So ich chume jeze au no zu mim Hochziitsbricht. Zersch chunt mal de Bricht vom zivile..


Mier händ eus am 21. August 2014 s'Ja-Wort geh im Zivilstandesamt Züri. Für mich isch ganz klar nur das Datum in Frag cho, will mier dänn euses 10-Jährige gha händ.

Ide Wuche vom 21. August 2014 hani no Termin für Manicure und Pedicure gha und am Tag vor em Hochziit no bi de Coiffeuse. Sie hät alles nomol alles schön blondiert, dass dänn au hine für d'Frisur au alles schön blond gsi isch :). Sie hät mier au no d'Haar glöcklet und den idreht und mit Spängeli befestigt, dass ich dänn am nächste Tag chli Volume ide Haar han.. (bin dänn so mit dene Spängeli go schlafe) Nach de Coiffeuse bini no zu de Schwöster vom GG hei und han no chli ghulfe bache. Sie hät ebe bi eusem selber organisierte Apéro s'Esse gmacht. De GG isch au no am helfe gsi. Han dänn au no schnell in Coop müese, will mer was vergesse händ und dete hani no de Trauzüge vom GG mit sinere Fründin atroffe :).

Am Dunnstig, 21. August 2014 simer beid gmüetlich ufgstande und händ zämä z'mörgelet. Am 11i hani mini Haar mal uftah und han die chli aständig wölle frisiere. Leider händ mini Versüech gar nüt bracht und ich han alles no abegwäsche. Hans dänn nomol versuecht und bin dänn eigendli sowiit zfriede gsi. De GG hät mi dänn id Stadt gfahre, will ich zersch no zu de Kosmetikerin / Visagistin gange bin.
Unterwegs simer bim Bluemelade verbi und händ wölle de Struss abhole. Sie händ dänn leider ihri eigeni Offerte nöd so verstande und händ zwei Strüss gmacht gha. Bin au chli schokiert gsi vom Struss sälber. Mier händ veribart rosa, apricot, wiiss und wenig grüen. Er isch dänn au extrem eng bunde gsi und extrem grüen. Han den de schöner vo beidne usgsuecht (de türer) und sie händ en dänn nomol bunde. Mier sind aber inzwüsche wiiter, bzw. de GG hät mi i de Stadt abgliefered.
Ich han dänn bi de Kosmetikerin no e Gsichtsbehandlig gha und sie hät mich gschminkt. Da mini Haar dänn aber recht verdruckt gsi sind, hät mier dänn no eine mit em Glättiise no chli Löckli gmacht gha. Sie isch ebe ime Coiffeurgschäft igmietet und en Coiffeur hät sich ebe no um mich kümmeret. Ich han dänn mich dete au no umzoge und han so chöne gah.
Da ich mini Täsche no näbet de Spiegel gstellt han, sind dänn au überall a mier dunkli chlini Haar kläbt :-/. Han abr zum Glück en Chleiderroller debi gha und so isch dänn doch alles bestens gsi.
Ich bin dänn bim Escher Wys Platz ufs Tram Richtig HB. Dete bini usgstigge und will lang keis Tram gfahre isch, bin den is Central gloffe und han dänn gseh, dass dete gar kei Trams meh fahred, wills irgendwo en Crash geh hät. Bin dänn de Limmat entlang zum Stadthuus gloffe. Aso ziitlich gseh, isch es keis Problem gsi.

Min GG hät, nach dem er mich abgliefert hät, de Struss bim Bluemegschäft abgholt und hät sich sälber au parat gmacht. Er hät den de Trauzüge abgholt und sie sind zämä id Stadt gfahre. Er hät den sis Auto uf min Parkplatz bim Gschäft gstellt. Sie sind dänn zämä ufs Tram. Sie sind dänn vo de Lüt im Tram chli lustig agluegt worde. Zwei schön agleiti Manne miteme schöne Bluemestruus, hihi. Abr de GG hät ja zum Glück mich dänn ghürate .
Mit em Bluemestruss bini am Schluss nöd ganz z'friede gsi, wobi uf de Fotene find en no recht schön..

Wo ich dänn itroffe bin, sind eigendli alli scho dete gsi. (Mier händs im engere Chreis gmacht, sind abr schlussendli glich no relativ viel Persone gsi.) Mier händ bim Fraumünster-Chrüzgang no en Apéro organisiert. Am GG sini Schwöster hät fliessig bached und Brötli gmacht, mini Eltere händ s'Getränkt mithnoh und de Trauzügin ihre Maa hät en Tisch mitgnoh. Es isch scho fascht alles ufgstellt gsi. E Kollegin vo mim Mami hät dänn während mier im Stadthuus gsi sind, de Apéro bewacht.

Mier sind dänn au scho gli alli is Stadthuus gange. Zersch hämer eus bim Empfang müese melde und mier händ gli druf abe chöne is Vorzimmer gah. Vom Vorzimmer simer dänn am 4i is Trauzimmer. Trauig isch schön gsi, aber extrem churz. Mier händ ja alli gseit es isch churz in Züri (Masseabfertigung halt), abr sisch würkli extrem churz gsi. Sie hät au leider fascht nix persönlichs gseit, es Gedicht abeglese und dänn isch dänn scho gli de offizielli Akt cho. Was sie no gseit hät, dass mier scho 10 Jahr zämä sind. Han ihre nämli das no gschriebe, öb sie echt das no chöngi erwähne.. Abr ich find sie isch nöd so guet überecho und sie hät au nöd so guet chöne frei verzelle..
Nach em Unterschriebe (was wunderbar klappet hät) hät sie mier dänn mit em neue Name gratulieret. Han das rächt schräg gfunde. Aschlüssend simer den alli usegloffe und zum Chrüzgang und händ dänn dete d'Gratulatione entgege gnoh und händ agstosse und gesse. Mier händ dänn au no e riese Champagner-Fläsche becho zum ufmache. :)
Mier sind dänn no mit de Fotografin es paar Föteli go mache, was sich extrem glohnt hät. Die hämer im übrige au scho becho. Insgesamt simer öbe zwei Stund (mit fötele) bim Chrüzgang gsi und händ dänn alles ufgruumt und zämä packt.

Mier sind dänn mit eusne Trauzüge und Partner id Waid go z'Nacht esse. S'Esse isch super gsi und d'Ussicht natürli phänomenal. Eifach mega schön.. :)

S'grosse Fäscht hämer dänn e Wuche später gha (am 30. August). Dä Bricht chunt dänn au no.. Dä isch scho gnueg lang worde :)

Zuletzt bearbeitet am 03.09.14 11:06

Datei-Anhänge

	apéro.jpg (51x) Mime-Type: image/jpeg, 272 kB
	blueme.jpg (43x) Mime-Type: image/jpeg, 262 kB

Jöö danke Nala :)

So jez folgt mit Monster-Bricht Han zersch no chli gschriebe, was mer zwüsched em zivile und em Fäscht gmacht händ, falls öber nur de Hochziitsbricht wet lese, muemer halt chli wiiter une afange lese..




Am Friitig bini so richtig platt gsi. Bin uu froh gsi, hämer nöd grad am Samstig druf s'grosse Fäscht gha. Aso mier beid händ am Friitig no frei gha, vo däm här hämers no chli chöne gnüsse. Wobi mier sind beid recht am umehänge gsi. Au am Samstig und am Sunntig bini voll k.o. gsi. Hürate isch halt glich astregend .
Ich han dänn die ganzi Wuche däzwüsche frei gha und de GG eifach am Friitig no.

Am Mäntig bin ich mit eusne beide Trauzüge uf Vitznau, zu de Location hindere gfahre. Ich han no d'Serviette chöne abhole, will mer die ebe andersch händ wölle gfallte ha plus Schnuer und Namestäfeli wo mer dänn no rundume gwicklet händ. Trauzüge händ die ganzi Location zum erste Mal gseh. Sie händ au no nacheme geignete Plätzli gsuecht, will sie no am Hochziit sälber ei Stund lang öbis mit de Gäscht planet händ. Mier händ alles zämä aglueged und sind sind dänn wieder hei gfahre. Ich bin dänn am Namitag mit em GG no id Stadt für sini Azugsaprob. Hät also bestens passt. Am Namitag hani dänn no es bitz bastlet.

Am Zisitg han ich dänn no Termin gha für mis Chleid, bin also wieder id Stadt gfahre. Mis Chleid isch au bestens gsi, bis uf e chlini Änderig no bim Gürtel (de händs ebe fest agmacht gha). Han dänn no wegeme Tuech für über d'Schultere g'luegt, aber de Priis hät mi dänn schier hine use ghaue, dass ichs dänn sii lah han. Go z'Mittagesse bini dänn no mitere Arbetskollegin und han natürli alles vom zivile müese verzelle :). An Namitag bini no ines Ichaufscenter go luege wegeme Tuech und eme Chalkboardstift (isch natürli promt im Depot nüme z'chaufe gsi), abr irgendwie hani nüm so möge und han au nöd gross Lust gha zum gross go umeluege. Bin dänn hei go Serviette falte. Hät scho no Ziit in Aspruch gnoh, vorallem ischs no müesam gsi, will die Dinger ali chli verzoge gsi sind. Abr ich glaub eusi Gäscht händ die nöd so gnau aglueget, wie ich die aglueget han. Aso am Schluss händs super usgseh..

Am nächste Tag bini no schnell hei gange und han mit mim Mami die Serviette no glettet, dass alli schön flach sind. Bin dänn nomol is Ichaufscenter und han nomol wegem Schal glueget. Han dänn öbis wiises gfunde und öbis i de gliche Farb wie min Gürtel. De isch so hellbründlich, cappuccino-mässig. Aso de hät dänn wunderbar däzuepasst. De wiisi hani inzwüsche Ziit wieder retour geh. Au de Chalkboardstift hani no gfunde. Am Namitag simer dänn no bim Bluemelade verbi. Mier händ einersiits d'Vasene müese verbi bringe und händ nomol alles besproche. Ich bin ja mit em Struss vom zivile nöd würkli glücklich gsi und mier händ alles nomol erchlärt. Han au no farbigi Bilder mitgnoh und au gseit, was mer am Struss gfalle hät (z.B: s'Schleierchrut) und was gar nöd (z'viel grüen und statt apricot isch d'Farb eher lachs gsi). Sie hät dänn gfunde, dänn möcheds doch Blueme lieber meh rosa (euses Farbkonzept isch rosa und apricot gsi). Am Abig hämer den no de Geburi vom GG gfiiret. :)

Am Dunnstig hani zersch mal no chli putzt und dänn isch mini Trauzügin mit em Göttibueb verbi cho. Ich han dänn die Tags agschriebe für Tischornig und dänn hämer d'Serviette fertig bastlet. Hets wahrschindli au sälber chöne bastle, aber es isch glich lässig gsi mit ihre. Mier händ dänn au no mit em chline gspielt und ihn chli unterhalte (oder er eus). Am Abig händ de GG und ich die ganzi Deko parat gmacht, will mer am nächste Tag go ufstelle sind.

Am Friitig hämer als erst eusi Turte vom Miyuko gholt. Die isch super usecho :). Mier händ zwei vegani Stöck gha und eini ohni Ei i de Creme. Sie isch zwar am 9ni nonig ganz parat gsi, zersch hämmer no chli müese warte, abr gli druf abe hämer sie dänn chöne mitneh. Es hät ebe am Samstig niemert eusi Turte wölle transportiere, drum hämer das sälber id Hand müese neh. Aschlüssend simer bim Bluemelade verbi und händ en Teil vo de Blueme abholt. Wunderschön sinds gsi. Eini vom Lade hät no gfunde, nur für d'Blueme ällei lohnts sich zum hürate . Sie sind also würkli de hammer gsi. Dänn simer hei alles go umbiige. Leider hät dänn doch nöd alles i eim Auto Platz gha und mier händ no Sache i mis Auto inebigge. Ich han eigendli nüm vill debi gha, abr shät bi ihm null Platz meh gha. Mis Mami isch au no mitcho und dänn simer hindere gfahre. Mier händ dänn au gad is Zelt inechöne und händ agfange dekoriere. Mit em Ergebnis bini echt z'friede gsi, bzw. alli sind schlussendli z'friede gsi :) Mier händ au nöd ewigs gha und sind dänn wieder hei zue.
...

Datei-Anhänge

turte.JPG (37x) Mime-Type: image/jpeg, 100 kB

Churz vor em 11i simer dänn zu de Chile abegfahre. Mier händ grad no die letzte Lüt inelaufe gseh und de Pfarrer isch uf eus zuecho. Mier sind zum Igang und dete händ eusi Bluemechind (drü Cousine und ein Cousä, im Alter vo 2 und 4i) mit irne Mamis uf eus gwarte.
Zersch isch dänn de Pfarrer ie, dänn d'Bluemechind (was würkli au klappet hät) und dänn de Papi und ich. Weiss ehrli gar nüm wie schnell mier inegloffe sind, es isch würkli sehr berüehrend gsi. Vorne hät de GG uf mich gwarte :) Mier händ eus dänn küsst (mier händ eus scho vorher mega lang überleit öb mer das überhaupt dörfed, abr mier händs dänn glich gmacht ). Trauig isch u schön gsi und au d'Musigbegleitig vo de Organistin hät eus guet gfalle. Susch hämer kei Sänger und Musiker gha i de Chile. Bim Ringwechsel hät dänn de Cousä s'Ringschachteli bracht. De isch so goldig gsi. Er isch dänn füre cho, hät d'Ring am Pfarrer geh und isch stah blibe, d'Ärm hinterem Rugge und hät eus so erwartigsvoll agluegt. Mier händ dänn au agfange mit em Ringtuusch. Han no dänkt, öb ich ihm söll säge, er müesi jeze zrug zum Mami, han abr gfunde er luegt eus so härzig a, mier lönd en no chli dete stah. Abr d'Muetter hät dänn afange rüefe und er isch dänn wieder zrug :). Mini Schwöster hät den no Fürbitte gschriebe und glese, was au mega schön gsi isch.

Nach de Trauig simer usegloffe und zu de grosse Stägge vor de Chile, es hät dänn es Gruppeföteli geh mit allne. Für zum Apéro sind de GG und ich vorus gloffe und hinedrah händ dänn d'Bluemechind no chli Roseblätter chöne streue. Voll härzig, sie händ uu froid gha. Isch no speziell durs Dorf zlaufe mit em Bruutchleid :). Aso dä Weg isch nöd lang gsi. Sisch no recht müesam gsi zum laufe, will ich uu en chline Reifrock gha han, dur das händ natürli au mini Schritt nöd chöne zlang si (han alles Mini-Schritt müese mache). De Apéro hämer bi eusne Nachbere gmacht. Sie sind Wiibure und s'Esse hät de Cousä vo de Trauzügin organisiert. Es isch uu schön gsi und gmüetlich. Sisch ufere Wiise gsi und s'Wetter hät voll mitgspillt. Es isch ja en wunderschöne Samstig gsi. Es händ sisch au schlussendli alli Fraue en Sunnebrand gholt. Mier sind dänn chli meh wie zwei Stunde dete gsi und dänn simer wiiter.

Mier sind dänn mit de Fotografin mitgfahre zu de Location am Abig und händ unterwegs a drü Ort Föteli gmacht. Wo mer bi de Location acho sind, hämer no knapp e halb Stund Ziit gha i eusem Hotelzimmer. De GG hät sich dänn agfange sind Azug uszieh und ich han dänn gfunde, ich müssi dämfall au mis Chleid abzieh, haha. Han dänn chöne ohni Balast ufs WC und mier sind chli is Bett glägge. Aso mier hetet eigendli gad chöne ischlafe, so müed simer dänn gsi.
I dere Ziit händ eusi Trauzüge no ihres Programm gha mit de Gäscht. Bevors für alli wieder wiitergange isch, isch mis Mami no go hälfe s'Chleid alege :). Sie isch dänn gange und es bitz später isch eus de Trauzüge im Hotelzimmer go abhole cho. Mier händ nomol en chline Apéro gha, uf de Loungeterasse. Isch uu en schöne Ort dete und vo dete gseht mer direkt uf de Vierwaltstättersee. D'Gäscht sind dänn für eus Spallier gstande (sisch no e Stägge abegange) und händ eus mit Seifeblätterli begrüesst, mega härzig. D'Gäscht händ während em Apéro wie wild Hugo trunke. (Bin jeze scho gspanne uf d'Abrechnig . D'Arbetskollegin hät mier im nachhinein verzellt, wieso dass so vill Hugo's trunke worde sind, sie sind ebe mega süess gsi..) Gege de Schluss hämer no es paar Gruppeföteli i verschiedene Kombinatione gmacht und sind dänn zum Zält übere gloffe.
Dete isch dänn au d'Bänd igrichtet gsi und händ gmüetlich Jazz gspillt. Es händ alli ihri Plätz gsuecht und gli druf abe isch au s'Esse parat gsi. De GG und ich händ no e chlini Asprach ghalte, händ alli vo eusere Siite no begrüesst, de GG hät sich no bi mier bedankt für mini Arbet und mier händ eus no bi de Trauzüge und allne andere wo ghulfe händ bedankt. Und mier händ dänn s'Buffet eröffnet. Mier händ es BBQ-Buffet gha. Ich sälber han abr fascht nüm möge esse und de gross Teil vo eusne Gäscht händ au nüm gross zuegschlage.
Nach em Esse hämer dänn ghört, was d'Gäscht während dere Stund gmacht händ. Es hät zersch es Quiz über eus zwei geh und dänn händ die beste 10 en Priis becho. Sind dänn alles Sache gsi, wos sie eus mal müend mache, wie en Sunntigszopf verbibringe, Zügle hälfe, Gmüeschorb mache für eus, etc.. Unter dänä beste 10 häts dänn genau au no ein Maa gschafft (min Papi) susch sind alles Fraue gsi. Bis uf sin Papi, sind all vo de Family (Eltere und Schwöstere) i de Top 10 gsi.
Aschlüssend häts den Biitrag geh vo mine Verwandte. Es isch e verpackti Babybadwanne gsi und dänn hämer müese en Schlitz drihschniide und ade Schnuer zieh. Es isch dänn immer wieder öbis usecho. Es sind ganz en huuuufe Babysache drah ghanget. Alles was mer halt so chan bruche, wie Windle, Schoppe, Nuggi, Bodys, Söckli, etc..

Woooooow
Ha simultan mitgläse :) bi grad ufem mail gsi. So schön tönts, mit so villne überraschige!
Tisch händ aso au u schön usgseh. Aber wo isch candybar? .) ha gar nüt gläse drüber.
Ich finds toll dass ihr au so schöns wätter gha händ. Mir händ all so glück gha! I dem jahr ja würkli nid sicher dass d sunne schiint .)
Danke liebi patricia für de bricht!

Gseht super us! Ach mi GG hät zerst au denkt ich sig ballaballa :) de hanem aber d stumpebar nöcher bracht und ab denn isch er sälber begeisteret gsi haha :)