Guete Moorge

Daenu & Fara
Gratuliere eu au no vo ganzem Herze zu euere Hochziit :) So schön händer en wunderschöne Tag chöne erlebe, dass sich die ganze Vorbereitig, Bemühige, etc. glohnt händ.. Und natürli au, dass s'Wetter so perfekt mitgspielt hät
Ich wür au gern no es paar Föteli gseh :)

Weddingbee
Han gad müese Dutt go doodle . Ich wür au mal warte, bis er sich entschiede hät mit de Accessoires, dass iher dänn zämä passed .

Squishy-fishy
So kuuhl, häsch en erfolgriiche Shopping-Tag gha. Wo häsch die rosa Bänder kauft?
Das mit de Wohnig dönt guet, findi.. Wenns eu nöd wetet, hetets die Sache sicher nöd verlangt.. Drucke eu de Dumme das es klapped .

Taeboyana
Grauliere zum DJ!! Isch es de Kolleg vo de Party? Oder händer eu für en andere entschiede?

Nala
Händs dämfall zruggschriebe wegem Hane? Isch er dicht? Kuuhl chaufsch en :) Wetsch en dänn nach de Hochziit wiiterverchaufe?
Mier händs leider nüme gschafft zum d'Ring no go hole z'gah.. Jez müemer eus no chli gedulde.. Defür sind iher eui Ring go hole? So schön!! Häsch es Föteli? :) Wow voll schön mit em Gschänk vo de Tante..

Fötele
Ich han mich zume Fotikurs agmolde und han jeze scho s'vierte Mal gha.. Insgesamt sinds sechs Mal. Am Afang hanis aso no recht schweriig gfunde, bis weisch was alles bedütet, wie Brennwiiti, Blendi, Verschlussziit, Empfindlichkeit, ISO-Wert, etc... Abr mit de Ziit ischs den gange.. Ich finde es nützt scho no recht.. Aso ich würs jedem empfehle.. Ich ja jeze dänn grad in Paris no chli üebe .

Me
Mier händ au wiedr mal es vollpackts Weekend gha.. Am Samstigmorge hani no Fotikurs gha, mier sind uf Züri an Sächsilüteplatz / See go fötele.. An Namitag sind den de GG und ich no unterwägs gsi und uf Rappi dänn go z'Nachtesse.. Leider häts den nüm glanged zum d'Ring abzhole..
Und gester hämer no Tanzkurs gha :). Mier händ mal drü Tänz gmacht: Merengue, Salsa und Walzer.. Am Afang hät er gfunde, so möched jeze mal.. Uuups isch dänn au chli id Hose . Und jeze hämer no chli Ziit zum üebe..

Guete Morge!!!

Daenu & Fara: Alles Liebi und Gueti und gaaaaaanz herzlichi Gratulation! Jetzt sinder "Ehefraue". Hihi!

Daenu: Ich würd de Link für d Fotis au meega gern ha!

Sooo jetzt mussi zerst mal schaffe. Bis spöter... En guete Wuchestart ine CHURZI Wuche!

guete morge mitenand

nala: ich weiss zwar nid obis würkli sell mache mitem umzieh. irgendwie chli too much :)
wow cool weg de ring, hender sie chöne abhole !

lilian: oh de tanzkurs tönt lustig :) schade häts nid glängt weg de ring.

taeboyana: cool wegem DJ, gratulierä ! het aso au lieber eine, mein gott :) han die software mal abeglade und etz spinnt mi laptop. brucht glaub u vill platz und videos laufed nüm guet. zudem isch es recht müehsam. ke ahnig wiemer das wend regle. GG macht sich ja ke sorge, aber ich han angst dass es de ke party git, nur sones umedüdele.

broncos: jaaa macht doch nüt, mir hend ja zit :))

weddingbee: haha du bisch die bescht. häsch bim brutchleid au vill aprobiert bis dis gha häsch ?

squishy: für was häsch bänder bstellt ?

me: ich han etz nomal en test tisch gmacht mit schleierchrut und ranunkle :) und eme mintfarbne tischläufer. am GG hets super gfalle. mis mami wo ja d läufer näht meint en jute mit spitze läufer sig besser.etz musi mal luege was ich a stoff cha finde, mint würd mer schono gfalle. defür hät er gmeint holzrondelle gönd uf ke fall wil tisch ja so schmal sind dass es ke platz für teller heb...da mir morn id location gönd, luegi mal aber susch bruchi de d rondelle zum erhöhige i de candy bar z mache :)
de hani ENDLI schueh bstellt ha die wedge ballerina mit ankle strip gno (die blaue, eifach in champagner). hani mi doch mal müsse entscheide :)
gester bini mit ere kollegin und mim sohn am FC Luzern match gsi. und de hend sie glatt gunne...aber muss sco säge s niveau vom fuessballerische her isch recht tüf gsi

@Fara: So schöön heit dirs troffe mitem Wätter und heit öies grosse Fescht so chönne gniesse! Bi scho gspannt ufe Bricht...

@Dänu: Gratuliere ou dir vo Härze!!! I möcht natürlech seeeeehr gärn d Föteli gseh...

@Littlefoot: Dä Tisch gseht mega cool us so!!! Gfallt mir also ou sehr guet mitm mint...

@nala: hihi, so cool sit dir no i Europapark...

@me: Mir hei ds ganze Weekend Family-Schluuch gha. GG u mi hei gad beidi Fest chli agschisse... Si fasch froh gsi wo gester Abä isch gsi, das isch ou äs säutens Gfüehl.

Ussert am Samsti Nami hei mir öpis cools gmacht... drfür bini jetz mal wieder total im Gfüehls-Chaos:
Mir hei üs ja äbä Gäld fürne VW-Bus gwünscht u si jetz immer chli am umeluege gsi für Agebot. Jetz het GG vor erä Wuche gseh, dass die nöie VW-Bus zum Teil günstiger si als die würklech coole alte... Die Alte wo i üsem Budget würde liege, si halt meistens scho rächt abgsifft, nid guet pflegt oder fahre sowieso nümme lang - wenn überhoupt. Und die nöie si zwar ou rächt tüür - aber me chönnt natürlech lease. I bi när mega skeptisch gsi - bi gar nid Fan vo Leasing. Aber es hei när mega viel Kollege gseit dass sie ihres Outo ou gleaset hei u dass das überhoupt kes Problem sig etc. I ha mi när vo GG lah überschnure mau id Garage z gah üs lah berate. Hei när gad Glück gha u ä würklech kompetänte Berater gha wo o nid sone typische schliimige Outoverchöifer isch gsi u säuber viu mit somnä VW-Bus unterwägs isch... I wär inzwüsche überzügt drvo - jetz chunnt ds grosse fettä ABER: Lieferzyt betreit 6 Mönet. D.h. üsi Flittis chönnte mir gad vergässe... Jetz hei mir no gluegt, ob mir halt einä wettä mietä fang für die Zyt. Chostet aber ou wieder fasch 4'000.-! U eigetlech hätte mir de wöue das wo mir Gschänkt bechömä a nöi Bus azahle. We mir aber gad direkt nachem Hochzyt no zuesätzlech 4'000.- müessä ufe Tisch legä für die Mieti gsehts de uf üsem Sparkonto scho langsam chli bitter us. Aber i möcht üsi Flittis uf ke Fall absägä... Ha mi scho so gfröit ufs Campe am Meer...

@Pfingstrose: Jaaa, mir chönnte fürs HZ ev. dr Bus vo mim ehemalige Chef bruuche. Aber für so lang möchti ihn nid frage. Wär ja glich 4 Wuche unterwägs und würde ca. 3'500 km fahre. U so dr "normal" Verschleiss vomnä Fahrzüg u Versicherigschöschte etc. mues me ja scho ca 1.- pro km rächne u we mir ihm das zahle ischs glich ä rächte Baze. So gseh si d Offerte wo mir becho hei eigetlech rächt günstig...

haha, die Brut het sich ja würklech drnäbä benoh... also i hoffe ou schwär dass ig de a üsem Tag chli relaxed bi. Aber sone Szene würdi gloub nie mache, bi nid so d Drama-Queen... Auso i weis ja nid wie i de denn druffe bi. Aber gad so... Haha, i gloub GG würd mi ömu när ou nümme wöue, wenn darfi mir das ersch nach dr Zeremonie erloube.

Ah cool, ha scho viu Positivs ghört vo derä Show... Super heit dirs so gnosse!!!

gäll... isch voll tote Hose. I gloub wenn ig de wieder kei Zyt meh ha, geits de wieder voll ab hie inne...