Danke ihr liebe! Bin glich im Gschät... Hihi! Aber isch egal.
Bikini: Ah ich hasse Bikini chaufe. Ich han es schöns gha wie ich finde aber jetzt isches nach zwei Saisons so lotterig am A***. Es gseht us wieni id Hose kakt hetti. Vorallem wenns no Nass sind. Gönd würklich nüme... Jetzt strähli mal de ganzi Zalando Shop dure. Grr...
Guet jetzt bini paranoid... Aber han gad d Pyjiama Hose gfunde wo i euses Farbkonzept passed. Hahahaha! Mir hend ja d Fotografin scho bi de Vorbereitige debie. Den muss eifach alles passe... Puhahahaha, das dörfi ja nöd mim GG verzelle suscht bringter mich hüt id Klappse.
@pfingströsli: all the best to your burzeltag!! gnüss es, häsch dir ja en wunderschöne tag usgsuecht!! zudem häsch mer jetz grad en lachchrampf wäg dim bikinihösli bschehrt. und hey, wänn scho dänn scho. die pyjama-hose müend ane und zwar sofort!!
@jane: eusi isch ebe au grad det wo mer wohned. en längere weg würdi nöd in chauf neh...aber sie isch sooooooooooo lässig und hät mega freud und isch total begeisteret jedes mal wänn mer wieder chömed und e neui idee händ (aso ich )...chan sie jetz nöd asaage. het es schlächts gwüsse und sie macht ja würkli usschliesslich wunderschöni sache. han no nie öpis gseh i ihrem lade wo nöd genau mim stil entsproche hät...und ja, jetz zahled mer halt die chf 1600.00.
Lillian: Jo bi üs sind Früehligsferie…zum guete Glück! Weisch Sportferie sind bi üs im Januar. Ja susch chönnti nur unbezahlt neh.
Taeboyana: Jo gell, i freu mi meeeega dass ebe ihri Schwöster extra chunnt. Danke danke! hoff übermorn wirdi denn au so guet usgseh! *smile* Hmmm, ich würd glaubs dis Mami froge. Bim Coiffeur chan dini TZ ja nöd helfe wenn sie selber ufem Stuehl hocked…und obs denn gnueg suuber isch für dis wisse Kleid. Me stiegt ja denn am HZ-Tag vo unne ine weg de Friise und stellts drum uf de Boge! Haaaralarm!
Pfingsti: Haaaaappy happy B-daaaay!!!! Ich bin au es Widderli Haha, so geil! Ich han auscho Haarschnitt usegsuecht für nachem HZ. Obis denn mach? Etz sind dHaar sooo lang…hmmmm! We’ll see Tönsch also begeisteret vode Bluemefrau, freut mi! oooh mir wänd au unbedingt mal en Hund. Hend scho sit eeeewigs sogar scho en Name für de Hund. Aber wetted denn scho chli meh Ziit für de Hunzi ha. Mega guete Tipp wegem Tischtuech. Und Kompliment…würkli en meeeega schöne Ort für d’Trauig! WOW!
Nala: danke danke danke! Die Buechstabe sind zämä-gmixt. Mir hend mal uf dWohnigsiweihig HOME übercho in wiss. Etz hani nirgends LOVE gfunde und drum hani denkt O und E vo LOVE hani scho. Drum hani im DEPOT separat es L und es V kauft und mit Acryl-Farb agmolet – Tadaaaa! Fertig wars!
Neue Pass: Danke Janedoe, dass du mich dra erinneret hesch. Chan am 2. Mai de neui Pass go mache. Juhuuu *freu*
Jane: Yeahhh! Mitem HZ-Kleid an Match! Das wär zuuu geil !
Sasi: Yeah, bling bling. Schööön! Isch no geil die Gold-Bling-Kombi. Ich scho chli e komischi Situation. I weiss no wo du s’erscht mal gschriebe hesch wegem Dilemma. Schad dass da etz zwüsched eu stoht. I hoff ihr chönd mal no drüber rede!
Sue: Danke! I freu mi au scho uf dFöteli vom HZ!!! Scho baaaald!
Me: Han hüt bi Honeyhome en alte Koffer in mint chönne go abhole und hanen grad scho id Kirche brocht. Mini Fründinne hend auscho de Torboge id Kirch brocht (bi soooo gspannt, hanen nonig gseh). Gester hemmer no alli 56 Väsli id Spüehlmaschine tue, sodass denn suuber sind und etz hani hüt Nomi dSpitzebändli dragmacht. GG isch grad no ide Schuel und kopiert dLiederbüechli für dKirche. Morn simmer de ganzi Tag ide Kirche am Irichte. Freu mi scho mega. Denn gsehni endli wie alles woni selber gmacht und bastlet han mit de Blueme harmoniert. Ha mal es Bild aghenkt vode Tischdeko...halt ohni Blueme, ufeme schwarze Tisch...weiss nöd ob mer sich's so vorstelle chan.
@Daenu: Dochdoch, chame sich vorstelle. Schöööön! Haha, ihr händ au so vill Väseli? Mir händ 66 Sanbitter Fläschli und no 15 anderi Väseli.
Ich freu mi au so, z gseh, wie das dänn als Ändprodukt usgseht. Guet, so d Apero-Deko hämmer ja schomal gha. Und det gibi au jetzt wieder (s letscht Mal au scho) eifach d Sache mit und lah de Lütlis suscht freii Hand. Klappet sicher. Händ ja gueti Sache usgsuecht.
Aber morn gömmer go ufstelle i de Abiglocation. Da bini debii und lueg de Lüüt uf d Finger. *gg*
Und d Candybar stell glaub ich uf, wil da hani kei Vorlag gmacht (bin nüm dezue cho, das z üebe). Aber chunt scho guet. Händ zumindest hüt di verschollnige Gläser defür doch no gfunde. Mir Glöön... Hett mi scho chli akäckt, wänn usgrächnet die verlore gsi wäred. Sind nämli tüür gsi. Und schön.
@Pfingsti: (Hani luschtig gfunde, de Spitzname. Übernimm en grad.) Kuuli Pischihose. Die leisch ja vilich au spöter gern wieder mal a. Bi gester au go Badchleider und Tankinis aprobiere. Bikini hetti no (guet, ha zwar rächt abgno, weiss also nöd, öb's no gächtet). Aber das gaht leider nüme nach de Operatione. Suscht würded alli so luege: Ha halt riise Narbe uf em Buuch und vor allem au en künstliche Darmusgang. Defür musi mi nüm schäme defür, dass min Buuch so schneewiiss isch. Wobi, d Unterschänkel sind no schlimmer amigs. Hmm... Burkini?
@Haar schniide: Hehe, das hani au vor. Han d Coiffeuse gester gfrögt, öb sie am Mentig no en Termin frei hetti. Han d Haar uf s Hochsig hii eifach wachse lah. De letschti Haarschnitt isch en Churzhaarschnitt (asymmetrisch no dezue) us em Jahr 2012 gsi (ok, Dezämber, aber gliich). Und leider verlüri au so cheibe vill Haar di letschte Täg. Han scho mal prophylaktisch e Perügge usgsuecht für de Fall, dassi alli verlüür. Aber hoff's ja scho nöd. Die wär e mega churzi Frisur. Sogar abgsägnet vo mim Maa. Ich tendier au dezue, am Mentig d Haar wieder rächt churz z schniide. Staht mir guet, fühl mi wohl demit (isch halt weniger cool zum d Haar verschiede chöne frisiere) und vor allem hani dänn nöd die lange Fäde, wo usgheiet. Aber bizli krass findi de Schritt jetzt scho, hät halt scho lang brucht, bis sie wieder lang gsi sind. Wonis s erscht mal churz gschnitte han, isch de Fall für mich vill klarer gsi.
@Baschtle: So, mach grad es Pöiseli. Aber sind fascht fertig. Han no en Tischordnigs-Aschlag gmacht. Nöd so edel wie die vo eu, wo's imene Bilderrahme mached (hett niemals no eine gfunde). Aber bin zfride. Han en uf Packpapier kläbt und une no es Spitzeband ane ta. Und d Asteckerli sind sowiit au "fertig". Muss aber no de Chläbi hine druf tue und han mal no vor gha zumindest bi dene (de gladne) Gescht hine druf z schriibe, uf weli Fotinummere sie chömed und a welem Tisch sie sind. Isch aber nöd driiingend nötig. Wobi, das mit em Foti wär scho praktisch. Staht aber eigetli au im Godi-Büechli. Mis Mami hät no d Serviette fertig zäme baschtlet. Bin scho sehr froh. Und dänn hani no en Art e Girlande gmacht mit de erste Siite vo eusne Iladige und Spitzeband. Wil mir ja soooo vil z vill Iladige bstellt han. (Hettet immer no tuusigi vorig. Ok, nöd ganz. Aber wohl a di hundert. Mir Glöön händ jede Gast einzeln bstellt und vorsichtshalber no paar Iladige meh. Händ voll nöd dra dänkt, dass vili Iladige ja a Familiene oder Paar gönd und s dänn nöd für jede en einzelni brucht. Pfffft.) Mir händ dine baschtlet. Mir händ mini Sunnebrülle nonig züglet und mis Mami hät au keini debi gha und es hett bländet. Wobi mir natürlich jetzt grad ifallt, dass mer au d Store hett chöne abe lah. Also echt... Ich chum grad völlig verpeilt übere glaub i dem Biitrag. Vilich binis ja au.
@a propos verpeilt/trötelig: Hani scho verzellt devo, dass mir eus zerscht sälber nöd mitzellt händ für de Znacht? Und em Caterer di falsch Teilnehmerzahl gmäldet händ? Wie blöööd. Isch eus ufgfalle, wo mer d Tischornig gmacht händ. Und am gliche Tag hani min Brüeder gfrögt, wie mer s "Meier" schriibt vo sinere Fründin. Händ ebe zwei mit em gliiche Vorname, drum chunt det zum Teil de Nachname dezue. Ha gseit, ich weli sie ja nöd falsch schriibe, wär peinlich. Dänn antwortet er, es wäri also tatsächlich peinlich worde. Sie heissi "Müller". Sehr geil. Zu minere Verteidigung: sie sind nonig sooo lang zäme und ich han sie nonig oft gseh. Aber gliiich.
@janedoe: Sorry, de Bitrag wäg de stylehäppchen-Bruut hani vorher voll überseh. Isch ja krass, die hüratet spöter nomal kirchlich. Gebeds ächt nomal so viel us??? Ich weiss nöd, ich hans zwar au mega schön gfunde, d Fotene und d Deko und alles. Aber ich glaub, s Wüsse, wie vill sie zahlt händ, hät's mir irgendwie kei Ahnig, fascht chli "madig" gmacht. Ich mein, jedem das Seine. Ich wett das au nöd verurteile und wahrschinli wär au euses Budget (ehrlich gseit, voll kei Ahnig, wie vill mir schlussändlich ganz gnau usgebed) anderne Paar scho vil z vill und eusi Deko und Planig übertribe oder so. Aber jedefalls ich glaub, viles devo kriegt mer au mit chlinerem Budget als 80'000 ane, vilich biiizli weniger cool (eusi Candybar wird kei Cupcakes und so ha, sondern halt Schläckzüg und Guetzli), aber so what. Ich glaub, so ganz krass es "Pinterest-Hochsig" würd ich gar nöd welle... Da würd mir de persönlich Touch fascht chli fehle. Weiss nöd. Obwohl ich natürlich au voll beiflusst bin vo dem ganze Vintage-Spitze-Väsliblüemli-Boom. Ich find das wunderschön und drum gits das bi eus au. Und Pinterest bini eh chli am entdecke, findi suuuper. So meinis nöd. (Bin dir ja am folge, häsch gseh? Ha au vili Sache vo dir, Daenu und Pfingsti bi mir here pinnt. )
Hui, für 2 vo üs isch morn dr gross Tag... fiebere auso chli mit euch mit und freue mi scho uf die schöne Brichte!!
@Pfingsti (hihi, gfaut mer o gad die Abchürzig, darfi?): Itz bini scho zspät... glich no HAPPY BIRTHDAY!! Hesch di Tag gnosse? I cha nümm ab dine Pyjamahose... hesch se bsteut? Wägem Bikinihösli hets mi ou fasch verchlepft. Hesch es schöns gfunge? Ig ha ungefähr 10 Bikini im Schrank u ha zitewiss sogar scho es Bikini-Choufverbot vo GG uferleit becho (zäme mitme Täschli-Choufverbot) Aber letscht Jahr simer ja z Oustralie gsi und wie chame bitte z Oustralie KES Bikini choufe...? Und was isch d Überraschig vo dim GG gsi?
@daenu: Eui Tischdeko wird u härzig! So richtig romantisch und mit Liebi gmacht
@Fara: Du bisch mega am vorbereite und bastle, das chunnt super use! I hami köstlech amüsiert ab dim Bitrag und wägem Burkini hani würklech müesse lache, obwou ja d Gründ eigentlech gar nid luschtig si. Isch auso gar nid bös gmeint! Aber du hesch das so mit Humor gschriebe und i findes eifach toll, wie du so erfrüschend mitme Ougezwinkere chasch drüber schriebe und di Humor anschinend nid verlürsch. Blieb so und bhaut die Hoffnig, mir hoffe aui mit dir!!
Wäg dr Stylehäppchen-Hochzit (i bi se zwar ehrlech gseit nie ga aluege, aber i weiss o nid ob sie so mi Gschmack wär) stimmi dir absolut zue. I dänke aube, für soviu Gäud (wemes hätt...) chönnte mir aui ds Tollschte uf d Bei steue. D Kunscht isch doch, mit weniger meh zmache und em Ganze e persönlechi Note zgäh. I persönlech wett ja o es Hochzit und e Deko wo zu üs passt und nid eini für iz Hochglanzmagazin wo eifach möglechst trendy usgseht. Aber das isch sicher Asichtssach. De muesi di ja uf Pinterest ou no ga sueche! Mir gfaue die Sache dert meistens o mega, aber äbe me cha aues übertriebe und mängisch isch ja weniger perfekt nid schlechter.
@me: Gester heimer äbe im Gschäft die Kafipouse gha woni d Iladig ha gäh und offiziell verkündet, dassi hürate. Ha de ou no Muffins bachet gha und sie hei sech aui gfreut und lieb gratuliert und d Iladig het ne mega gfaue. Üsi Assistäntin het de grad e Outlook-Termin gmacht für üses Hochzit. Het mi auso gfreut.
Am Mittwuch si de no mini Ohrepänk cho woni ha bsteut (ha hürzlech es Biudli postet) und sie si ir Realität no fasch schöner asi se mir ha vorgsteut! Ha würklech Fröid dranne. De hani bi LaRedoute im Usverchouf no sones Spitzebolero in écru erstande für 20.- woni evtl. am Zivile alege, je nachdäm wie warm oder chaut's de isch. Und üsi etsy-Bstellige si aui ufem Wäg
E Frag a aui: Heit dir aui es Strumpfband? Faus ja bitte Biudli zeige I wett gärn eis aber nume zum alege, nid zum wärfe Bsteue de äuä o mau no eis uf etsy.
Nächst Wuche heimer wieder 2 Termine. Am Mänti mitem Sänger (das wär ja o no letscht Wuchenänd vorgseh gsi, aber är isch chrank gsi) und am Samsti gömer bim Resti z Murte verbi womer ds Catering für ds Zivile lö la mache. Das isch e ehemalige Schukolleg vo GG. Und hüt hani no mitem DJ abgmacht zum telefoniere. Drücket mer d Düüme!
Wünsche aune e guete Start i Fritig und de gli scho iz Wuchenänd
oh mann, i ha momentan echt nur no zyt fürs Forum weni im Büro hocke... Wes so schön isch ziehts mi halt scho meh use, und när hani no gad paar angeri Projektli am loufe wo die letschti Zyt chli ids Rolle cho si u das aus näbem HZ Vorbereite... Mängisch fragi mi scho chli ab mir sälber, so viel sälbst-gmachte-Stress. Villecht bini chli masochistisch?
I stige jetz eifach wieder i, sorry weni halt nid uf alles cha igah...
@pfingsti: (sorry, i mues ou gad... ) Sooooooo geil wägä de Pischi-Hose! Hesch se bstellt? haha... U das Problem mit de Bikinis kenni. Bruche sowieso nöii wöui ha abgnoh u jetz sie si genau so lodelig am A... wie du hesch gschribe. Gseht schrecklech us. Ha scho paar usgsuecht uf conleys und sportscheck aber no nid bstellt... Hesch viel schöni gseh uf zalando?
@fara: i gsehs o so mit derä stylehäppchen-hochzyt. I ha o eismau gad mit erä Fründin drüber gredt, klar we mir jetz meeeega viel Kohle hätte würde mir villecht chlei meh usgäh. Aber sicher nid soooo viel! Da chämä mir de no ganz viel anderi Sache i Sinn woni lieber würd choufe oder mache...
Hihi so luschtig dass dir öich nid mitzellt heit... das isch üs ou passiert. Aber mir heis no gmerkt bevor mir d Azahl hei düregäh. U mit em Name isch ja ou no gad mal guet gange... Wär ja de scho chli peindlich gsi. Aber i wirde de wahrschinlech am Hochzyt nid alli mit Name chönne aspräche, GG het sone riese Verwandtschaft u die gseh sich alli no so ähnlech - i cha d Näme bis hüt no nid.
@haar schnide: hahaha, das hani eismal ou gad dänkt. I gloub i schnide mir d Haar de ou wieder chürzer nachem Hochzyt. Ha se meistens nur so schulterlang oder sogar no chli chürzer... I mues se eifach no chönne zämäbinde, süsch närve sie mi bim Sport z fest.
@me: I ha hüt vor schnäll i däm Bluemelade verbi z luege wo mir d Sue het empfohle... I weis eifach sälber eigentlech gar nid rächt wasi wott - das isch chli z houptproblem würum i mi da no immer nid drum ha kümmeret. Aber i gange jetz glich mal ga luege, villecht het sie mir ja no tips. U i ha ja no chli zyt bis am Mittag uf Pinterest umezsurfe...
Was steit bi öich so a? Wie geits de Brütli wo morn ihre gross Tag hei?
Anmelden
gniess das schöne Wätter
)...chan sie jetz nöd asaage. het es schlächts gwüsse und sie macht ja würkli usschliesslich wunderschöni sache. han no nie öpis gseh i ihrem lade wo nöd genau mim stil entsproche hät...und ja, jetz zahled mer halt die chf 1600.00.
Mir händ 66 Sanbitter Fläschli und no 15 anderi Väseli. 
Suscht würded alli so luege: 
u ha zitewiss sogar scho es Bikini-Choufverbot vo GG uferleit becho (zäme mitme Täschli-Choufverbot) 
I wett gärn eis aber nume zum alege, nid zum wärfe 
Ha scho paar usgsuecht uf conleys und sportscheck aber no nid bstellt... Hesch viel schöni gseh uf zalando?