Wow! danke viilmol fürs teile! So e schöne bricht und es tönt au nachem perfekte dag, nid nur wättrmässig! Find euri gäst hän sich jo au mega mieh gäh, ob wohl mi die truhe vrruckt mache würd ischs jo en meeeega schöni und cooli geste! D love-buechstabe findi de hammer- inkl. De rosarote mandle, hihi!
I wär natürli gspannt uf e foti vo dr sirupbar
Aso nomol alles gueti euch zwei!

Nala
Danke villmal!! Ja d'LOVE-Buechstabe hämer au super gfalle, sind eifach extrem tür die Dinger.. Ja das mit de Truhe isch würkli fies
Han no kes Föteli vo de Sirupbar, duens dänn no nahliefere

Hey liebi Brütlis

D Taeboyana hät mir grad gseit, es segi nach mir gfrögt worde.

Also, ich bin no da. Ha letschti wieder mal notfallmässig in Spital dörfe, wil min Darm wieder mal nöd tue hät. Das isch en zimliche Scheiss gsi, isch mer gar nöd guet gange. Aber vorher isch es mir eigetli verhältnismässig guet gange, halt immer no regelmässig Chemo, ha aber rächt en ermuetigendi Ziit gha. Im Momänt bini rächt schlapp. Ha hüt Ewigkeite brucht, bisi einigermasse i d Gäng cho bin. Aber sust gahts wieder dütlich besser als vor zwei Wuche, wo ebe de Zwüschefall gsi isch.

Wie gahts eu? Immer no glücklich mit eune Ehemänner? :D Schwelgeder no chli im Hochsigszauber oder hät sich de Alltag definitiv wieder igschliche?

Ich hoff, ihr händ en wunderschöne Advänt! Wür mi freue vo de einte oder andere z läse.

Liebs Grüessli
Fara

Liebi Broncos

Schön, vo dir z läse!

Wow, Flittis! Wo gahts bi eu ane? Wie lang gönder?

Ja, gäll... De Alltag hät eim rächt schnäll wieder. Ich bin immer no sehr glücklich mit mim Maa (wär ja au zimli schlimm, wänns jetzt scho krisele würd - ich han mal e Lehrerin gha i de Primar, die hät ihren laaaangjährige Fründ ghürate - nach es paar Mönet hät sie dänn wieder de alt Name gha ).

Öbi mi dra gwöhnt han? Einersiits ja, voll. Anderersiits isch das mit em neue Name und Adrässe mängisch no sone Sach. Ich tipp bi Bstellige regelmässig us Versehe die erste zwei Buechstabe vo de alte Adrässe i. Hät vilich au demit z tue, dass ich weiss, dass es det au immer no würd über en chline Zwüschehalt zu mir cho. Drum hani mir das weniger igschärft vilicht.
Und letschti (1-2 Mönet her) hani e Chundecharte bim Marionnaud gmacht. Wo sie dänn dihei acho isch, gsehni, dass min alte Name det druf staht. Ich so: Hääää? Aber ich muess das sälber falsch usgfüllt ha.

Und ich han doch soooo brav mini Unterschrift güebt vor em Hochsig. Und mittlerwiile... chani sie nüm. Gseht jedes Mal andersch us. Mischt. Muss glaub nomal üebe. Ich unterschriib halt so sälte öpis.

Ich chämt gern mal anes Träffe. Ihr müssteds mir halt separat no säge. Entweder da oder per WhatsApp oder so. D Taeboyana hät mini Nummere.

Am Sunntig macheder eis, gäll? Ich bin ebe am Morge no im Gottesdienst (würd da sowieso gern gah - aber das Mal bini au no am Musig mache und "muess" eh det sii). De gaht bis am 11i ungfähr und isch im Züri Oberland. Ich würd vermuetli z spat acho, dass es sich no würd lohne.

Liebi Grüess
Fara

Zuletzt bearbeitet am 10.12.14 11:05

Hey Fara

So schön, vo dier z’ghöre! Han au immer wieder a dich dänkt! Schön, gahts der wieder es bitz besser..
De Alltag chunt halt scho zimli schnell wieder.. Mier händ ja Endi August ghürate und dänn simer im September / Oktober ide Flitterwuche gsi.. Super gsi :) Aber irgendwie dur d'Flitterwuche ruckt au gad d'Hochziit chli in Hintergrund.
Ich söt überhaupt mal no die ganze Sache mit em Name no ändere.. Schieb das immerno chli vor mich her.. Abr susch hani mi an Name gwöhnt. Han au nie falsch abgnoh am Telefon .
Ja wär kuuhl, wenns mal miteme Treffe wür klappe.. :)

nicht registriert

Liebi Fara

So genial, hesch du wiider ins Forum gschriibe! Schön, dass du au mit dä Taeboyana no Kontakt hesch und so dä Draht zu uns ned ganz verlore gange isch! Siit miir uns uf FB verschoobe hend isch ja da inne mucksmüsli still

Du bisch ä starchi Frau und es Vorbild für alli, wo ähnlichs erlebe müänd. In diiner Not lasch diich nöd unterkriege: Du fiirsch es Hochziit, bausch diir es neus Lebe mit diim Maa uf und vertrausch vo Herze uf Gott und sini Zuesage für diich! Bewundernswert! Wie viiel anderi 2014-Brütli denk iich an diich und ii bete zu üsem Gott, dass er dir Vertraue in ihn schenkt und du dich in guätä wie au schlechte Ziite treiit und unterstützt fühlsch, vo Fründe und Familie.

Wiie fühlts siichs für diich aah, so früsch mit diim Ehemaa zämäzoge z'sii? Durch da, dass dä Summer "ned nur" mit Zivilstatus gänderet het, iisch dä Alltag zwar da und trotzdem ganz andersch wie no vorher. I bii dankbar, darf ii jetzt miis eige Geld verdiene und muä nüm in PH go. I freue miich, dass miis Dihaii nüm bii miine Eltere isch, sondern da mit miim tolle Maa. Natürli, isch ned alles rosarot (obwohl diiä Farb total kuul isch ) Aber in bestimmte Situatione merk ii einfach wiider, wiie ich nöd zrugg wott. So zum Bispiiel nach Familie-Fester muän iich mii nüm vo miim GG verabschide, sondern mir chönt gmeinsam Haii go. Da isch doch so grossartig?? Und denn chömet no alli Nachteil. Ufzmal muä meh selber putze, koche, wäsche, Stüre zahle und Verantwortig übernäh für Sachä, wo meh no null Durchblick het (z.B. Krankekasse )

Du und dii GG hend doch au viiel Ferii-Flitter-Plän gha? Dä Norde hesch mal welle aluege... Hend ihr scho chönä gah oder stönd d'Flitteri bii eu no aah?

Nala: Meega schöni Idee mit dem Erinnerigsbuäch! Hesch in diis Kleiid driigschnitte oder es Stoffprob no gha?

Also Taeboyana, Lil.lian und Nala sind mir klar gsii wärs isch. Aber broncos han ii müässä go naluege. Zum Glück giits unseri Liiste!! ^.^