So, ich chume au wieder emal zum schriebe... Hei ihr sind au immer so schnäll!! Muess mer glaub au en Job am PC sueche dassi da chan mithalte

Han hüt mal afange Hochziitschärtli-Prototyp bastle... Min schatz hät doch tatsächlich igwilliged sMotto vom Schmätterling für dHochziit zbenutze... Juppi Defür nememer sini Lieblingsfarb blau... mir hetti rot am beste gfalle, aber mit blau chani au ganz guet läbe...

Bin scho ganz fliessig am Hochziitschleider aluege im Internet und s gid da natürlich scho favorite... Aber ja, zerst mal chli go aprobiere, vilicht stönd mir die ja gar nöd...
Es isch natürlich scho sehr verlockend zum irgendwo es günstigs zbstelle im Dütsche... Jedes mal wäni ufs Facebook gang landi irgendwie dän uf de Werbig vo JJsHouse, aber ja schlussändlich weisch dän nie wasd würkli bechunsch... Aber ja de Priiiiis... De isch halt scho seeeehr viel weniger!!! Und schöni chleider häts ja au... Es isch halt eifach chli verdächtig günstig!!!

Wäg em verzelle... Also ich cha nie lang ufs Muul hocke
Womer vode Ferie zrugg cho sind, i dene er mir de Atrag gmacht hät, hemmer grad beid Eltere zum Znacht iglade underem Vorwand Föteli zzeige und dän verzellt... Mis Mami häts natürlich scho g'ahnt gha...

Hend üsi Traumlocation gfunde gha fürs Znachtässe... Etz hät sich usegstellt dass de doch tatsächlich die Lounge verchauft Schiesst mi schön ah... s'wär so perfekt gsi!!!! Jetzt suechemer wiiter nachere Location.. Möchted nöd ines Resti sondern irgendwo öppis für üs ganz alleige ha, wo mir chönted es Catering cho lah, aber das isch eifach schwierig da in Züri umenand... Mal luege was sich ergid...

Also wünsch üch no es schöns Weekend!

Liebi Grüess Butterfliege

@ butterfliege..
ach je, das isch ärgerlich.. cha di nur allzu guet verstah, geit üs ja ähnlech
mir finde scho no öppis, z problem isch nur, dass itz das "perfekte" usem chopf muess, damit me sech überhaupt uf öppis anders cha isteue. geits dir o so?

butterfliege, i bi genauso! mega schnäu füür und flamme für öppis wo mir gfallt.. und ha denn äbe müeh zum um-schalte und bi mega enttüscht..
bi üs isches ganz ähnlech gsi, die person wo üs alles zeigt het, het zwar gseit, dass z schloss zum verchouf stöngi, aber er dänki, dass die wo itz druffe si, no es jahr ahänke und het date und alles ufgnoh.
denn nach paarne mail-wechsel het mir di aktuelli chefin gseit, si wett no gar keni abmachige und offerte etc. gäh wüus äbä e pächterwechsel gäb. und das wird endi jahr stattfinde, also weissi nid, öb mir das risiko würklech söue uf üs näh..
tja.. liebi butterfliege, löh mir dr chopf nid la hange, tüe umdänke und finde denn villecht öppis wo no viel besser geeignet isch

malu, ja das isch bi üs gnauso... ändi jahr wüsseds dän wärs übernimmt und dänn chönt me evtl. mit ihne luege, aber das isch eifach zspaat für mich!!! ich möcht doch etz scho alles ha :D

daninici10, ja sgid vieles aber da umenand hani bis etz nüt gfunde... entweder sinds restaurant mit sääl oder dänn ischs irgendwo so wiit wäg dasses fürd gäst ziemli müehsam wär... oder dänn nöd bezahlbar... mir wüssted ebe en guete catering für de znacht, aber ebe, ohni lokal defür bringt üs das nöd viel

@ MaLu
Ha grad gläse dases mitem Schloss salavaux äue nid klappet
ig finde z`Hotel Murtenhof& Krone ouno sehr schön (het ä super ussicht ufe See) oder lueg doch nau no Bad Muntelier a.

Grüessli
sara

nicht registriert

@butterfliege: lueg mal uf raumsuche.ch
Vielicht wirsch döt fündig

Oder wo-heiraten.ch