Guete morge Jovia

Aha, demfall chund din Chef e Harley über?

Nei, mi Schatz hed nüd mit Marketing am huet. Er schaffed bi de Willy Stäubli und isch Bootsalagebauer. D.h. er saust die meischti Ziit mit em Boot uf de Schwiizer See umenand und gahd go defekti Bootsstäg schweisse und flicke oder er stellt grad neui uf. Dementsprächen brun isch er de allig au im Summer ;-)

S Standesamt chönd mier leider erscht im Februar 08 reserviere, aber da ich d Standesbeamtin persönlich känne (isch vo mim erschte Fründ s Mami) hani da ned eso fescht Angscht, dass es ned sett klappe.

Mis Chleid hani sitt dem Summer, muess jetzt aber sicher no bis im Dezämber warte, bis es glieferet wird. Wennt luscht hesch chasch under dem link mini Story zum Chleid läse http://www.wirheiraten.ch/kenel-erni/content-r20497.html

Es Grüessli Cannella

Salutti Jovia

Ah, das macht doch nüd wäg mim Liebschte, hätt ja chönne sii, dass er det schaffet *smile*

Merci für s Komplimänt, es macht au Spass, die HP z gstalte. Grundsätzlich han ich die "im Griff", isch ja schliesslich quasi au es Geburigschänk für min Schatz gsii, drum bin ich vorallem de Webmaster. Freu mi jedesmal, wenni wieder irgendöppis Neus cha dezue schriebe, will d Vorfreud isch halt scho riesig und doch soooo schön!!

Ich bi genau au dinere Meinig, dass es eifach no viel z lang gahd, aber mier hend das ja so wellä, damit mier üs ned müend stresse lah. Aber ich bin sicher, dass de plötzlich d Ziit schnäll vergahd! Freu mi aber, dass jetzt de de Winter wieder chunnt und ich mit mim "halbe Feriejob" anere Schneebar z Davos und de nachfolgende Fasnacht rächt abglänkt bi und wenn das dure isch, gahts ja de würklich nüme so lang. De chömmer üs de au ändlich um die letschte konkretere Sache wie z. B. Bluemeschmuck, de Apéro und s Menu kümmere und vorallem chani denn au öppe mis Chleid definitiv go abstecke *judihuiii*

Wüssed iehr scho, was iehr alles eso zum Apéro und am Abig zum Ässe wettid? Und was für Blueme nämid iehr, hender scho en Idee?

Es liebs Grüessli us em schöne Unterägeri

cannella

Sali Jovia

Mier hüratid zivilisch z Oberägeri und kirchlich z Cham (det bin ich ufgwachse). Grundsätzlich isch alles am 09.08. z Cham, d.h. aso au de Apéro und nachher s ässe. So müend mier und üsi Gäscht ned no lang umefahre und chönd alles z Fuess mache. Wobi das wäg em umefahre uf üs zwoi wohl eher ned wür zueträffe, da mier wahrschindlich no es bitz mit emene Super Puma (Helikopter) werdid underwägs sii... schliesslich muess ich min gschäftliche Bezug zu dem Heli scho chli usnütze ;-)

Ja, ab und zue ziehts mich a de Weekends und zwüsche Wiehnacht/Neujahr uf Davos. Ha im Winter 05/06 i de Jatzhütte en Saison gmacht und irgendwie chumi vo dem nümme los. Wenns die einisch packt hed... aber us diverse Gründ chani das leider nüm vollzitlich durezieh :-(
Zum Bispiel isch d Gugge au en Grund. Einisch chammer das ja viellicht mache, dass mer grundsätzlich nie id Probe gahd, aber a de Fasi de debii isch, aber es zwoits mal lied das de nüm würklich dinne, isch ja de andere gägenüber au ned würklich fair. Mi Schatz und ich sind aber ned i de gliche Gugge, er isch bi einere vo Arth (sinere Wurzelgmeind) und ich bi z Cham debii. Bi üs gsehds nonig grad so us, als öb mier d Nase vo de Fasi voll hättid *smile*

Wäg em Apéro simmer üs äbe au langsam am Gedanke mache. Da mier aber mit fascht 350 Lüüt rächnid isch das gar ned eso eifach... Mim Schatz sin Dädi isch aber Metzger und drum händ mier üs überleid, dass es wahrschindlich zu de übliche Apérohäppli no Würscht gid. Das passt absolut zu üs und vorallem au zu de Lüüt wo a Apéro chömid (Gugge, Trichler, Alphörndler, Turner, Handwärcher, Flughälfer, Förschter, Mechaniker, Pilote ect.) Und da mier vor hend erscht am 3 i d Chile z gha, sind denn evt. au einigi Hochziitgäscht so richtig hungrig und drum isch das genau s richtig. Zum trinke wird sicher au Bier, Wasser und O'saft gäh. Mier wärdid aber kei Wii, sondern en liechte Champagner ha (de wird grosszügigerwiis vo mim Grossmutti spendiert *ganzvielfreud*)

Bim Znacht hemmer üs no gar ekei grossi Überleggige gmacht. S einzig wo sicher isch, isch dass es ekei Fisch wird gäh *grins* und dass es es Dessertbuffet gid.

O ja, die Blueme sind au cool. Hend au Callas wellä, aber da mini Wunsch-Art vo Bluemestruss mit dene Blueme ned würklich passt, gids demfall de anderi. I de Chile wärdid mier mit Sunneblueme schaffe, passt super i die Chile, aber für e Brutstruss find ich das absolut hässlich... Jetzt gang ich de mal bi minere alte Schuelkollegin wo Floristin isch go luege was mier süsch no so wür gfalle. Sie isch absoluti Spitze (cha sogar näscht Früehlig ad Floriste-Schwiizermeischterschaft) und ich lieb ihri Bluemesache wo sie so hizauberet. Mier gfallid Lilie grundsätzlich no, isch aber glaub für e Bruutstruss au ned eso geeignet. Mal luege, han ja no chli Ziit :-)

Au es liebs Grüessli us em wieder trochne Ägeri

Cannella