Emma, das tönt super mit de Grillparty. mir hürotet ja in 3 täg, bis jetzt haltet sich d nervosität in gränze, ich glaub einfach, will ichs no gar nid richtig realisiert han und mir eifach irede, das s hochzitsfäscht im august denn wichtiger isch.
s wätter isch jetzt ändlich früehligshafter, obwohls je nach wetterdienst am donnstig oder erst am fritig rägnet.... bin mal gspannt, obs öis trifft oder ob mer nomal devo chömed.

Hoi zäme und willkomme Rea80!
Das tönt doch au scho rächt "planet", einfach anders, mit meh Kollege ibezoge. Ich find, es muen doch für jede passe und wenn hose und plazer für dich s richtig isch, denn isch das doch super.

also ich verzell no vom standesamt: mer händ ja im april scho ghüratet und es isch eifach traumhaft gsi! de einzig schön tag ide wuche hämmer verwütscht! am morge hani mis kleid (es wisses summerchleid, mega schlicht) und mini peeptoes agleit und bin zum coiffeur uf die 9i, löckli mache. mer händ am 11i mit allne vorem standesamt abgmacht gha (nur trauzüge und eltere sind iglade gsi), am halbi 12i hets denn richtig agfange. nun ja, am viertel vor 11i bini immer no bim coiffeur ghocked und han langsam panik gschobe, will erscht d helfti vo mine haar gmacht gsi isch. si het mi beruhigt, si schaffis, ich heb eifach mega vill und dicki haar. ok, am 11i dänn die erschte arüef vo minere trauzügin und mim jetztige ehema. han alli beruhigt (am meischte wohl mich sälber), es heb ja no puffer, eifach mal alli versammle und uf mich warte, ich schaffis. im geist hani mer aber scho vorgstellt, wies isch, nur mit emene halbe chopf locke und emene halbe gradi haar zgha!

am viertel ab 11i hanis denn gschafft, han schnäll zahlt und bin use grännt. de coiffeur isch es paar meter vom bahnhof weg gsi, det hani mit de wartende trauzügin des taxi bestige und underwägs no en inzwüsche panische aruef vo mim ehema (ja, ich hans a sinere stimm ghört.... ) entgegegno. am 5 vor halbi 12 simmer dete gsi und han alli begrüesst, d trauzügin het mir als überraschig en riisige bluemestruss bsorgt, woni denn no schnell d verpackig abgrisse han und denn simmer scho is trauzimmer gfüehrt worde. ich chan nid säge, wie lang dases gange isch, han kei uhr gha und im stress au keis zitgfühl me gha. aber mer sind die letschte a däm tag gsi und drum hets d standesbeamtin au mega isi gno (han scho horrorgschichte us züri ghört, das me inere viertel stund scho wider unsanft usegschobe wird und die nächste ineplatzed) und mit em trauzüg witz gmacht und mer händ no mega lang im trauzimmer föteli gmacht. es het sogar no es chlises gschänkli vor stadt gäh (danke winti!) und denn simmer früsch verhüratet use gange in sunnige (!!) park und händ dete no chli föteli gmacht mit de eltere und de trauzüge und so. denn simmer go zmittag ässe und will so schön gsi isch, simmer in innehof dusse ga hocke und es isch eifach de oberhammer gsi zwüsched all de böim im innehof z sunne z gnüsse und fein z ässe. es sind all mega fröhlich gsi und händ sich guet verstande (es händ sich nid alli vorher scho kännt). nachher händ mini eltere scho müesse gah, wills id ferie sind und trauzüge und mir sind nomol go föteli mache, will mer die fürd iladigscharte wänd verwände. nachher simmer hei und händ no chli de freii namittag gnosse und ich han scho die erschte brief mit de namensänderigs-aträg ufd poscht bracht

wenner mi ganz lieb fröged, verzelli au no vo öisere hochzitsreis

Hoi emma, ui, bisch scho nervös? Bi öis isch de wetterbricht au nid guet gsi afang wuche, aber denn hets möge hebe und es isch erscht am fritig cho rägne. mit chli glück klappeds also au bi dir no. und susch isch au kei untergang, ich han mer äxtra en megagrosse rägebogefarbige rägeschirm gchauft und hetti au fröid gha, weni mit däm umeglaufe wär. villicht chansch der ja au no öppis usdänke, wos nur git, wenns rägnet, und was di würd fröie

vor drü wuche am fritig simmer em räge entflohe und direkt uf miami gfloge. es isch en richtige alptraum gsi am flughafe! nach dem lange flug, womer eigentli totmüed gsi sind, hämmer 1 stund vor de immigration gwartet und nomal 1.5 stund ide schlage bide mietauto-firma. will ich mim gg gschänkt han, das er in daytona chan go sälber nascar fahre (so e art ami-formel1), und das nur am samstig gange isch, simmer no am fritigabig d ostküste ufegfahre und am samstigmorge denn no die restlich strecki. vode ostküste florida hämmer drum leider nid so vill mitbecho, aber me muen sich ja no öppis für d widerholigsreis ufhebe (hehe). während min gg also gas gä het, hani mis beschte gäh, das fotografisch festzhalte (die autos sind so schnell verbi...). nach dem vile fahre, hämmer öis eifach en abig im hotelzimmer gönnt, um echli schlaf nachezhole. am nächste tag simmer denn d ostküste zrugg zu cape canaveral gfahre, um det s kennedy space center azluege. isch mega idrücklech die alte space shuttle, wo det usgstellt sind. die sind mega gross, aber dete, wod astronaute dinne gsässe sind, det hets nur grad platz zum hocke, nid emal ufstah chamer. das wär nüt für mich!
am abig simmer wiiter uf orlando gfahre. ich han scho vo diheime us tickets fürd universal studios gchauft gha und es zimmer imene park-hotel buecht gha. und das chani echt empfehle! klar, die hotels sind türer als die usserhalb vom park, aber me chan defür 1 stund vor de anderne ine und ich han föteli vom harry potter bereich gmacht, wo ussert öis ken andere mensch druf isch. denn simmer au grad am morge früeh alli bahne, wos susch langi schlange het, abgfahre im eine park (island of adventure). am nami simmer in andere park übere und dete hets denn dütlich me lüt gha, es isch aber au no gange. wahrschinli wills nid so en schöne tag gsi es (bewölkt, einisch am namittag hets churz chli grägnet, aber nur schüch). mer händ no e zweiti nacht z orlando verbracht, denn simmer wiiter.
Und zwar simmer is fantasy of flights museum. min gg interessiert sich für flugis, isch imene modellflugi-verein, drum isch das pflicht gsi. mich hets nid eso interessiert, vili alti flugis halt

denn simmer wiiter uf tampa. det hemmer am nächste tag in busch gardens zoo welle (en zoo mit achterbahne). das hämmer au gmacht, leider het öis s wätter en strich durd rechnig gmacht. am morge ischs no ok gsi, denn simmer d tier go aluege und giraffe go füetere (mega cool!), aber am nami, wo mer ufd bahne hend welle, hets agfange chüble, mega krass! und in florida, wenns mal rägnet, denn richtig und alles überfluetet! mer sind zrugg zum auto grännt und chnütüf im wasser gstande, will de parkplatz gfluetet gsi isch. pflotschnass simmer denn im auto gsässe und händ eifach s nöchte motel agstüred, wo mer scho gmeint händ, mer chömed nid zum motel ane, willd strass au so überschwemmt gsi isch. zum glück isch de parkplatz denn echli erhöht gsi und mer hends auto im "trochne" (also vo une, vo obe hets immer no grägnet) chönne abstelle. bi däm rägewätter simmer denn is kino, go ironman3 luege. leider simmer nachem ässe chli spat dra gsi und d plätz vom kino sind nid nummeriert gsi, das heisst, mer sind ide zweitvordeste reihe gsässe! und das imene risige ami-kino! ich han vo mim platz us gar nid die ganz liinwand chönne überblicke, sondern würkli min chopf müesse bewege, wenn sich öppis vo links nach rechts bewegt het naja...

denn sind ferie in florida scho verbii gsi und mer händ zum glück no 10 täg in jamaica dra ghängt. mer sind vo miami uf montego bay gfloge und dete hets hotel so e lounge gha, das heisst, me wird uf jede fall abgholt und chan während em warte no es drinke. i öisem fall ischs aber sofort los gange und 90min mitem auto uf negril gfahre. in negril hets äbe die schöne karibik-stränd vo de poschtcharte mit endlos lange stränd mit wissem sand und palme und türkisem meer. halt wie me sichs vorstellt
ich muen zuegäh, das mer jamaica denn nüme würkli erkundet händ, sondern grössteteils im hotel blibe sind. es isch au würkli zur erholig dänkt gsi und mer sind jede tag am strand gläge, händ gläse, im meer badet, beachvolley gspilt etc. jamaikaner sind es luschtigs völkli, jedefalls die wo im hotel gschaffed händ, und schaffeds, e netti, kollegiali atmospähre z schaffe. ich hans au guet gfunde, das mer im hotel kei trinkgäld het dörfe gäh (isch verbote vor hotelleitig), denn het me au würkli s gfühl gha, das die mit eim redet, wills das gern mached. und es isch würkli alles inklusive gsi ussert d poschtcharte und d föteli vo öisem private dinner im bauhuus, wo mer a eim abig gha händ also würkli traumhaft, chans nur jedem empfehle.