hallo ihr alli!

ich meld mi jetz au mal no ah als bruut für de september 2013 :-)

mir händ scho relativ viel vorbereitet und provisorisch reserviert, aber eusi familie wüsseds nonig und drum isch s datum au nonig fix.

wie händ ihr das gmacht, da in züri cha mer maximal es halbs jahr vorher de standesamtlich termin reserviere, und mir hürated ebe standesamtlich amene samstig (isch uf jede fall de plan) und am abig gits es fest. da mir scho location etc. provisorisch reserviert händ, bini halt denn au druf agwiese dasses klappt mit dem trauuigsdatum... oder händ ihr alles erst fix buecht und plant woner de termin im standesamt bestätigt gha händ?

mini kollegin wo 2010 ghürate hät wotti nöd fröge, es isch ja nonig offiziell :-)

min nickname isch eifach... ich lieb himbeeri :-)

Hallo Himbeer

Au dir es herzlich Willkomme i oisere Rundi.

Zu Dinere Frag, da chani dir leider nid würklich Helfe. Da im Unterland chamer es Jahr vorher reserviere, drum hani das Prolem nöd. Aber ich denke wenn du genau es Halbjahr vorher tuesch de Termin reserviere klappt das sicher. Ich wür glaub Location etc erst fix mache wenn de Termin vom Standesamt häsch chönne reserviere. Oder wie wärs sust mitere allternative mitere freie Trauig?

Grüessli

Guete Morge zämmä!

@LadyWolverine
Ehrlich chasch mir ä PN mache mit dinerä Idee oder em Bildli? Ig ha mol eifach ganz schlichti Schmetterling gseh wo mäh so ad Wyigläser cha stecke und dr Name druf schriebä... ABer um Idee bi ig immer Dankbar..

Ring: Mir wüsse noni genau wieviel si dörfe choschte:-) E sisch eifach so, eigentlich hätt ig gärn Ring mitemenä Brilliantchranz aber denn ischs Männermodel zu schlicht und mir hei bi 123gold gseh wo in Mokume Gane Desing gmacht si.. Mi Schatz stoht uf so Damststahl sache... So wie ig sä brechnet ha cheme si öbbe uf 2500-3000 je nachdem... Aber entscheide die mir glaub erst im Winter.. Ig find das sehr günstig.. Mi schwöschter isch am Samstig dört gsi, sie hei sich für Wissgoldring mit RoseGold entschiede.. und sie het no 5 Brilliante.. Zahle glaub 2200.- für bedi zämmä (sie finde das tüür...guet si trage halt nie echte Schmuck)

@himbeer Also ig ha mi Termin scho fest chönne reservierä für am 27. Juni 2013 am halbi sechsi zobe.. ig find das vo denä zvilstandsämter hcli ä zuemuetig, wenn mäh erst 6 Mönet vor dr Trauuig cha reservierä...

Mir hend üsi Ring au us 123gold. Sie sind zwar no in Bearbeitig, aber bstellt sinds. Sie chosted üs au ca. 2200.-, was ich rächt ok find, will mir sie individuell hend chönne zämestelle. Üsie Ring sind zwar nöd sehr ähnlich, defür hemmer beid eine wo üs sehr guet gfallt. Am beste mal im Internet chli umepröble, dett chan mer mit de meiste Ring scho sehr viel bearbeite grad im Internet und wän me bitz e Vorstellig hät dett verbigah. DVerchäuferi wo mir gha hend hät sich sehr viel Ziit gno für üs. Mir sind eimal 2h dett gsi und dän nomal einisch 1h. hend etz sogar no "Probering" in Silber becho, demit mir mal chönd dGrössi usprobiere, öb die würkli au guet isch. Also (wott ja kei Wärbig mache aber...) ich bi mega zfriede mit de Ring. Mir hetted suscht kei Ring gfunde, wo mir beidi schön gfunde hetted!

Ich bin au en absolute Schmätterlingfan (Drum au de Nickname ) aber ich weiss nöd öbs zu de Hochziit passt.. Also ja zu mir scho Aber nöd so zu mim Schatz Ich glaub da müemmer beidi chli Kompromiss igah...

Hend ihr alli "Save the Date" Chärtli gmacht? Ich bin mer chli unsicher, die wichtigste känned üses Datum ja scho (Trauzüge, Familie und so...)

Härzlech Willkomme a aui Nöiie!

@LadyWolverine: I hätti Ringe us Elfenmetall no schön gfunde, wüus eifach speziell isch u se so nie es zwöits mau wird gäh... Aber wo mi GG dr Priis het gseh, hets ihm fasch eis gäh. Wärde bi üs wou Ringe bis max 2'000.- bis 3'000.- gäh. Zumau mine sine, nume ane het, wenn mr zämö wäg ghö.

@schmetterling & butterfliege: Wie si Dini Erfahrig mit 123gold? Gseh gäng öbe Wärbig, muess mau ga luege.

@all: Was heit Dir am Wucheändi vor, zWätter wot ja mau wieder nit so dr Hammer...

nicht registriert

@Nathi: Wir werden die Trauung im März in Rheineck haben. Das mit Rorschach weiss ich von der geplatzten Hohzeit
Wo feiert ihr? Habt ihr die Location schon?