Scho überne Monet isches här Aber mir dänke wäuts gärn a üse Tag zrüg!
Am morge am sächsi isches los gange! i ha super gschlafe u bi o am morge überhoupt nid närvös gsi (ligt äue drane, das i am Abe vorhär 2 Tablettli gno ha)
Nach Coiffeur u Kosmetiker ha i mi när i mis wunderschöne Brautkleid gstürzt! i has eifach gliebt, i bi so wohl gsi u ha mir cheibe guet gfalle
Nachdäm ig chli müeh ha gha mit däm riese Kleid ines normals Auto z stige, si mir när zu üsem Plätzli gfahre wo mir gfötelet hei! Dert vorem Schloss hei mir üs zum erste mau gseh! wau so ä schöne Moment! aui wo scho ghürate hei, wüsse vo was i rede, u die wo no hürate chöi sich uf dä Moment fröie! lueget das dir dä moment chöit gniesse u öich kener Brautführer oder Fotografe störe, äs isch eifach herrlich dä Moment! Mim Maa si sogar Träne acheglofe, ig ha ihn vorhär no nie gseh gräne.............
ja när hei mir ganz ä gmüethliche morge bim Fötele gha, mir hei ganz üs selber chönne si u hei kei stress gha!
när si mir langsam zur Kirche gfahre, dert si mir imene Hüsli no öpis chlises ga ässe u hei zum Fenster usegluegt wär aus chunnt......... den bi ig när langsam närvös worde, es het mi extrem schön dünkt, wär da aues chunnt wäge ÜS
Mi Maa isch när i Kirche ga warte, u 10 Minute später bi ig mit mim Vater ineglofe! ä Moment wome nid cha bschribe! eifach wunderschön we Türe vor Kirche ufgeit, d Lüt sich umdrähie u i ha äs chlises "wau" dür Kirche düre ghört u sobald mir di erste Schritte hei gmacht si aui Lüt ufgstande......... i überchume itze no Hünerhut
d Trouig isch wunder schön gsi, dr Prediger het ä sehr eindrücklichi trouig gha, u när isch z eheverspräche cho.........
zuerst die Braut i bi nidemau närvös gsi, u ha dä Moment wäuts gnosse! Mim Maa vor 150 Lüt z verspräche das ig ihn immer wot liebe und ehre u für ihn wot ä gueti und tröii Ehefrou si und und und am Schluss ha ig ihm när dr ring aus Zeiche für üsi liebi gä (mi Maa het scho ume mit de Träne kämpft, so härzig) när het är mir äs wunderschöns verspräche gä! het mi wäuts gfrührt wie är sich het müeh gä u mit wi viu Leidenschaft är das gseit het! när het o är mir dr Ring agleit! u mir hei anang grad nüme los glah när het dr Prediger üs gsägnet u d Musik het im Hintergrund äs Lied afa spiele, u wo är üs fertig gsägnet het, hei mir üs ändlich küsst :-) u d Musik isch drzue immer lüter worde u d Lüt hei wäuts afa klatschen....... (scho ume hüenerhut) äs isch wäuts schön gsi, u da mir vor Musik si begleitet worde, isch dä Hochzytskuss nid so steril gsi wimes mänggisch gseht. ufzmau seit mi Schatz är chöng nüme....... i hät no chli wöue küsse, i ha das so schön gfunde när ha ig ihn agluegt u gseh das ihm Träne nume no so acherugele.................
Das isches gsi! so schön!
vor dr Kirche het ä Bekannte vo üs miteme Aebi gwartet, är het dert äs bänkli drufbunde gha, u so si mir dür z ganze Dorf gschoffiert worde...............

sitem 02.05.2009 glücklichi E

wow dönt aso au wunderschön

heiraten am 20.08.2009 & 22.08.2009 in Liebe

isch super gsi! u d Sunne het gschune da drzue mues i säge, dases am morge wo ig bim coiffeur bi gsi grägnet het, u wo mir ir Kirche si gsi heigs o rächt starch grägnet............. u mir hei nid eis tröpfli ab übercho, dr ganz Tag nid! Mir si wäuts dankbar!
ja när isches hinger z apero gange, das isch ganz gmüethlich gsi, mir hei äs Tischli für üs gha, u hei zersch öpis gässe u när hei mir gratulatione entgäge gno! das isch o ganz schön gsi! u äs het zum glück nie ä meter längi Kolone gha, d lüt si würklich verteilt cho!
vo dert us si mir när mitere Rössligutsche abgholt worde, so schön, wie imene Gotthelffilm u när hei mir ä Stund für üs gha u hei Champagner drunke............. ganz gedige!
När si mir ine Saal gführt worde, dert hei üs d Lüt empfange u si spalier gstande u hei üs Roseblättli agworfe! dert hei mir när ä Tanzkurs gha mit dr ganze Gsellschaft! isch lustig gsi, mi Maa het när no so grossi Schueh übercho u stifle und und und
so när am Abe.......... da cha i fasch nid aues verzelle! mir hei rächt viu darbietige gha u äs isch ungerhaltsam gsi! zum Beispiel isch mi Vater Lüt ga bsueche, wo i früecher kennt ha (d Lehrerin vor 1-3 Klass, Lehrmeister, ä ehemaligi Fründin, Chef bimene Alte arbeitspaltz vo mir und und und) u di hei aui öpis gseit u dä Film isch super cho, äs het mir aube fasch eine gä........ ja u no einigi so überraschige! mir heis wäuts gnosse!
Ja u när wos isch fertig gsi, si d Lüt usegange u mir hei müesse warte. När wo mir o use si, si mir dürne Kerzli strass glofe öpe 30 Meter, när si dert aui Lüt imene Kresi gstande u hei äs Kerzli ir Hand gha u hei "Ewigi Liebi" gsunge! äs het mir fasch eine gä vor Glück! mir si när zäme i d Mitti ga tanze! i wierde no lang a das dänke! u am schluss hei sie no zuckerstöckli ufeglah! wau wau wau! när si mir im Kreis aune ga tschüss säge u si när hei! no bim wäg loufe si mir träne cho......................
das isches gsi........ fasch ömu wo mir dahei si gsi u türe hei ufdah, isch dr ganz Bode vou Bächerli gsi.......... aber mit Hörndli u schöggeli drinne! u z ganze schlafzimmer vou ballön u süsch no ganz viu schöni Sache!
i mues säge, äs isch mega lustig gsi, mir zwöi si zäme uf de Knie gsi, u hei di blöde bächerli ufgrumt! aber mir hei wäuts viu glachet drzue!
isch haut o dr vorteil gsi, das mir am 1 uhr scho si dahei gsi, mir si überhoupt nid müed gsi, u hei dä Abschluss für üs wäuts gnosse! ja u när ha i müesse z kleid abzieh! das het mi schön agschnäglet! i bi so wohl gsi u äs het mir nie wehdah oder wär z eng gsi oder so! eifach äs super Kleid!
Ja u när si mir oberglücklich i z Bett....................................

mir hürate am 02.05.2009

So schön, gratulier eu vo Herze!

nicht registriert

Herzlichen Glückwunsch!

Viele Dank für din Bricht Maju
Finds immer uu spannend z ghöre wies dänn usecho isch!
Ganz herzlichi Gratulation au vo mir!