@ dänu: merci dir viu mau. mi gg isch häuuf begeisteret vo denä hop-on tickets. heimer ds london u ds paris o so gmacht u woninem vrzeut ha das du gseit hesch das gits i sf o heter gad mega fröid ka. alcatraz wüssemer no nid ob mir das wei machä. wahrschinlech nid... ou ja, chinatown muess unbedingt si

@lilmonkeyme: dini reis tönt ja o super. mir wüsse no nid wi lang mir wo blibä, mir gö de afangs herbscht nomau ids reisebüro und de besprächemer de aues nomau. ja mir hüratä am glichä tag ja mir weis chli gmüetlech näh. mir hei dänkt so 1 tag disney und adventure land, 1 tag universal studios, 2 täg l.a. süsch, 2-3 täg vegas, ca. 3 täg sf. 1 tag wot gg ga schlangä fotografierä ir mojave wüeschti (är het säuber schlangä u wot unbedingt äs paar klapperschlangänä vor d linsä becho).

@lula: das isch dr lake tahoe


beträffend hotels:
mir wärä froh für hoteltipps in sf und l.a. nid ds nobel aber o nid gad ä biuegi abstigi, am liebstä zentrau

Hey Morelia

Mier sind im 2010 für 3 Wuchä im Westä vo Amerika gsi. 5 Täg uf Hawaii, denn 3 Täg in SF und denn übere Yosemite, Gran Canyon, Page, vo detä ä Flug is Monument Valley, zrugg uf Page, Las Vegas, Joshua Tree Park, LA, Highway Nr 1 uf SF zrugg. Mier hend für die Rundreis (ohni Hawaii) ca 12 Täg deziit gha. Und es hed locker glanged.

In LA hemmer s Roosevelt Hotel gha. Das isch direkt am Walk of Fame, mit Blick ufs Kodak Theatre. Es mega schöns Hotel.

Universal Tickets hend mier direkt dete amne Automat useglah, mit Front-of-the-line Pass, hed sich glohnt. Am morge früeh dete sii lohnt sich au. Am Beste am Afang gad mal abcheckä wenn die versch. Vorfüehrige /Shows (Delfinä/Wal, etc etc) sind.

Alcatraz isch ja es ehemaligs Gfängnis, wo zb de Al Capone (Scarface) igsässä isch. Mr fahrt mitme Boot übere und hed den en Audio-Guide, wo eim dur s ganze Gfängnis füehert. Mier hends interessant gfunde. Und natürli hed mr au e schönä BLick uf d Skyline vo SF. Mr hend die Tickets gad online kauft, und scho dihei usdruckt. So hemmer üs s Astah chönnä erspare, denn s isch wirkli so, dasses det immer viel Lüüt hed. DSchiffalegestell isch gad bim Pier42, was ja au für sini Seehünd sehr bekannt isch. S Fishermenwharf isch au gad näbä drah, das isch e richtige Rummelplatz und s isch immer öbis los.

Am Beste ier nähmed en Laptop oder Tablet mit, de chönd ier vo underwäx s näxte Hotel bueche. Das hend mier bi Vegas, LA au so gmacht.
Ide MC Donalds oder Wendys ligged amig so Heftli uf. Am Beste stüüred ier gad sone Lade ah wenn ier achömed. I denä Heftli sind Motels dinnä, wo vergünstigti Priise abietet, wenn de Voucher vom Heftli vorwiisisch. Das hed bi üs immer super klapped. Und so weisch au gad, wos nächste Motel hed. Eifach d Adresse im Navi iigäh und go fragä...

Ohh das isch ez gad echli en langä Text wordä.... ich hörä ez mal uf

hey so kuhl. merci für öii tipps.

heiter ds gfüeu mir hei eher ä churzi strecki für 4 wuchä?? eigentlech hätti scho gärn no chli meh gmacht, z.b. dr hw 1vo l.a. uf sf, aber üsi beraterä het gmeint, dä sigi nid so bsundrigs...

heit ier aubä agä dases öier flittis si?? bechunnt mä da äch no upgrades oder vergünstigungä??

Hoi Morelia

Erst mol es Kompliment zur Uswahl zu üchere Flitterwuche...
I bi letscht Johr mit mim Verlobte in Amerika gsi. Mir hend für 2 Wuche e Camper gmiete kha.

Also San Francisco muesch erläbt ha. Tickets für Alcatraz chasch telefonisch au reserviere. Isch mega idrücklich. Denn muesch unbedingt China Town go aluege... Au das muesch erlebt ha.


Zum Lake Tahoe cha dr nur sege. Traumhaft. Muend dr unbedingt gniesse.

Dr Yosemite National Park würdi gnue Ziit iplane. Mir sie zum 3 Teilige Wasserfall ufegloffe. ( Gueti Schueh alege) D Eichhörnli werde euch uf dem wunderschöne Weg begleite!

Zum Mammoth Lake cha dr nur sege: es cha au im Juni dert no schneie! Mir sin von^m Death Vally her cho... hend a dem Tag 50 Grad plus kha und 4 Stund später bim Mammoth Lake hets gschneit und hend dur d Nacht Minus 12 Grad kha.

Bim Death Vally müend ihr unbedingt viiiiiieeeeeeel Wasser mitneh. Sehr heiss aber e sehr idrücklichi Landschaft!!!

Glaub zu Las Vegas muess me nit viel sege. Eifach gniesse und stune!!!! Und unbedingt is Casino go spiele! Es het usserhalb vo Vegas au es super Outlet zum shoppe!!! Weg dem unbedingt mit leere Koffer go und mit volle heicho :-)

In L.A würdi usser de Universal Studios sicher au zum Walk of Fame!! Dert gseht meh sache.......


Was dr uf euchem Trip au würd empfähle ischs Napa Valley. Das ich es "Dorf" bi San Francisco.
De Ort bestoht eigentlich nur us Weinguets.... Mir sind Vineryvom Robert Mondavi go aluege. Sit den trinke mir nur no de super Wiiii

Für meh Infos darfsch di gern meld und trinket unbedingt e Fanta Ananas für mi.... :-))

Viel Spass

Miar gönd in rund amana monat au uf amerika in d'flittis. D'routa wir au bitz a klassisch sii im Westa, mit NP, las vegas, los angeles und san franciso...

jetzt aber no a frog zum Shoppa wo gits guati, grossi outlets....

Bin sit letschtem johr in florida fan drvo

Guete Morge zäme!

Mir wärdet öisi Flittis ou i de USA verbringe. Mir wärde i de Woche 23 2014 vorussichtlich am Mäntig flüge und den i de Woche 26 am Mäntig oder Zistig heicho :-) Wär weiss, vellecht trifft me sich jo de ungerwägs :-)

Mir wärde ohni Reisebüro bueche, eifach mit Empfählige vo dene Kollege wo ou scho en Rundreis gmacht händ im Weste. Üsi Route wird ungefähr so usgseh:¨

1. Teil mit Camper
- LA
- San Diego (evtl. Seaworld?)
- Joshua Tree
- Lake Havasu
- Grand Canyon
- Monument Valley
- Antelope Canyon
- Page (Übernachtung am See)
- Bryce Canyon
- Zion
- Hoover Damm
- LV
- Death Valley
- Bodie
- Yosemite
- SF (mit Hop on Hop off und Alcatraz)
- Highway No 1
- LA (Universal Studios)
- Hawaii

Das si jetzt eifach au die Statione wo mir öppis wette go aluege. Gemäss Google-Maps wär die längsti Strecki ca. 6-7 h a eim Tag. Mir si no am öberlegge, ob sichs lohnt, ufem Wäg vom Lake Havasu bis zum Crand Canyon ein Teil uf dr Route 66 z fahre. oder ob mir üs dä Umwäg söue spare ond eifach in Flagstaff deför en Haut mache.

@elea: Din Tipp wägem Outlet hani mer uf jede Fau scho notiert, i gloub ufem Wäg zrogg nach LA wirds dört en Stopp gäh :-)