| Parallelbräute 31.8.13 |
|
|
1 .. 3 4 5 6 7
|
|
|
|
|
04.09.13 11:33
Emma13 
|
Emma's Traumhochzeit - 31. August 2013
Emma's Traumhochzeit - 31. August 2013
Da ich keis eignigs Plätzi han, verzell ich euch da vom schönste Tag i eusem Läbe...
Mir hend en absoluti Traumhochziit dörfe verbringe, mir sind beidi immerno total überwältigt…
Agfange hets eigentli scho am Fritigabig, mis Mami het für eus ä chlini Überraschigsparty im Quartier organisiert, alli Nachbare sind mit chline Gschänkli verbicho, mir hend dusse bi strahlendem Sunneschii Pizza gässe und agstosse, s isch so herzig gsi… Mir sind denn bi Ziite hei und hend de Abig usklinge lah… Am nöchste Morge am 7ni het min Wecker gschällt, bin aber eigentli scho wach gsi, bin total guet gluunt ufgstande, bin go dusche und mir hend no zäme z’mörgelet, am 8i isch d Coiffeuse bi mir gsi und sie het mär ä meeega hübschi Frisur anezauberet, bin denn mis Mami go hole und zäme simmer zur Kosmetikerin gfahre fürs Make-Up… am 11i het denn mini Trauzügin scho uf mich gwartet und het mär ghulfe i mis Traumkleid inezhüpfe. 1 Stund spöter isch denn de Fotograf cho und mir hend no ä mega luschtigs Vorbereitsshooting gah, bim Kleid schnüere hets vorallem uu lässigi Bilder geh, d Stimmig isch total locker gsi und ich bin überhaupt nöd nervös gsi. D Ziit isch denn irigendwie gfloge und öpe am 13.30 simmer d Stäge durab gloffe und dusse hend scho ganz viel Lüüt uf mich gwartet, hend gfötelet, Roseblätter grüehrt und klatscht, s isch soooo herzig gsi, churz drufab isch de Trauzüg vo mim Maa mitemene wisse Jaguar mich und min Papi go hole, s Auto isch sooo schön gschmückt gsi und es het eifach bombastisch usgseh. Zäme simmer zude Chile gfahre, sind usgstiege und churz vorem Tor simmer denn stahblibe, eusi Trauzügine sind usecho, hend mich umarmt und no s Kleid schön grichtet, eusi Bluemeitli sind strahlend det gstande, han min Papi nomal agluegt, er isch sooo nervös gsi, hend eus umarmt und sind zum Hochziitsmarsch inegloffe, das isch definitiv eine vode schönste Moment i mim Läbe gsi.
Zuletzt bearbeitet am 04.09.13 11:37
|
|
|
|
04.09.13 11:34
Emma13
|
Emma's Traumhochzeit - 31. August 2013
Ich hans so gnosse, han mich uf mim Schatz vorne am Altar fokussiert und alli Lüüt um mich nöd agluegt, han nämli gwüsst dasi so usem Konzept wür gheie… ihihi hans denn super gmeisteret und han min Schatz i sinere ganze Schönheit bewunderet. Er isch det gstande mit grosse Auge und total berüehrt. Er het mich uf de Wange küsst und liislig zuegflüsteret „du bisch unglaublich schön“…
D Trauuig isch wunderschön gstaltet gsi, eusi Trauzüge hend d Fürbittene mit Symbol vorbereitet gah und no 2 Gedicht vorgläse, en Kolleg vo mim Maa het für eus no es Lied gsunge und det hani denn würkli müesse brüele, es isch sooo schön gsi, han mi eifach nüm chöne zrugghalte. Alli hend klatscht und rundume hets füechti Äugli geh. Bim Ringtusch hemmer denn ä Uflockerig gah, da ich scho wieder die falschi Hand gno han ihihi denn sind d Chind uf de Altar cho, hend eusi Hand gno, zäme hemmer en Kreis bildet und de Vater Unser bettet, s isch würkli herzig gsi. Mit eusem Lieblingslied simmer denn tanzend Hand in Hand usegloffe womer grosszügig mit Riis beworfe worde sind.
Alli sind go gratuliere, mir hend no ä grosses Gruppeföteli gmacht und sind wiiter zude Apérolocation wo eifach en Traum gsi isch. Mir hend bi schönstem Wetter uf de Wiese womene botanische Garte agstosse, d Stimmig isch super gsi, im Hintergrund isch d Musikliste vo mim Schatz gloffe und obwohl mir praktisch nüd gässe hend, hani öpe 3 Gläsli Wiiswii trunke ihihi ich han sooo Durst gah! Eusi Trauzüge hend denn allne Stift und Kärtli verteilt, wo mär Wünsch fürs Brutpaar het söle drufschriebe, bitz spöter sind sie mit ganz vielne rote Luftballöön uftaucht womer alli zäme stiege lah hend. Es het unglaublich schön usgseh… Uf dere wunderschöne Wiese han ich denn mit Brutstruss gworfe und au det isches uu luschtig gsi, eusi Mädels hend richtig drum kämpft. 
D Gäst hend denn de Apéro wiiter gnosse und mir hend eus verschliche zum euses Fotoshooting mache. D Location isch eifach en Traum gsi, überall hets blühendi Blueme gah, viel Grüen, Bäum, Bänkli, es Bächli… also perfekt zum fötele, mir hend mega Spass gah und ich freu mich scho so sehr ufd Föteli. Mit eusem gschmückte wisse Jaguar simmer denn zude Abiglocation chauffiert worde wo d Gäst scho uf eus gwartet hend. Mit rote Luftballöön ide Händ simmer zu „we found love“ is Restaurant inegloffe und vilicht wäg de Liedwahl, vilicht will d Stimmig eifach super gsi isch, plötzli sind scho alli uf de Tanzflächi gsi und mir sind scho vor de Vorspiess mega abgange ahaha
Zuletzt bearbeitet am 04.09.13 11:44
|
|
|
|
04.09.13 11:36
Emma13
|
Emma's Traumhochzeit - 31. August 2013
S Esse isch super fein gsi, d Deko genauso wie ich's mir gwünscht gah han, mediterranisch, mit Palme, vielne Kerzli, Muschle und Seesterne, zwüschet ine simmer immer wieder go tanze, euse luschtige Eröffnigstanz isch super guet acho, d Lüüt hend richtig mitklatscht und gsunge. S het nöd besser chöne si. Als Überraschig hemmer no 2 Brasilianerine in typische brasilianische Kostüm gah wo ä mega Show bote hend, d Gäst hend nüme ufghört tanze, s isch eifach sooo lässig gsi. Spöter hend eusi 4 TZ no en Mambo tanzet und au det sind wieder alli uf de Tanzflächi gsi. D Stimmig isch eifach genial gsi, alli hend mitgmacht und sind guet druf gsi und mir hend eus eifach nüd bessers chöne wünsche. Am Schluss isch denn no eusi wunderschöni Turte inebracht worde vomer dusse agschnitte hend und im Hintergrund sind Füürwerk-Fontäne abgange, s het so schön usgseh.
Natürli isch de Abig denn wiitergange und di bestgluunte hend bis am 3 ide Nacht mit eus duretanzt. Womer denn müed aber überglücklich wo eusne TZ hend wele verabschiede, hämmer e grollts Blatt übercho womer erst im Auto hend dörfe läse. Sie hend eus umarmt und ä „gueti Nacht“ gwünscht.
Unwüssend simmer vo eusem TZ-Chauffeur is Romantik Hotel am See gfahre worde, womer mit Cüpli und Roseblätter ufem Bett empfange worde sind. Todmüed und überglücklich simmer denn igschlafe… Sie sind eifach di BESCHTE, die Überraschig isch eifach genial gsi, am nöchste Morge hemmer mit Blick ufem See dusse zmörgelet und en gmüetliche Wellnesstag verbracht. S isch so schön gsi, mir zwei allei de Tag nomal chöne Revue passiere lah…
Mir hend en perfekte Hochziitstag verbracht wo alli eusi Erwartige übertroffe het und sind so glücklich und zfriede dass mär das riese Glück hend dörfe erlebe. Womer heicho sind het es Gästebuech ufem Tisch uf eus gwartet vollpackt mit Föteli vom Abig und liebi Glückwünsch vode Gäst… und wieder hani Tränli verdruckt… Unglaublich wie schön dass märs gah hend! 
Zuletzt bearbeitet am 04.09.13 11:48
|
|
|
|
|
|
|
|
04.09.13 18:01
drusilla
|
Re: Parallelbräute 31.8.13
Liebi Emma, so wunderschöööööööööööööööön, vile Dank für de Bricht und natürlich alles Gueti ide Ehe!! Mer hend au en wunderschöne Tag dörfe erläbe. Ich bin leider nid so guet drin, das alles Wort da z fasse, aber chan brichte, dases genau so gsi isch, wie ich mir das gwünscht gha han. Alli Dienstleister (Musig, Apero, Zeremonieleiter etc.) händ ihri Sach wunderbar gmacht und d Trauzüge sind de Hammer gsi! Ich muen versueche, das für is Hochzitsalbum ufzschriibe, das wär e schöni Idee, wenns nebed de Bilder no en Text gäbi 
|
|
|
|
|
|
|
|
|
|
|
|
1 .. 3 4 5 6 7
|
Anmelden
. Vo Härze alles Liebi und Gueti für euch 
