood isch meega :)! Finds schön möchtet sie eu chli meh schenke und wünsched sie sich me für eu, aber wenns eu nöd recht isch würdi das au klar säge. Ohh chasch di imfall freue ufd hochziitsmess in st.galle :)!
@claudilein: wo hesch das gseh uf de siite, dass die personalisierte m&ms au id schwiiz gliefered werdet? Han die ebe au welle aber d schwiz staht nöd bidä lieferländer.. ussert ich hans überseh :)
@malinchen: wenner nüme so under druck sind mitem budget würdi das glaub au mache mitem personal für de crepe wage, isch sicher einiges eifacher für eu und er müend nüme dra umestudiere obs lauft :)
@Sue87: mir hend eusi iiladige für im juni afangs Dez verschickt und würdets wieder so mache, willmer kei std chärtli gha hend. Wassi aber würd endere isch, dass sie soo lang ziit hend zum sich amelde, es isch eifach eifacher zum plane wennmers scho chli gnauer wüssed :)
@sasileu: welcome back im forum :)!
@Taeboyana: ich würd beidi neh, gsehnd super us !!! und isch ja super mit dinere arbeitskollegin, das isch immer e mega erliechterig wennmer so öpper im gschäft het :-)
@Bibi77: schön bisch wieder zrugg! Isch wieder besser mit dinere lebeskriise..? I wellere Region suechsch denn nachere Chile? Chöntsch denn lebe mit dem, dasser gar keini hetted? Wär ja scho en rechte unterschied.. hey das mitem polterabig tönd ja kul und hoffe, dass mit dinere TZ klapped denn doch na! Isch sie denn wiit weg im usland, chönt sie nd vorher für es weekend cho?
@chlinii:Du hesch ja gest scho din grosse Tag gha !!! Wie isches gsi?? Bin mega gspanne uf de erschti Bricht vonere 14er Bruut!
@daenu16: hey wow dini probefrisur gseht super us, du hesch uu schöni haar :)! Und die ufem 3. Fötteli gfalltmer au meega, die hani grad abgspeicheret für mich :D
@nala: super het dim halbbrüeder sini fründin de job überno und isch ja toll das sie eu das wot schenke :)! Mmhm hesch ja en super GG, hihi :)
@me: soo mir sind hüt 4h adä HZ Mess gsi :D es isch soo guet gsi, hettis nöd denkt!! Hend so viel super schöni Sache gseh und sind mit zwei Täsche hei voller Fyler und Visitekärtli :p s beschte isch, dassmer endlich en Apéroabüüter gfunde hend!! Ich han ja vor 3 Mönet en huufe Caterer, Metzgereie und Bäckerie agfröget und es sindmer eifach alli chli z tüür gsi. und ez hemer öpper gfunde wo pauschalagebot macht für 27.- p/p mit allem drum und dra, brötli, herzli mitem name druf, gmüessticks, frücht, wiiswii, rotwii, bier und mineral. So chömemer viel günstiger als bimene andere und da simer ez wüürklich froh. Denn hemer wahrschinlich na e fotografin gfunde wo eus seehr sympathisch gsi isch, det wartemer ez na ufs Agebot. Denn het min GG all mini Plän für mini HZ-Torte über de Huufe gworfe ;) ich het gern eini gha wo übernenand baue wär, wiis mit rosa schmetterling und han auscho eini gseh gha im internet. Ez hetter aber hüt eini gseh woner uuunbedingt wet, sie isch riiiesig uf verschiedene etage mit brüggli und eme springbrunne idä mitti. Viel z gross für eusi gsellschaft aber er chunt nüme vo dere weg ;) naja, denn nehmemer ez die, hauptsach sie baued na mini rosa schmetterling ii :p. und ez chömemer zu eusem gröschte „problem“.. mir hend ja am afang grad e band bueched für 3h, will sie eus mega gfalle het. Das isch aber de einzig punkt gsi woni scho sit wuche unsicher gsi bin, obs die richtig entscheidig gsi isch. Und ez simer an stand vodä swiss-djs cho und ich muen säge die hend eus eecht überzoge.. und plötzlich gsehni fascht nurna vorteil vom dj!! Sie würdet für öppe 1500.- 8h go spiele cho, eusi band choschted 2100 für 3h! und min gg und mini tz sind ez au voll begeistered vo dene dj’s und ez wüssemer grad würklich nöd wassmer mache selled.. =/ sie tüend eus ez mal es agebot schicke und denn luegemer wiiter…
Allgemein mueni aber säge het sich d hochziitsmess würklich glohnt und bin ez grad wieder topmotiviert zum wiieter z organisiere :)!
Ah und en 20% Guetschii vom Modissa hemer na becho, mini tz und ich wend na im januar go luege wäge kleider fürs zivile :)
Wünsch eu en super schöne sunntig abig und morn en guete start i die neu wuche!!
Guete Abe zäme! Mir si grad ide Schiferie uf de Bettmeraup u drum hani nid eso Ziit für z Forum
Nume churz: Pricana: auso wenn mer mau die bstellig vode m&ms dürespieut denn chamer am schluss z lieferland wähle u da geit d schwiiz. S berächnet ou d vrsandchöschte. Öbs denn würkli o geit weissi abr nid. Mir hei üsi no nid bsteut
Meh tueni öpä morn odr schriebe wenni mau z notebook vo mim gg cha bruche, mitem ipad isches bitz müehsam
Anmelden
2014 in Love
I cha dr leider o nid würklech es usfüehrlechs Update gäh, chume säuber unger dr Wuche nümm zum schriebe u mängisch nid mau meh zum lückelos mitläse.
Bimer ou am überlege evtl. gad 2 z'näh, sie si aui abegschriebe und mir si ja o no anes Hochzit iglade... 
Gester hani no e ganz nätti neui Bekanntschaft gmacht im Gschäft: Paar vo üs hei amne grosse Alass mit ca. 500 Lüt müesse ga mithäufe und de hani eini besser kenneglehrt, wo nume e Monet vor mir het agfange und dr glich Jahrgang het wie ig. Ha de usegfunge dass sie sit 1.5 Jahr ghürate isch u de si mir uf üses Hochzit z'rede cho und sie hets u schön gfunge u mir heis mega guet gha bim apéröle u über Hochzitstheme, Chind etc. quatsche 