das isch sicher e gueti idee nala! mündlich langed de aperogäst sicher, und ebe wenn sie denn na 4-6 mönet vorher e iladig überchömed, chönd sie sich das sicher iirichte. en aperogast wird jetz au nöd unbedingt sini ferie verschiebe für e hochzit, als gladene gast machsch das ja no eher ;-)

Ich möcht gärn nomol das Thema kurz ufgriffe.

In de nächste Wuche würde mir gärn unseri Save the Date-Karte verschicke (wenn mr se denn ändlich erstellt hän...). Jetzt hän mr uns gfrogt, ob mr diä allne Gäste, also au dene wo denn nur am Apéro iglade sind, solle schicke, oder nur dene wo ans Ässe iglade sind.

Am Esse sin mr nur öbe 20 Lüt, am Apéro wärdes ungefähr 60 si.

Ha denn dänkt, wiäs scho mol beschriebe worde isch, dass diä Gäst wo denn nur am Apéro iglade sin viellicht enttüscht sind, wenn si denn bi dr Iladig sehn (diä wärde mr früehstens 6 Mönet vorher verschicke), dass si nit zum Ässe iglade sin. Anderersits wärs doch guet, wenns au diä rächtzitig wüsse wäg em Datum, nit dass plötzlch niämer me Zit het.

Wiä hän dihr das so gmacht bzw. wiä sind euri Erfahrige?

Liebs Grüessli

Hallo Infinity86

Mir händ StD Chartene kah aber nur gladni Gäst, also kei separati Apéro Gäst.

Ich persönlich würs jetzt nur de gladne Gäst gäh, will ich muss ehrlich sih, wenn ich ä StD Charte wür becho würi scho denke ich seg am ganze fest ihglade und wür mir de ganz Tag reserviere. Und wenn denn nur ä Ihladig zum Apéro chunnt (das "nur" bitte nöd falsch verstah, au ä Ihladig zum Apéro isch schön und nöd nur) wäri echt entüscht. Ich denke für en Apéro chamer sich schnell mal ächli Ziit ihrichte und wenn ihr es halbs Jahr vorher die Ihladige veschicket söt das sicherlich keis Problem sih. En Apéro gaht ja meisten mit de Trauuig zäme max 3h.

Ich ha ebä ä Kollegin wo mal ä StD becho hät und sich de ganz Tag frei bhalte hät und den isch "nur" d'Ihladig zum Apéro cho und denn hät sie denkt sie heg die falsch Charte becho und bim Bruutpaar nahgfröget, ächli ä peinlichi Situation gsi... Oder evtl. erwähnet ihr scho bi de StD das es zum Apéro oder zum ganze Fest isch.

Grüessli

Hoi ihr Liebe

Ihr wärdets nit glaube, aber i bi nonig witer cho mit de Karte.

Jetzt hani mol mit de erste Gstaltigsvrsüech agfange. Bzgl. im Text hani mi jo eigentlich drfür entschiede, dassi bi de Apérogäst hinde druf schrieb "Einladung zum Apéro folgt" und bi de gladenen Gäst schriebi "Einladung zur Feier folgt" (vo dr Trauuig muessi jo glaub nüt schriebe, isch jo logisch, dass dört jede cha cho oder? Stoht jo denn au in dr Iladigskarte). Wiä findet ihr das? Händ ihr viellicht no e besseri Idee wiä mes chönt schriebe?

Liebs Grüesssli

Infinity: i find das e gueti idee mit "einladung zu ... Folgt" so ischs suchr klar, abr i würd idr iladig den scho schriebe das alli zur trauuig ko könne. Bi uns hän lüt die wuche no gfrogt, obwohl das stoht wir laden wuch zur trauung und anschliessendem apero ein, und das obwohls nur no 2wuche goht
Vilicht au no as tipp, evtl hilfts nid nur save the date z schriebe sondern au no öbis uf dütsch.. S vrstöhns halt nid ganz alli immr und so meint niemert das das scho d iladig isch ;)

Infinity: jo genau, bi dr iladig würdis den schribe. Bim safe the date nonig :)
Joo das wär no öbis, s kömme alli erst uf dr apero und ihr händ e trauuig for two