spannende bricht und auch ich freu mi uf d'fortsetzig :-)
isch abr recht heiss gsi a dem tag gell, mini schwö het jo au denn ghürote und im sarganseland muans glaub no recht gwitteret ha, in sg isches nöd ganz so schlimm gsi
ui und denn isch de grosse moment cho zum id kirche laufe. han immer denkt i seg denn sooo nervös. dävor isch es aber no ganz schön gsi. bin im park mit mim papi allei gsi, mer hend gwartet bis all wäg gsi sindd. er hät mer no versuecht di ganze blätter usem tüll zneh, hihi, han de halb park drin gha. denn sind mer zur kirche zmitts im dorf gschritte, überall hend dlüt gwunke usde autos, di letschte gäst sind id kirche ghuscht und denn hend mer üsi bridesmaids und groomsmen inkl. mim maa und sinere muetter und de pfärrer döt troffe.
denn hät mis herz so dermasse gschlage, bin für 2min sooo nervös gsi und han fast wieder losgflennt :-) und denn fangt di schön musik a, mendelssohn ufde orgel. und alles isch guet gsi. bin di ruhe in person gsi und min vater und i sind als letschti arm in arm ine glaufe. de schön bluemeschmuck hani keis bitz wohrgnoh, däfür hani würkli i jedes einzelne gsicht vode gäst chönne luege und han lustigerwiis dbettinli und dspeedy do usem forum als ersti gseh
i han immer denkt i heb denn sonen tränäschleier vor de auge, dass i gar nünt realisier. isch gar nöd so gsi, han alles total bewusst wahrgnoh und bin überhaupt nümm flatterig gsi. zuvorderst hät denn min maa mim vater wölle dhand geh, aber dä het das gar nöd gschnallt i glaub er isch nervöser gsi. mer hend denn links obe ufde treppe platz gno. do gad es föteli
die trauuig isch so wunderschön gsi, i chan das kum i wort fasse. üsi zwei pfärrer wo sich e riese müäh geh hend zum alles schön uf üs zuegschnitte zmache, wo mer so liecht hinter de wunderschöne rose gseh hend. üsi fründe zur rechte, mini eltre grad us, dmusik vor üs und min schatz näbet mir. i han mi gfühlt wie im himmel uf erde. das triffts glaub am beste. i han selte sones dermasse schöns gfühl gha, es isch eine vode schönste moment i mim lebe gsi. i han so freud gha, bin so dermasse glücklich gsi, dass mer ab und zue eifach tränlis über dbacke kulleret sind.
und denn die genial musik. das hend üs nochher all gseit, es hät sich so glohnt zum üsi zwo engländer izflüge. es isch wie elton john original gsi, total berührend, suuuperschön und de andy hät sich so gfühlsvoll is züg gleit. fantastisch!!! wenn er eu en idruck wönd mache, gönd mol uf http://www.lastrequest.net/what_we_play.html und denn de letschte song, your song. mer hend zwor circle of life und can you feel the love tonight gha, aber damit er de stil ghöret.
jo und denn sind mer noch de toccata total happy, fast usegrennt usde kirche :-)
all lüt sind üs denn sozusägä hinterher glaufe noch de kirche. mer hend extra gluegt dass mer zügig fürschi laufet, damits erst bim apero gratulieret, vor de kirche wär zu wenig platz gsi. es isch toll gsi de awohner döt zuewinke zchönne, es paar glatti szene für de video chönne zmache wo mer so bimene wasserspiel umegrennt sind. isch eifach tooottaaal es schöns gfühl gsi. denn dallee im quellehof abe und denn sind mer bim apero acho.
de apero isch viel zu schnell verbi gsi. mer hend im schatte gratulatione entgegegno, ab und zue was ztrinke becho vo üsne helferlis, däno chli uemglaufe, ballon stige loh wo scho gümmelig gsi sind wäg dä wärmi und drum nümm würkli gfloge sind :-)) (min schatz hät no ufen baum möse klettere zum sones ding abezhole. lool), denn hani de wurfstruss gworfe wo sini schwö gfange hät (haha, ufem video gseht me ihres enthusiastische gsicht, das chunt denn scho no zur sproch). i hans schön gfunde hend mer mit allne lüt bide gratualatione nochli chönne rede, nöd nur schnell schnell. und denn sind scho gruppefotos ar reihe gsi. de apero hend mer scho e halb stund überzoge und trotzdem hend mer sgsamtgruppefoti leider vergesse, schade, das reut mi chli. aber es isch denn eifach so schlag uf schlag gange.
und scho isch de tolle bentley, üses überrashigsauto, döt gstande. juhuiii, mit dem isch es denn id höchi gange, chli übers land und denn zude heuwiese. bin froh gsi zum es bitz rueh ha, denn wäg dä heisse temperature, de ufregig, allne lüt hani trotz jenste aspirins recht kopfgeh gha. hans natürli aber glich chönne gnüsse :-)
bevor i döt wiiterverzell, nomol zwo fotos. chan mi eifach nöd beschränke uf es paar wenigi, gfallet mer all so guet
ide heuwiese hend mer denn ufem inseli usse de 2. apero gnoh, das hani total schön gfunde. han somit mol e 3/4 stund zit gha zum eifach mit üsne gäst zrede, währetdesse glaubs üsi bridesmaids brutal is ruedere cho sind und no gschwind alles parat gmacht hend. han mer gwünscht dass würkli alli kerze scho azündet sind, alles grichtet isch wenn mer denn in pavillon schrittet. ui, und denn isch de moment cho. han mit mim schatz zerst inedörfe, di andere gäst hend am igang vo üsne bridesmaids de platz zuegwise becho (hend jedem tisch en name vomene bekannte paar geh und es foti vo dene imene bilderrahme ufgstellt, also z.b. romeo und julia). das isch eine vode schönste moment gsi a dem tag. es hät so wuuunderschön usgseh alles, bin baff gsi, het mers nöd so dermasse schön vorgstellt. eifach genial, die hunderte vo kerze i de chline gläslis, ide kerzeständer, ufem brunne, de lüchter ar decki, die blätterranke, die schöne rose und alles im tiffanys türkis style. genial. do bini gad wieder seeehr sentimental worde :-)
de ganz obet hani nur gstuunet ab dem super schöne ambiente und wo denn no üsi musiker afange hend spiele, traumhaft. sie sind würkli sehr empfehlenswert, falls öppert vo eu no musiker brucht. min vater isch bzgl. sowas immer recht kritisch und au üsi helfer hend no gseit, seg en rechte ufwand die herzhole, va. hend mer sganz equipment selber bsorgt. aber es hät sich eifach nur glohnt!! han immer no freud wenn i ihri cd los.
mit warmem lachs uf grüäbnem salot anere leckere sauce häts menü agfange, han au dringend was zesse brucht, bin langsam schier usde latsche kippt :-) die wärmi, das enge kleid, do hät me nöd viel möge esse. denn hend üsi beide vätere sone herzlichi, berührendi red ghalte, wow, bin ganz überrascht gsi. total süess. de 2. gang mit orchiette nach mir benannt ;-) mit frischem gmüäs isch sehr fein gsi, aber han wägem kleid schier kein biss me abebrocht. es isch eifach nöd gange. jähnu, han jo stestesse gnosse. au de hauptgang mit de heuwiese kartoffeln, em grillgmüäs und em angus beef isch genial gsi. mhhh. denn häts e längeri pause geh, wo eigentlich so nöd plant gsi wär und au fast es bitz lang gange isch. e präsi vo mine unifründe wo mi supergfreut han, eifach fotos vo üsere unizit, denn natürli jensti spielis und darbütige. han ziemlich möse lache und hend sich all u müäh geh. aber irgendwenn sind üs dlüt denn fast zu müäd worde, zudem isch es no so warm gsi. zum glück häts am obet total beglärt und gwitteret (um üs ume anschinend überall überschwemmige und bäum wo abecho sind. do hend mer glück gha)
do bini denn froh gsi dass i denn uf mini lütlis han chönne zelle und all no hend möge ufstoh und go tanze noch em superfeine und grosse dessertbuffet und de hammerschöne hochzitstorte, wo i leider no keis bild dävo han. isch e gueti stimmig gsi, schöns ambiente, eifach genial. i hoff me gsehts es bitz ufem foti. do loset mer gad ere präsi zue.
bis zum zwei hend mer denn gfestet, nochher hend mer üs verabschiedet und sind mit mine eltre richtig bad ragaz gfahre und todmüäd vode herzliche portiers begrüässt worde wo üs als ersti gratuliert hend :-)
bim 3. kärtli lese vo üsne liebe gäst bini denn au glücklich igschlofe
jetzt blibt mer a dere stell nur nomol zsägä was für en traumhafte tag es gsi isch, es isch definitiv eine vode schönste i mim bisherige lebe gsi (hehe und däbi hani das immer sonen kitschige spruch gfunde). es hend sich soviel müäh geh, soviel liebi isch üs entgegebrocht worde und i fühl mi no immer di glücklichste und stolziste frau, dass i sonen tolle maa han dörfe hürote
en ganz herzliche dank a dere stell a üsi families, a üsi bridesmaids und groomsmen, a üsi fründe wo üs teils hend möse ushalte i dere lange und intensive vorbereitigszit, anes künftigs bruutpaar us dem forum wo üs deko ufgstellt hät am mittag und mer denn das dörfet a ihrem hochzit mache, a üsi gäst wo üs soviel zlieb tue hend und natürli a eu all wo mi mit rat und tat unterstützt hend und mer au sonen geniale fotograf empfohle hend, gell tara ohni das forum wäri wohl oft ufgschmisse gsi und hets au nöd glich gnosse, denn so unter gleichgesinnten isch es halt scho schön. drum würdi mi au freue denn mol es after-wedding-treffe zmache mit dene wo me regelmässig gschribe hät.
tschüsss! wink (er mönd entschuldige, jetzt ish es eifach en ellelange bricht worde :-) aber han gad so freud gha, wo i endli mit eu han welle teile)
und jetzt freu mi uf berührendi bricht vo dene brutpaar wo hüt hürotet!!
Herzlichen Dank für diesen schönen, autentischen Bericht! Man sieht dass ihr 2 Menschen mit viel Style seid und auch die Hochzeit scheint super gewesen zu sein! Herzliche Gratulation nochmals! Ich weiss ja nicht was du beruflich machst aber als Wedding-Planer würdest du dich wahnsinnig eignen ;-)!! Ich glaube deine Hochzeit war wirklich perfekt organisiert und gestylt ;-) Mein Kompliment!
Ganz liebe Grüsse
Cocolina
**wir heiraten am 29. Juli 2010 zivil und am 31. Juli 2010 kirchlich**
Wow, ich chan nur säge, sehr hübschi Bruut, es super glücklichs Päärli und en super emotionale Bricht! Merci! Din Struss gfallt mir sehr guet und es mega schöns Kleid! Nomal alles alles Gueti dir und dim Maa!
Anmelden
Nomal alles alles Gueti dir und dim Maa!