Hoi zäme,
Ech mäude mi iez ou no i dem Thread. Es louft jo wörkli fascht nüd me...
Be öis gohts iez no 47 Täg! Ond ech fröie mi so. Aber d To-Do-List werd ergendwie ned chliiner. Aber egal. Ech maches jo gärn. ;)

@ Valey, hoffe händ trotz em schlechte Wetter oi Flittis gnosse.

@ Eve; oh je, hoffe das leit sich wieder... häsch mit dim GG scho gredt und gseit wie dich fühlsch?

@ anyany; sodeli, bi dir wird de Countdown au immer chürzer, bisch immer na die letzt vo ois 2013-Brütlis da im Forum (isch niemed meh däzue cho so wie ich mitbecho ha).

ou eve, das isch doof mit dim gg... meinsch es steckt öppis dehinder?

weisch, ich fühl mi sälber grad irgendwie mega komisch, chas ned beschriibe... geschter hätti eifach chönne hüüle, be aber ned truurig gsii wirklich, aber au ned willi so glücklich be, eifach irgendwie komisch... viellicht isches eifach chli viel wo do uf eim ine chunnt, es sind so viel erwartige ume, es konzentriert sich so viel uf de tag, be mer chond no dezue dassi ned fit be und mi eh ned wohl fühle... viellicht gohts ihm gliich. de polterobe hinder sich, jetzt no e wuche und denn hochziit uswusw... ich hoff das leid sich bald! aber ich chas irgendwie nochvollzieh, ich bi sälber met mine gfühl überforderet

@anyany ouuu schön jo stimmt du hürotisch jo im Oktober, wow denn simmer denn wörkli gli alli 13er Brüütlis dure.

@LucyLu/Sonne: Jo ich ha ehm gseit dass er mir mega schräg inechunt und ich s Gfühl ha es stimmt öpis ned und er het denn nur gmeint ich bildi mir das ii er hegi eifach no mega viel Alk im Bluet. Ich bi glaub eifach chli es Pflänzli im Momänt. Er het mir denn spöter no vom Week-end verzellt und het gseit jo er hegi denn müesse irgendwie Unterschrifte sammle oder so öpis und denn hegi er immer gseit jo ebe er müesi hürote und bruchi do e Unterschrift. Und ich so "was du MUESCH hürote?". Er het denn versuecht zruggzruedere und gfunde jo s sigi ehm sälber ufgfalle nach dem er das 3 Lüüt so gseit het und denn hegi ers nachhär andersch gseit. Aber weisch, das het mi mega troffe. Ich weiss es tönt jetzt dureberoht, chume mir au lächerlich vor wenis do schriebe. Aber ich dänke halt wenn me Alk intus het denn seit me jo eigentli graduse was me dänkt, und wenn er doch im i dem Zuestand seit er müessi hürote denn heissts das für mich scho irgendwie dass offebar öpis ned so wörkli super esch. Wo ich mi Polterobe gha ha beni so happy gsi und ha jedem verzellt woni gseh ha uf de Stross jaaaa ich hürote ich freu mi megaaaaaa. Ich weiss ich weiss, Männer ticke do halt andersch, aber s het mi trotzdem eifach mega möge.

Zuletzt bearbeitet am 09.09.13 13:35

Ach Eve,
Ech dänke ned, dasser das so gmeint het. :)
Aber dänk drah, d Manne hend vöu de grösseri natürlechi Versorgerstress. "Ech hürote, ha e Frou, muess zonere luege, hoffentli schaffi das, hoffentli chani öisi zuekönftige Chend ernähre...etc." Öber so Sache möche sech Manne meh Gedanke aus mer ne zuetroue. ;)

ich verstoh dech guet eve, das würd mi au träffe, au wenn me weiss dass es wohl gar ned so gmeint isch. me interpretiert halt viel, und es isch halt es sehr wichtigs thema, do cha me ned eifach so drüberhinwäg luege... aber weisch, wo en kolleg mi gg gfrogt hed wieso är hürotet hed är au gseid dass är cha säge: "mini frau", und nümm "mini fründin"... findi jetzt au ned grad DIE liebeserklärig schlechthin er heds denn scho no andersch gseid, aber so sind männer (emu mine...) halt - me muess jo cool sii