@danid. was....??? wie chont die do druf? meine si kennt dech jo demfall au ned guet, wenn du si ned rechtig kennsch.... huere schregi Situation, ned?????

hallo himbeer, ui jo das met de gschwollne füess vom flüge kenni. das esch so unagnehm wend nachem flog chum me ed schueh die chonsch i ha scho lang Emmer so stützstrümpg a zom flüge. es helft mega, au wend d füess nachetene so grusig stenke wege dem sintetik Stoff

eve, gleb da metem buch foht a so bald me seit me hürotet. ond de hörts nöme uf bes me wörkli schwanger esch. i froge mi de amigs ob d lüt echt meine dass me das ned merkt wenn si Emmer so abe luege... denke de Emmer, me verzellts jo denn scho wenn me bereit dezue esch, ond bes denn eschs das buch-gafe eifahc nor frech!


jo i hami de ganz morge aso ufgregt ab sinere ussag... de wetz esch jo, er het Emmer 100% gschaffet ond sini frau esch dehai gsi. eigentli hetti zo ehm sele sege "DU besch karrieregeil"
jo mer het das eifach so gnervt, welli ehn ned om sini meinig bette ha. ond vorallem au d ussag "die chend wo id chreppe gönd hend nachetene gschädigte Charakter" äh bitte... i be as chend id chreppe ond bes jez hani mi Emmer as recht normal empfunde. aber es geht lüt di studiere ke milimeter wiit. das macht mi so rasend, Emmer das dri gschnoor. i denke Emmer, sell doch jede so mache wis för ehn stemmt. wenn öper voll wett dehai si denne sch das super, ond wenn di ander voll wet go schaffe den esch das genau so toll! jede winers för rechtig haltet. Emmer das cheibe verurteile! genau snet, wie met dim schlock wii. es esch DIN körper ond wenn das för de stemmt denn het do niemert anderst ergendöpis dri zrede fendi! das esch s gliche wie wenn me eim eifach seit "dis tshirt esch jo ober grusig" das macht me jo au ned. aber i mine auge esch das genau s gliche....
phu, dud guet fruscht abloh....

mini eltere sind eigentlich recht diskret. mis mami hät scho zweimal i so doofe situatione gfrögt "bisch schwanger?", da hani mi au ufgregt... ich mein, mir sind go esse und ich ha wii trunke und irgendwie gseit mir seg schwindlig oder was und denn isch die frag cho... ja genau, jetz wos seisch, ich bi schwanger... so doof. als würdis ihre nöd säge wenns sowiit wär. und min cousin frögt au jedes mal wenn er mich gseht und hät letztens ernsthaft gfrögt öbs denn nöd klappi bi eus. da bini au grad rasch mal usgflippt.

i fende generell, wenn me öper ned kennt de sprecht me au ned persönlechs züg a. i miech das emo ned!!!
i denke wenn si weiss dass ehr dra send, werds secher besser met störme. es wer emo zhoffe.... i hoffe i denke de i 30johr a da wie das gsi esch, ond mache mim chend nie so drock met dere doofe störmerei

ui nei himbi, so taktlos vo dim Cousin.... i weiss eifach ned was d lüt studiere.... das esch doch öper vom privatischte wos geht, aber jede meint er chön do froge as wers nüt... verstohni voll dass usgflippet besch!

Guete Morge Zäme

Jo s geht ächt Lüüt wo eifach näbe de Spur sind. Wobi ich amigs für mich au wieder mues relativiere und mir säge, ned jede machts mit Absicht zum eim eis inewürge (geht's leider au!), viel studiere eifach ned eso wyyt wie z.B. allwäg din Cousin Himbi oder ebe sind sich ned bewusst dass es mega verletzend cha sii. Ich finde me söt denn eifach säge was me vo so Ussage haltet und denn merkt s Gägeüber denn jo au dass es jetzt ächt näb de Schueh gsi esch, aber zu fest goldwöögele döf me glaub au ned sust regt me sich jo nur no uf de ganz Tag. S empfindet jo au ned jede die gliche Froge als zu intim etc.

Letschthin esch mir z.B. grad i Sinn cho dass ich au mol öper öpis mega intims gfrogt ha und mir das i dem Momänt aber¨überhaupt ned bewusst gsi esch. Ich bi dete 22gi gsi und anere Hochzyyt iglade, denn hämmers det i de Rundi bi eus am Tisch vo Chind gha etc. und ich ha eifach so im Gspröch usem Smalltalk use die einti gfrogt öb sie denn au mol Chinder möchte. Im Nochhinein hani denn erfahre dass die's vieli Johr vergäblich probiert händ, mini Frog het die Frau sicher mega troffe aber sie het nüt gseit gha und mir eschs im Nachhinein niene rächt gsi, ha wörkli nüt gstudiert gha und wär ned uf d Idee cho dass das öpis Schlimms chönt sii, d Frog esch mir eifach so usegrütscht . Dorom sägi, amigs meines d Lüüt wörkli ned bös sondern sind eifach zu unerfahre, naiv etc. und löhnd dorom so Stuss use. Sit dem Erläbnis halt ich mi uf jede Fall immer seeehr zrugg bi so Züüg !

Was d Ussag vo dem ältere Herr betrifft bi dir Elea, kei Ahnig was dä gritte hät, eifach null nochedänkt und allwäg rächthaberisch veralagt so dass er s Gfühl het nur sini Art esch richtig, cha mirs ned andersch erkläre .