Das isch würkli en Seich elea, aber glaub märs, es gaht verbi... :)

Mir het is-chalts Wasser mit Zitronesaft drin seeeehr ghulfe, zwüschetine immer wieder öpis chlises esse und Mandle chaue, vilicht nützts bi dir au?

Und no s Buech woni der han wele empfehle, s heisst "Alles über meine Schwangerschaft - Tag für Tag" von Dr. Maggie Blott, isch zwar ä riesigs Buech aber mega interessant, eifach gschriebe und erchlärt jede Tag was mitem eigene Körper passiert und mitem Baby, gitt au zwüschetine Tipps zu verschiedene Wehwehli wo idem Ziitpunkt chönd vorcho etc.

ui elea, fühl mi grad zrugg versetzt... mir isch au es par wuche lang 24h pro tag schlächt gsii... s isch für ne guete zwäck aber es hed rächt aaghänkt! schön isch aber - wenns denn verbii isch, denn gniessisch es richtig! ha mol mim maa am obe voller freud und stolz verzellt dass mir de ganz tag ned schlächt gsii isch und denn luegt er mich aa und seid: du bisch luschtig, isch jo langsam ziit dass das verbii isch! für ihn isch es au ned liecht gsii - er hed sich so sorge gmacht wills mer nie guet gange isch und ich überhaupt ned ha möge ässe (ha mi aber immer zwunge dezue, ha glaub zum teil tagelang nur darvida gässe...) aber das vergissisch schnell wieder elea!

woni noch de 12. woche mine chef informiert ha und mir denn nochher mol zäme gred hend hed är mich denn gfrogt wies mer eigentlich so goht. ich ha ihm de gseid dass es mir währed de letschte par wuche täglich vo morge bis obe und i de nacht eifach nur schlächt gsii isch, dass es aber langsam wieder besser isch. de luegt dä mich ganz erstuunt aa und seid: ächt? ech hätt nie öppis gmerkt dass es der ned guet goht. Tja, mir sind ebe MASCHIENE be froh gsii dass es be mir im rahme gsii isch mit erbräche und es hätt jo no viel schlimmer chönne sii! gwüssi fraue liided jo horrormässig...

Sonne, verstahn di uu guet.. isch mir ähnlich gange, aber leider mit Erbreche fast all 2 Täg und sogar im Büro, bin amigs ufd Toilette grennt und han mi übergeh und wie wenn nüd gsi wär zrugg an Arbetsplatz und das sicher en Monet lang, wonis denn offiziell gseit han, hend au alli gfunde sie heget ja gar nüd gmerkt, bis uf öper, wo mal blöderwiis ide andere WC-Kabine gsi isch und mich ghört het, aber janu.. isch au verbi und vergesse :)

Nei würkli? Hesch s gliche Buech? So luschtig, ich dörf jede Zischtig di neu Wuche nahlese, hüt isches wieder sowiit.. 28. SSW

Als Alternative zu Zwieback gitts no Darvida, Riiswaffle und Goldfischli ihihi das sini mini Helfer gsi

Würkli elea? So cool, denn chömer eus immer zäme uf de Wechsel am Zischtig freue hesch au en Newsletter abonniert? Ich find de vo swissmom super, chunsch jedi Wuche neui Infos über was grad so aktuell isch.. finds halt eifach sooo spannend :)

Hey elea

Ha churz i eue Thread inegluegt und dänkt, ich gibe mal vo minere Übelkeitserfahrig (völlig anderi Gründ, leider) chli mit.

Anschinend hilft Ingwer. Mir isch amel so schlächt, dass das wohl au nüt meh nützt. Aber ev chasches mal usprobiere. Zum Bispil chli hacke und mit heissem Wasser ufgüsse.

Chalti Sache vertreit mer besser, wänn's eim schlächt isch, als warmi.

Herdöpfel funktioniert bi mir zimli guet. Herdöpfelstock, Herdöpfelgratin, Salzhördöpfel, Brathördöpfel... Gits amel in allne Variatione - und lampet mim Maa glaub zimli zu de Ohre us.

Ovomaltine oder Jemalt (das hät no alli Vitamin und Spureelemänt drin, wo mer brucht) fueret rächt, isch sehr kalorieriich. Mini Physiotherapeutin hät gseit, sie halti sich amel mit dem über Wasser, wänn's ihre schlächt isch. Allerdings hett ich glaub rächt Müeh grad mit Ovi und so vil Milch. Aber bi ihre funktionierts.

Bier isch übrigens ja au sehr kalorieriich. Ich nime mal a, das giltet au für s alkoholfreie? (Wobi sogar s alkoholfreie ganz biz Alk hät... Isch drum vilich glich safer, das nöd uszprobiere i de Schwangerschaft.)

Suppe isch amel au no guet. Wänn's der sehr schlächt isch, vilich eher eifach Bouillon... Mit Gries drin, je nachdem.

Ah und die guet alt Banane mit Joghurt.

Und ja, das Darvida/Blevita-Zügs hilft mir amel au, demiti wenigschtens es bizli öpis han. S git au Blevita mit so Schoggi obe druf. Dänn hetsch no chli Kalorie.

Sorry für de unbättni Ratschlag. Aber ha dänkt, so isch mini Übelkeit vilicht wenigstens no für öpis guet, falls de eint oder ander Tipp für dich in Frag chunt. Und suscht bini au nöd beleidiget. *gg*

Liebi Grüess vonere 14ner-Bruut
Fara

jo genau Emma, freue mer eus zeme ofe zischtig :)
ou de Newsletter tönt au no guet. hani nonie ghört! super wini vo euch cha lehre :)

haha sonne, sends met dinere leseposition ned iverstande? ;)
i freu mi scho weni imene monet "öbere berg" be, bes denn getroui mi nemli au noni föteli zmache oder so

ou jo es babytreffe, denke das wird nöm lang go, bes de alli es bebe oder wenigstens en decke buch hend :)
hett jo mega gern dis zwillings-chugeli gseh sonne :)