am Uffahrtsdunnschtig hani min zuekünftige Ehemaa bi sine Eltere abglade und ha den en gmüetliche Abig eleige bi eus dihei verbracht. Irgendwenn hani denn gmerkt, dass i öpe is Bett sött, damit i denn au fit bi a minere eigne Hochzig! wo i denn ändlich im Bett gsi bin, bini ufzmal nervös worde. Nöd vo de Gedanke här, sonder min Mage hät ganz mühesam kribbelet. Irgendwenn bini denn doch iigschlafe und bi nur zwei mal i de Nacht verwachet. Am Morge hät mi de Wecker und churzdruf abe mis Mami per Telefon gweckt. Ha ja nöd welle verschlafe. bi mine Eltere hani den min Brüeder troffe und bi mit ihm zum Coiffeur. Er hät chli müess fötele. Die erst gross Überraschig isch denn au scho da gsi: E sympatischie jungi Frau staht näbed mich und seit: i tuet si hüt friesiere. I ha dänkt i spinni! i ha en Termin bimene Maa gha! naja, dem sini Frau hät i de Nacht es Baby becho und drum hät sini Kollegin müesse iispringe. Si hät das super gmacht! Ha uh Freud gha a minere Frisur. Nachher bini mi go schminke la, das hät super klappet :-)
Wieder dihei hani no es Brötli gässe und chli öpis drunke. Denn isch scho Ziit gsi zum s Chleid und de Schmuck azieh. Natürlich hani denn au müesse go teste wie das jetzt gaht mit uf s WC müesse. Es gaht tiptop :-) Und denn hani müesse warte... Wow, am viertel ab elfi isch denn en Oltimer atuckerlet cho und drine min Brütigam, Trauzügin und de Trauzüge! Wow, hät min Brütigam super usgseh!!! Au die andere zwei! Eifach super... Zum Glück hani mim Ehemaa au gfalle :-) Denn hani no min Bruutstruus becho. wunderschön, genau so wie ich s mir gwünscht ha!
denn simmer uf Rappi tuckerlet, wo s denn z erst mal no öpis z trinke und es sandwich gäh hät und denn isch scho de Fotograf cho. Do hämer gfötelet bim Auto und bim Schloss sälber. Wenn die Fotos so usechömed, wie ich das dänke, denn wärdeds de Hammer! Freu mi riesig druf!
Bald emal isch es Ziit gsi zum nomal uf s WC gah und denn hämmer scho chöne eusi Gäst begrüesse. Denn simmer all in Rittersaal und mer händ dörfe Platz neh. de Tisch isch schön dekoriert gsi mit Roseblätter und zwei Chärzeständer. d Trauig hät agfange und nach em zweite Satz isch natürlich scho bi eim Chind s ganze Füürsteichörbli usgleert :-) und s nächste wo hät welle hälfe hät denn s eigne au no usgleert. d Trauuig isch denn wiiter gange ohni Zwüschefäll bis de Göttibueb vo mim Maa beschlosse hät, dass er jetzt d Ring nöd will bringe. Da au all ander Chind nüme händ welle, hät den mini Schwögerin das übernah :-) alles in allem sehr schön gsi. Natürlich mit mim Grinse wo i mit em neue Name agsproche worde bin.
Denn simmer wieder use und dur s Spalier vo eusne Aperogäst gloffe. De Apero isch eifach de Friede gsi! i ha Ziit gha zum mit allne chli rede und au zum Esse. Eusi Gruppeföteli hämer denn au no grad gmacht. Als überraschig hämer denn no dörfe Tuube flüge laa (de Züchter hät gseit, dass die sicher wieder hei findet...).
di nächst station isch de Hafe gsi, wo mer e stündigi Schiffrundfahrt ghacht händ. i dere Ziit häts dusse grägnet und dinne händ sich d lüüt vorgstellt. wo mer wieder im Hafe gsi sind, häts scho nüme grägnet und mer sind troche bis zum Car cho, wo üs denn zum Restaurant bracht hät. Bevor mer in Saal inne händ chöne, hämmer es risigs Herz zum liintuech müesse useschniide und denn hät mich min Maa dur s Herz dur in Saal ine trait wo sehr schön dekoriert gsi isch. Bi feinem Esse, gueter Unterhaltig und es paar harmlose Spieli isch denn de schöni Tag usklunge. I ha mi de ganz Tag super gfühlt und alles richtig chöne gnüsse. Eifach wunderbar! Es riesigs Dankeschön a eusi Trauzüge wo alles super organisiert händ, a eusi Gäst wo so toll mitgmacht händ und a mim Maa, wo mir de Tag ermöglicht hät, obwohl er ken Hüratsfan isch. Danke

nicht registriert

Liebi Trix77

Als erstes möchte ich dir ganz herzlich graulieren! Ich wünsche dir und deinem Mann alles Liebe und Gute!!!

Vielen Dank für den tollen Bericht. Es hört sich wirklich nach einem total entspannten Tag an. Es ist schön zu lesen, dass du deinen Tag so geniessen konntest! So stellt man sich das doch vor

Die kleinen Pannen mit den Kids...das find ich süss...

Ich hoffe, wir werden auch ein paar Bilder zu sehen bekommen

Alles Liebe
PrinzessinN

...Today, Tomorrow And Forever...You'll always be my love...8. Oktober 2011

liebi Trix

Herzlichi Glückwünsch au oi!
Ich freu mich für eu, dass ihr so en schöne Tag ka händ und de i volle Züg händ chöne gnüsse! Und ich finds wunderbar, wiä entspannt du über diä chline Zwüschefäll mit dä Chind gschriebe häsch, was dir offesichtlich gar nüt hät chöne verderbe
Alles liebi und Gueti für eui Zuekunft,

gruess Eleni

danke viilmal!
wie chönt mer bös si de chind? i ha so müesse lache
i wett no uf d föteli vom fotograf warte. i ha scho es paar, aber i würds schade finde, di nöd so guete föteli zbringe. am weekend sött i d föteli becho vo mir us chöntets hüt scho cho

guet nacht zäme...

:)))) oh.... das ist so köstlich!!!! :)) ich musste so lachen bei den zwischen fälle von den Kindern. :) Danke dir für das erzählen... wirklich fantastisch!!! :)

Und gratuliere dir natürlich ganz herzlich für dini hochziit!!! :)

LG

Liebe Trix77

Auch von mir herzlichen Glückwunsch zur Hochzeit! Geniesst euer Eheleben in vollen Zügen und alles Gute für die Zukunft.

Lg Palchen

@-->-- Zivil 20.05.2011 --- Freie Trauung 28.05.2011 --<--@