Hallo zäme!

Eg be nöi do (ha aber scho en anderi Frog zom Thema Osland-Hochzit postet) ond hät en Frog a öich:
Eg be met mim Frönd am Samstig em Brutmodelade gsi, wöu mer mau chli hend wöue luege was es so get. Mer hei no nüt wöue gross probiere drom si mer ou ohni Termin gange.
De hani (wie chönts ou andersch si) bzw. mi Frönd es super schöns Chleid gse woni de ou ha chöne probiere. Es wörd mer fast wie agosse passe. Kouft hani noni, wöui jo niemer derbi gha ha wo mer no en zwöiti Meinig hät chöne gä (dr Frönd esch id Herreabteilig verbannt worde).
Das Chleid esch no es Einzelstöck, me chas nöm bstöue ond es esch ou s'Ustöuigsmodäu. Originalpris wär 2196 Franke. Si wörde mers reinige ond 500 Franke belliger gä. Fendet der dä Rabatt en Ornig oder söui no me handle? Ha nor gse, dass anderi Brutmodeläde bes zo 70% Rabatt of 2008-Kollektion gäbe.
Wär froh om öichi Meinige, es het jo einigi wo scho Brutchleid-chouf-Erfahrige händ
För morn hani en Termin gmacht, de chöme no mini besti Kollegin ond mini Mueter met. Ond eg werde secher no anderi Chleider probiere zom vergliche. Me cha jo ned grad s'erste choufe wo me agha het, oder?

Merci vömou!

nicht registriert

Hoi Piglet

Also ich find das mit em reinige und dä 500 Franke entgege cho es super Agebot. Das mit dene 70% ha ich als Lockvogelagebot empfunde. In dem Gschäft wo ich gsi bin, häts genau 2 Kleider für 70% gha, denn viellicht no 2-3 für 30%. Die meiste Kleider, wie au das, wo ich kauft ha, händs eifach 10% günstiger gäh.

Aber vergliche würd ich so oder so no. Plötzlich gfallt dir es anders Kleid no viel besser.

Viel Spass!

Lg

Manuela

Mir trauet üs am 29.05.09 & 06.06.09

Hallo!

Danke för öichi Antworte. Eg be gester nomau dört gsi ond ha no öppe 7 anderi Chleider probiert. Es esch aber bem auererste Chleid blebe! Mini Mueter ond mini Trouzügin ond ou d'Verchöiferin sind begeisteret gsi vo däm Chleid. Jetzt hanis scho kouft, obwous no es Johr got bes zom Hochzit. Eigentli schad, jetzt esch Brutchleider-ussueche scho verbi Muess erst i 9 Mönet go abstecke. Bes denn chani aber mis Chleid jederzit "go bsueche".
Grüessli

Hoi Meitli

Jo das fendi wörkli ou en guete Service met em ufbewahre ond em go bsueche! Be ou söscht rächt zfrede met däm Lade. Priskas Hochzeitsmode in Aarau. Be gester zwar vo der Lehrtochter bedient worde, aber si het das ganz guet gmacht.
E werde äuä scho gli weder mis Chleid go bsueche, bruche no es Föteli vo mer wäge Struss ond Hoor ond so. Das darf me am schin a erst mache wemes definitiv wott choufe.
Osser em Reifrock för onders Chleid hani no nüt kouft. Das het jo jetzt no lang Zit. E werde aber secher en Stola oder öpis müesse ha, wöu mer jo em Oktober/Novämber wärde hürote. Söscht werds denn es betzli chaut! Mau luege, velech goni de no ine andere Lade go gögsle was es so an Accessoires get, kenne mi do nonig so us. De versuechi das no me z'gniesse wöui s'Chleid jetzt scho ha. Aber eg be eigentli scho froh hani so ne Glöcksträffer glandet. Hät jo ou grad andersch chöne usecho.
Hesch du dis Chleid denn scho? E be jo nöi do ond ha nonig so d'Öbersecht, wär wie wit esch...

En schöne Tag!

Sali Piglet,

Da bini wohl z spaht mit mine Erlebnis. Also mis Chleid isch au es Usstelligsmodell. Es isch greinigt worde und ich han 30% Rabatt übercho.

Han's au uh schad gfunde, dass s'Probiere scho nach em 3. Mal verbii gsi isch. Aber ich chan bald zur Aprob. Am 1. Dezember. Mir hüratet am 31.12.

Ja, wir hoffen bloss, es hat nicht so viel Pflotsch wie heute!