Hallo zäme

Ech ben neui e dem Forum. Han erst grad vor 6 Täg min Antrag vo mim Frönd (ui han mech no ned dra gwöhnt ehn min Verlobte znenne) becho ond mer wettet eigentlich ned lang warte met de Hochzyt darom wend mer scho em Sommer 2014 hürote.

Ech wörd gern anstatt ener Chele enere Schüne oder ufemene Rebberg hürote. Ech han mech scho chli schlau gmacht, aber no ned werkli das gfonde won ech wet.

Het öbert vo üch Idee oder scho selber Erfahrige?

Ech danke üch scho mol recht herzlich för üchi Vorschläg.

nicht registriert

Hallo linally
Isch zwar kei Schüne-Atmosphäre, aber bim Schloss Meggenhorn gits en Saal wo mer für Fäschtaläss cha miete (sCatering muess mer glaub sälber organisiere). Näbedzue hets grad en Rebberg und au süscht findi de Ort sehr sehr schön. Vilicht wär das ja öppis für dich.
lg

an purpurblume
Danke vell mol för de Tipp. Ah das hani gar ned dänkt gha, obwohl echs Schloss Meggenhorn eigentlich könne. Werd mech do mol schlau mache.

an _janedoe
Danke der. Jo chas fast no emmer ned glaube!!
Jo de Landschi Hof könni. Stoht uf jedefall au uf minere "to see" Liste. Wo hürotisch denn du?

an _janedoe
Wow, das tönt aber super. Jo so öpis ähnlichs suech ech äbe au. Min Verlobte esch äbe Engländer ond sini Verwandtschaft und Frönde chömet extra do hi ed Schwiiz ond jetzt mönd mer natürli au en Ort ha oder es Hotel wo die alli chönd schlofe. Dörf ech froge was das för es Huus er gmietet hend?

@linally
d'Huus isch z'Schönenberg/ZH. Mier hend e Huufe Hüüser agluegt und eus für das entschiede wills seinzige gsi isch, wo ned nur Masseschläg sondern Einzel-/Doppel- und Mehrbettzimmer hed. Die Hüüser sind ja meischtens eher uf Schuelklasse usgleit. Chan der suscht mal de Link schicke?

linally,

am 17.5.14.
wenns dich intressiert, würi eifach mal go luege, du gsehsch uf de page nid so vil wie in echt, und er isch au scho recht verbuchet...