Ich verstoh di imfall voll Lou, ich bi au öper wo mega schnäll uf so Züüg reagiert und rasch Zwifel het, allerdings egal bi was. Und s hürote findi halt scho speziell, ich meine me het jo d Absicht wörkli zämezbliebe bis zum Läbesändi. Und wenn me denn halt viel Negativbispiel gseht machts eim scho Angst.

Vorallem dunkts mi me cha das fast niemertem säge wills de Lüüt au cha schräg inecho wenn me so öpis seit wenn me am Hochzyyt plane esch. Aber ich bi ebe wörkli kei so "happy-hippo-bruut" wo nur Härzli i de Auge het und no ganz naiv cha dänke (das esch jetzt NED abschätzig gmeint imfall, beniede die Fraue amigs um das) aber ich ticke ned eso sondern bi rächt realistisch veralagt und gseh halt bi wie villne dass es id Hose goht oder wieviel das zwar zämebliebe aber total unglücklich sind. Ich ha mit mim GG aber scho oft über das gredet und mir sind eus beidi einig dass mir alles wänd gä damits ned eso chunt. Ich dänke das esch au s einzige was me cha mache, dra bliebe, ned ufhöre schwätze, s Verständnis für de ander ha und eifach d Beziehig wichtig nä und sich Müeh gä. Hoffe mir dass mirs schaffe.

Lönd oi nöd verunsichere. Wens für oi jetzt stimmt, denn isch das guet so! Usserdem chamer nöd vo anderene (wos nöd klappet hät) uf eim sälber zrugschlüsse.
gänd zuekunft eifach possitiv ah

Lueg Lou ich ha bis vor 4 Johr gseit ich will nie hürote um kei Priis, für mich esch Ehe = Gfängis gsi chli krass usdrückt will ich bi mim Umfeld au viel mitbecho ha wo gaaar ned guet gloffe esch und mir immer gseit ha so wot ich nie wärde, ich wot go wenns mir nüm passt und ned inere lieblose Zwäckgmeinschaft läbe.

Ich ha rächt lang brucht bis ich gmerkt ha hei Momänt, ich bi ich und ich und mi GG händ ganz e anderi Beziehig als die Lüüt wo mir als Negativ-Bispiel so präsent gsi sind. Ich ha denn rächt lang a mir gschafft und au viel und lang mit mim GG gschwätzt. Für mich stimmts dass mir jetzt hürote und ich freu mi eigentli mega ufs Fest. Aber amigs weni e schlächte Tag gha ha oder so und starch konfrontiert wirde mit Lüüt wo vom hürote abrote etc. denn verunsicherets mi amigs glich immerno. Ich glaube au, das wird ich allwäg nie ganz chöne abstelle. Ich gsehs mittlerwiile eifach eso: dur das, dass mi GG und ich au scho einiges duregmacht händ weisi, dass es eus ned grad bim erste Sturm umhaut. Und will mir eus so bewusst sind wies cha schief go versueche mir so z säge präventiv gäge das vorzgo. Ich glaube wenn me weiss uf weli Warnzeiche dass me söll achte denn esch das scho mol sehr viel.

Und was dis Schwiegermami gseit het esch allwäg wörkli eifach e mega doofe Spruch gsi, vorallem di Maa het di jo scho ghürote also vo dem här esch das eh e mega förigi Ussag gsi vo ehre. Versuech eso Sache am beste z ignoriere und konzentrier dich uf die guete schöne Sache wo di Maa und dich verbinde und heb a dene fest.

Velecht esch es au grad will dir scho so viel duregmacht händ? Aso weisch ich ha das z.b. mängisch, dass ich so de Hochzyytszauber total gärn hätti wo die Päärli händ, wo nonig so lang zäme sind und eigentli no nüt wörkli schlimms duregmacht händ zäme. So das ganz naiv eifach verliebt sii, das esch doch soo e schöni Zyyt . Aber glaube wenn me scho einiges heftigs überstande het denn hinterloht das halt Spure. Klar bi eus esch es jetzt wörkli so dass eus das no meh zämegschweisst het aber trotzdem hets eus au rächt mitgno. Mir hürote sicher mit emene "realistischere" Bild als wenn mir ghürote hätte wo mir rächt früsch zämegsi sind.

Und weisch wägem Atrag mache, meine du hesch ne zwar gmacht, aber er het jo gseit, und das hät er sicher ned gmacht wenn er ned sis Läbe mit dir wörd welle teile .