Sali zäme

Ez bini dra zum über min Polterobig zverzelle!

Ich bi erscht am 10ni ufgstande, es hät richtig guet tue zum nach dere Wuche, woni ka han letscht Wuche emol uusschlofe zchönne. Min Maa und ich händ üs dran gmacht dWohnig chli in Schuss zbringe und mir händ Spaghetti brunched. Denn hät er mir xeit, ich müess mi langsam parat mache und sisch nüt cho. Naja, mir händ üs halt denkt, dass er sich verirrt hät mit de Ziit und sind anegsesse, zum chli gmüetlich binenand xi, wos a de Türe gschellet hät. Ich hans nöd ghört, bin zum Fenster go luege und *Pops* isch mr en Korke genau vorem Gsicht id Schiibe detscht. Sie händ sich versteckt ka, händ aber mega afoh lache weg dem Korke. Er steckt ez zunderscht ide Store ine, wo mr nöd dezue chunt

Anyway, bi denn uusse und mini 3 Mädels sind mr entgegecho mit riesigem Wägeli, Täsche usw. Sie händ mr xeit, ich müess es Bikini, es Tüechli, öbis für de Sport und bequemi Schuhe aalegge. Ich bi die Sache go zämesueche und i de Zwüscheziit händ sie de Champis verteilt und mir händ alli (inkl. Maa) uf mich aagstosse. Ich han es Biigli Papier und en Chorb id Hand druckt becho und scho simmer los. Sisch e Schnitzeljagd xi, woni nach Bildli mich ha müesse i de Stadt orientiere. Und a jedem 2te Poschte hämmer es Mädel zämegsammlet. Mir sind denn insgesamt 8 Fraue xi am Ziel und sZiel isch en Buuchtanzstudio xi. Das isch sooooooooooooooo genial xi! Ich han no nie Buuchtanz gmacht, hans aber scho immer mol wölle mitmache. Anschiinend tüend im Orient dFraue vorem Hochziitstag de Bruut vortanze und debii ihre Wünsch mitgeh für id Ehe. Nachdem mir alli Grundschritt glernt händ, bini ufeme Königssessel ghocked, han es traditionells Hochziitschopfteil aaka und alli händ für mi tanzt und mir ihri Glückswünsch mitteilt für id Ehe. Ich hät fasch aafoh hüle, ha mi aber no chönne zämeneh. Mir chömed ez scho wieder Träne, wils so persönlich xi isch und ich han extrem vil Freud ka!!!!

##Zivil am 10 Juni 2010 -- Trauung am 10 Juli 2010##

Denn bim wieder aalege, hani nümm dörfe mini andere Chleider aalegge und ich ha müesse mis Bikini aalege sie händ mr es rots glitzernds Chleid überreicht. Denn isch no es grüens zackets Teil ume Hals cho, es Stilhüetli ufe Chopf und e grüeni Sunnebrille dezue cho. Sie händ mi als Erdbeeri verchleidet. Es Schild häts dezue geh mit Erdbeersaison und uf de andere Siite isch "Süsses oder Saures" gstande. Es hät total witzig uusxeh!! Mini Mädels händ alli es T-shirt becho, vorne druff isch Australie abzeichnet xi und sisch uusgfüllt xi mit de schwizer Flagge. Hinde isch druf gstande Titel: Polter-flight, mit Check-in 03.07 um 12:45, Abflugdatum 10.07 und min Name. Sie händ das würkli richtig guet gmacht ka. Mir sind denn zum Central und ich han dörfe is Chörbli ineluege. Ich han es paar Ufgobe becho und vor allem hani müesse sChörbli leere, i dem ich dSüessigkeite drin verchaufe. Es hät au Kondom und Schnäpsli ka und de riise Wage, wo sie mitgschleppt händ isch volle Alkohol und Säft xi. Ich han also au chöne Cocktails mische!! Sie händ alles under eim Huet verbunde, woni gern han und woni schaffe (ich schaffe mit Mischer, hihihi). Denn hämmer e Stund ka bis zum Zürisee vorzdringe.
Am einte Caipi-Stand bini anecho und han müesse min neue Nachname ufsäge und es hät für di ganz Truppe Caipis geh!!! Die ghöret zu de Catering Firma, wo mir engagiert händ und sisch so vorher abgmacht xi!! Und das am 4i am Nomi. Sisch meeega luschtig xi! Naja, es hät leider nöd so vil Lüüt ka und ich han nöd so vil chöne verchaufe. Mir sind denn aber bim Zürisee aaglanget, wos e Flugshow geh hät und ich han das mega toll gfunde, wil ich liäbe Flugshows! Anyway, mir händ denn bi de Pedalos aaghalte und sie händ scho 2 reserviert ka. Es hät zwor gad aafoh tröpfle, aber sisch war gnueg xi und mir sind trotzdem uusse. Es paar Meter vo de Landig entfernt häts gad aafoh schütte. Nach 2 Minute ischs aber vorbii xi und mir händ de Rescht vo de Ziit regefrei chöne umepaddle. Wegem Gwitter, wo ganz i de Nöchi xi isch simmer immer bi de Landig zue umepaddlet und händ vo nöchem chöne de Super-Puma Flugshow zueluege und das mit Lichi-Sekt ide Hand. Ich hans sensationell gfunde. Mir sind au no go schwümme gange und sWasser isch herrlich xi.

Meh giits später, ich sött no schaffe, han en Vortrag hüt, woni no muess fertig mache.
Freu mi aber druf zum de Rescht zverzelle :D

##Zivil am 10 Juni 2010 -- Trauung am 10 Juli 2010##

das tönt ächt geil!! als erdbeeri... mega herzig!! hihihi...

ich chume au dä samstig dra... bin au scho gspannt..

~~~~~juhu!! am 17.7.2010 isches sowiet!~~~~~~~

So, es sind sogar 2 Vorträg xi und eis devo isch um 1.5 Stund füreverschobe worde. Phfuuuu

Mir sind uusgstige, vo de Pedalos, wo en anderi Fründin uf mich gwartet hät. Sie isch vo Luxembourg cho und isch denn bis zum zNacht mit üs mitzoge :D.
Nachem umziehe wieder zrugg zur Erbeeri häts aagfange mit de Ufgobe. Ich han versuecht mis Chörbli zleere, de Schnaps isch recht guet weggange, aber wil alli scho vo 3 anderne aagfrogt worde sind, ischs nöd so eifach xi zum mini Süessigkeite zverchaufe. Mir händ eifach nur Richtig Stadelhofe müesse laufe. Ei Ufgob hani relativ schnell chönne erfülle: ich han müesse en Schluck Appezeller (ich hasse das Züügs) teile mit öberem. Es isch e 1.5 bis 2dl Fläsche xi und ich han chönne en guete Priis verlange inkl. selber en Schluck devo neh.
Denn hani müesse so schnell wie möglich 9 Kravatte binde bzw. Manne froge, wo helfed binde. Ich han nöd gwüsst, dass es sooooo vil Manne giit, wo kei Kravatte binde chönd. Es paari händ au nöd wölle, aber irgendwenn hani au das gschafft.
Bim Bellevue hani relativ lang nacheme Maa gsuecht zum mit mir Walzer ztanze. Entweder händs nöd chönne oder nöd wölle... Zuefälligerwiis isch en Studikolleg vorbiicho und hät trotz Nichtkönnens mit mir tanzed.
Somit hani dUfgobe erfüllt zum dörfe go zNacht esse. Mir sind denn im Outback glandet :D
Im Outback hämmer super guet verusse gesse und währeddesse häts recht aafoh regne. Mir händ üs eifach chli zämegruckt und händ wiitergesse. Di nächscht Ufgob hät nöd lang uf sich warte loh: de Fründ vo minere Bruutjunfere isch selber au ame Polterobig mitzoge und händ sich zum zNacht is Outback inegsetzt. De wo Polteret hät isch cho und mir händ en luschtige Tuuschhandel gmacht, womit mir beidi üsi Ufgob erledigt händ. Ich han es Bei vo ihm mit chline Wachsstreife gwachst und er hät mr defür sin Dildo !?! gschenkt. Mir sind alli fascht ab vor lache. Das Teil isch sogar recht gross xi, hihihihihi. Jänu, min Maa häts sehr luschtig gfunde... Di 2t Ufgob isch xi zum im Outback abzwäsche. Ich bin also id Chuchi vom Outback und han denn det gholfe sGschirr in en Korb zstaple und denn id Maschine ineschiebe, demits gwäsche werde chan. Ein Hoch auf die Technik!! Es sind es paar Mitarbeiter vorbii go luege und uuslache. Ich hans jedefalls sehr luschtig gfunde und es hät mr nüt uusgmacht.



##Zivil am 10 Juni 2010 -- Trauung am 10 Juli 2010##

Ich han no was meeeega süesses vergesse. Im Outback händ mini Mädels Filzerdbeeri uf de Manne-WC miteme Zettel deponiert. Ufem Zettel isch gstande, dass sie mich (als Erdbeeri verchleidet) sölled sueche und mir sErdbeeri sölled geh. Plötzli sind 3 Jungs vor mir gstande und de erscht hät so tue, als ob er en Kolleg wär (isch sehr glaubhaft xi!) und hät mir no alles Gueti gwünscht. Am Schluss hät er mir en riiiiiiise Schmatzer uf dBagge geh. Ich bi fascht abe vor lache! Di andere zwei händ nöd so vil Selbstsicherheit usgstrahlt, aber sie händ mr au en Schmatz uf dBagge geh.
Ez hani die Erdbeeri zum dekoriere dehei. Jipiiii!!

##Zivil am 10 Juni 2010 -- Trauung am 10 Juli 2010##

hahahahahha soooo geil!!!

*autsch*--> haar wachsä....!!! hihi, häsch du diä stell usgsuecht oder dä Ma? ;-))

jöö, das erdbeeri kostüm isch ja voll süess!!!!!

~~~~~sitem 17. Juli 2010 glücklichi Ehefrau~~~~~~~