Hallo Zämmä

Also eigentlich ghört's jo nid so richtig ine Hochziitsforum (sorry)

aber ha denkt dasi do am meiste Inputs (vorallem ehrlichi) überchume

mir wohnet im moment no bi mine eltere dihai, hend aber en eigene Stock für üs allei..

es ziel isch, vorem Hochziet e Wohnig zfinde.. isch lieder eifacher gseit wie gmacht.

mir hettet jetzt ev. e Wohnig, die wür üs aber 2070.- koste (inkl. Nebetköste und Parkplatz)

mir hend aber kei ahnig wa für Köste no uf üs zuechömed... Wieviel bruchet 2 Persone im Hushalt und und und...

vo 300.- bis 1000.- hani scho alles ghört... ich weiss eifach nid wa mache..
het mir öbber ev. en Tipp wa so Fixköste sind? (Strom, Hushalt, Billag, und und und)

und isch de Mietpries z'hoch???? (Neubau, 4.5, EG)

danke viel mol
lg Cosa



am 27.08.2011 isch üsen grosse Tag
*****Du bist ein Teil von mir*****

ach, au das nämet mer dohne uf! i fende es ghört is bezihigs züg ine :)

2'070.- för en 4,5er neubouwohnig met näbechöschte/parkplatz esch secher en normale pris.

grondsätzlech esches jo scho eher tür, gägene 4,5er wo halt scho 10 jährig esch ;) ond denn chonds no drufab wot wohnsch. natürli esch en 4,5er ned en 4,5 er, es ged 4,5er met 70m2 ond 4,5er met 140m2!!

mer seid t wohnigmieti dörf ned meh als 1/3 vom lohn choschte. (das heisst ehr müend zäme minimom 6'000.- verdiene) 1. chiemtsch sie söscht garned öber ^^ ond 2. chasch es ebe ned (werklech) finanziere.
wenn die natürli s 2. zahlsch gohts scho. t frog esch, was wenn eine mole kei ihkomme hed? aber so wit chonds jo meischtens "dank arbetsamt" ned.

i beschrib mole wies bi mer esch:
also mer rächned för 2 persone, met 2'000.- wohnig (met näbechöschte + parkplätz) + billag, strom, heizig, husrotversecherig, telefon/internet, söscht evt no es bluewin TV, OND läbensmettel, wöschmettel, göselsack ettikette etc...
gähnd mer 2'800.- pro monet us.

= gueti 800.- för läbensmettel ond diverses, wie billag, husrot, telefon/internet etc.
klar chond billag nor all 3 mönet, oder neu 2x im johr, wenn aber die 800.- jede monet uf t siite duesch, hesch mol chli meh ufem konto ond wenn en rächnig ine chond, besch halt weder chli witer onde, aber üs längt das so sehr guet, send nie im minus, hend emmer gnue uf üsem "wohnigskonto" droffe, för rächnige ond jo.


das mole so vo mer.
"sheilyn-budget-style"

s chond halt scho uf t ahspröch drufab etc... ond die 2800.- send reini wohnigs-läbensmittel chosche!!! ohni alles anderi wommer im läbe no muess zahle... chleider, stüre, kosmetika, versecherige, KK, auto-benzin etc...

.oO°Oo..26.06.2010..oO°Oo.

Zuletzt bearbeitet am 06.01.2011

Hi Cosa

Spannends Thema, mit dem hend mer üs gad au beschäftigt, da mer e neui Wohnig gsuecht und gfunde hend.

Zerst mol zum Mietpriis. Die Frog loht sich so sehr, sehr schwer zbeantworte, ob die im Rahme isch oder nöd. Würd mol als Verglich uf Comparis umeluege wie A) anderi Wohnige ide Region bzgl. Koste usgsehnd und B) wied Prisentwicklig isch (gsehsch wenn uf älteri Resultat klicksch ade gliche Adresse). Denn es chunt nöd nur ufd Anzahl Zimmer druff a, sondern au uf folgendi Faktore:

- Region, wohl de wichtigst Punkt. z.B. Region Zürich (au 30min dävo no entfernt) sind dPrise ide letschte 5 Johr rasant agstige.
- Anzahl Quadratmeter
- Ussicht
- Usbaustandard (Materialie, Cheminee, eignigi Waschmaschine etc.)
- und wie du schribsch, Baujahr (plus ob Renovierige gmacht worde sind)

du gsehsch, nöd so eifach zum beantworte. Wenn mer sInserat hetsch, chönt der eher witerhelfe.

Wichtig zbeachte bide Uswahl vonere Wohnig findi, dass sie zuerst emol gfallt, dass mer sich wohl fühlt, aber au dStüre machet en riese Unterschied us je nach Wohnort und Arbetsweg. Zwor isch üsi Wohnig jetztde am neue Ort fast doppelt so tüür, däfür zahlet mer en Drittel weniger stüüre und hend fast kei Arbetsweg me. Zit hend mer als Opportunitätskoste au mitberechnet.

Wenns um di absoluet Zahle goht, bin der e schlechti Hilf. Mer hend soviel Wandel gha ide letschte zwo Johr sit mer zeme wohnet bzgl. Studium, Arbet, Hochzit etc., dass der kei Zahle chan nenne wo länger Bestand hend. Mer hend eifach gluegt dass alles irgendwie goht :-) Zudem isch mer jetzt do däfür sInternet zu öffentlich zum gross Pöste znenne.

Insgesamt aber chan der nur sägä, dass die Frog schwierig zbeantworte isch. möchtsch en Minimalbetrag wüsse wo mer zum Lebe brucht? Denn gits Homepages däfür. Ansonste hängt alles sehr, sehr stark dävo ab was willsch und häsch. Je nach Auto zahlsch pro Monet zwüschet 400 und 1000 Fr. für Unterhalt (Versicherig, Pneu, Reparature, Abschribige etc. mitiberechnet). Bzgl. Esse chunsch mit Aldi, Poste in Dütschland recht günstig dure, möchtsch aber mol in Coop wirds tüürer. sglich gilt für Ferie, Kleider sowieso. au bzgl. Krankekasse. Han vorher bide gliche Kasse um di 500 Fr. pro Monet zahlt, han jetzt aber dLeistige gänderet und han nur no dHälfti vom Betrag.

Di einzig verlässlich Zahl wo der chan nenne, wo wohl für all gilt, soferns Swisscom nehmet :-) isch die 100-120 Fr. für Grundbetrag Telefonaschluss, Internet und TV mit bluewin TV (ohni Telefonierkoste).

So wied Bluemefee seit. Wichtig, dBruttomieti sött 1/3 bis 1/4 (optimal) vom Bruttoghalt nöd überstige als Grundregel. Muesch aber gad so grossi Poste wie Hochzit iberechne und überlegge wenn ihr Kind wönd bzw. obs mit eim Ghalt denn au no längt oder mit me Teilzitghalt.

Zum Hochzitsbudget kriegsch do im Forum sehr wertvolli Tipps. Git en eignige Thread däzue. Und wenn die Sparfee schlechthin als Beroterin willsch, ad Sheilyn wende :-) I bin do glaub di falsch Asprechsperson.


@Blumefee: wow 1000 Fr. Mieti? Wohnet er im eignige Huus oder im Huus vode Eltre? Es isch jo mega günstig, au wenn er jo ländlich wohnet. der Poste mit em Cheminee hani gad möse lache, so glatt dass de Kamin ufgführt häsch :-)) und hey, freu mi soooo, hend am neue Ort au eine. Min absolute Traum gsi

Mer hend (ofem Land) en 100m2 5.5 Zemmer Wonig för 1500.- inkl. Garage, Chäller ond Garte gha ah ond met Eschtrech... aber das esch en Usnahm.
Ou ech wörd onbedengt öber d Fuschtregle "1/3 vom Lohn go".

Mer hend för alli Usgabe, die üs beidi betroffe hend (inkl. Mieti) jewils 1400.-ofs gmeinsame Hushaltskonto izahlt. Mer hend am Afang aber ame es Johresbudget gmacht ond ahand vo dem of die 1400.- cho. Das het emmer klappt, osser wemer zäme grösseri Aschaffige gmacht hend (Färnseh, Möbel...) denn hemmer abe eifach weder je en Tuusiger druf öberwese.

S chont halt werklech sehr of d Aspröch drof a. Wenn er gli wend Chend ha ond du länger nöm wördsch schaffe müesst denn jo din Ma d Mieti elei zahle (oder wär ou emmer...) ond drom wördi werklech ned öber die 1/3 vom Lohn go. Wenn das no lang kes Thema esch, wördi eifach luege, daser wenigschtens ez zäme 6000.- verdienid.

Vel Spass!

Hey Cosa87

Uiuiui Geld und Miete ist so eine Sache.

Eigentlich sagt man, dass die Miete 1/4 von Einkommen sein sollte.

http://www.budgetberatung.ch/Familienbudget.75.0.html

Da wir aber alle wissen, dass nicht jede eine Wohnung unter CHF 1'500.-- hat und nicht jeder Mann 6'000.-- nach Hause bringt, ist dies nicht immer umsetzbar.

Wir haben damals gesagt, wieviel wir monatlich sparen möchten und danach eine Wohnung gesucht!

Ich habe dir mal ein Budget geschickt. Jetzt musst du einfach deinen und deinem Schatz seinen Nettolohn anpassen und dann die Beträge jeweils ein bisschen anpassen und dann siehst du, was ihr euch leisten könnt.

Liebs Grüssli

PS: CHF 4'000.-- sind nicht unsere Löhne


**** *** ** * Ewig dein, ewig mein, ewig uns * ** *** ****
****** ***** **** 28. Mai 2011 ** **** ***** ******

Datei-Anhänge

Budget.xls (23x) Mime-Type: application/vnd.ms-excel, 21 kB