guete obe mini liebe mit-brüütlis!
hoff ihr händ ostere alli guet übrstande und das de osterhas euch mit gueter schoggi übrascht het ihr händ soo viil hüt gschriebe, entschuldigt wenni nid uf alles igang *sorry*

@jane: ohhh mannooo! zerst muesch erfahre das euri tz's nid wirkli so kommuniziere wie meh sich das wünscht und den no das drama mit em tz?! gits jo ächt nid! fühl di ganz fest druggt! ich ka mi de andere nur aschliesse, das ganze tönt wirkli as hät dä typ es problem. ich finds rächt komisch das meh öper zum online pokere um gäld bätet und de nochär so usrastet wen meh nid nomeh übrkunnt ich hoff für ihn das är sini problem gli in griff bikunnt und vorallem dich nid mitiibezieht! dich so behandle isch eifach unter aller sau! sorry!
au das mit dim vatr tönt vrzwickt, i vrstand jedoch das du dich demit hesch könne abfinde. mis mami het jo au eher e schwierige charakter und het au scho gseit si kunnt nid as hz, ha den für mi miesse sage.. jäno drfür ka ich den dr dag gniesse ohni mich miesse drum zsorge ob si mit öperem ahfoht stritte. (si isch extrem stritsüchtig und findet immer irgendwas zum d lüt vrärgere)
mega toll eures gästebuech! finds e super idee mitem sälber mache! toll hesch de frust grad könne umwandle

@pfingstrose: *rotes-bös-luegend-whatsapp smiley* aso das mit dine bald schwigis isch jo s letschte! hey nei, do hauts eim jo de nuggi use! wie ka meh nur! ich finds zwar au mega schön haltet di gg und du so zäme, abr es isch doch eifach truurig was si euch beidne ah tüend. vrstand eifach nid wie meh em eigete sohn und sinere zuekünftige d hochzytsvorbereitige und d vorfreud so ka vrmiese! goht gar nid, und i vrstand voll das du däre sach noni trausch. hoff aber au fescht das si sich jetzt ändlig mol aständig benäh und sich zämmerisse könne!
ouuuu du bisch jo hüt go s kleid abstecke! hoff isch alles guet gange und du hesch di grad es zweitsmol i dis kleid vrliebt! hoff es git fotis

@principessa: das mitem domino isch ächt doof! hoff das si dir e andere termin könne mache! find das aso au en schlächte kundeservice!

@littlefoot: uiui das isch abr au nid grad nätt vo dim schwieger-omi. aber du hesch das so richtig gschriebe, du zeigschs es ihre grad mit eurem tolle fescht! de kriegt si d auge gar nüm zue vor stuune!
cooool dini schueh sin ko! ändlig glöst das schueh problem!
hmm d ring gfalle mir ehrlig gseit au gar nid, isch gar nid mi gschmack die "gmusterte" ring und find au s schwarz bimene maa ok aber binere frau brüchtis für mi chli meh gold/silber und nur dezänt schwarz. aso unseri ring ghöre au nid zäme, mir hän gfunde es isch wichtiger dases uns beidne gfallt as dases dr glich si mues.. und user uns (und jetzt euch) weiss das au niemer und es fallt au nid uuunbedingt uf.
ahh und bluemestruus gfallt mir de zweit au am beste

@lil.lian: und hesch di päckli no biko?

@weddingbee: aso i find dä priis für reagänzgläsli au vööööllig übertüürt. zum durchmässer vo däne gläsli muessi as ehemaligi laborantin no sage dases tatsächlig breiteri git :o) aber au nid soooo breiti!
das vo honeyhome isch ächt denäbe! hesch absolut richtig gmacht, i hät au genau für 130.- bstellt kei rappe meh.

@malinchen: euri papis sin sooo cool! finds aso ächt schnuusig das si zäme si go shoppe und ez no so halbe partnerlook hän sooo super!

@taeboyana: isch doch mega lieb vo dim gg sim vatr, dänk au becho würdet ihr so oder so, und wie du scho gseit hesch, meh kas au as zuestupf a die gmeinsam zuekunft seh und so händr scho öbis fürs zuekünftige huus, kind, ferie oder was au immer ;o) ach isch de doof wägem flug, aber ihr findet sicher en lösig wo für alli stimmt!

@fara: jetzt bini scho chli spot dra.. aber ich wünsch euch au gaaanz schöni flittis! hoff es goht alles guet und das du keini beschwärde meh hesch. und weisch ömi-ferie sin doch au mol ganz gmietlich ;o)

so ez no chli egopost:
@fotograf: leider sin die fotografe wo ich euch d homepage zeigt ha viiiil ztür gsi. über 3000.- für nid-profis. findi ehrlig gseit übrtriebe.
ha bi jetzt grad no im gspröch mit eim fotografepaar us dütschland. die würde für 6stund 1600€ welle mit allem inkl. und es sin profis.. was dänked ihr? isch das zviil für nur 6 stund? den wär am obig niemer meh drbi.. weiss nid sooo rächt, für 8 stund würde si 1900€ welle.. aber mir wän nid meh as 2000.- eigetli usgäh.
ha no yunchastyle agschriebe, bi de 13er brüüt hän die e paar ka, die hän es package für 1800 für 8 stund.. hach sooo schwer!

@brautmutter: am samstig bini mit mim mami und minere schwöster go "shoppe" mis mami isch soooo kompliziert gsi, eigetli hämir jo für i wägeme kleid welle luege, aber si het eifach nüd schön gfunde! sin in ca 5 läde gsi und niiix hetere gfalle. im esprit hetere den zar ändlig eis gfalle aber zum aprobiere het si kei lust ka. sin de widr gange und ha den gseit das si doch jetzt mol öbis söll probiere wen si scho z basel isch (wohnt susch im tessin) wil mir si jo den au berote könne. de simer zrugg in esprit und si het e mega schön schwarzes cocktail kleid aprobiert und no es usem sale wo bliemlet isch. sin beidi super schön gsi, si bliemlete het aber fast chli bessr passt wo de farbe här und sich biz summerlicher gsi. si het den ääändlig könne zuegäh dases schön isch und hets kauft! das isch en krampf gsi. kuum dehei meint si das si das nur ans zivile azieht und ans fest vilicht doch öbis anders.. ohhh jeee.. mini schwöster het de schnäll gseit das si sicher das azieh mues wil das am beste zur deko usw passt hihi das het si glaub übrzügt.
ah do hani no de link: http://www.espritshop.ch/damenmode/kleid...-024EO1E033_960 bi mim mami ihrer dünklerer huut sehts super us :D

@susch chli me: ha geschter no chli e downer ka und mich bim gg beklagt das är sich zwenig ibringt und ich meh vo ihm erwartet ha. ha au gseit das ich langsam kei freud meh ha am organisiere wil ich sooo schiss ha es nid allne rächt z mache (vorallem sinere familie)… ha mir das ganze eifach so anderscht vorgstellt, ha au vo sinere site meh hilf erwartet.. är het de gseit är mischt sich halt nid dri wil ich mir das fest doch so wünsch und so.. är wil eifach mich hürote und e schöne dag mit mir ha. isch jo schön und guet aber e schöne dag kunnt halt nid vo nüd.. jetzt het är hüt ganz viil sache für d hz recherchiert und gmacht.. bini ächt froh, hoff das blibt no chli so. morn hämir jo unsere marathon hz-dag in luzärn, de het är kei anderi wahl. ;)
hmm und susch.. ah jo de gg het bi sim vatr noche gfrogt ob är de au e bluemeastecker wot (wil mi papi kriegt de ein, wil är mich jo füre begleitet, de findis no schön) mir hän ebe dänkt wen är kei azug ahet (ihr erinnert euch- dresscode drama) seht e astecker jo ehrliggseit blöd us dorum froge mir ihn eifach ob är ein will, de isch d antwort ko "jo wens zu de jeans passt" mich rege die kommentär eifach sooo uf und es vrletzt mi mega. gg het zwar gmeind das sigi nur en spass gsi, aber ach trotzdäm die mache so späss nid eifach so!

uiii sorry mega lange egopost worde!
ebe morn hämir en hz-dag in luzärn vor uns, gön id locations und zur floristin. freu mi!
schöne obe euch no!

Zuletzt bearbeitet am 22.04.14 22:48

guete morge :))

nala: was, dis mami chunt nid ? het sie das mal gseit gha oder was ?
ja fotografe sind würkli tür. ha au mal yunchastyle agfragt gha aber isch mer denn au z tür gsi. ich hoffe findsch no was. nime a bisch i dere phase womer all oder fast duremached einisch...mir wänd vorwärts mache und GG's stressed sich nid aber es chunt denn scho. aso mi GG isch etz voll deby, au wenn er mängisch seit er mög das thema nüm ghörä :) macht etz aber au ganz vill sache und hät ja sogar es gastgschänk usgläsä
chunt de scho ou sinder bi mir dehei hüt

me: ha gester spat am abig chunt es mail vom domino. aso im griff ha isch anders. de erst termin womer ja am dunstig gha hetted, womer denn aber hend müsse verschiebe wil s chleid no gar nid da gsi wär und anschienend au nid isch, chön nid stattfinde. d beraterin (wo mit mir telefoniert hät gha weg dem), heb gseit sie sell nomal schribe...han ihre denn gschribe, de termin sig scho lang verschobe worde, ufe 15.5 mit dere heb ich gredt und sie sell mer das etz bitte nomal bestätige, au d sofortänderig. wenns schlecht chunt hends no nid mal itreit. ah und sie sell nomal in kalender luege. ich sig telefonisch nid erreichbar gsi, sell doch en nr. agä..alles schomal gmacht, die hend mer ja scho mal aglüte !! nei so deppe ehrlich. hetti nie denkt, dass die so unprofessionel sind ? au mit de principessa ihrne termin problem..de leifertermin sig afang mai vo mim chleid. ich sägs eu, die schaffeds echt no dass öpis schief lauft. aber warte etz mal uf s bestätigungsmail.

Guete Morge und Happy Bergfäscht

Littlefoot
Zum Glück hesch no Ziit, zu es anders Chleid für dini Chlii zbsorge. Isch scho so wege de Qualität.
Oh Mann, die sind echt unorganisiert i dem Domino! Ich hett glaub au langsam Schiss, das nöd mis Chleid chunnt oder suscht irgendwas schief gaht. Die sölled de eifach die Änderig richtig guet mache.

Squishy
Ja, mier hend eifach keis blanks Gästebuech welle. Hend ja eusne TZ mal gseit, das mer gern es Rezeptbuech hetted wo sie vorher umeschicked und jede e schöni Siite gstaltet aber das isch ja jetzt offebar nöd zstand cho. Drum müend mier eus ez kümmere. Und so ganz leeri Siite isch denn oft langwilig, will de eint oder ander nöd weiss was schribe :)
Wow de sinder ja voller Tatedrang bi soviel Termine.

Nala
Also 1600 Euro sind ja doch recht viel findi. Das sind ja denn glich knapp 2000 Franke. Möcheds denn Bilder i genau euem Stil oder isches en „Notlösig“. Und ich frag mich grad, wie das denn isch, wenn glich d Schwöschter vo dim GG chan fötele? Oder würdeder definitiv die neh woner bueched?
Ui dini Mum tönt echt kompliziert! S Chleid findi mega herzig… Wieso füehrt sie sich denn so uf? Grrrr
Hehe, was du über din GG seisch, hani ihm doch echt vor es paar Täg genau so gseit. Er hed denn zwei Täg aaaaaaaaaalles geh. Jetzt heder sini guete Vorsätz glaub schowider vergässe. Hoffe bi dim GG hebet das ganz lang a.

Weddingbee
Ich ha gmeint wege de Nähmaschine? :D

Me
TZ
Hüt Morge han ich die 400.- vo ihm uf mim Konto gha. Er heds mer gester no im whatsapp gschribe und ich ha de glich ned uf sini ‚Entschuldigung‘ reagiert und eifach Danke fürs überwiise gseit. Ich glaub er nimmt ez eifach a, das alles wieder guet isch. Han denn no mit mim GG drüber gredet und er möchte ihn wirkli gern als TZ bhalte. Für ihn isches, wie d littlefoot seit, zwei verschiedni paar Schueh. Uf jedefall han ich am GG ez gseit, das er bitte mal das Thema Sucht bi ihm aspricht. Ez luegemer mal.

Auto
Han geschter no eine agfragt wegeme VW Chäfer zum miete und de hed mier gester am Abig am 9i aglüte. Ich ha min GG unbedingt welle überrasche mit dem Auto, dases denn eifach vor d eTüre staht und er sich freut aber neeeeeeeeeei, Madame nimmt s Telefon ab und es isch de Typ wo au no halbe in Hörer schreit. GG hed d Hälfti natürli mitbecho und die ganz Überraschig isch im A*****.
Aso zum Agebot: de Chäfer choschtet 250.- für 24Std. Optional chönnten öpper vo dene bringe und/oder hole. Findi scho mal super. Mier sind ez so verblibe, das mier en am Friitig Abig würded hole und phalte bis am Samschtig Abig und öpper holten denn a de Location ab. Würd denn im total 350.- choschte. Das gaht no oder??

Guetä morgä!

@fara: oh je, i bi ja ou endlos z spät! Aber i wünsche dir glich schöni Flittis! Gniess es z Paris...

@squishy: oh cool, bi öich geit ou grad einiges! Hihi, weni so a öies Datum dänkä hani z Gfüeu dir heit no laaaaaaang zyt...

@Ehegelübde: I ha eismau ou dänkt i chönnt mir fang chli Notize mache oder so. I ha dänkt i dues so i 3 Teile gliedere. 1. ds Verspräche dasi dr Räst vo mim Läbe mit mim GG wot verbringe 2. Begründig für 1. und 3. ds Verspräche dasi alles für ds Glinge vo üserä Beziehig wott gäh. I ha mal irgendwo gläsä dass es Gelübde nid länger als e halbi A4 Site sött si. Me sötts gloub scho eher churz halte...

@pfingsti: Wie isch ds Träffe mit dim Chleid gsi?

@littlefoot: ou da verstahni dass beunruhigt bisch! Wär ig also ou... Finde das geit gar nid so sache. Isch ja nid so schwirig ä Agenda z füehrä.

@nala: viel spass a öiem HZ-Marathon-Tag! Hmm, Fotografe sie halt meistens scho sehr tür... I dänke die Agebot töne eigetlech nid schlächt... Am schluss chani dir nur rate, dass dir am bestä eifach ufe Stil lueget was öich besser gfallt. Und ou so chli ob öich die Pose gfalle wo d Lüt uf de Föteli mache etc.

@me: Maaaaan, bi mir louft gar nix... ha zwar einigi Boustellä aber chume gad nienä würklech witer wöui uf irgend öpis mues warte. Das isch so müehsam...

lil.lian
Nei es isch kein private. Findes es uh cools Agebot :) Aber er hed gseit, seg chli astrengend zum fahre wills scho sones alts Auto seg :D

malinchen
Uf was bisch de alles am warte?

Pfingstrose
Haha, GG hed de au gfunde, ob ich mit mim riese Chleid denn inepasse. Denn hani nur so gseit 'woher willsch echt du wüsse ob ich es riese Chleid alegge. Vielleicht chumi ja im Hoseazug?' Sis Gsicht isch himmlisch gsi :D Hesch es Biiild gmacht? Ohh freu mi au ufs abstecke
Tönt das schön mitem Abstecktermin. Richtigs Traumkleid, Pippafüdli!