Ich würd di paar freie Täg über Wiänacht/Neujohr eigentlich gärn nützä zum plänä und Iladigä und Homepage gschaltä. Jetzt weissi aber nöd so rächt wo afangä. S'Problem isch, dass ich's schön würd findä wänn alläs ä chli farblich zämä passt, also Iladigä, Hindergrund vo dä Homepage, Bluämä i dä Chilä, Deko im Restaurant und min Brutstruss. I dä Chilä hät's blaui Stüel und d'Wänd im Restaurant sind lachsfarbig. Da macht d'Farbplanig nöd grad eifach. Miär händ schomol mit änärä entferntä Bekannte gred wo sich würd um d'Bluämä kümmärä. Diä meint mär sölläd Föteli machä vo dä Chilä und vom Restaurant und dänn nögscht Johr bi ihrä verbi go zum luägä weli Bluämä dass würdäd passä. Da heisst aber miär chönd entweder no nöd mit dä Iladigä afangä (und da würdi eigentlich gärn - mier hürotäd im Mai) oder miär nämäd eifach ä Farb wo zu blau und lachs passt. Dä Brutstruss müäs jo dänn au zum Kleid passä und da hani au no nöd definitiv. Da wo miär aber äm beschtä gfallä hät isch Eierschaläfarbig. Do passt jo farblich fascht alles.
Passt bi eu alles zamä und wo oder mit was händ iär agfangä?

Witzig, das mit de Farbe isch mir ou no wichtig... Mir hend üs (oder besser gseit, ich ha mich) für grüen/crème resp. wiss entschide.

Mis Chleid isch elfebeifarbig. Mi Brutstruss söll mit crèmefarbige Rose und grüene Hortensie si.
D Iladig wird es crèmefarbigs Chärtli mit ere grüene Manschette.
Tischdeko halte mer ebefalls i dene Farbe (d Tischtüecher wärde denn halt äuä wiss, ned crème, aber was söll's) - ou wenn de Saal, wo mer fiired blau gstricheni Bälke het.
D Bank-Chüssi ide Chile sind zuefälligerwis grüen, was minere Farbwahl natürli entgäge chonnt.

Die Sach mit de Zit/Termine esch ned so gäbig. Chönntisch denn ned das Johr no met öichere Bekannte abmache - oder d Föteli maile, dass si's emou cha aluege und der Tipps gä.... Lachs und Blau isch scho no schwierig... Alles in wiss oder crème und denn eifach je nach Location es paar passendi Farbtupfer wär eventuell en Lösig.

Toi toi toi uf jede Fall!