Guete Morge Zäme

Ich hoffe s goht euch allne guet. Elea hoffe di Maa esch wieder deheime und dass es ab jetzt wieder weniger sträng wird.

@Lilly: au do nomol vo Härze alles alles Gueti zu euchere Chline, so schön dass bis jetzt alles guet klappt !

@Sonne: jööö wow so cool ersti Schrittli, das findi immer so e berüehrende Momänt, irgendwie wärde sie ab denn wenn sie laufe so richtigi Chlichinder, Babyzyyt esch denn wörkli ume dunkts mi .

Ich ha rächt e strubi Zyyt hinter mir, ha mitti Oktober e Lungeentzündig becho und bi wäge dem no im Spital glandet 5 Täg. Die erste 10 Täg lang het mir niemert glaubt dasi e Lungeentzündig ha obwohl ich vo Afang ah gseit ha ich hegi das Gfühl, s händ mi X Ärzt im Notfall etc. gseh und händs alli abto als Bronchitis wo halt krasser esch will ich schwanger bi. Nachdem ich denn komplett am Ändi gsi bi körperlich und psychisch und wäge emene Spezialultraschall binere Spezialistin im Spital gsi bi het die grad gmerkt dass gar ned guet esch und mi ganz genau untersuecht und het mi denn grad stationär igwiese. S esch ächt mega schlimm gsi, ha müesse deftigi Antibiotika nä und röntge und eifach alles was me ned söt mache als Schwangeri aber ha kei Wahl gha . Durch dä sehr starki Hueste woni durch das Ganze wuchelang gha ha het sich agfange de Muetermund verchürze, do muesi jetzt eifach überwache und hoffe dass er ned no wiiter zrugg goht, bi jo erst i de 27. Wuche . Aso uf jede Fall schaffi jetzt sit letschter Wuche wieder eifach 50% und luege jetzt mol wie's wiiter goht.

Im Baby gohts aber sowit ich das cha beurteile guet, schlüsse mi übrigens so wie's usgseht im Meitli-Club ah, mi Maa und ich freue eus riesig !

Ohje eve :-( das tönt ja gar nöd luschtig :-/ aber hauptsach euem baby und natürli au dier gahts guet!! Und das jetzt hoffentlich ruhe häsch bis nach dä geburt und kei so untersüech meh über dich ergah lah muesch... + au nüm so starchi medis muesch näh! Aber gäll, amig gahts leider eifach nöd anderscht :-/
Gits bi eu dämfall es meitli?? :-) soo herzig! Gratuliere! Wenn häsch scho wieder din ET termin? ;)

Ich bin am fritig scho s erscht mal allei gsi (min ma hät ane event müesse) und dä tag is h so richtig durzoge gsi hihi aber isch gange... bruch amigs eifach eeewigs bis mer mal all parat sind :p drum wirdi in zuekunft sicher am morge amigs dihei si und alles erledige und nachem mittagsschlöfli dänn use :)

Hallo zäme

Ojee Eve das tönt würkli nachere ganz ganz schlimmi und astrengendi Ziit bin aber froh zläse dases dir mittlerwile wieder guet gaht und eues Meitli guet wachst, so schön!

Elea ou au bi dir tönts astrengend, und s machts alles schwieriger wenn din Ma no so liidet! Jöö eue Chlii het grad chli de Vollmond gspürt? Wie gahts inzwüsche?

Mir sind vome verlängerte Weekend in London zruggcho, isch alles super gange, de Chlii het sooooo guet mitgmacht, mir sind richtig richtig stolz uf ihn und s isch so schön das mär glich bitz chönd öpis unterneh und nöd uf eusi gliebte Städtereise müend verzichte er isch natürli vodene viele Autos und grosse Büs total fasziniert gsi und au bi eus sind di eestw Schrittli gmacht worde sooo herzig! S het am Flughafe in Züri agfange das er plötzli ade Hand het wele umespatziere und irgendwenn het er au selber di erste Schrittli gwagt

Und letzti News: ich han en Job!!! Starte im Januar miteme 50% Job im Marketing, mir hend zum Glück e tolli Lösig gfunde mite Betreuuig (1 Tag mini Eltere, 1 Tag d Schwiegereltere und en halbe Tag de Papi) euse Chlii isch ganz sicher guet ufghobe aber ich bin nur scho am Gedanke nach 16 Mönet min Sohn "zverlah" sooo trurig ich hoffe ich schaff das wie ihr das alli super machet.. zum Glück hemmer no bitzli Ziit

Hallo zäme

Mir müend eus eusi Tochter schwer verdiene, ich ligge sit hüt znacht uf de Neonatalogie wili Wehe übercho ha . Bi erst i de 28. SSW und ha jetzt Wehehemmer becho und wirde überwacht. Sie händ mir jetzt Lungeryffi gsprützt als Vorsichtsmassnahm.

Bi grad rel. fertig mit de Närve ich wet uf kei Fall dass sie scho so früeh chunt sie esch doch no so chli ! Drücked eus d Dume dass es sich wieder beruhigt.

Ou nei eve :-/ das tuet mer leid! Drucke ganz fescht t dumme dass die chli no bitz im mami sim buch chan bliebe... aber t ärzt bechömet das sicher guet in griff! Toitoitoi... bin mit dä gedanke bi eu! Ganz en liebe gruess

Guten Morgen

@eve: Tut mir Leid solche Nachrichten zu lesen. Geht es dir besser und haben die Wehen aufgehört? Eine Bekannte (ET Dez) hatte das Gleiche und dann ein Pessar gelegt, Wehenhemmer und Lungenreife bekommen. Und der kleine Mann ist immer noch in ihrem Bauch und das so kurz vor ET. Ich drücke euch die Daumen und denke an dich.

@elea: Jaja, die lieben Zähne... Bei M. gehen sie nicht so schlecht vorüber (Klopf auf Holz). Gutes Durchhalten deinem Kleinen!