Es isch jez zwar scho rund e Monet här, aber ig möchts natürlech nid versume öich vo üsem grosse Tag z brichte (28.08.2010).
Am Vorobe simer no go d Tische ider Obig-Location go dekoriere und de nou zum Cousin go Geburtstag fire (är het vorgfiret, sin 18ti heter de mit üs zäme am Samstig gfiiret). Gschlofe heimer beidi rächt guet. Mi Wecker hät de am 7ni glüte, jedoch si mini Büsis scho vorhär zum Morge-Schmuse cho. Bevori unger d Duschi bi hani no e Blick veruse gwogt. Naja.. es het no grägnet churzvorhär und dr Himmu isch trüeb u grau gsi. Ha de gfunge jänu, mache mer s beste drus, so lange mer nid grad nass wärde isch jo das glich. Am 8ti isch de Coiffeur agseit gsi und am 9ni de no schminke (isch praktisch, Coiffeuse und d Kosmetikere si grad vis-à-vis vonenand. Achliessend i dere Zit woni bim Schminke gsi bi isch mini Trouzügi ou frisier worde und när simer zäme zu ihre hei, hei dört mit trouzüg u tätschmeister no öbbis chlis gschnouset und de heimer no bau müesse pressiere mit alege u fertig zwägmache.
Chli spöter aus abgmacht (es isch haut de 10ab 11i gsi statt 11i, froue haut ) simer de bim Parkplatz vorem Kloster (mir hei im Kolstergarte üsi Fotos gmacht) ufgfahre. Es isch ganz speziell gsi wie eim aui agluegt hei woni usem Outo gstige bi, ou lüt womer nid kennt hei… Aber es isch für beidi e „WOW-Momänt“ gsi. Zu üsere überraschig simer nid s einzige Brutpaar vor ort gsi, aber das isch haub so tragisch gsi, so hetme enang no grad chönne vöu glück wünsche Mir hei de mou hie mou dört, mou eleini und mouzäme mit Trourüge u Tätschmeister die Föteli gmacht. Und schwups isch scho zit gsi dasmer in richtig Chile fahre.
Dört heimer nis de trennt. Mit Ma isch mitem Trouzüge in richtig Chile, und dr Trouzügi het mit mir ufe Göttibueb und s Gottemeitschi mit Schwöster (si Ringbuebe und Bluememetli gsi) und ufe Papi gwartet. Gloub mit Vater het o nur einisch gstralet woner mi gseh het. Är isch richtig stouz gsi!
S warte bis de Ändlech s Igangsspöu cho isch, hetmi so langsam aber sicher afo lo nävös wärde. I däm Momänt het doch tatsächlech d Sunne afo dürd Wouche düerglüssle! Di ganzi Trouuig isch wunderschön gsi. Dr Pfarrer het aues sehr härzlech gmacht und ou mou no es Witzli ibout. Dr Hammer si natürlech die 2 Soliste uf Posune und Saxophon in Begleitig vo Schalgzüg und Klavier gsi wo vor und nochem Ja-Wort gspöut hei!!! (es git mer jez no Hüenerhut weni dradänke)
Womer usecho si hetnis es grosses Spalier empfange. Zerst d Chind vom Turnverein mit Sunneblueme, Abreitskollege, Fasnachtsclique, Fründe und Bekannti. Doch bevor mer düre gsi si hetnis scho dr Atmeschutz (mi Ma isch ir Füürwehr). Si hei ihm de es Maske agleit woner nümme gseh het und s Grät mite Surstofffläsche. Ig ha ne de per Funk müesse dürene Parcour lotze… Uff .. isch aber aues guet gange. Denne isch gratuliert worde und ändlech heimer hingers Apèro chönne (ha de doch afe chli es Hüngerli gha! Während de Gruppefoto isch de noch no cho ganz fiin rägele , aber nume churz. Mitem Wätter heimer auso riiisig Glück gha.
Mir 2 si de mitemne Oldtimer-Füürwehrouto abghout worde und hei no e chlini Sprütztour gmacht bis zum Resti. Isch speziell gsi aber hammermässig! So hei mir de ou afe grad echli Zit für üs gha und di erste Idrück chönne verarbeite.
Womer im Restaurant acho si hei üsi Gäst scho mit Ballön i de Finger gha mit Chartene ungedra. Womer usgstige si het d Sunne gstrahlet und es isch richtig schön warm gsi. Mir hei de ou 2 Ballön becho wo ungernoche es Härz dranne ghanget isch. Mitenang heimerse de lo id Luft stige. Es geniaus Böud het das gä! Denne simer de is resti und us überraschig hei üsi Häuferlis e Hochzits-Zitig zämegstöut gha. Die ganzi gsöuschaft hetme de gseh ade Tische hocke u Zitig läse *hihi* Mir hei de dr Obe no so richtig gnosse, mit guet Ässe, Tanze, emne Komiker wo cho isch und ou no emne chline Spili wo aui Gäst hei chönne mitmache. Dr Krönend Abschluss isch de natürlech no s Dessert gsi mit üsere Hochzitsturte! Mhhhh!!!!
Isch u schad isch dä Tag so schnäu verbi gsi. Aber är isch absolut so gsi wiemer das gwünscht hei, we nid no vöu besser!!! Jeze heimer grad d Fotos vom Fotograf becho und chöi so nomou üse Tag lo revue passiere.
Aune wos no vorsech hei: gniesset dä Tag i voue Züg!! Är wird einmalig si!
Ich gratulier eu vo Herze zu eurer wunderschöne Hochziit. Danke vilmol für de Bricht, ha mi fasch zmitzt drin gfühlt, findi guet gschriibe . Für dZuekunft alles Gueti und falls du Föteli häsch zum dritue, wärs natürli no si-Tüpfeli .
Merci vöu mou fürd Glückwünsch! Hoffe dir heits grad so schön gha!
Wirde, sobaud igse düreglueget ha, dr link derzue uf üsi hochzits-homepage due. es het scho 2,3 schnappschüss drufe vor kollegin. üsi homepage www2.swisswedding.ch/disliundmaesi
wonderschön! ond absolut ned nor t location! ehr hend jo mole ganz schigg ond verliebt drihgseh! mega schöns chleid! ond wonderschöni reng!
i ben emmer weder erstunt öber jede stil vo de hochzit ond vom outfit, wie toll, das zom brutpaar passed! emmer anderscht ond uf jedi bruut zuegschniideret! eimalig!
Anmelden
) simer de bim Parkplatz vorem Kloster (mir hei im Kolstergarte üsi Fotos gmacht) ufgfahre. Es isch ganz speziell gsi wie eim aui agluegt hei woni usem Outo gstige bi, ou lüt womer nid kennt hei… Aber es isch für beidi e „WOW-Momänt“ gsi. Zu üsere überraschig simer nid s einzige Brutpaar vor ort gsi, aber das isch haub so tragisch gsi, so hetme enang no grad chönne vöu glück wünsche
, aber nume churz. Mitem Wätter heimer auso riiisig Glück gha.
. 
.
