Wow, das wird en lange Bricht… Am Tag vor de Hochzit hemmer no mit vielne Helfer alles igrichtet ide Kirche und Obiglocation. Es isch no recht streng gsi und het bisam 19:30 Uhr duuret. Mini TZ het denn grad bi üs gschlofe (sie chunnt ja us minere Heimat AR). Am Hochziitstag isch denn am 06:00 Uhr Tagwach gsi für TZ und mich. Scho am Morge hani fascht nix abebrocht…obwohl i suscht die Ruhe selbst gsi bin. GG hemmer schlofe loh und sind denn am 7ni mit Sack und Pack usegschliche. De Himmel het scho chli zeigt, dases en schöne Tag wird. Unglaublich…di ganz Wuche het de Wetterbricht vo Tag zu Tag unterschiedlichs Wetter azeigt für de 12. April. Im „Art of Beauty“ in Krüzlinge hemmer üs denn verwöhne loh. Mir het mer zerscht dHaar gmacht und de TZ zerscht sMake-up, nacher hemmer gwechslet. Mit de Ziiit simmer denn es bitz in Verzug cho. TZ het das seeehr nervös gmacht. Sie isch denn schomol gegeüber im Bluemelade üsi Strüüs und Astecker go hole…alles ander hämmer ja scho am Tag vorher gholt und arrangiert gha (und es isch soooo praktisch, dass grad alles a eim Ort gsi isch). am 09:50 (statt 9:30) simmer denn losgfahre. Mir hend 1h zum Fahre uf Schaffhausen. Dete simmer grad go ichecke im Hotel. Natürlich hend alli Lüüt recht komisch glueget woni do voll gschminkt, mit Brautfrisur und Schleier (aber in Normalkleidig) acho bin. Die vorreservierte Suite het mir mini Schwägerin denn is Kleid gholfe. TZ het scho id Kirche müese (wegere Überraschig). d’Fotografin het mich denn im Hotelzimmer abgholt und het det auno es paar wenigi Föteli gmacht (mir hend ebe s’parat mache nöd unbedingt welle, lieber dass sie noher länger chan debi si). Ich bi parat gsi und han sTelefon becho vom TZ, dass GG etz zur Fotolocation goht. Es bitz spöter bini denn au mit de Fotografin los. Ich han 2min zmitzt dur Schaffhuse müese laufe – dur de Samstigs-Wuchemarkt. Aber sisch ebe de nächsti Wäg gsi vom Hotel zum Kloster/Museum Allerheilige. GG het im Chrütergärtli mit de Secondshooterin gwartet. Sie hend ihn mitem Rugge zu mir dreit…ich het zwar fascht lieber gha, wenn er mich vo Wiitem het gseh uf ihn zuecho, aber das hani erst ide Situation gmerkt. Ich ha ihn denn ade Schultere umdrüllt. ER isch soooo nervös und stockstiif gsi. Und woner mich gseh het voll paff und immerno agspannt. Plötzli seit er: du hesch da e Flüge unterem Kleid…tatsächlich…Insekte hend mis Kleid glieeebt! I ha müese lache und er au – das het grad chli Uflockerig geh. Mir hend denn überall Föteli gmacht: Im Krüzgang, ide Gärtli, und vorne under emene wunderschöne, blühende Magnoliebaum – WOW! 1 Stund hemmer nur Ziiit für üs gha, hend üs ghebet, küsst und üs romantischi Sache is Ohr gfüsteret – ah ja, dFotografinne sind natürlich debi gsi…aber sisch würkli so natürlich gsi, ohni Pose und so. Hend üs super wohl gfühlt
Denn sind dFotografinne id Kirche ufe und 5min spöter isch de TZ mitem Auto cho üs go abhole. Er het verzellt, dass dLüt scho acho sind. Di einte seged scho fascht e Stund früehner dete gsi. Mir hend ja demit grechnet gha und hend drum extra erst 10min vorem Traubeginn welle acho. dKirche het en Hinterigang zude Seminarrühm und das hemmer üs zu Nutze gmacht. Bim acho het üs würkli niemert gseh und mini Schwägerin isch denn grad parat gsi zum üs im Ruum nomol büschele. So hani usgseh kurz vorem Ilaufe id Kirche (Siehe Brautselfie). sBluememaitli isch mit üs ufe und mir hend üs parat gmacht. Mini Schwägerin het sZeiche geh für mini Fründin am Flügel. Sanft und wunderschön isch sLied „the river flows in you“ erklunge und dBluememaitli isch losglaufe. Bim erste Ton sind mir scho dTräne id Auge gschosse und au GG het gseit: „ich fang etz scho a brüehle“. Au mir sind losglaufe und bald simmer in Sichtwiti gsi für dLüüt. All üsi Fründe und eifach irgendwie alli. 120 Lüt. Und denn sinds gad auno alli ufgstande. Das het sHerz grad no höcher schloh loh. Unter Träne simmer denn unter em Torboge und zwüsched de Lüüt dure (wow, dLüüt sind nööööch gsi). Vieli hend brüelet, das isch no überwältigender gsi. Sehr ergriffe hemmer denn uf üsne Stüehl Platz gnoh. Mir sind so ghocked, dass mir guet zum Diakon gseh und aber au direkt zude Lüüt glueget hend. So chönd dGäscht au üsne Emotione teilha und mir au a ihrne. De Diakon, wo mir ja sehr guet kenned, isch selber au sehr nervös gsi. Er het e mega persönlichi Zeremonie ghalte. Mir hend mit de Lüt zämä „Grosser Gott wir loben dich“ gsunge, begleitet durch mini Fründin am Klavier. Das hend dLüt super chönne singe…kennt echt fascht jede. Denn isch s’erschte Lied cho mit de Sängerin „can’t help falling in love“ vom Elvis. Sie het soooo schön gsunge und nöd nur ich han müese brüele *smile*. De Diakon het uf de Text Bezug gnoh. Nach ungefähr 20 oder 25 min het er üs üseri Ehegelübte vorglese (mir hend ihm ufgschriebe gha was üs wichtig isch). Mir hend JO gseit, mit Gottes Hilf und denn isch de Ringbueb uuuuuh stolz mitem Ringteller cho. Es isch sooo schön gsi wommer üs dRing agsteckt hend und denn hemmer üs endlich chönne küsse…hetted nachem erste Ring scho fascht (wie us Reflex). Denn het dSängerin gsunge „sag es laut“ vom Xavier Naidoo. Wuuuunderschön. Wieder Träne. Ich ha min Brüeder gseh wiener so het müese brüele und mini TZ het mir nachher no verzellt, dass sich au min Vater d’Träne abgwüscht het. Denn sind di beide TM as Mikro cho (eine devo isch ja min Brüeder). Sie hend es paar Infos gha…sorry, ich weiss nurno dass sie d’Infos voll witzig verpackt gha hend. Ah jo sie hend seit, dass de Apéro i dem Gebäude isch und so. Zämä mit de Lüüt hemmer denn zum Abschluss „Oh happy day“ gsunge. dSängerin de Lead und mir und dLüt de Choor. denn simmer dur dLüt zrugg glaufe bis zum Torboge. Det han ich mich bide Lüt bedankt, dass sie alli do sind und sie zum Apéro iglade. De TM het üs denn so en riese Buzzer greicht und min GG het det drufghaue. Dusse het min Brüeder (i dere moderne Kirche) de Knopf vode Wand druckt und tadaaaa, vode Kirche isch e Holzwand abegfahre und dehinter isch de wunderschön agrichteti Apéro zum Vorschiiiin cho. Wow, H2Plus het Wunder vollbracht und sEsse het so super usgseh. Mir sind subito mit Gratulatione belageret worde. Hend gar nöd recht gwüsst wo anestoh…und alli sind grad inere riese Schlange agstande, obwohl mir gseit hend, dass sie au zerscht zude Häppli chönd. No während de erschte Gratulatione het mini TZ ihri Überraschig akündigt. Sie het am Mikro gseit: Dänu, wili weiss wie wichtig Musig i dim Lebe isch, hani mir scho früeh überleit, dass d’Musig au e super Gschänk für dich wär. Sie het e Band organisiert für de Apero. Aber nöd irgendeini…e TwoManBand us üsere Heimat. Und i ha beidi kennt. De eini isch mal vor Ewigkeite mit mir imene Lager gsi und de ander isch mit mir id BMS. So kuul. Wer sie wett lose „Upper Corners“ (vo Oberegg AI, haha, checkeders?). uf FB findet mer sie. Sie singed zu Gitarrebegleitig, würkli sehr toll! Und ich han vorher kei Sekunde d’Instrument entdeckt wo scho di ganz Zit ide Kirche gsi sind (Hochzeitsblindheit?). Als Unterhaltig bim Apéro hemmer auno de Fotobooth gha mit vielne Verkleidige vode Fotografin. Nach de Gratulatione bini denn auno use und han paar Fötelis mit Gäscht gmacht. Denn auno chli öppis vom Apéro gesse, de Band zuegloset, gschwätzt, mit GG Föteli gmacht bim Fotobooth. Ich han soooo viel Kompliment becho und dLüt sind dauern mit de Handy cho go Föteli mache, hehe.
Denn hemmer auno dusse paar Gruppeföteli gmacht. Nur 6 Gruppene. dGruppenummere hemmer grad uf dNamensastecker hinnedruf gschriebe. Denn hend dLüt chöne det druf luege und mi hend nur chönne sägä „Gruppe 1 ufs Foti, Gruppe…“, voll praktisch gsi. Am Schluss vom Apéro simmer denn uf de Vorplatz vode Kirche. Ich han dete de Brutstruuss gworfe und denn sind plötzli min Brüeder (Täschm.) und sini Frau so hoch offiziell verkleidet ufkrüzt. Sie hend sich als Schuelinspektore usgeh (GG und ich sind ja beidi Lehrpersone) wo müesed prüefe ob Lehrer im Kanton Thurgau au nach de Hochzit no ihri Lehrbefähigung dörfed bhalte. Zum das Bewiese müemer mehreri Ufgabe erledige. Voooll de luschtig Ufritt! Mir hend denn Ziit gha zum üs vo Gruppe 1 (Apérogäscht) verabschiede und dGruppe 2 in Reih und Glied z’formatiere für e Schuelreis. Nachdem mir alli in Zweierreihe büschelet hend hemmer no spontan oh du goldigs Sünneli gsunge und denn hend alli es Lunchpaket becho imene Beutel wo üses Bild und üses Datum druf gsi isch. Sooo e schöni Überraschig! Im Beutel hets Chips gha, IceTea, Brügeli und so… Denn isches los gange und mir sind ide Zweierreihe zude Bushaltestell. Dete simmer mit allne in glieche Bus ine. D’Lüüt hend scho chli gluegt, aber eigentlich stört eim das denn überhaupt nöd. Alli sind hocherfreut es Bruutpaar z’gseh und gratuliered und mached Kompliment. Mitem Bus simmer direkt ade Schiffslände in Schaffhuse acho. Det ufem grosse Platz sind scho e chlini Schueltafle und so orangi Töggel und so Sache parat gstande. Es isch wieter gange mit de Ufgobe. Die 2 „Schuelinspektore“ vode „TGKAK“ hend verkündet, dass wege Sparmassnahme mehreri Fächer zämägleit werdet. Ich han denn di erscht Ufgob gha in intersportiver Geographie. d“Schüeler“ hend dörfe ufstrecke und mir es Land nenne woni han müese mit eme Dartpfiil drufschüsse. Sauglatt. GG het müese Rechnigsufgabe löse während er miteme ferngstüürete Auto durch en Parcours het müese und so weiter. Mega unterhaltend für Gäscht und au sehr witzig für üs. Denn hend mir dGäscht mitere Schifffahrt überrascht. Dank em wunderbare Wetter het mer sogar hinne usse chönne sitze, oder dinne ade Tisch. Dete isch denn no, zu üsere Überraschig e Hochzitszitig verteilt worde…mit Bricht vom Polteri und luschtige Anektote us üsem Lebe. Und au es Chrüzworträtsel isch dinne gsi. Die Stund Schifffahrt isch sehr entspannend gsi. Di bescht Entscheidig! Alli hend sich chli durmischt und me het Ziit gha zum rede. Ganz entspannt! Nach de Schifffahrt simmer uf Terasse vode Obiglocation. Die Terrasse isch direkt am Rhy und nur paar Schritt vo dete womer usem Schiff usgstiege sind. Mir hend dete so en Emfpang gha mit Virgin Caipirinha, Mozzarella/Tomate Spiessli, Olive, Gmües und Dip. Mi hend alli agstosse. D’Stimmig isch so entspannt gsi. Für de Empfang hemmer 40min iplant gha…nach 25min simmer churz abgschliche ines Gärtli, zum nomol es paar Föteli mache. D’Abigsunne het nomol alles geh und mir hend unter wahnsinns Liechterspiel no 15min Fötelis knipst. Denn simmer ine in Saal. Dekoration het no viel schönner usgseh als am Tag vorher, will etz halt no d’Kerzli brennt hend. Denn isch au scho bald de erschti Gang serviert worde. Mir hend folgendi Gäng gha:
Gemischter Salat mit gerösteten Kernen
***
Karotten-Currysuppe mit Thunfischspiess
***
Rinderfilet mir Kräuterkruste und Balsamicoglace mit frischem Marktgemüse und Kartoffelgratin
***
Dessertbuffet
S’Esse isch de OBERHAMMER gsi! Es isch vode Lüt ide höchste Tön grüehmt worde und i wett am liebste nomol zrugg zum nomol so richtig zueschlog. Am Tag selber hani nämli nie soviel chönne esse wieni gern hett welle!!!! De Mage isch eifach chliii a dem Tag. Zwüsched dä Gäng hets geh - Red vode Schwiegermama - Fotopräsentation vode beide Daddy (herrlich erfrischend die Babyföteli), und s’Ganze hemmer denn als Fotobuech übercho (sooooo schöööön) - e Fründin vo mir het bi allne Rezept gsammlet und imene Kochbuech zämägstellt *sooo Freud* - alli Gäscht hend es Fründebuech usgfüllt…dFrage voll passend zu üs und dBiiträg eifach unbeschrieblich witzig und einzigartig und auno in 100 Johr e riese Freud. - Uswertig vom Krüzworträtsel mit tolle Scherzpriisli für dGäscht – mega unterhaltsam - Spieli ICH oder DU hend GG und ich müese mache und hend – man höre und staune – 100% Übereinstimmigkeit gha. Sogar bide Froge wer besser iparkt, wer dHose ahet und so. d’Lüüt hend sooo müese Lache! - Video vo ehemalige Trainingskollege und Fründe us de Islaufszene wo uf dem Weg zur HZ gratuliert hend - Natürli Hochziitstanz…uuuh das isch schwierig mitem Kleid. Oh oh…bin recht oft zimli schäps umeghopst i üsem Jive zu „all shock up“ vom Elvis. Aber egal!
WOW, ich säg eu…soooo viel Überraschige und liebi Biiträg! Echt mega toll! Perfekt isches gsi für üs! D’Stimmig isch super gsi, dLocation sehr gediege, s’Esse usgezeichnet und noher hemmer no t
......und noher hemmer no tanzed bisam 2 (so guet das gange isch mit mim Kleid). Und denn simmer ist Hotel und mega erschöpft igschlofe.
Am Morge isch no am 09.30 de Brunch gsi. 16 Persone hend mit üs no gmüetlich zmörgelet und mir sind no bisam halb 12 hocke bliebe und hend usgiebig gschwätzt. Sowohl am Obig, als au am Morge hend dLüt bim Verabschiede de Tag mega globt und sich herzlich bedankt. S’Esse isch immer sehr useghobe worde und d’Stimmig insgesamt. Mir hend so Freud, dases bi allne so guet acho isch und das mer gmerkt het wieviel Herzbluet investiert worde isch. Mir hend super Helfer und es grandioses OK gha. Es sich echt nix id Hose! Wie chans so perfekt si?
Diin Briicht! Ich han en verschluunge! Es isch wunderschön z'lese, wiiä eue Tag gsii isch, zum Lese wiiä siich Gäscht mit euch gfroiit hend und wiiä riibigslos eue gross Tag gloffe isch!
Gratuliiärä nomol ganz herzlich und freue miich gad meega mit eu über eues grosse Fest und dä Schritt in eui gmeinsam Zuäkunft!
Dänu!!!! E soooone schöne Bricht! Hani grad es chlises Freudetränli verdrückt :-* Eue Tag tönt so persönlich, so emotional, so voller Liäbi. Was d Lüüt rund um eu gschaffe hend isch de wahnsinn, mit soviel Detailverliebtheit und so viel überleit! Wunderschön.
Gratuliere eu zwei nomal vo ganzem Härze!! und danke villmal, dass du din Tag und dini Emotione i dem Bricht mit eus teilsch!
Wow Daenu, sooooo schön di Bricht! Ha dä gad verschlunge, du hesch so schön gschriebe und würklech dr perfekt Tag gha. Freut mi riesig für euch! Gratuliere euch o ganz härzlech und hoffe, dir chöit no lang vo däm schöne Tag zehre. Da wird d Vorfreud uf die eigeti Hochzit gad no grösser
wow daenu super schöne bricht ! danke :) tönt echt nacheme hammer tag und was die lüt alles für eu gmacht händ, aso überwältigend ! du häsch wunderschön usgseh au eui deko (de hammer !) das holzchischtli, han ja etz au ganz lang gsuecht nach eim, und de het doch mis mami zwei im huus. tishdeko findi au ganz toll !
Anmelden
ahhh ich freu mi so mit dir!