När simer diräkt übere zum Schminke (isch zum Glück aus im gliche Salon gsi). Chum hocki ufem Stüehli, isch o scho gli d Andrea da gsi und het afa fötele. Ungloublech, wie schnäu das isch gange! Mini TZ si de o scho am frisiere gsi und sie hei o super usgseh. Ihres Chleid isch e Troum gsi, dunkublau mit Spitze-Ermu und bodeläng, mega elegant. D Andrea het de no Föteli vo aune Accessoires und vom ufghänkte Chleid gmacht u när hani o scho gli mau chönne is Chleid schlüpfe (vorhär bini aber natürlech nomau ufs WC ). Im Verglich zu de vordere Mau wonis ha annegha und ja immer nur es aprobiere isch gsi, hani mi itz mit dr Frisur zäme würklech sofort wiene Brut gfüut . Ha de no ds Strumpfband und d Schueh agleit und mir si super im Timing gsi. Woni usem Salon bi cho, isch d Sunne gad fürecho, herrlech. Mini TZ hei de no e Chleiderroller brucht, wüu ig dr haub Coiffeursalon ar Schleppe ha gha Die ersti Challenge, iz Outo izstiege, heimer ohni Problem bewäutiget, o weni die ganzi Fahrt ha zGfüu gha, mis Chleid verchrügli totau bismer dert sige . I bi mit dr Andrea zum Schlosspark Oberhofe gfahre, wo mir üses First Look Shooting hei gmacht. GG isch mit de TZ scho dert gsi und sie hei ihn zumne Plätzli gfüehrt, wo är uf mi het müesse warte. Bim Parkplatz wo mir si ugstiege hätts no fasch en Unfau gä, wüu dr eint wo isch inegfahre mir dermasse het nachegluegt u sech nid uf die angere Outos het konzentriert När hani mis Strüssli becho, wunderschön und genau so wienis ha wöue u de bini mit dr Andrea düre Park zu ihm gloffe. Dr eint TZ het de mit mir gwartet, bis si beidi si parat gsi u de hani z Zeiche becho, dassi cha losloufe. Läck het mis Härz klopfet... paar Meter hinger em GG hani ihm gseit, er chönn sech umdräihe und är het meeeega Träne ide Ouge gha... mir hei de beidi fasch nümm chönne und i bi churz gad schluchzend um si Haus gfaue Hei dä emotional Momänt mega gnosse und zum Glück het ihm mis Chleid und aues u guet gfaue. Är het natürlech o super usgseh... mir hei de ca. 1 Stund im Park gfötelet, bi schönstem Sunneschiin und diräkt am See. Ha so Fröid dass mir die Location hei usgwäut, obwou mir vorhär no nie si dert gsi Hei de o no paar Föteli mit de TZ gmacht, aber die hei de cho gli witermüesse ga vorbereite. Es isch de gäge Schluss rächt früsch gsi, aber mit mim Bolero isch tiptop gange.
GG und ig si de im Mini zur Chile gfahre und gnue früeh dert acho. Mir hei de imne Rümli näb dr Chile chönne warte und no öpis ässe. I ha sooooo Hunger gha Cha auso nid säge, dassi a mim Hochzit ke Apettit hät gha Vorem Warte dert het mir vorhär chli grauet gha, aber d Zit isch de so schnäu ume. Dr Pfarrer u d Sigristin si no cho verbiluege u d TZ si ou no öpis cho ässe u de isch de gli o scho mi Papi cho. Vom Fänster us (natürlech hinger ere Store) hani chönne beobachte, wie d Lüt chöme, das isch mega spezieu gsi. Churz vor de 2 hei de d TZ d Lüt inegschücht und mir si aui los. D TZ si mit GG bim Siteigang ine und mi Papi und ig vo hinge. Vor üs si d TZ-Froue inegloffe und gad vor üs mini Nichte und Neffe mitme Schiud "Patric, here comes your girl". Ds Klavier het de afa spiele und scho isch dä Momänt da gsi. Sooo schön gsi inezloufe, o wenns so schnäu geit. Mini Schwägerin isch i Träne ufglöst gsi, so härzig. Und o GG isch vore gstange mit ganz füechte Öigli. I ha o chli müesse d Lippe zämepresse aber hami chönne zämenäh, damit ds Makeup nid no meh verschmiert (es het bim Shooting minim glitte ). Mir si de rächts vom Altar und sitlech zu de Lüt abghocket. Ha das super gfunge, me het d Lüt nie diräkt agluegt, aber zwüschine chönne e Blick zu de Gescht wärfe. Ha das de bewusst es paar Mau gmacht, schliesslech het me dä Momänt nie meh. Es hei aui so gstrahlet, isch eifach schön gsi. D Predigt vom Pfarrer isch schicht dr Hammer gsi. Är isch sooooo uf üs und üsi Iladig und üse Spruch igange, eifach schön. Es hei üs u viu gseit, dass sie d Trouig dr Hammer hei gfunge. Für e eigentlech Trouigsakt het dr Pfarrer de aui bittet, chli necher zcho, damit sie öpis gseh, das heimer o super gfunge. Hei üs de nomau üsi Liebeserklärige vortreit, womer o scho am zivile hei gmacht. GG het dert wieder mega füechti Öigli becho, so härzig. Denn heimer beidi lut und dütlech Ja gseit und d Ringe dörfe tusche. Mi Göttibueb het ds Ringböxli zäme mit mire TZ bracht. Nachem Ringtusch isch ds Lied "Hallelujah" cho und es isch eifach sooooo wunderschön gsi!! Hei aui när gseit, dasses ihne würklech Hüehnerhut het gmacht. Es het eifach aues so guet zämepasst und isch wunderschön gsi. När simer usegloffe und diräkt ga d Torte aschniede vorem Apéro. Mir hei ja dä Cupcakes-Turm gha mitere Torte zoberst. Het wunderschön usgseh und isch ou guet acho, obwous ja chli ungwöhnlech isch bim Apéro. GG und ig hei üs de chli öpis vom Buffet gno und si när ga Gratulatione entgägenäh. I ha mega viu Komplimänt becho (guet das isch ja fasch Pflicht weme Brut isch )

Für d Prämierig vo de Wyfläsche hei sech d TZ u luschtigi Priisli usdänkt gha: 1. Platz: e BMW (Brot Mit Wurscht) , 2. Platz: weissi leider gad spontan nümm 3. Platz: ein Wein-Abend zu zweit (e Zibele und es Pack Papiernastüechli )
De isch scho gli ds Dessertbuffet eröffnet worde und es isch dr Wahnsinn gsi... meeega schön agrichtet, aus i so chline Glesli und natürlech uuu fein. Chli speter hei mir de üse Eröffnigstanz gmacht. GG isch zviu gsi, mir hei ja vorem HZ sicher Mi, Do und Fr no ziemli güebt dähei und när gfunge mou, das klappt rächt guet. Bim Dessert ässe isch de GG plötzlech närvös worde und het gfunge "chum, mir gö duss no schnäu dr Grundschritt ga üebe" , i ha nume glachet u gfunge, das bring itz o nüt meh... Mir hei de dä Tanz gschwunge ohni Problem und üs gloub nid es einzigs Mau vertanzet Ds Üebe het sech aso würklech glohnt und es het grosse Applous gä. De heimer de d Gescht uf d Tanzflächi ghout und es isch würklech e super Stimmig gsi. O vo de eutere Semester heis es paar mega gnosse. Dr DJ het sech mega a mini Playlist ghaute und die het sech as gar nid so schlächt erwiese . Wäge dr Lutsterki woni ja no fasch schlaflosi Nächt ha gha vor es paar Monet, isch schlussändlech überhoupt kes Problem gsi und me het o nid zGfüu gha, es sigi zlisig. Gäge Schluss, wos eh nümm lang isch gange, het nur d Hotelchefin churz gseit, er söu chli abe, aber usser ihre het gloub niemer öpis gseit gha. Die Sorge si auso o völlig für nüt gsi... Die Gescht wo no si heigfahre, hei sech de langsam verabschiedet. Vom Timing heimers perfekt planet gha, dr DJ het bis am 2 ufgleit und de isch dr hert Chärn no bliebe bis am Schluss u het zu "scharlachrot" no "usplampet" . Mir si de no es chlises Grüppeli gsi vo de einte TZ, GGs Schwoscht und dr Fründ vo sire Haubschwoscht u mir 2, wo de no ir Hotelhaue e letschti Fläsche Wy si ga kille . Das isch mega gmüetlech u schön gsi u so isches de glich fasch 4i worde, bis mir totkaputt i üses Hotelbett si gheit. I ha de aber doch no mini schöne Dessous füregnoh und das het GG mega gfaue . När simer ine komatöse Schlaf gsunke (i ma mi nümm erinnere, wie dr Chopf ufem Chüssi ufgschlage het ) und am 9i simer scho wieder uf für az Zmorgebuffet. D Sunne, wo am Vortag zum Teil no chli zögeret het, het itz strahlend vom Himu gschune und i ha mis rote Summerchleidli vom NAF NAF chönne alege und uf dr Hotelterrasse mit Sicht ufe Thunersee zmörgele. Das isch wunderschön gsi.
Nachdäm mir aues Materiau hei i 3 Outos verpackt gha, simer heigfahre und hei dert es wunderschön härzig dekorierts Hüsli vorgfunde. Soooo schön!!
Es isch würklech schnäu verbi, und glich hani zGfüu, mir hei jede einzeln Momänt chönne i voue Züg gniesse und ufsuge. Au mini Ängscht und Sorge si würklech für nüt gsi und üsi Trouzüge hei das soooooo guet gmacht. Es hätt nid schöner chönne si und i wüsst nüt, womer würde angers mache. Es isch würklech ÜSE Troumtag gsi. Und itz weni aube mi Ehering aluege, kribbelets immer no. Ha soooo Fröid dranne und dassi mi Troumma ha dörfe hürate!!

Zuletzt bearbeitet am 24.08.14 13:56

hallo miner liebe 2014er brütlis! üses hochzit isch itz genau 1 wuche här, und i chume ändlech drzue, dr bricht für öich z schribe. wird chli ä lengere, wöu ig vom zivile ou no gad chli öppis verzeue :-) und i entschuudige mi scho itz, we i jedem 2te satz "mi maa" vorchunt, aber i finges so kuul das z säge ;-) u irgendwie het mini tastatur gspunne u het immer 2 läärschleg gmacht...ke ahnig wieso:-)

agfange het mini hochzitswuche am zischtig, woni vom 9 bis am 2 ha beautyprogramm gha :-) leider het a däm tag o mini vercheutig agfange, woni uf däm bequeme und gheizte bett bi gläge hani gmerkt, wini plötzlech mega hausweh ha becho. nachem beaut bini när uf thun u ha dert di letschti aprob vo mim chleid gha. da dr abstecktermin nume 4 wuche vorhär isch gsi und i eigentlech nid gross abgno ha, isches nahezu perfekt gsi, nume no paar chlini sache hei müesse apasst wärde. am mittwuch isch när am mim maa sini familie vo italie acho, u mi maa u si brüetsch si zäme uf züri a flughafe aui ga abhole. i ha derwile chli zit für mi gha, ha eifach no hurti d gäschtezimmer müesse parat mache, da 3 bi üs gschlafe hei. mi maa het mir denn vo züri aglüte und gseit, dasses no chli lenger geit bis si chöme, leider isch aues gepäck vode italiäner z rom blibe. so hei mir auso 15 italiäner i churze hose u tshirt bi üs gha, aui hei gfrore und kener chleider gha zum wächsle...mir si de am nami zur mueter vo mim maa, di hei meh platz aus mir bi üs und de heimer dert ä gmüetleche nami gha vorem cheminée :-) am abe hani de no äs mail as lost&found uf züri gschribe und chli uf d tränedrüede drückt (so à la "kleiderlose hochzeitsgesellschaft") und ghoffet äs häufi de öppis... hets ou, denn am donnschtig morge (dr tag vo üsem zivile) hei die vor alitalia aglüte u gseit, si schicki iz z gepäck nid mitem DHL sondern miteme äxtrataxi, ases schneuer bi üs isch :-) am 11 ha ig ä termin bir coiffeuse gha, si het mir ä schöne wasserfau zopf gmacht u mi u schön gschminkt. mi maa isch i dere zit mit sine cousins (die 3 wo ou bi üs gschlafe hei) chli ga thun aluege und mi woni fertig bi gsi wider cho hole. mir si när hei, wosech aui manne hei parat gmacht und am 2 si mir när richtig schloss bümpliz abgfahre. ufem wäg bini de no scnäu ga mis strüssli hole und ha de no gad glichzitig sone chline ahänger mit biuderrahme und ä goudring abgä. das isch beides füre brutstruss vom samschtig gsi. im biuderrahme isch äs mini-foto vo mir aus ching mit mim grosi, und dr goudring hetsi mir vererbt wosi (ufe tag genau vormene jahr) isch gstorbe. när het sogar d sunne afa schiine u mir si so nervös gsi, asmernis z bärn no fasch verfahre häte... :-) im schloss acho hei mir üsi familiene troffe u si nör ine warteruum gfüert worde. nach paar minute isch d tür ufgange und d zivilstandesbeamti isch üs cho hole. dr ruum wo d trouig het stattgfunge isch mega schön gsi, mit blick i schlossgarte. si het de när äs schöns gedicht abegläse und när hei mir beidi müesse ufsta und üs vis-à-vis vonenang ufsteue und änang aluege. dert hani scho fasch müesse hüle :-) si het när irgendöppis gseit woni nüm weiss - ha nid so zueglost ehrlechgseit, nume ouge für mi maa gha - und när hei mir scho z JA wort gä. ringe heimer keni tuscht, natürlech heimer när no müesse ungerschribe, u dr eint cousin het vo hinger füregrüeft, i söu de miter nöiie ungerschrift ungerschribe :-) nachder trouuig heimer im schlossgarte no agstosse, mi papi het ä riise fläsche champagner mitgno. när hets no paar fotos gä und de si mi langsam richtig heizue. gfiiret hei mir im huus vo mire schwigermueter, si hei ä riise garte. dert isch de scho aus parat gsi zum grilliere. dr metzger het diversi salät, apero, brot usw mitbracht und de när äbe grilliert. isch aus mega fein gsi! dr ganz abe isch d guggemusig am üebe gsi, si si immer am huus verbligloffe. mi papi isch ihne de einisch nachegsecklet und het gfragt obsi bi üs chli chöme ga spile. typisch mi vater :-) aber si hei mega fröid gha und hei när sogar 3 stück für üs gspiut. und obwou ig schüsch nid so gärn guggemusig ha, hanis mega kuul gfunge :-) schlussändlech hei d italiäner afe singe und mir hei no bis am morge am 2 gfiiret. si när mitem taxi hei und hei super gschlafe.
am friti hani no aus parat gmacht woni ha müesse mitnä (photobooth schild, seifebläterli, nastüechli, chleider für am sunnti ect) u nachem zmittag ässe hei mir ufe wäg is hotel gmacht, wo mir am hochzitstag gfiiret hei. ufem wäg bini no mis chleid ga abhole, wosi äxträ nomau dämpft u glettet hei. ig bi när mit mine eutere und mire schwoscht (mini TZ) im hotel acho und hei dert fein znacht gässe. mini ercheutig hetsech bis dert häre zersch chli verbesseret, ha ömu ke hausweh meh gha. leider hani dfür wäretem znacht gmerkt, dass mi gschmacksinn wäg isch :-( dr chef vom restaurant het mir denn ä chrüter schnaps bracht, är het gmeint das häufi :-) nachem znacht bini denn is zimmer, ha duschet und mini mam isch mir när cho d haar föhne, si het gseit das düeg si beruhige, si isch gloub zu däm

nach öppe angerhaubstung heimer agfange mite gruppeföteli. d lüt si immer grüppliwiis igsammlet worde wesi si dranne gsi u hei nume churz z apero müesse ungerbräche. s isch zimlech chaut gsi u mini ercheutig isch immer wi schlimmer worde, aber i ha natürlech trotzdäm ohni stola gfötelet :-) d fotgrafin het wider aues gä und sich kuuli posene la ifaue. i ha ja d foto no nid gseh, aber i gloube di wärde dr hammer :-) öppe am haubi 4 simer när abe gloffe wo üs ä grosse bus isch cho abhole. mir si när uf thun gfahre und im schloss schadau usgstige. dert simer när aaui düre schlosspark zum see gloffe. hei ungerwägs no äs chlises fotoshooting igleit und si när ufs schiff. dert bini när ou z erschte mau uf z wc :-) ha isch guet gange, ha sogar no äs beieli usem tüll chönne befreie :-) ufem schiff ischs gmüetlech gsi, hei chli mit aune chöne rede, hei no äs "titanic" shooting gha vore am bug :-) und ha sogar no chönne ga z schiff stüre, ou weni viu kurve gmacht ha, ischs u spannend gsi :-) insgsamt si mir 1,5 stung ufem schiff gsi. womer hei agleit, simer aaui z fuess ufe zum restaurant spaziert. u genau wo mir si acho het afa rägne. äs mega timing, mir si ja när dr ganz abe dinne gsi. im garte hets zersch ä feine welcome drink becho. mi maa u ig si de churz i üses zimmer ga früsch mache. dunge acho si scho fasch aui im saal gsi. d deko isch meeega schön gsi, genau so u no viu schöner as ig mir das ha vorgsteut. ig ha ja aus zäme mit mim mami baschtlet. di grosse lollies si dr renner gsi :-) ou d fotobooth box isch scho rege gnutzt worde. aui heisech verchleidet und luschtegi föteli gmacht. när heimer agfange mitem ässe. aui hei gseit äs sig mega fein, ig ha ja leider nüt gschmöckt...nachder vorpies het mi papi ä churzi red ghaute, mega schön! äs het isngsamt 6 gäng gä (ohni amouse bouche) entsprächend lang heimer gässe. zwüsche de gäng simer immer zude lüt ga rede, üs isch wichtig si, dassmer ä däm abe ouno mau mit aune chöi rede. u zwüschine simer ganes foto iidr fotobox ga mache. u während ig dä bricht schrbe, bini scho di ganzi zit am überlege, ob ig u mi brütigam eigentlech ou äs gmeinsams foto ir box hei gmacht... i weisses nämlech nüm hahahah :-) i hoffes itz mau, wir wärdes de gseh wemer d foto bechöme ;-) när isch hochzitsturte agschnitte worde, u trotz em viele ässe si di meischte no 1-2 mau ga hole, jenachdäm obsi vo aune gschmacksrichtige hei wöue probiere (champagner, waldbeere, mocca) nachem desser het mi maa mis strumpfband ungerem chleid ghout, drzue isch das strip-lied cho vom joe cocker. är hets när id manne mängi gworfe,dr brüetsch vo mim maa hets miteme hechtsprung gfange :-) när ha ig dr brutstruss gworfe und mini chlini cousine hetne gfange u meeega fröid gha :-) när hei mi maa u ig zu "diamond" vor rihanna üse hochzitstanz tanzet. isch eher sone 9. klass schueldisco tanz gewippe gsi, aber mir chöi beidi nid tanze u hei ou ke ungerricht gno :-) di erschte lüt si denn gange, isch öppe haubi 1 gsi. d fotografin het sich verabschiedet u mir hei no chli z tanzbei gschwunge.d gescht si nadisna ga schlafe oder heigange. dr harte kern (mir si öppe no 6 gsi) isch no bis öppe am haubi 4 blibe, si hei sogar no äs nöis bierfass mmüesse zapfe :-) mi maa u ig si när ou gange und öppe am 4 heimer de ou gschlafe :-) är isch eifach nur dr hammer u meeega gsi, u viu z schnäu düre.... u itz binimi a mi a mi nöi name am gwöhne und i eire wuche geiz ab id flittis uf d seychelle!!!