So ändläch nimmä ig mir ono Ziit übärä üsä zwöit wichtigsch Tag z schriebä Z grossä Fest isch de übermorn, juppi.
Nach zwe turbuläntä Abä mit viunä Sachä zum erledigä isch äs Friti dr 20.Ougust wordä. O am Morgä hei mir rächt viu z tuä kah, da mir d Apéro u z Ässä für üsi 12 Gest daheim gmacht hei. Am Zähni si mir de beidi zum Coiffeur ga d Haar schniedä u si het mir spontan no grad ä Hochsteckfrisur gmacht, wo super isch usächo.
Di GG isch mi Broutstruss ga abholä, wo ig nid ha gwüsst, wiä är usgseht. Är het super usgseh, het aber keis Band um Stielä gha, wüssä o nid wieso
Am haubi zwöi si diä erstä Gest bi üs itroffä. Am meistä bini überrascht gsi vom Outfit vom Trouzügä vo mim Ma. Normalerwis het är ä rächt eigätä Chleidergschmack u mi gseht vo witäm, dass är Single isch. O a däm Tag het är so ä Thermohouzfäuerjaggä, wo karriert isch, anäkah. Dies Mau aber für mi z schockä. Druner het är ä Azug anägha u sogar ä Kravattä. Är isch dä äxtra ga choufä, wüu schins nüt vo sim Chleiderschaft am Adjektiv festlich entspricht
Am Drü het nähr üsi Trouig agfangä. D Standesbeamtin hets schön gmacht, het no vo ihrer Ehe verzeut u üs gratä, immer wiedär zämä ufänäs Boot z ga, da mä dert anang nid usäm Wäg cha ga u zämä redt. Natürläch het si o dä obligat Gsetzesartiku müssä vorläsä, was si grad am Afang gmacht het. Nachäm zunang JA sägä heimär ungerschriebä u dert bini würkläch grad chli närvös wordä. Am Schluss het sie mir no mi nöi Pass u diä nöii ID überreicht. Blöderwis hani mini auti ID daheimä vergässä (a Pass hani dänkt), ha zum Glück 10 Täg Ziit becho diä nachä z schickä. O ä Gruss am Soefeli82 hani usgrichtet, si het 1 1/2 stung speter g hüratä dert.
Vorussä heimär no äs paar Fotos gmacht u hei ä ehemaligä Arbeitskolleg vo mim Ma gseh. Iz het är doch am Vieri dert ghüratä. Zufäu gits
Bi üs daheimä hei mir Apéro gha u speter no ä Ballonwettbewärb gmacht. Dinnä hei mir nähr Fondue chinoise g ässä u no bis am haubi eis gfiirät.
Anmelden
Z grossä Fest isch de übermorn, juppi.
26. Juni 2010, unser schönster tag....