Liebi Brütlis

Ich mälde mich au wieder mal, han grossi Neuigkeite, aber leider au sehr schlächti.

Zersch aber @laprincipessa: Es tuet mir u leid, dass dini Grossmuetter verstorbe isch so churz vor em Hochsig. Mer merkt, wie gern du sie debi gha hettisch. Das wirft natürlich en Schatte über di wiitere Vorbereitige. Am beschte nimmsch der vilich es paar Täg zum zur Rueh cho ohni Hochsig plane.
Vilicht findeder nacher en Wäg zum sie doch uf en Art a euem Tag debii z ha und ihre nomal Ehr erwiise? Vilicht hät sie e Brosche gha, wo chöntisch an Bruutstruss mache lah? Oder sones Ahängerli mit emene Föteli vo ihre drin?

Me: Mir gahts leider gsundheitlich sehr schlächt. Eigetli wär ja en Operation planet gsi, aber die findet jetzt nöd statt. Ich bin i de letschte Wuchene immer wieder notfallmässig es paar Täg im Spital gsi. Han wohl en Darmverschluss (bzw. zwei) oder öpis ähnlichs gha und han e chlini Operation müse mache lah, wil mini einti Niere gstaut gsi isch. Mer hät dänn bim erste vo dene Spitalufenthält nomal es CT gmacht und gseh, dass sich de Chräbs innerhalb vo nur vier Wuche enorm usbreitet hät. So macht en Operation kei Sinn und ich han scho wieder mit Chemotherapie gstartet letscht Wuche.

Min Onkolog hät eus au offe gseit, dass er nöd dänkt, dass ich längerfristig chan gheilt werde. Aber wie lang ich no Ziit han da, chan niemert säge. Es isch en mega Schlag gsi. Ich möcht d Hoffnig nöd ufgeh, aber bin au realistisch. Rein mänschlich medizinisch gseh chan mer mis Läbe nur no verlängere, aber wohl nöd rette.

Min Maa und ich händ drum beschlosse, dass mir au eusi kirchlichi Trauig (wo für eus eh vill wichtiger isch) tüend vor verlegge. Drum hüratemer jetzt scho am Samstig. Mir macheds im chline Rahme, planed aber wiiterhin, am 12. April dänn nomal z fiire mit meh Gäscht. Aber mit de eigetliche Trauig hämmer eifach nüme welle warte. Und wie's mir im April gaht, isch schwierig zum abschetze. So isch s Risiko uf zwei Date verteilt. Aber im Momänt gsehts guet us für de Samstig. Mini Verdauig isch immer nonig richtig guet, aber sie schaffed wieder und ich bin langsam wieder am Choscht ufbaue.

Ich bin mega berüehrt, wie vill Lüüt mitschaffed, dass mir am Samstig chönd hürate. Mini Trauzügin isch de Hammer, sie organisiert soooo vill! Hüt Nami nimmt sie scho wieder frei für mich, demit mir s Chleid chönd go hole. Das isch übrigens letscht Wuche im Spital abgsteckt worde. Sind extra zwei Schniiderinne det ane cho defür. So liäb!
Isch au rächt amüsant gsi. S hät det uf de Station rächt vill jungi Ärztinne und Pflägefachfraue, wo dänn au no gwundrig ine güggslet händ.

So, das wärs mal vo de Neuigkeite.

Han no gläse, dass ihr wäg Gottesdienschtbüechli diskutiert händ. Also, mir mached sotigi (bzw. min Vatter machts). Mir sind aber no bizli am abwäge, was alles dri söll. Sicher d Lieder, wo mer gmeinsam singed, und en grobe Ablauf und wahrschinlich au d Bibeltext.

Liebi Grüess,
Fara

jö danke iehr liebe
Jo, Liim und Wasser (1/1) mische git Liim Ich glaube, das het mit de Stärki z'tue, oder so
Äbe, für das, das es würklich nur es Testobjekt isch, find ichs au sehr härzig. Eigentlich wet ich jo mit Ballön schafe, sodass mer so Chugle überchunt. Oder Härzli-Ballön, für z.B als Deko für d'Wänd im Restaurant oder so. Ach, es gäbt tuusig Sache wo mer so chönt mache.

duuuuu lilian? Wäg de Wiifläsche ... hesch mer do es paar Idee? Ich han äbe gester denkt, theoretisch chönt ich dete jo au mit Schnuer die Fläsche quasi iwickle, oder halt wie es Chörbli mache für d'Fläsche .. bin aber offe für anderi Idee

Littlefoot: oh cooooool, das isch jo ganz e cooli Sach demfall!! Gratulier dier demfall zu dem Schnäppli Gisch de Bscheid wie's gsi isch ... Wie lang hebet das denn? Ich würds evtl vorher (also April) mache. Ich bin eh ungeduldig.

Liebi Fara
Es macht mich ganz truurig, das z'läse. Und mier fählid d'Wort.
Ich verstohne eu guet, das iehr alles vorverleit händ. Ich findes uh schön, wie eu alli unterstützig, sigs d'Trauzügin, di Ma und all die Lüt wo um dich ume sind.

Ich wünsche dier ganz ganz viel Chraft. Gib d'Hoffnig ned uf, es isch en grosse Bestandteil vom Läbe. Ich bewundere dich würklich, wie du demit umgohsch. Es isch sicher ned eifach, und ich wünsch dier uf däm Wäg alles alles erdenklich Gueti, ganz viel Chraft und natürlich für am Samschtig alles alles Gueti für dis Hochzit!!!

Ich drück dich, unbekannnterwiis, ganz fescht
Snicki

*reinschleich*

Liebi Fara, ha grad di Bricht gläse und eg be gschockt! Es duet mir so leid dass du das muesch duremache i scho so junge Johre! Unglaublich! Eg wünsche dir und dim Ma ganz viel Chraft und alles Liebi und Gueti für euchi Zuekunft. E hoffe dir heit no e gaaaaaaaanz langi Zit vor euch.

Ganz liebi Grüess
Dandi78 (e 2013er Brut)

Liebi Fara
Es duet mier au mega leid das z'lese.. Bin gad recht verschrocke und truurig .
Ich wünsche dier und dim Maa ganz vill Chraft und hoffe ganz fescht uf es wunderschöns Fäscht am Samschtig!! Ich hoffe, dass iher trotz allem eue Tag chönd gnüsse und wünsche eu ganz e schöni und unvergässlichi Hochziit!!
Ich finds au uu schön vo dim Maa und vo de Trauzüge wo dich so unterstützed.
Druck dich ganz fest..

Zuletzt bearbeitet am 13.03.14 11:18

Liebi Fara, ich chan mich de anderne nume schlüsse. Das isch ja garnöd schön so öpis zghöre. Ich finds wahnsinnig wie ihr das jetzt alles meistered und das ihr glich no mengisch lache chönd. Ich hett so e enormi Angst und ich finds wunderbar wie din Schatz zu dir staht und ihr das eifach dureziehnd. Isch ja für alli Beteiligte enorm schwierig. Ich drucke dir Dumme und mengisch passierd Sache wo mer nöd erkläre chan und so öpis häsch du verdient und ich hoffe sehr, dass das passiere wird. Mengisch gönd doch die cheibe Chrankheite so wies cho sind! Und das häsch du verdient!