@stella: oh je, das tönt bi dir ja ou sehr ansträngend... I weis ou nid, aber so Hochzyte löse bi Froue gloub eifach die unterschiedlichste Reaktione us womä gar nid würklech cha nachevollzieh. Mini TZ isch letscht Jahr bim Hochzyt vo ihrem Brüetsch ou BM gsi und det hets ou ä mega Zickechrieg gäh am schluss. I bi inzwüschä froh, dass mir kei klassische Polterabe mache, öpis weniger wos so Frouegstürm cha gäh drwägä. I verstah di mega guet, dass das immer no zwüsche öich steit... I ha jetz ou immer es komischs Gfüehl we mir öpis zämä unternähme oder so und ha gar nümme so luscht mit ihne übers Hochzyt z redä.

Gester hani ja gad ä Termin abgmacht bi minerä Coiffeuse woni immer gange fürd HZ-Frisur. Aber ds Mami vor eintä vo denä 2 Fründinne het mir abote gha, dass sies würd mache. Ha mi när gester spontan drgägä entschiede, wöui eifach lieber zu derä gange woni immer bi. Ha scho richtig Bammel drvor, mire Fründin das z "biichte"... So sötts ja ächt nid si eigetlech...

@malinchen: ech glaube wörkli bi der gohts ähnlech zue ond her wie bi mer... mer machts au kei freud meh öber s'hochzyt zrede met dene beide. aber glaub mer, au da werd ned ok sii, ech ghöre d'vorwörf scho, das mer sie nöm tüeched iibezieh ond sie ned tüend informiere ond so wiiter. aso schlossäntli chamer wohrschindli mache was mer weott, es esch ned recht. ond de wösseds meischtens au no alles besser ond wörtet ALLLES anderscht mache... debii sends 1.noni mol ghüürote (chönds aso ned vergliiche) ond 2. eschs im GG ond mis hochzyt ond es cha ehne herzlech egal sii öb sies so wörtet mache oder ned. sie chönds jo de au so mache wie sies wänd.
aso wörkli, momentan esch forchtbar.... die eint vo beide goht jetzt no rasch rasch as gliiche ort hii i d'ferie wie mer de i d'flitterwoche gönd... hetti ehrli gseid au ned grad brucht. aber was sells, wenn för sie d'seychelle ned speziell send ond mer eifach so rasch spontan buecht ond goht...

Mädels, viele Dank für die liebe guete Wünsch vo eu!!¨Hie gahts zu mim Bricht: http://www.heiraten.ch/forum/board/versc...5_238_2.html#18

Guete Morge

Danke no für aui liäbe Wort wäge minere Beste. Ig ha sit denn nüt meh vo ihre khört u irgendwie muessi ehrlichgseit säge, dass das grad zu ihre passt. Ha am Wucheändi no lang mit mim Mami gredt u sie het mir de o gseit, dasses bi mire Fründin immer drum gange isch, dass es ihre guet geit u dass sie e recht negativi Person sigi. Sie sig mit nütem z friede u dass ig jetz eso zfriede bi privat wie im Job, cha sie wie nid vrrchrafte, drum vrsuech sie mir das jetz z vrmiese. Abr das schafft sie nid...

Janedoe: WOW gratuliere dir recht härzlich zur Hochziit Di bricht tönt ja mega guet, bitz stressig, abr schlussamend doch no schön Sehr schöni Föteli hesch aghänkt! Und wie fühlt sechs eso a, vrhüratet z si?

Malinchen: Auso ig finde, dass du dert söttsch zum Guaför gah, wo du di wouh füeuhsch. Es cha scho si, dass z Mami vo dinere Kollegin echli enttüscht isch, abr du muesch für di säubr luege u grad aune rächt mache chasches ja de sowieso nid... Abr sie wird das de scho vrstah!
Auso das mit dine Fründinne isch ja o mega doof. Auso isch ja schön, dass sie sech so wei ibringe u o wei häufe, abr dass nur öpert TZ cha wärde, sött ne ja o bewusst si. Chani vrstah, dass di das imische bitz närvt. Sie chönnte ja dir ihri Hieuf abiete u müesse ja eigentli o nid immer aues wüsse...!

Taeboyana: Ja es isch würkli nid eifach. Vor auem wenni irgendwie genau weiss, dass sie mit ihm nie wird glücklich wärde (ussert ig tüüüsche mi grad extrem). Ig findes eifach o so schad, dass sie absolut kei Stouz u kei Säubstachtig het. Entweder het sie eifach immer eso übertriebe, wo sie mir die Sache vrzeut het u es isch eigentli aues gar nid esooo schlimm, odr sie isch würkli eso dumm (sorry, abr es isch eso) u laht sech so behandle u näre höselet sie ihm no nache. Da chani eifach o nümme vieu mache u egau wasi säge, sie macht eh was sie wott... Eh ja, irgendwie wotti mer z Hochziit vo ihre nid vrmiese lah, u dass sie bi üs daheime jetz scho e Wuche z Thema Nr. 1 isch, wenns um z Hochziit geit, denn isch das doch scho z vieu u es schisst mi langsam ah, dass das jetz eso negativ behaftet isch...

Pricana: Ja gäu, nachane vrmieset sie mir de no de Hochziitstag mit ihrere Luune. Nei danke!
Hihi bi ja gspannt uf öii Hochziitsturte. Mir si zwar o ade Hochziitsmäss gsi, abr hei die denn gar nid gseh. Vo wäm isch de die?
Gratuliere zude Lohnerhöchig! Isch schön, wenn sech d Müeh lohnt!

Daenu: Ja es isch mega schad mit minere Fründin. Abr wie du seisch, wahrschienli isch sie eifach frustriert ab ihrere eigete Situation u ig stah haut grad ide Schussbahn. Abr ig muess säge, dass ig irgendwie merke, dass mer a so verschiednige Pünkt im Läbe stöh, dassi nid weiss, wie die Fründschaft wiiter pflege. Auso weisch, mir tüeh hürate u dänke a Familieplanig. Abr mit ihre chani gar nid über settigs redä, wieu sie so anderi Sache im Chopf het! Echt schad!
Z Chleidli isch ja würkli mega härzig! Chani mer guet amene chliine Bluememeitli vorsteue!

Littlefoot: Ja mau luege öb u wenn sie sech besinnt. U wie du seisch, es cha guet si, dasses denn de z spät isch... Bi au denä Sache wo sie mir a Chopf gworfe het, hani eifach o gmerkt, dass sie mi gar nid kennt. Wieu suscht wüsst sie, dass das aues gar nid stimmt, wo sie da vo mir bhouptet... U das het mi eigentli ouno möge. Wie cha sie mi nach 8 Jahr derewäh fautsch ischätze? Schlimm...
Hihi bi ja gspannt, öb du bi dire Deko bliebsch odr no mau änderisch mit de Jute findenis ämu sehr schön!

Nala: WOW hesch ja e erfougriichi Londin-Reis gha! Die Schueh si ja mega schön! M&M's wei mer de ouno mache lah. Wie lang si die ächt haltbar?
Ja gäu, öbi sone Fründin bruche, hani mer imfau das Wucheändi o ziemli überleit. Sie het sech o agemein nume gmäudet, wenn sie öpis het wöue (Auso im letschte Jahr ämu). U wie gseit. sie kennt mi irgendwie gar nid... Und uf settigs chani ehrlichgseit vrzichte...

Sue: Ja auso wenn sech das mit öirere Catering-Frou nid gli klärt, denn würdi imfau o luege, dass de rasch chasch wächsle. Wärs de für z Ässe u z Apèro odr nume Apèro?

Guete Morge liebi Mitbrütlis

Malinchen/Stella Black: Tuet mer so leid für üch zwei und isch völlig unnötig vo üchem Umfeld. Das sött doch üche grossi Tag werde und mer sött sich so richtig druf chönne freue und sich ned no mit so unnötige Sache müesse beschäftige

Malinchen: So lässig weg em Coiffeur. Das chani so richtig verstah, ich lahn a mini Haar sit Jahre niemert andersch als min Coiffeur ane. Leider wärs viil z tür, wenn er mir ade Hochzyt d Frisur wür mache, wil er ja in Züri isch und den extra uf Einsidlä ufecho müesst Naja, ich han jetzt mal en Termin für d Probefrisur bimne Coiffeur z Einsidlä abgmacht, womer d Vikunja da im Forum empfohle het. Bin ja gspannt wies wird.

Pfingstrose: Het din GG d Iladige mitlerwile verschickt? So langsam pressierts ja würklich...

Claudilein: Tönt ja ganz eso, das du das Thema mit dinere Fründin chasch abhacke, findi super. Und zum Glück isch das ganze doch no so lang vor de Hochzyt passiert, denn stressts ned no meh.

Sue: Muess jetzt grad ehrlich säge, das mir das mit em falsch igschribne Termin im Februar au passiert isch. Es sich ebe mega gemein will d Date im Februar und März genau am gliche Wuchetag sind (Also zb. de 17. März isch au en Mäntig), drum hanis gar ned gmerkt, dasis falsch itreit han, bi mir isch den aber zum Glück umgekehrt gsi, de Termin isch erst im März und ich han ne scho im Februar itreit gha
So schön weg dim Chleid. Hesch es Föteli devo? *gwunder*

Me: Mir hend ja am Samstig üse "Monstertag" gha. Am 10ni hemer mit dene vom Restaurant abgmacht. Mir kenned die wos ghört scho lang, ich han während em Gymi amigs det im Service gschaffed und de Wirt isch de Firmgötti vo mim Brüeder. Mir hend s Menu und de Wii usgwählt und will er üs s Gabelgeld für d Turte erlah het, simer genau im Budget gsi. Und den het er no gseit, er schenki üs s Zimmer für üsi Hochzytsnacht, die schönst Suite wos hend und zudem müemer au nix für d Verlängerig zahle, das heisst mir chönd problemlos bis am 2 fiire Wow, ich bin s erscht mal a dem Tag echt überrascht gsi. Also ich han scho denkt, dass si üs bi gwüsse Sache entgegechömed, wil mer si ja kenned. Aber ich het nie erwartet, dass si so grosszügig sind.
Denn hemer mit dem vode Bäckerei für de Apero agmacht gha. Er stellt üs jetzt mal es komplets agebot mit allem (also au Getränke, Service etc.) und den chömer immer no striche, wemer öppis devo selber wennd mache, bin echt gspannt wie tür d Offerte wird.
Denn hemer mit em Pfarrer agmacht gha und das berüchtigte Formular vode katholische Chile usgfüllt. Isch überhaupt kei Hexerei gsi und ich muess säge, ich han d Frage zum Teil no würklich sinnvoll gfunde.
Nachher simer zu mine Eltere hei. Mis Mami isch grad vom Poste heicho und ich han ghulfe d Täsche usrume und den seit sie eifach so nebebi, si heged entschiede, dass sie s ganze Esse übernehmed!! Ich het das niiiiiie vo ihne erwartet. Mini Eltere sind überhaupt ned traditionel (han glaub schomal gseit gha, dass si u eifach ufeme Berg ghürate hend) Ich hans chum chönne glaube! Aber mir hend u freud dra, han ja es paarne da ine scho verzellt, dass mer recht müend luege weg em Budget und das isch jetzt natürlich en riiise erliechterig. Isch den grad die zweiti riise Überraschig a dem Tag gsi

@jane: no mal härzlechi Gratulation und merci für dä cool Bricht!

@broncos: Das isch ja meeeeega cool!!! Dä Tag isch ja mega erfolgriich gsi für öich... So schön dass dir so viel Unterstützig bechömet... Gäll es erliechteret de glich so einiges wemä weiss, dass me när nid gad Pleite isch nachem Fest...

@Sue: Schön hesch dis Chleid gfunde!!! I bi natürlech ou gwunderig... gits Föetli?

Mir hei üsnä TZ verschiedeni chlineri Ufgabe übergäh, z.B. mi Brüetsch luegt für Iis wo mir die Badwanne drmit chöi fülle wo när d Getränk dri chömä, sie koordinierä Biiträg wo d Gäst wettä mache, düe d Gäst am Hochzyt no mau übere Tagesablouf informiere, sie häufe bim Deko bastle und dr Polterabe organisiere sie eigetlech allei.

Mir träffe üs rächt hüüfig (so all 1.5-2 Mönet) und de gäbä mir ihne eifach immer wieder so chliners Züg ab...

@Pfingstrose: Mega cool dass aui bi öich übernachte! Das wird sicher super...

@me: Mir hei gester no mal es Träffe mit üsnä TZ gha... Es isch gloub würklech gad guet gsi, wöu erstens ir letschtä Zyt einiges isch gange bi üs wo mir sie hei chönnä update und zwöitens isch halt äbä das Gstürm gsi mit minä zwöi Fründinne... I ha när no erfahre, dass sie hei agfange mini Besti übergah und z.B. via mi Brüetsch hei versuecht Föteli vo üsem Ziviler z becho für die Karton-Toggle wo mir wei mache füre Fotobooth. Drbi het d TZ vo mim GG scho so Figure bstellt online... Jetz müessä mir gloub de würklech no mal mit ihne rede, dass sie eifach nid sölle Sache organisiere ohni das abzspräche, süsch si sie halt när eifach sälber tschuld wenns nid cha umgsetzt wärde. Abgseh vo däm isch ds Träffe super gsi, sie si alli mega härzig und i bi soooo froh, dass sie üs so guet unterstütze. Vor allem mi Brüetsch isch würklech süess, er isch ja ersch 20gi u het jetz no gad ä nöie Job aber leiht sich mega is Züg und git sich mega Müeh...

Hüt faht scho wieder ds Semester a und i bi no voll nid parat. Ha irgendwie ersch gad mitem Prakti abgschlosse u jetz geits scho witer... Bi no nid soooo motiviert. Aber ja, so geits halt.

Wünsche öich allne ä schöne Tag!