Hihi so lustig, jo gäll die meiste beliebte / bekannte Sache spräche sich dänke ume. Wünsche euch uf jede Fall viel Glück und Erfolg bim Location sueche, dir findet ganz sicher öpis superschöns .

Hm komisch, aso bi mir gohts mängisch eifach mega lang bis es mi Text denn inestellt aber i de Regel gohts denn irgendwenn emol.

Am Samstig hani mi Polterobe gha und es esch eifach nur e super super super coole und schöne Obe gsi, bi immer no mit richtig viel positiver Energie glade devo !

Am 5i eschs losgange, mini TZ esch mit mir, minere andere Schwöster, enere Kollegin und minere Cousine mit em Auto losgfahre uf Aarau, am Träffpunkt händ denn die andere Ladies uf mi gwartet. Erste Programmpunkt: Poledance-Workshop für alli . S esch sooooooooo lustig gsi und mega cool und alli händ super mitgmacht, die wo gsundheitsbedingt ned händ chöne mitmache händ gfötelet und gfilmt, het suuupeerr Ufnahme gä . Mir händ denn dete no chli Apéro übercho mit Salzstängeli und Cüpli und sind eus denn nachem Workshop i mim Elterehuus wo ganz i de Nöchi esch go dusche und style für zobe. Ich ha es Trägershirt übercho wo Pink-Violett Braut drufgstande esch und alli Mädels händ öpis Violetts i ehrem Outfit gha .

Am Obe simmer denn ines meegaaaaaa schnüsigs Restaurant in Aarau, läck esch das Ässe guet gsi und die Agstellte dete sind sooo lieb gsi und händ sich so mitgfreut für mi, het mi richtig grüehrt. Zerst händ sie gmeint öper hegi Geburtstag will mini TZ e Täsche mit ganz villne Gschänkli zückt het. Denn het die einti Chällnerin gfrogt "ah wer het denn Geburtstag?" und mini Fründinne händ sie denn aber ufklärt. Wo alli andere Restaurantgäst wäg gsi sind het sie denn extra für eus d Musig uftreit und nachem Dessert esch sie cho und het gseit sie hegi i de Chuchi verzellt dass ich Polterobe hegi, die ganzi Crew möchti eus gärn e Tequila-Rundi spendiere . Soooo lieb hei, hät nie mit so öpis grächnet . Aber fange mir vorne ah. Also mir sind im Resti acho und denn het mir ebe mini TZ e Täsche gä mit ganz villne Päckli drin. Jedi vo mine Ladies het mir öpis ipackt wo symbolisch für öpis stoht wo eus verbindet und ich ha denn müesse errote vo wem weles Päckli esch. Läck esch das lustig gsi und es sind so alti Gschichte wieder fürecho, eifach e super Sach . Mir händ denn zum Astosse Cüpli gno und zum ässe händ es paar mit mir chli Rotwyy trunke. Denn ebe nach dem super guete Ässe no d Tequila-Rundi. Ich söt velecht erwähne, dass ich gar kei Schnapsnase bi und i de Regel ächt ned viel verträge, lustigerwyys beni aber de ganz Obe total fit gsi trotz für mini Verhältnis viel Alkoholkonsum und ales durenand trunke. Ha au kei Kater und nüt gha am nächschte Tag .

Nachem Resti simmer wiiter ine Bar und händ det per Zuefall grad e grosse freie Tisch gfunde, mega cool gsi hämmer alli Platz gha zum hocke. Mini best Fründnin het denn det inne es Rätsel mit mir gmacht, sie het uf Blätter Bildli drufdo wo für öpis gstande sind woni i dere Bar finde und dete a dem Platz esch denn immer e Hiwies versteckt gsi. Für jede erroteni Hiwies hani öpis übercho, zerst violette Glitzernagellack, Liedschatte, Lippestift und violetti Ohrerringli, nachhär es pinkigs Strumpfband, violetti Handschelle und Händsche und am Schluss als Krönung es Chrönli und e Zauberstab . Also bis ufs Chrönli hani vo Afang ah alles mega easy gfunde, nur wo denn ebe das Ding cho esch hani zerst dänkt hei nei ich legge keis Chrönli ah. Aber s esch so es härzigs gsi und s het wörkli ned schlimm usgseh denn hani beschlosse ach sch... drauf ich ha nur eimol Polterobe und das döf me au gseh . Mir sind denn us dere Bar use und händ no wiiter welle, denn chunt eus e andere Polterobe entgäge und mir händ mit dene nochli gschwätzt. Die händ eus denn gseit sie hege jetzt grad i die Bar welle wo mir au ufem Wäg gsi sind dezue und sie welle dete keini Polteröbe ine loh (allwäg will sie ned wänd dass me Züüg verchauft). Also hani beschlosse mis Chrönli etc. wieder abzzieh will ich ned ha welle dass mir nur wäge dem ned det ine chöne. De Türsteher het denn alli Täschene kontrolliert und het s Chrönli gseh und d Gschänkpapier und frogt so "ah wer het denn Geburtstag" und alli so uf mich zeigt "jo sie" hihihihi, aso zum 2. Mol wo öper dänkt het ich ha Geburi, emel esch es denn keis Problem gsi und mir sind inecho . Mir sind denn bis am 2 det gsi, denn händ alli Bars dicht gmacht und de grösst Teil vo de Mädelsgruppe esch denn hei will sie no rächt wiit händ müesse heifahre und alli au no chlini Kids deheime händ.

Mini TZ und mini bescht Fründin sind denn mit mir no 1 Stund go tanze und dank mim Brut-Shirt und eme nätte Türsteher beni dete sogar no gratis inecho . Am 4ri beni denn öpe im Bett gsi und eifach total happy vo dem mega coole schöne Obe, s händ alli so super mitgmacht und d Stimmig esch so guet gsi . S het eifach richtig guet do und s het i mir inne irgendwie total öpis glöst. All de Stress vo de letschte Wuche esch wäg gsi und ändlich hani gmerkt wie fest ich mi uf d Hochzyyt freue, vor luter organisiere esch das irgendwie total vergrabe gsi. Aber a dem Obe hani gmerkt doch es esch genau das woni wot und plötzli beni glich e Brut mit Härzli i de Auge worde

jö eve, danke für de tolli bricht! toll dass du so e schöne obe hesch dörfe erläbe! ich findes wunderbar, dass du dine stress hesch chönne abbaue und dini freud jetzt wieder platz hed!

so es erläbnis chönnti au guet bruuche, im momänt magi überhaupt nümm...