was? ou manokasa das tönt aber nach emne bez schwerige pfarrer!!!
i ha verständniss deför dass e gwösse teil vom ablauf ge esch. zb gebet oder d segnig oder so. das ghört zo enre cherchliche trauig! aber es bezli spetz gseit fendi spellt doch das ke rolle zo welem lied du ine laufsch ond ob das vo CD chont oder ned. klar wennd jez wördsch Highway to hell wele, jo do wördi verstoh dass de pfarrer ned so freud het ;) aber i glaube ned dass ehr öpis i dere art usgwählt hend... wet jo nüt onderstelle aber mengisch donkts mi träget die pfärerr bezli machtkämpf us of eusne scholtere
aber weishc wa d valey het doch au bez so diskusione gha met erem pfarrer ond schloss entli het si glich no ehri lieder döfe brenge. i wörd öberlegge wie wechtig euch da esch ond allefalls nomol metem pfarrer rede!!

Nei i han nid highway to hell welle hihihi.. Ich han ganz klassisch s Canon in D welle.. Es isch em nur drum gange das er findet wemer scho live musik het sell mer nid au no cd laufe la.. Ich weiss nid, er het eifach so viel regle, vorallem bi Fotograf und ebe au bi de Lieder.. Das es immerno en Gottesdienst isch und das es Gebet und sägnige git isch mir ja völlig klar und ghört sich au so, aber er isch keis bizli flexibel.. Mis eine Lied woni han welle isch Halleluja vo de Alexandra Burke.. Das heter jetzt ersetzt zu you raise me up.. Weiss nid mal vo wem das isch.. Und den ebe no die ganze chile lieder womer singe müend.. Ich han mi so uft trauig gfreut, isch ja s wichtigste... Aber jetzt hani chli en dämpfer becho.. :( nid nur ich, min schatz au..

da cha ehm doch eigentli glich si ob das lied live esch oder ned. meine ehr zahlet jo d musiker ond ned ehr! ond i fende halleluja es super schöns und passends lied för en traugottesdienst. i has gfüehl er wet eifach sini vorstellige vonere trauuig dorre boxe. aber eigentli set doch da s schöne si, dass jedi trauuig anderst und persönlech esch! ond au da metem fotograf esch schwerig... meine ehr zahlet ehn deför... ond di meiste fotografe send absoluti profis ond wösed sech zbeneh wärend de trauuig! i has bes jez emmer so erlebt dass die oft hocket ond de ifach zwösche dorre chli am rand omeschliche ond unuffällig fötelet. ha nonie eine gseh wo wie weld omegompet ond faxe macht
fendes mega schad dass ehr beidi sone dämpfer becho hend! aber log i fende au d trauuig eschs wechtigste am ganze tag. ond das esch doch euche moment! denn wenn ehr euch s eheverspreche gend, ond de moment sell perfekt si för euch!!! i wörd nomol metem pfarrer he hocke ond ehm sege wie vell euch zb halleluja bedütet ond ehr das lied wörkli vo herze gern hettet ade trauuig!
mer hend eusi lieder vo eusem pfarrer au müsse lo absegne. bim einte het er gseit, s lied sig schön aber passi ned so zonere trauuig. aber wenn för eus s lied en bedütig het denn sigs oke. da fendi e super istellig!! redet doch nomol met ehm!!!! ehr fendet secher en kompromiss!!! ond wenner ned vo zb you rise me up wet wegcho de froget doch ehn eifach mol wiso dass denn es bessers lied sig?

Er hets rise me up nur usgwählt wegem titel.. I sim Gebet chunt öpis vor vowege mer tuet enand ufehälfe oder so öpis und den heter de titel passend gfunde.. er kennts lied nid emal.. Ja ich denk mir redet nomal mit ihm, mir sind im Moment nid so zfride demit wies gloffe isch.. Eue Pfarrer het ja en super ihstellig, so sets sii! :)

Hallo Manokasa

Mir händ es ähnlichs Problem gha, aber mit em Chilemusiker selber.
Gspröch mit em Pfarrer alls super und au sehr offe uf eusi Wünsch iigange.
Guet hätt er eus gseit mir sölled doch dem Chilepianist eifach e Liste schicke mit de Lieder wo mir wänd. Das hämmer dänn au gmacht und zrugg isch es mega frechs Mail cho.

Vo wäge es gäbi 1000 Lieder wo besser töned als mini Vorschläg und er seg kei Band. Er hätt dänn no sini SUPER Vorschläg iibracht...Lieder wo ich nöd mal känne vo irgend eme "bekannte" Chilemusiker komponiert (Hani müesse google damit ich überhaupt druff chumm wer das isch )

Ich han ihm dänn recht hässig zruggschriebe, dass er bitte uf eusi Wünsch söll iigah, au wänn ihm das nöd so passi. Und am Schluss han ich no gschriebe, dass ich mich langsam nümme wunderi, warum so viel Lüüt us de CHile ustreted wänn die so müesam und kompliziert tüend... Ok ok das hett ich nöd umbedingt sölle, aber ich han mich SO gnervt...und Nerve lieged langsam au blank....

Also ich würd au nomal mit ihm rede, au säge, dass die Lieder für eu e Bedütig händ, dass es alles persönlicher machi etc.

Wünsch Dir ganz viel Glück!!!

Liebe Gruess
Kat

kat du hesch scho recht.. iverstoh scho wiso so vell lüt us de chele ustrette ond ine frei chelle wechsle. es geht so vell lässigi frei chelle wosi sogar rechtig rockigi musig hend ond dezue cooli englishi lobeslieder senge!klar tradition esch wechtig aber es bezeli mues me au met de zit go... oder em minimom halt offe för kompromess ond neus si!!!!