Vom Schiff heds denn en 10minütige fuessmarsch gäh zum schloss wo trauuig stattgfunde hed. Mi gg und ich sind vorus glaufe. Es isch herrlich gsii und super gäge nervosität ;-) all lüüt wo eus begägnet sind hend eus gratuliert und alles gueti gwünscht, das isch mega härzig gsii!
Im schloss sind mer denn relativ zügig zum trauigsruum gange. Gäscht send denn scho ine gange und mir hend dusse gwartet mit de tz. D standesbeamtin hed eus denn no begrüesst und hed sich no parat gmacht. Euse tz hed den no gfrogt was das am bruutstruss seig. Ich ha ihne denn s bildli vo mim schwiegervater zeigt. Die beide sind sehr greührt gsii und mini tz hed nur no ghüült ;-) denn hed d musig afoh spiele und mir sind ine gange. Es isch mega schön gsii, eifach unbeschriiblich. Nervös bini nümme gsii. D standesbeamtin hed de aagfange, sie heds sehr persönlich und schön gstaltet. Irgendwenn hend mir eus denn zum jo-wort dörfe erhebe. Ich glaub ich has einigermasse dütlich über d lippe brocht. Langsam bini nervös worde, will ech gwüsst ha dassi nochhär mis eheverspräche darf säge. Ich ha de aagfange und mim gg de ring a finger gsteckt und mis eheverspräche gseid. Gäge schluss sind mer de scho tränli cho, aber ich ha mi einigermasse ghalte ;-) (im gägesatz zu minere tz, die hed die ganz ziit ghüült ;-)). denn isch mi gg draa cho, es isch uh härzig gsii! Am schluss hed er denn müesse im chittel nochem spick nosche will er vor ufregig nümme wiiter gwüsst hed. Isch härzig gsii dass au er nervös gsii isch ;-) er hed au süscht die ganz trauuig über mini hand ziemli fescht ghebt. Em ganze raschle und schnüüze aa sind eusi gäscht au ziehmli grüehrt gsii, mini schwöschter hed sogar richtig gschluchzet vor hüüle!!! Denn hend eusi sängerinne nomol gsunge (die eint hed zum aafang grad de iisatz verpasst – mir hends natürli gmerkt ;-)) aber es isch sehr schön gsii! Denn hend mer no underschriebe und schwups, ich trauuig dure gsii! Euse tz hed denn no gseid wies wiiter goht. Die meischte gäscht sind de sim wunsch gfolgt und zügig usem ruum gange, es par hend no schnell gratuliert. Denn sind mer vor s schloss goh fötele, mir hend ned viel ziit gha, aber alli föteli dure brocht. Eusi tz hend sich einisch meh als wohri perle erwiese – sie hend getränk und snacks verteilt (früchte, schoggi usw) und gliichziitig d lüüt zämetrummlet zum fötele. Denn sind mer zrugg zum schiffssteg glaufe, wieder mine maa und ich vorus. Es isch schön gsii noch dere überwältigende trauig eifach schnell chli spaziere und dure schnufe. Und s wätter hed so bombe mitgmacht!!! Denn hed bim see scho euses extraschiff gwartet. Es hend denn all öppis zum aastosse übercho und denn hend mer d schiffsfahrt zrugg zum hotel gnosse zum gratuliere, schwätze usw. mir hend sehr viel komplimänt übercho für eusi trauuig, vieli hend gfunde es seig so wunderschön persönlich, härzlich, bewegend und berüehrend gsii. Zrugg bim hotel sind denn gäscht mi eusne tz scho mol in saal verschwunde und mir sind mitem fotograf goh fötele. Leider hed sich kulisse sit em engagementshooting ziehmli veränderet gha, so dass mer chli hend müesse umdisponiere. Euse fotograf isch super gsii. Ich hasses jo gfötelet z wärde, fühle mich oft wüescht, unfotogen und blöd. Und doch ischs fötele luschtig, entspannt und unkompliziert abglaufe. Mir hends gnosse, e momänt für eus zha, wäg vo de gäscht durezschnufe und s bisher erläbte churz z verarbeite. Leider isch ziit sehr schnell verbii gange, mir sind denn scho chli z spot gsii zum goh ässe. Ich bi aber froh gsii heds öppis zässe gäh, ich ha nämmli vor hunger buchweh gha (ha au chuum öppis gässe gha de ganz tag) und langsam chli gfröschtlet. Wo mer in saal cho sind hend eus denn eusi gäscht empfange, zwe onkel vo mim gg hend no gschwiizerörgelet ;-) und mir hend champagner übercho. Denn hend mer platz gnoh und s ässe isch serviert worde. Eusi gäscht hend sich sehr über deko gfreut, hend viel komplimänt gmacht und d m&m’s sind natürli de renner gsii ;-) näbscht em ässe hend denn eusi gäscht diversi spieli und darbietige vorbereitet gha. Es isch super gsii! Ich ha so freud gha was sie sech extra für eus hend loh iifalle! Das hed mi richtig umghaue! S ässe, d stimmig, alles isch eifach super gsii. Mir hend zwüschedüre au ziit gha chli met de lüüt goh schwätze, das hani sehr gschätzt und gnosse. Noch de torte hend mir denn no es bild überreicht becho – das wo eusi gäscht währed mer gfötelet hend gmacht hend för eus! Ächt bombe!!!!!!!!!!! Meega! Mini tz hed mer denn verzöut, dass sich alli regelrächt uf die pinsel gstürzt heiged, es seig super gsii! Euse ruum isch e wintergarte gsii und eusi gäscht hend no uf terasse use chönne mit lounge, tisch usw. die hends glaub uuhh gmüetlich gha währed eusere abwäseheit, chli gmolet, chli chillet, chli trunke ;-) es isch wirkli toll gsii, eusi gäscht hends so gnosse, hend eus immer wieder gseid wie schön alles seig, und eusi tz hend au gfunde mer heiged super gäscht, und gäscht hend vo de tz gschwärmt usw, es hed eifach alles passt!!!

ech ha mer nie chönne vorstelle dass das so schön wird, dass das erläbte so tüüf goht, dass mich dä tag so dermasse us de socke haut… unbeschriiblich!
Churz vor de 2 sind denn vieli hei gange, sie hend jo no alli en mindeschtens 45minütigi fahrt vor sich gha. Mir hend de de saal gruumt und sind mitem räscht no id bar. Det hend mer nochli wiitertrunke und de obe loh usklinge. Es isch eifach nur gmüetlich und schön gsii – mir hends eifach nur gnosse. Am halbi 4i hed sich denn die ganz gruppe ufglöst. Vieli hend det gschlofe und mir sind gmeinsam is hotel zrugg. Ich bi irgendwie froh gsii dassi usem chleid chume, de tag isch scho lang gsii ;-) mir sind denn no goh düschele und aaschliessend total erschlage vo all dene erläbnis und iidrück, aber überglücklich ufem bett gläge. Ich ha de gar ned richtig chönne schlofe, und am siebni bini wieder hell wach gsii. Ich bi denn is bad und ha mi parat gmacht, nochher hani chli ufgruumt und denn sind mine schatz und ich uf de balkon goh es käfeli trinke. Aaschliessend hend mer eusi kleider iipackt und is auto brocht und au grad deko iiglade. Ich ha allne gäscht gseid sie dörfed alles vo de deko hei näh wenns wend und ich ha de freud gha dass doch s eint und ander gfählt hed ;-) aaschliessend sind mer goh zmorge ässe, mir hend denn nomol mit allne gäscht wo det übernachtet hend nochli chönne zäme sitze. Irgendwenn sind denn no eusi tz mit partner und mir det gsii. mir sind denn eifach nochli zäme ghöcklet und hend de tag nomol chli revuepassiert, und irgendwenn sind mer de hei gfahre. Deheim hend eus tz no ghulfe alli sache und gschänk id wohnig träge. Mir hend de chli ufgruumt und aaschliessend d chärtli nomol gläse usw. ich bi total ko gsii vor luuter ned schlofe und die viele liebe glückwünsch hend mi grad no einisch meh grüehrt.
Mir isch klar dass mir kei „normali“ hochziit gfiirt hend. Aber für eus heds zu 100% gstumme und im nochhinein bini trotz allne blöde komentär usw glücklich drüber, dass mir eus vo eusem wäg ned hend loh abbringe.
Dä tag isch viel schöner gsii als ich mir je hätti chönne vorstelle und ich hoffe fescht, dass ich die erinnerige draa ganz fescht cha i mim härz und mim hirn feschthalte.

wow onne, sone tolle bricht!! (i liebe abgöttisch euchi bricht zlese ;)! danke vellmol! ;) i liebes so detailiert ond lang, as wördi en liebesroman lese mega schön sonne!!!! ;)

ou nei eve, sone scheiss passiert doch eifach emmernor a serige täg womes noll cha bruche.. ge me het halt eifach ke nerve ond do bruchts so wenig zom eim ofd palme zbringe :/

aber eve gell de wetterbricht gseht so us as wörds troche blibe!

Sooooo schön sonne, viele herzliche Dank für din Bricht, ich lieb die z'lese, muess jedesmal schmunzle, so herzig gschriebe und irgendwie erkennt mär sich immer bitz i allne :)

danke euch, jo es närvt mi eifach mega und ich weiss was das jetzt für ne Ratteschwanz wird uslöse, maaaaaaaaaaaaan hei ächt eifach ned 2 Täg vor eusere Hochzyyt no so Kack.

Apropos, Elea findi au komisch wäge dene Öpfel, die het doch ned richtig gluegt die gehts doch s ganze Johr i grössere Läde??

So ich mues jetzt öpis go ässe sust chunt zu mim Frust no Hungerrast dezue denn chunts gar ned guet *g*

ja gell, d eve ond i hettes verdient, einersits weg de büroproblem ond wegem chrank si wenns jez wörd regne am samschtig wers nomeno gemein