Guete morge ihr liebe, ich melde mich als VERHÜRATETI FRAU!

Danke a alli wo a eus denkt hend geschter, es isch eifach en unvergessliche Tag gsi, voller Emotione, eifach wunderschön, ihr chönd eu alli riesig druf freue :)

Eusi Trauuig isch sehr emotional gsi, d Standesbeamtin hets würkli sehr schön gmacht, s isch alles guet gange bis sie denn mal gseit het "so, jetz chömemer zum Moment wo alli druf wartet..." und denn het mis Herz afange rase, han min Schatz agluegt und han richtig gspürt wie sich Tränli duredrucket :) mir hend eus ade Hand ghebt, eus agluegt und euses Ja-Wort usgsproche und denn hani nüm chöne, mir hend eus umarmt und es isch eine vode schönste Moment gsi i mim Lebe :)

Es het au luschtigi Moment geh, z.B. womer es Gnusch gah hend bim Ring tusche, plötzli hemmer nüm gwüsst öbs rechts oder links chunt, und alli hends natürli herzig und luschtig gfunde :)

Denn hemmer no es paar Föteli idem wunderschöne Ruum gmacht und sind als verhüratets Paar usem Standesamt usegloffe, ich han riesigi Freud gah a mim farbige Bluemestrüssli und obwohls gregnet het, hend mir das gar nöd mitübercho, s Wetter isch würkli nebesächlich gsi, mir sind so überglücklich gsi, dass das würkli nüm wichtig gsi isch :)

Denn simmer alli zu eus hei und hend en super feine Apéro gnosse, es het soooo viel z'esse gah, Musik und d Stimmig isch eifach locker und fröhlich gsi... alli hends luschtig gah und mir hend jetz d Wohnig volle Bluemestrüss und Pflanze :) wo denn d Eltere und d Gschwüsterti gange sind, simmer no mit eusne super 4 Trauzüge is Mövenpick en Dessert go esse und hend de Abig usklinge lah...

Mir sind denn todmüed und überglücklich is Bett und hend vor Freud gar nöd chöne ischlafe, sind alli Moment nomal duregange, hend glachet, hend eusi Ring nomal bestunt und sind zwar sehr spaat aber überglücklich igschlafe... und hüt morge simmer als glücklichs Ehepäärli verwacht und hend en Schock gah womer is Wohnzimmer gloffe sind und realisiert hend dass mär wohl s ganze Wuchenend müend ufruume

Sonne...Pizzaschnäge no nie ghört!!!
Müesst e erklärig deför ha...

Ohhh Emma das freut mech extrem dassehr en super Tag gha hend!
Das alles so guet klappet hed ond ehr euches Fäscht vom Wätter ned hend loh vermise!

Wow tönt nach ämä perfektä Tag Emma

und wiä isches gsi vorher? bsich fast durädreit?

Gratuliärä eu härzlich und gnüssed s Weekend trotz ufrume au ächli

Danke viel mal, ich strahle wienen Maikäfer

Mona, nei, ich han gar kei Ziit gah zum duredreihe :) han am Morge no d Wohnig putzt, mit mim Schatz alles dekoriert, bin am 11h zum Coiffeur, han denn bi mine Eltere zMittag gesse, di letschte Sache parat gmacht und scho isch denn Ziit gsi zum eus alegge, am 16h sind eusi Spinner vo TZ heicho und mir hends uuuu luschtig gah, hend mega viel blödi Föteli gmacht und es isch sogar d Sunne fürecho und mir echli use chöne go shoote und scho isch 17h gsi und mir sind alli vorem Standesamt gstande, also die Ziit rast :)

Und du, bisch scho ufgregt??? :)

Canoa:

---

Sonne...Pizzaschnäge no nie ghört!!!
Müesst e erklärig deför ha...