Sonne jo werklech es esch mega schnöu gange...

hey canoa, eg wünsche dir de ganz e tolle polterobe morn. wird sicher super cool!
be scho gspannt ufe bricht

und s'menu tönt auso au sehr lecker. chome grad hunger über...

canoa, wönsch der en super tolle mega bombastische polterobe!!!!
wow no e Woche bes zom zivile! wahnsenn!!! :)

Pouterobig

Am haubi 5fi sends mech cho abhole de semer metem Öv uf Lozärn, det esch besammlig gseh. Ufem Wäg uf Lozärn hemer ergendwie öbis vo Ballerinas gha ond denn hed mini Schwöstere festgstöut uhhh ech hät jo pinkegi Ballerinas gha. Okay chorzerhand hends denn em GG aglüte är müessi die Schuhe brenge!!! =) Wär hed jo au scho pinkegi Schuhe?

Alli 10 Mädls send super pönkltech gseh. Denn heds mou es Apéröli gäh ond e chorzi Vorstelligsrondi. Denn semer ufs Bhf Klo ond det hani mi müesse umziehe, ha wissi Hose, es wisses Top ond es wisses Tshirt öbercho wo de Ufdrock gha hed: Ratschläge für die Braut ond es pinkigs Täschli sowie e Scherbe wo droffe gstande esch: Bride to be ond natürlech es Schleierli. Mini Ufgab esch es de gseh Manne azspräche ond wo Rotschläg ufs Tshirt schriebed. De ersti hed auso grad gschrebe: 5 Kinder auf die Welt stellen!!! =) Aus dankeschön hani de i mim pinkige Täschli Härzli-Schöggeli gha woni ha döfe abgäh.

De semer zum Resti gloufe ufem Wäg hani flissig Rotschläg gsammlet. De semer im El Divino acho ond hend mou Apéro bstöut. Ei liebi Kollegin hed leider ned chönne cho hed aber de TZ loh usrechte dass sie 3 Fläsche Prosecco spändiert! =) Leider heds chorz vorem Poutere au no e Abmäudig gäh. Es hed mi rächt entüscht. (aber das esch es anders Thema)

Ufem Manne-WC im Resti hends denn Rösali deponiert gha ond ech ha de ab und zue Rösali öbercho ond natürlech emmer grad t Glägeheit packt witeri Rotschläg zsammle. Ergendwenn semer de witer rechtig Max ond det hed eus scho de Türsteher gseid dassi nüt darf verchoufe, handle etc. was natürlech ned so praktisch gseh esch. Ech ha nämlech ufem Wäg no en Gort becho wo Shöttli dra gha hed ond die hani müesse gäge Gäud verchoufe, t Manne hend aber müesse abechnöuile zum die trenke! =) Wöus i de Bar enne soooo warm gseh esch semer use ond hend die Manne vorosse ufgforderet zum metmache. Ergendwenn esch de 12i gseh ond mer hend no es Geborichend i de Rondi gha ond de heds grad e rondi Shöttli för alli gäh! =) De esch es witergange is Roadhouse womer de versompft send. Am 1s ume hend sech scho die Erste vo de Groppe verabschedet…nodisnoh esch t Groppe chliner worde was aber de Stemmig ned gschadet hed! =) De herti Chärn esch denn bis am haubi 4ri blebe, mi GG hed den Taxidienst gmacht ond eus heigfahre. Schlossäntlech beni am 5.45 Uhr im Bett gläge, be rächt guet parat gseh, ha am Morge aber kei Kater gha…das hani anderne öberloh! =)

Föteli hani keini, die hends schön för sech pautet, ergendwie gäbs denn no es Fougegschänk...

Es esch e super Obig gseh ond mini liebste hend super metgmacht ond t Stemmig esch top gseh.

Zuletzt bearbeitet am 12.08.13 09:35

Nüüüt sie hend keine chönne organsiere, hätti s Budget gsprängt aber esch ned tragisch gseh...dä hed ned gfäht...de GG hed gmeint är strippi de för mech! =)

Gester Obig heder gmeint ech seli de die Woche ned verschrecke är seg denn es Carsting be eus deheime, är suechi jo abem Fritig weder e Fröndin. =) Är hed denn gseid so 150 Frou chämed awäg scho! =) Aber am Beste nämer grad zwe Fröndinne wöu nome eini chön mech ned ersetze! =) haha